Markaziy bank patentlari egalari operatsiyalarini kengaytirish chora-tadbirlari toʻgʻrisida (413-son)

20.10.1995

Oʻzbekiston Respublikasi Vazirlar Mahkamasining

qarori

Respublika isteʼmol bozorini yanada toʻldirish, xususiy tadbirkorlikni rivojlantirishni ragʻbatlantirish va milliy valyutaning ichki almashinuvchanligini kengaytirish maqsadida Vazirlar Mahkamasi qaror qiladi:

1. Belgilab qoʻyilsinki, 1995-yil 1-noyabrdan boshlab Oʻzbekiston Respublikasi Markaziy banki patentlarini yuridik va jismoniy shaxslarga berish, shuningdek, patent egalariga soʻmlarni vakil qilingan banklar orqali erkin muomaladagi valyutaga almashtirish ular tomonidan respublikaga keltiriladigan tovarlar turlariga bogʻliq boʻlmagan holda amalga oshiriladi. Vazirlar Mahkamasining 1995-yil 25-iyuldagi 287-son qarori bilan belgilangan roʻyxatga muvofiq Oʻzbekiston Respublikasiga import qilish (keltirish) taqiqlangan yoki zarur litsenziyalarsiz yoxud ruxsatnomalarsiz keltirilgan buyumlar bundan mustasno.

2. Oʻzbekiston Respublikasi Markaziy banki, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari patent egalari sonini keskin koʻpaytirish va ularning respublikaga keltirilgan tovarlarni aholiga sotishdan olingan soʻmlardagi tushumlari oʻz vaqtida almashtirib berilishini taʼminlasinlar.

3. Vazirlar Mahkamasining 1994-yil 23-noyabrdagi 566-son qarori bilan tasdiqlangan, import qilinishi respublika valyuta bozorida imtiyozli almashtirish huquqini beruvchi oziq-ovqat va nooziq-ovqat tovarlar roʻyxati (2, 3-roʻyxatlar), Vazirlar Mahkamasining 1995-yil 23-martdagi 94-son qarorining 1 va 2-bandlari, shuningdek, Vazirlar Mahkamasining 1995-yil 19-apreldagi 135-son qaroriga 2-ilova oʻz kuchini yoʻqotgan deb hisoblansin.

4. Markaziy bank bir hafta muddatda oʻzining meʼyoriy hujjatlarini ushbu qarorga muvofiqlashtirsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari B.S. Hamidov, M.Z. Usmonov va Markaziy bank Boshqaruvi raisi F.M. Mullajonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1995-yil 20-oktabr,

413-son