Oliy taʼlim muassasalari reytingini aniqlash tartibini takomillashtirish chora-tadbirlari toʻgʻrisida (467-son)

07.06.2019

Oʻzbekiston Respublikasi Vazirlar Mahkamasining

qarori

Respublika oliy taʼlim muassasalari reytingini aniqlash tartibini yanada takomillashtirish maqsadida Vazirlar Mahkamasi qaror qiladi:

1. Oliy taʼlim muassasalari reytingini aniqlash tartibi toʻgʻrisidagi nizom ilovaga muvofiq tasdiqlansin.

2. Oliy taʼlim muassasalari reytingini (keyingi oʻrinlarda reyting deb ataladi) aniqlashda quyidagilar Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasining asosiy vazifalari etib belgilansin:

oliy taʼlim muassasalarining ilmiy-pedagogik faoliyati darajasi, oʻquv-metodik ishlar, taʼlim sifati, talabalar va bitiruvchilar bilimini tavsiflovchi maʼlumotlar bazasini tizimli shakllantirish hamda ularni reyting indikatorlariga muvofiq baholash asosida har yili respublika oliy taʼlim muassasalari reytingini tuzish;

jahondagi yetakchi reyting tashkilotlari bilan hamkorlik qilish va milliy oliy taʼlim muassasalarining dunyodagi nufuzli oliy taʼlim muassasalari reytingiga kirishida amaliy yordam koʻrsatish;

reyting natijalari asosida respublika oliy taʼlim muassasalari faoliyati toʻgʻrisida tahliliy axborotni tayyorlash va uni oliy taʼlim muassasalarida taʼlim sifatini oshirishga qaratilgan aniq takliflar bilan birgalikda Oʻzbekiston Respublikasi Vazirlar Mahkamasiga kiritish;

har yili reyting natijalarini keyingi oʻquv yili boshlanishidan kechiktirmay Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasining rasmiy veb-saytida eʼlon qilish va ommaviy axborot vositalarida keng yoritib borish;

ilgʻor xalqaro tajriba asosida va oliy taʼlimni rivojlantirishning ustuvor yoʻnalishlarini hisobga olgan holda reyting tuzilmasiga zarur oʻzgartirish va qoʻshimchalar kiritish boʻyicha Oʻzbekiston Respublikasi Vazirlar Mahkamasiga takliflar kiritish.

3. Belgilab qoʻyilsinki:

tegishli vazirliklar va idoralarning masʼul tarkibiy boʻlinmalari hamda oliy taʼlim muassasalarining taʼlim sifatini nazorat qilish boʻlimlari tomonidan reytingni aniqlashga doir maʼlumotlar toʻplanadi, tahlil qilinadi hamda har yili 1-fevralga qadar Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasiga taqdim etiladi;

Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasiga kiritilayotgan reytingni aniqlashga doir maʼlumotlarning asoslanganligi, ishonchliligi va belgilangan muddatda taqdim etilishi uchun maʼlumotni kiritayotgan vazirliklar va idoralar hamda oliy taʼlim muassasalarining birinchi rahbariga shaxsiy javobgarlik yuklatiladi;

reyting natijalarini hisoblash Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi hamda Oʻzbekiston Respublikasi Oliy va oʻrta maxsus taʼlim vazirligining qoʻshma qarori bilan tasdiqlanadigan oliy taʼlim muassasalari reytingini hisoblash metodikasi asosida amalga oshiriladi.

4. Vazirlar Mahkamasining “Respublika oliy taʼlim muassasalari reytingini baholash tizimini joriy etish toʻgʻrisida” 2012-yil 29-dekabrdagi 371-son qarori (Oʻzbekiston Respublikasi QHT, 2013-y., 1-son, 10-modda) oʻz kuchini yoʻqotgan deb hisoblansin.

5. Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi boshqa manfaatdor vazirliklar va idoralar bilan birgalikda bir oy muddatda ular qabul qilgan normativ-huquqiy hujjatlarni ushbu qarorga muvofiqlashtirsin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov, Vazirlar Mahkamasi huzuridagi Taʼlim sifatini nazorat qilish davlat inspeksiyasi boshligʻi U.N. Tashkenbayev hamda oliy va oʻrta maxsus taʼlim vaziri I.U. Madjidov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 7-iyun,

467-son

Vazirlar Mahkamasining 2019-yil 7-iyundagi 467-son qaroriga ILOVA

Oliy taʼlim muassasalari reytingini aniqlash tartibi toʻgʻrisida

NIZOM

1-bob. Umumiy qoidalar

1. Ushbu Nizom oliy taʼlim muassasalari reytingini (keyingi oʻrinlarda reyting deb ataladi) aniqlash tartibini belgilaydi.

2. Ushbu Nizom talablari Oʻzbekiston Respublikasida faoliyat yuritayotgan xorijiy oliy taʼlim muassasalariga nisbatan tatbiq etilmaydi.

3. Oliy taʼlim muassasalari reytingi Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi (keyingi oʻrinlarda Davlat inspeksiyasi deb ataladi) tomonidan har yili xolislik, oshkoralik va adolat tamoyillariga amal qilingan holda aniqlanadi.

4. Oliy taʼlim muassasalari reytingini aniqlashni tashkil etish ushbu Nizomga 1-ilovada keltirilgan sxemaga muvofiq amalga oshiriladi.

2-bob. Reytingni aniqlashning maqsad va vazifalari

5. Oliy taʼlim muassasalari orasida sogʻlom raqobat muhitini shakllantirish, ularning ilmiy-pedagogik faoliyati darajasi va sifatini oshirishni ragʻbatlantirish, professor-oʻqituvchilarning ilmiy salohiyatidan samarali foydalanish, oʻqitish sifati boʻyicha xalqaro mezon va standartlarga muvofiq yuqori koʻrsatkichlarga erishishga hamda iqtisodiyotning real sektori tarmoqlari uchun yuqori malakali kadrlarni tayyorlashga zamin yaratish reytingni aniqlashning maqsadi hisoblanadi.

6. Quyidagilar reytingni aniqlashning vazifalari hisoblanadi:

oliy taʼlimni muntazam takomillashtirib borish asosida mehnat bozorida talab yuqori boʻlgan malakali kadrlarni tayyorlash;

oliy taʼlim muassasalarida koʻrsatilayotgan taʼlim xizmatlari sifati, ulardagi ilmiy va oʻquv-tarbiya jarayonlari hamda imkoniyatlar haqida taʼlimni boshqarish boʻyicha vakolatli organlar, kadrlar buyurtmachilari va keng jamoatchilikni xolis axborotlar bilan taʼminlash;

oliy taʼlim muassasalarining dunyodagi reytingi yuqori boʻlgan oliy taʼlim muassasalari bilan hamkorligini taʼminlash hamda ularning xalqaro standartlarga muvofiq yuqori koʻrsatkichlarga erishishiga koʻmaklashish;

milliy reyting tizimida yuqori koʻrsatkichlarni qayd etgan oliy taʼlim muassasalarining dunyodagi nufuzli 500 talikka kiruvchi oliy taʼlim muassasalari roʻyxatiga kirishi uchun zarur chora-tadbirlarni bosqichma-bosqich amalga oshirish.

3-bob. Reytingni aniqlashga oid maʼlumotlar bazasini shakllantirish

7. Reytingni aniqlashga oid maʼlumotlar bazasini shakllantirish Davlat inspeksiyasi tomonidan hisobot yilidan keyingi yilning birinchi choragida amalga oshiriladi.

8. Davlat inspeksiyasi tomonidan maʼlumotlar bazasini shakllantirish maqsadida tegishli namunadagi jadvallar ishlab chiqiladi va reyting aniqlanayotgan yilning 20-dekabriga qadar tizimida oliy taʼlim muassasalari boʻlgan vazirliklar va idoralarga hamda oliy taʼlim muassasalariga yetkaziladi.

9. Vazirliklar va idoralar hamda oliy taʼlim muassasalari tomonidan reytingni aniqlashga oid maʼlumotlar asoslovchi hujjatlari bilan birgalikda 1-fevralga qadar Davlat inspeksiyasiga taqdim etiladi.

Asoslovchi hujjatlar taqdim etilmagan taqdirda, maʼlumotlar reytingni hisoblashda inobatga olinmaydi.

10. Reytingni aniqlashga oid maʼlumotlarning ishonchliligini taʼminlash maqsadida Davlat inspeksiyasi tomonidan ushbu maʼlumotlar 1-aprelga qadar tahlil qilinadi va dastlabki oʻrganilgan maʼlumotlar tanishib chiqish va tasdiqlash uchun 10-aprelga qadar oliy taʼlim muassasalariga yuboriladi.

11. Reytingni aniqlashga oid maʼlumotlar oliy taʼlim muassasalari rektori imzosi bilan tasdiqlangan holda 1-mayga qadar Davlat inspeksiyasiga taqdim etiladi. Qoʻshimcha kiritiladigan reytingni aniqlashga oid maʼlumotlar asoslovchi hujjatlar bilan birga taqdim etilganda hisobga olinadi.

Reytingni aniqlashga oid maʼlumotlar Davlat inspeksiyasiga elektron shaklda ham taqdim etilishi mumkin.

12. Reytingni aniqlashga oid maʼlumotlar bazasini shakllantirish uchun:

oliy taʼlim muassasalarida ilmiy-tadqiqot ishlariga yoʻnaltirilgan xorijiy grantlar va xorijiy jamgʻarmalar mablagʻlari, sohalar boʻyicha buyurtmalar asosida oʻtkazilgan ilmiy (ilmiy-ijodiy) tadqiqot natijasida olingan mablagʻlar hamda davlat grantlari doirasida oʻtkazilgan tadqiqotlardan olingan mablagʻlar toʻgʻrisidagi maʼlumotlar — Oʻzbekiston Respublikasi Innovatsion rivojlanish vazirligi tomonidan;

oliy taʼlim muassasalari bitiruvchilarining ishga joylashganligi toʻgʻrisidagi maʼlumotlar — Oʻzbekiston Respublikasi Milliy statistika qoʻmitasi tomonidan;

fan nomzodi, falsafa doktori (PhD) va fan doktori, fan doktori (DSc) ilmiy darajalariga hamda ilmiy darajaga ega boʻlmay dotsent yoki professor ilmiy unvonlariga tasdiqlangan oliy taʼlim muassasalari professor-oʻqituvchilari tomonidan himoya qilingan dissertatsiyalar toʻgʻrisidagi maʼlumotlar — Oʻzbekiston Respublikasi Vazirlar Mahkamasi huzuridagi Oliy attestatsiya komissiyasi tomonidan;

oliy taʼlim muassasalari va ularda faoliyat olib borayotgan professor-oʻqituvchilarga tegishli ixtiro, foydali model, sanoat namunalari va seleksiya yutuqlari uchun olingan patentlar, axborot-kommunikatsiya texnologiyalari uchun dasturlar va maʼlumotlar bazalari uchun olingan guvohnomalar, mualliflik huquqi bilan himoya qilinadigan turli boshqa materiallar toʻgʻrisidagi maʼlumotlar — Oʻzbekiston Respublikasi Adliya vazirligi tomonidan Davlat inspeksiyasiga taqdim etiladi.

4-bob. Reytingni aniqlashga oid soʻrovnomalar va nazorat ishlarini oʻtkazish

13. Reytingni aniqlash jarayonida Davlat inspeksiyasi tomonidan har yili may-iyun oylarida:

professor-oʻqituvchilarning xorijiy til va axborot-kommunikatsiya texnologiyalariga oid bilim darajasini aniqlash maqsadida test sinovlari;

talabalarning mutaxassislik fanlariga oid bilim darajasini aniqlash maqsadida nazorat ishlari (test sinovlari) va oliy taʼlim muassasalarida taʼlim sifatini oʻrganish yuzasidan soʻrovnoma oʻtkaziladi.

Davlat inspeksiyasiga nazorat ishlari va soʻrovnomalarni tashkil etish va oʻtkazishda oliy taʼlim muassasalarining taʼlim sifatini nazorat qilish boʻlimlari koʻmaklashadi.

14. Soʻrovnomani oʻtkazish nazorat ishlari boshlanishidan oldin tashkil etiladi. Soʻrovnoma quyidagi toʻrtta qismdan iborat boʻladi:

taʼlim olish uchun yaratilgan sharoitlar;

darslar sifati;

talabalar bilimining xolisona baholanishi;

oliy taʼlim muassasasidagi ijtimoiy-maʼnaviy muhit.

15. Nazorat ishlari tanlash asosida belgilangan bakalavriat taʼlim yoʻnalish (magistratura mutaxassislik)larining talabalari uchun mutaxassislik fanlaridan oʻtkaziladi.

Nazorat ishlari oʻtkaziladigan bakalavriat taʼlim yoʻnalish (magistratura mutaxassislik)lari va fanlar roʻyxati nazorat qilish muddatidan kamida bir oy oldin Davlat inspeksiyasining rasmiy veb-saytida eʼlon qilinadi.

16. Oliy taʼlim muassasalarining asosiy shtatida faoliyat yuritadigan professor-oʻqituvchilar “Xorijiy til” va “Axborot-kommunikatsiya texnologiyalari” fanlaridan test sinovlari topshiradilar.

17. Test topshiriqlari:

a) professor-oʻqituvchilar uchun:

“Xorijiy til” fani boʻyicha — 20 ta;

“Axborot-kommunikatsiya texnologiyalari” fani boʻyicha — 20 ta;

b) talabalar uchun ikkita mutaxassislik fanidan — 20 tadan jami 40 ta savoldan iborat boʻladi.

18. Test sinovlarida har bir test savoli uchun 2 daqiqadan, jami 80 daqiqa vaqt beriladi. Har bir toʻgʻri bajarilgan test savoli 2,5 ball bilan baholanadi.

19. Nazorat ishlari oʻtkaziladigan talabalar guruhlari Davlat inspeksiyasi tomonidan aniqlanadi va nazorat ishlari oʻtkazilishidan kamida uch kun oldin oliy taʼlim muassasalariga maʼlum qilinadi.

Soʻrovnoma va nazorat ishlarida tanlangan bakalavriat taʼlim yoʻnalish (magistratura mutaxassislik)lari talabalarining kamida 30 foizi ishtirok etishi shart.

Soʻrovnoma va nazorat ishlari har oʻquv yili oxirida oʻtkaziladi.

20. Oʻzbekiston Respublikasi Bandlik va mehnat munosabatlari vazirligi tomonidan Davlat inspeksiyasi bilan hamkorlikda oliy taʼlim muassasalari bitiruvchilarining bilimi, malaka va koʻnikmalarini aniqlash maqsadida ish beruvchilar oʻrtasida soʻrovnoma oʻtkaziladi. Soʻrovnoma savollari Davlat inspeksiyasi tomonidan tuziladi.

Soʻrovnoma natijalari Davlat inspeksiyasi tomonidan tahlil qilinadi va reytingni aniqlashda hisobga olinadi.

5-bob. Reyting natijalarini hisoblash va eʼlon qilish

21. Reytingni aniqlashga oid toʻplangan maʼlumotlar, oʻtkazilgan soʻrovnomalar va nazorat ishlari natijalari asosida Davlat inspeksiyasi tomonidan oliy taʼlim muassasalari reytingi aniqlanadi.

Reyting ballarini hisoblash ushbu Nizomga 2-ilovada keltirilgan oliy taʼlim muassasalari reytingini aniqlash mezonlari asosida amalga oshiriladi.

22. Reyting indikatorlari uchun ballarni hisoblash quyidagicha amalga oshiriladi:

tegishli reyting indikatori boʻyicha eng katta koʻrsatkichga ega oliy taʼlim muassasalari aniqlanadi;

eng katta koʻrsatkichga ega boʻlgan oliy taʼlim muassasalariga shu indikator uchun belgilangan eng yuqori ball beriladi;

boshqa barcha oliy taʼlim muassasalarining ballari shu indikator boʻyicha eng yuqori ballga ega boʻlgan oliy taʼlim muassasalarining koʻrsatkichiga nisbatan hisoblanadi;

har bir indikator boʻyicha hisoblangan ballar yigʻindisi oliy taʼlim muassasalari reytingini belgilaydi.

23. Reyting natijalari har yili keyingi oʻquv yili boshlanishidan kechikmay Davlat inspeksiyasining rasmiy veb-saytida eʼlon qilinadi va ommaviy axborot vositalarida keng yoritiladi.

24. Reytingni aniqlashga oid maʼlumotlar Davlat inspeksiyasida 5 yil davomida saqlanadi.

6-bob. Yakunlovchi qoidalar

25. Ushbu Nizomni qoʻllashda yuzaga keladigan nizolar qonunchilik hujjatlarida belgilangan tartibda hal etiladi.

26. Ushbu Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javob beradilar.

Oliy taʼlim muassasalari reytingini aniqlash tartibi toʻgʻrisidagi nizomga 1-ILOVA

Oliy taʼlim muassasalari reytingini aniqlash

SXEMASI

Bosqich Masʼullar Chora-tadbirlar Bajarish muddatlari 1-bosqich Taʼlim sifatini nazorat qilish davlat inspeksiyasi Reytingni aniqlashga oid maʼlumotlar bazasini shakllantirish maqsadida tegishli jadvallar ishlab chiqiladi va tizimida oliy taʼlim muassasalari boʻlgan vazirliklar va idoralar hamda oliy taʼlim muassasalariga yetkaziladi. oliy taʼlim muassasalari faoliyati oʻrganilayotgan (reytingi aniqlanayotgan) yilning 20-dekabriga qadar 2-bosqich Vazirliklar va idoralar hamda oliy taʼlim muassasalari Reytingni aniqlashga oid maʼlumotlar asoslovchi hujjatlari bilan birgalikda Davlat inspeksiyasiga taqdim etiladi. har yili 1-fevralga qadar 3-bosqich Taʼlim sifatini nazorat qilish davlat inspeksiyasi, sohalar boʻyicha jalb qilinadigan mutaxassis-ekspertlar Reytingni aniqlashga oid maʼlumotlarning ishonchliligini taʼminlash maqsadida ular tahlil qilinadi (oʻrganib chiqiladi). har yili 1-aprelga qadar 4-bosqich Taʼlim sifatini nazorat qilish davlat inspeksiyasi Oʻrganilgan maʼlumotlar tanishib chiqish va tasdiqlash uchun oliy taʼlim muassasalariga yuboriladi. har yili 10-aprelga qadar 5-bosqich Oliy taʼlim muassasalari rektorlari, Taʼlim sifatini nazorat qilish boʻlimlari Reytingni aniqlashga oid maʼlumotlar tasdiqlangan holda Davlat inspeksiyasiga taqdim etiladi. har yili 1-mayga qadar 6-bosqich Taʼlim sifatini nazorat qilish davlat inspeksiyasi, oliy taʼlim muassasalarining taʼlim sifatini nazorat qilish boʻlimlari Reytingni aniqlash jarayonida: 1. Professor-oʻqituvchilarning xorijiy til va axborot-kommunikatsiya texnologiyalariga oid bilim darajasini aniqlash maqsadida test sinovlari oʻtkaziladi. 2. Talabalarning mutaxassislik fanlariga oid bilim darajasini aniqlash maqsadida nazorat ishlari (test sinovlari) va oliy taʼlim muassasalaridagi taʼlim sifatini oʻrganish yuzasidan soʻrovnoma oʻtkaziladi. har yili may-iyun oylarida 7-bosqich Oʻzbekiston Respublikasi Bandlik va mehnat munosabatlari vazirligi, Taʼlim sifatini nazorat qilish davlat inspeksiyasi Oliy taʼlim muassasalari bitiruvchilarining bilimi, malaka va koʻnikmalarini aniqlash maqsadida ish beruvchilar oʻrtasida soʻrovnoma oʻtkaziladi. har yili 20-iyulga qadar 8-bosqich Taʼlim sifatini nazorat qilish davlat inspeksiyasi Reytingni aniqlashga oid toʻplangan maʼlumotlar, oʻtkazilgan soʻrovnomalar va nazorat ishlari natijalari asosida oliy taʼlim muassasalarining reyting ballari hisoblanadi. har yili 20 — 30-iyulda 9-bosqich Taʼlim sifatini nazorat qilish davlat inspeksiyasi Hisoblangan reyting ballari asosida oliy taʼlim muassasalarining reytingi tuziladi. har yili 1-avgustga qadar 10-bosqich Taʼlim sifatini nazorat qilish davlat inspeksiyasi, ommaviy axborot vositalari Reyting natijalari Davlat inspeksiyasining veb-saytida eʼlon qilinadi va ommaviy axborot vositalarida keng yoritiladi. har yili keyingi oʻquv yili boshlanishidan kechiktirmay

Oliy taʼlim muassasalari reytingini aniqlash tartibi toʻgʻrisidagi nizomga 2-ILOVA

Oliy taʼlim muassasalari reytingini aniqlash

MEZONLARI

T/r Reyting indikatorlari Ball JAMI: 100 I. Professor-oʻqituvchilarning ilmiy faoliyati 40 1. Dunyoning nufuzli 1000 taligiga kiruvchi oliy taʼlim muassasalarida fan nomzodi, falsafa doktori (PhD) va fan doktori, fan doktori (DSc) ilmiy darajasini olgan professor-oʻqituvchilar ulushi (asosiy shtatdagi professor-oʻqituvchilarning umumiy soniga nisbatan foiz hisobida) 3 2. Reytingni aniqlash yilida dunyoning nufuzli 1000 taligiga kiruvchi oliy taʼlim muassasalarida oʻquv mashgʻulotlari (maʼruzalar, amaliy mashgʻulotlar, seminar-treninglar) oʻtkazgan professor-oʻqituvchilar ulushi (asosiy shtatdagi professor-oʻqituvchilarning umumiy soniga nisbatan foiz hisobida) 2 3. Professor-oʻqituvchilarning ilmiy salohiyati (asosiy shtatdagilar boʻyicha foizda), shu jumladan: 3 a) fan doktori, fan doktori (DSc) ilmiy darajasiga ega (shuningdek, ilmiy darajaga ega boʻlmay professor ilmiy unvonini olgan yoki unga tenglashtirilgan) professor-oʻqituvchilar ulushi 2 b) fan nomzodi, falsafa doktori (PhD) ilmiy darajasiga ega (shuningdek, ilmiy darajaga ega boʻlmay dotsent ilmiy unvonini olgan yoki unga tenglashtirilgan) professor-oʻqituvchilar ulushi 1 4. Professor-oʻqituvchilar tomonidan himoya qilingan doktorlik (PhD va DSc) dissertatsiyalari soni 6 5. Xalqaro koʻrsatkichlarga koʻra oliy taʼlim muassasalari professor-oʻqituvchilari nashrlariga iqtiboslar (“Web of Science”, “Scopus” va “Google Scholar” bazalari boʻyicha, soʻnggi 5 yilda) 9 6. Reytingni aniqlash yilida xalqaro ilmiy jurnallarda va mahalliy ilmiy nashrlarda (“Web of Science”, “Scopus” bazasiga va Vazirlar Mahkamasi huzuridagi Oliy attestatsiya komissiyasi roʻyxatiga kiritilgan jurnallarda) chop etilgan maqolalar (bir nafar professor-oʻqituvchi hisobiga), shu jumladan: 5 a) xalqaro jurnallardagi ilmiy maqolalar 3 b) respublika ilmiy jurnallaridagi ilmiy maqolalar 2 7. Oliy taʼlim muassasasida ilmiy-tadqiqot faoliyati va ilmiy-tadqiqot natijalarini amaliyotga taqdim etish asosida olingan mablagʻlar hajmi yoki boshqa nomoddiy koʻrsatkichlar (ijtimoiy samaradorlik) (bir nafar professor-oʻqituvchiga toʻgʻri keladigan), shu jumladan: 4 a) xorijiy ilmiy-tadqiqot markazlari grantlari va xorijiy ilmiy fondlar buyurtmalari hisobiga olingan mablagʻlar (bir nafar professor-oʻqituvchiga toʻgʻri keladigan mablagʻ) 2 b) sohalar buyurtmalari asosida oʻtkazilgan ilmiy-tadqiqot (ilmiy-ijodiy) faoliyatidan olingan moliyaviy mablagʻlar (bir nafar professor-oʻqituvchiga toʻgʻri keladigan mablagʻ) 1 v) davlat grantlari asosida oʻtkazilgan ilmiy tadqiqotlardan olingan mablagʻlar (bir nafar professor-oʻqituvchiga toʻgʻri keladigan mablagʻ) 1 8. Professor-oʻqituvchilarning bilim darajasi, shu jumladan: 4 a) xorijiy tillar boʻyicha 2 b) axborot-kommunikatsiya texnologiyalari boʻyicha 2 9. Reytingi aniqlanayotgan yilda bajarilgan ilmiy-tadqiqot ishlarining samaradorligi, shu jumladan: 4 a) chop etilgan monografiyalar soni 2 b) ixtiro, foydali model, sanoat namunalari va seleksiya yutuqlari uchun olingan patentlar (tegishli tashkilotlar tomonidan tasdiqlangan hujjatlar asosida) 1 v) axborot-kommunikatsiya texnologiyalariga oid dasturlar va elektron maʼlumotlar bazalari uchun olingan guvohnomalar, mualliflik huquqi bilan himoya qilinadigan turli materiallar 1 II. Oʻquv-metodik ishlar va oʻqitish sifati 30 10. Oliy taʼlim muassasalarida taʼlim berish sifati darajasi va ijtimoiy-maʼnaviy muhit (talabalar oʻrtasida oʻtkaziladigan soʻrovnoma natijalari asosida), shu jumladan: 7 a) taʼlim olish uchun yaratilgan sharoitlar 2 b) darslarning sifati 2 v) talabalar bilimining xolisona baholanishi 1 g) taʼlim muassasasidagi ijtimoiy-maʼnaviy muhit 2 11. Hisobot yilida oliy taʼlim muassasasi professor-oʻqituvchilari tomonidan yozib tayyorlangan va belgilangan tartibda roʻyxatdan oʻtkazilgan darsliklar va oʻquv qoʻllanmalari, shu jumladan: 8 a) darsliklar 6 b) oʻquv qoʻllanmalari 2 12. Reyting aniqlanayotgan yilda xorijiy professor-oʻqituvchilar va talabalar ulushi (tegishli ravishda umumiy songa nisbatan foizda), shu jumladan: 7 a) xorijiy professor-oʻqituvchilar 3 b) xorijiy talabalar 4 13. Hisobot yilida xorijiy oliy taʼlim muassasalari bilan almashuv dasturlari, konferensiyalar, ilmiy yoki oʻquv loyihalarida oʻqituvchilar va talabalarning ishtirok etganligi, shu jumladan: 5 a) akademik almashuv (talabalar tomonidan) 3 b) xalqaro konferensiyalar, seminarlar, ilmiy yoki oʻquv loyihalarida talabalar va professor-oʻqituvchilarning ishtiroki 2 14. Taʼlim yoʻnalishlari (mutaxassisliklari) boʻyicha xorijiy tilda oʻqitiladigan fanlar salmogʻi (mutaxassislik fanlarining jami soniga nisbatan foizda) 3 III. Talabalar bilimi va bitiruvchilar sifati 27 15. Talabalarning bilim darajasi (nazorat ishlari natijalari asosida) 8 16. Bitiruvchilarning ishga joylashish darajasi (bitirganidan soʻng 6 oy ichida) 8 17. Oliy taʼlim muassasalari bitiruvchilari bilim va koʻnikmalari sifati haqida ish beruvchilarning bahosi (soʻrovnoma asosida aniqlanadi) 8 18. Reyting yilida xalqaro va respublika olimpiadalarida, nufuzli tanlovlar va sport musobaqalarida sovrinli oʻrinlarni qoʻlga kiritgan hamda mukofot (diplom)larga sazovor boʻlgan talabalar salmogʻi, shu jumladan: 3 a) xalqaro miqyosda 2 b) respublika miqyosida 1 IV. Jismoniy tarbiya va sportni rivojlantirish boʻyicha faoliyati 3 19. Sport klubi va seksiyalariga aʼzo boʻlib,sport bilan muntazam shugʻullanuvchi hamda sport tasnifiga (razryadga) ega boʻlgan talabalar soni 2 20. Jismoniy tarbiya va sportni rivojlantirish boʻyicha moddiy-texnik bazaning holati, sport infratuzilmasining mavjudligi va jihozlanish darajasi 1