Shakar xom ashyosi xarid qilishni tashkil etish chora-tadbirlari toʻgʻrisida (44-son)

01.02.2002

Oʻzbekiston Respublikasi Vazirlar Mahkamasining

qarori

Shakar xomashyosi barqaror olib kelinishini taʼminlash va shu asosda Hazorasp shakar zavodining ishlab chiqarish quvvatlarini yanada toʻlaroq oʻzlashtirish maqsadida Vazirlar Mahkamasi qaror qiladi:

1. Vazirlar Mahkamasining Isteʼmol tovarlari ishlab chiqarish va savdo kompleksi hamda “Oziqovqatsanoat” uyushmasining shakar xomashyosini xarid qilishga oid takliflarni tanlab olish boʻyicha maxsus guruh tuzish toʻgʻrisidagi taklifi qabul qilinsin.

2. Quyidagilar:

shakar xomashyosini xarid qilishga oid takliflarni tanlab olish boʻyicha maxsus guruh tarkibi 1-ilovaga* muvofiq;

*1-ilova berilmaydi.

shakar xomashyosini import qilishda takliflarni mahsulot yetkazib berish shartlari boʻyicha tanlab olish tartibi toʻgʻrisidagi nizom2-ilovaga muvofiq tasdiqlansin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari M.Z. Usmonov zimmasiga yuklansin.

Oʻzbekiston Respublikasining Bosh vaziri Oʻ. SULTONOV

Toshkent sh.,

2002-yil 1-fevral,

44-son

Vazirlar Mahkamasining 2002-yil 1-fevraldagi 44-son qaroriga 2-ILOVA

Shakar xomashyosini import qilishda takliflarni mahsulot yetkazib berish shartlari boʻyicha tanlab olish tartibi toʻgʻrisida

N I Z O M

I. UMUMIY QOIDALAR

1. Mazkur Nizom shakar xomashyosini import qilishda takliflarni mahsulot narxi, sifati va yetkazib berishning boshqa shartlari boʻyicha tanlab olish (keyingi oʻrinlarda — tanlov deb ataladi) mexanizmini belgilab beradi.

2. Quyidagilar tanlov oʻtkazishning maqsadi hisoblanadi:

yuqori sifatli shakar xomashyosini jahon narxlari konʼyunkturasi, xomashyo sifati, yetkazib berish shartlaridan kelib chiqib eng maqbul narxlar boʻyicha xarid qilish;

shakar xomashyosini xarid qilishga yoʻnaltirilayotgan markazlashtirilgan valyuta mablagʻlaridan foydalanish samarasini oshirish.

3. Tanlovning barcha ishtirokchilari uchun bir xil raqobat shartlarining yaratilishi, oshkoralik, baholashning xolisligi va talablarning yagonaligi tanlov oʻtkazishni tashkil etishning asosiy prinsiplari hisoblanadi.

4. Tanlov faqat ijtimoiy ahamiyatga ega oziq-ovqat mahsulotlarini ishlab chiqarish va taqsimlashning tasdiqlangan balanslarida belgilangan import boʻyicha xarid qilish hamda xarid qilishni mablagʻ bilan taʼminlashning Oʻzbekiston Respublikasi Vazirlar Mahkamasi bilan kelishilgan manbalari mavjud boʻlgan hajmlari doirasida oʻtkazilishi mumkin.

II. TAKLIFLAR TANLOVINI OʻTKAZIShNI TAShKIL ETISh

5. Tanlov mazkur qaror bilan tasdiqlangan Maxsus guruh (keyingi oʻrinlarda — Maxsus guruh) tomonidan oʻtkaziladi.

6. Maxsus guruh rahbari guruh ishini tashkil etadi, zarurat boʻlganda tushgan takliflarni baholash uchun ekspert va maslahatchi tashkilotlarning vakillari (Tovar bozorlari konʼyunkturasini oʻrganish respublika markazi, konsalting firmalarining mutaxassislari)ni jalb etish yuzasidan qaror qabul qiladi. Jalb etilgan mutaxassislarning tavsiyalari Maxsus guruhning protokolida aks ettiriladi.

7. Maxsus guruh tanlov oʻtkazishni amaliy jihatdan (tanlovni oʻtkazishga tayyorgarlik koʻrish va mahsulot yetkazib beruvchilarga taklifnomalarni joʻnatish, tushayotgan takliflarni ekspert baholash, hujjatlarni rasmiylashtirish) tashkil etadi.

Tanlovni tashkil etish va oʻtkazish bilan bogʻliq xarajatlar, ekspert va maslahatchi tashkilotlar, shuningdek shartnoma asosida jalb etilgan mutaxassislarning xizmatlariga haq, shu jumladan shakar xomashyosini tanlab olish bilan bogʻliq safar xarajatlari Oʻzbekiston Respublikasidagi shakar xomashyosini import qiluvchi tomonidan tanlov gʻolibidan olingan vositachilik mukofoti mablagʻlari hisobidan toʻlanadi.

8. Tanlovni oʻtkazishda Maxsus guruh:

tanlov oʻtkaziladigan sana toʻgʻrisida qaror qabul qiladi;

tanlov oʻtkaziladigan sanagacha tanlovda ishtirok etish uchun joʻnatilgan barcha taklifnomalarga va xorijiy mahsulot yetkazib beruvchilardan tushgan barcha takliflarga oid maʼlumotlarni, shuningdek mazkur mahsulot yetkazib beruvchilar toʻgʻrisidagi maʼlumotlarni yigʻadi;

tanlov mezonlari koʻrsatilgan hujjatlar ishlab chiqilishini tashkil etadi;

taklifnomalarning aniq daʼvogarlar nomiga pochta, telefaks orqali yoki boshqa rasmiy taklifnomalar shaklida joʻnatilishini tashkil etadi;

jalb etiladigan ekspertlar va konsultantlarning faoliyatini muvofiqlashtiradi;

daʼvogarlarni tanlov mezonlari bilan tanishtiradi;

daʼvogarlardan tijorat takliflarini qabul qilib oladi hamda ularning hisobga olinishini, saqlanishini, shuningdek tanlov gʻolibi eʼlon qilingunga qadar sir tutilishini taʼminlaydi;

olingan tijorat takliflarini tizimlashtiradi;

oʻz buyurtmalarini yoʻllagan daʼvogarlar, xususan daʼvogar-firmalar nufuzi toʻgʻrisidagi maʼlumotlarni tayyorlaydi.

III. TAKLIFLAR TANLOVINI TAShKIL ETISh VA OʻTKAZISh BOSQIChLARI

9. Tanlovni tashkil etish va oʻtkazish quyidagi bosqichlarni oʻz ichiga oladi:

tanlov mezonlarini belgilovchi tanlov hujjatlarini (zarurat boʻlganda ixtisoslashtirilgan texnik va tijorat konsultantlarini jalb etgan holda) tayyorlash;

tanlov oʻtkazilishini eʼlon qilish, tanlovda ishtirok etish ehtimoli boʻlgan daʼvogarlarga tanlovga taklifnomalar yuborish;

tanlov ishtirokchilaridan tijorat takliflarini qabul qilib olish;

olingan tijorat takliflarini baholash va tanlov gʻolibini aniqlash.

IV. TAKLIFLAR TANLOVI TOʻGʻRISIDAGI EʼLONLARNI TAYYoRLASh VA TARQATISh

10. Maxsus guruh takliflar tanlovi oʻtkazilishidan kamida 15 kun oldin daʼvogarlarga uning oʻtkazilishi toʻgʻrisidagi xabarni pochta, telefaks orqali yoki boshqa rasmiy taklifnomalar shaklida daʼvogarlarning aniq manzillari boʻyicha joʻnatadi.

11. Tanlov toʻgʻrisidagi xabar quyidagilarni oʻz ichiga oladi:

tanlov predmeti — shakar xomashyosi;

shakar xomashyosini yetkazib berish hajmi;

xarid qilinadigan shakar xomashyosining asosiy sifat koʻrsatkichlari;

yetkazib berish shartlari va muddatlari, toʻlov shartlari;

takliflar qabul qilinadigan manzil, muloqot telefoni va telefaks;

takliflar qabul qilinadigan oxirgi muddat (kuni va mahalliy vaqt boʻyicha soati koʻrsatilgan holda).

V. TAKLIFLAR TANLOVINI OʻTKAZIShGA OID HUJJATLARGA QOʻYILADIGAN ASOSIY ShARTLAR

12. Tanlovni oʻtkazishga oid hujjatlar quyidagilarni oʻz ichiga oladi:

tanlov ishtirokchisi uchun yoʻriqnoma;

texnik qism;

tijorat qismi;

rasmiy kontrakt namunasi.

kelishilgan davr ichida tanlov ishtirokchisining taklifi chaqirib olinmasligini kafolatlovchi pul zakalatining miqdori, uni kiritish va qaytarish tartibi;

buyurtmachining ixtiyoriga koʻra tanlov natijalariga muvofiq tuzilgan kontraktni zarur darajada bajarish boʻyicha pulli kafolatning (garov sifatida) miqdori, uni kiritish va qaytarish tartibi.

Takliflar ikki boʻlimdan iborat boʻladi, ulardan biri tijorat qismini va kontrakt proformasini oʻz ichiga olgan boʻlim taklifning chaqirib olinmasligi kafolatlanishi shart.

13. Tanlov ishtirokchisi uchun yoʻriqnoma quyidagilarni oʻz ichiga oladi:

Tanlov oʻtkazilishiga doir tegishli tushuntirishlarni olish mumkin boʻlgan Maxsus guruhning aʼzolari bilan bogʻlanish uchun manzil va muloqot telefonlari;

tijorat taklifini rasmiylashtirish tartibi;

ishtirokchi tomonidan taklif taqdim etilganidan keyin tijorat taklifiga oʻzgartirishlar kiritish va ularni rasmiylashtirish tartibi;

taklifni Maxsus guruhga berish tartibotiga oid talablar;

tanlov ishtirokchilarining tanlovni oʻtkazishga oid hujjatlarga asoslangan taklif bilan bir qatorda qoʻshimcha takliflar kiritish mumkinligi toʻgʻrisidagi maʼlumot;

tanlov gʻolibi tanlab olinganligi tasdiqlangan vaqtdan eʼtiboran kontraktni tuzish muddati.

14. Tanlovning texnik qismi xarid qilinadigan tovarga qoʻyiladigan zarur texnologiya va sifat talablari (GOST, NSO va h. k.)ni oʻz ichiga oladi.

15. Takliflar tanlovini oʻtkazish boʻyicha hujjatlarning tijorat qismi quyidagilarni oʻz ichiga oladi:

tovarning bahosi va uni aniqlash tartibi;

tovarning miqdori;

yetkazib berish shartlari;

toʻlov shartlari va jadvali.

16. Rasmiy kontrakt namunasi kontraktlarga qoʻyiladigan talablarga javob berishi shart, shu jumladan:

kontraktning amaldagi xalqaro savdo huquqi normalariga muvofiqligi;

kontraktning Oʻzbekiston Respublikasi qonun hujjatlariga muvofiqligi.

Rasmiy kontrakt namunasini tuzishda Maxsus guruh maslahat olish uchun shartnoma asosida ixtisoslashtirilgan konsalting firmalariga murojaat qilish huquqiga ega.

VI. TANLOV IShTIROKChILARI

17. Tanlovda shakar ishlab chiqaruvchi xorijiy firmalar va kompaniyalar hamda mulkchilikning har qanday shaklidagi shakar xomashyosi yetkazib berish tajribasiga ega boʻlgan tijorat firmalari ishtirok etishlari mumkin.

VII. DAʼVOGARLARNI TANLAB OLISh

18. Maxsus guruh tomonidan oʻz takliflarini yoʻllagan daʼvogarlar oʻrtasida malakaviy tanlov oʻtkaziladi.

19. Daʼvogarlarning malakaviy tanloviga:

qayta tashkil etish, tugatish yoki bankrotlik jarayonida boʻlgan, ishi sud yoki arbitraj tartibida koʻrilayotgan, agar bu toʻgʻrida ishonchli maʼlumot mavjud boʻlsa;

belgilangan muddatda malakaviy tanlov oʻtkazilishi uchun barcha zarur hujjatlarni taqdim etmagan;

ilgari oʻtkazilgan tanlovlarda oʻzini salbiy jihatdan koʻrsatgan;

ilgari tuzilgan kontraktlar boʻyicha zimmasiga olgan majburiyatlarini talab darajasida bajarmagan;

tanlovda ishtirok etish huquqini boshqa yuridik shaxsga bergan tashkilotlar va firmalar keyinchalik koʻrib chiqish uchun qoʻyilmaydi.

VIII. TAKLIFLAR TANLOVINI OʻTKAZISh REGLAMENTI

21. Tanlovda ishtirok etishga daʼvogarlarga pochta (sana pochta tamgʻasiga muvofiq aniqlanadi), telefaks orqali yoki boshqa shaklda rasmiy taklifnomalar joʻnatilgan sana tanlov boshlangan sana hisoblanadi.

22. Maxsus guruh tijorat takliflari qabul qilinadigan muddatni va oxirgi sana hamda soatini, shuningdek tanlovga qoʻyilgan barcha takliflar ayni bir vaqtda koʻrib chiqiladigan yigʻilish sanasini belgilaydi. Belgilangan muddatdan keyin kelgan takliflar koʻrib chiqilmaydi. Tanlov ishtirokchisi oʻz taklifini tijorat takliflari qabul qilinadigan oxirgi sanadan kamida 24 soat oldin chaqirib olish huquqiga ega.

23. Malakaviy tanlovni oʻtkazish davrida jahon bozoridagi narxlar konʼyunkturasi nomaqbul boʻlgan taqdirda Maxsus guruh tijorat takliflari qabul qilinadigan muddatni uzaytirish yuzasidan qaror qabul qilishi yoki malakaviy tanlovdan oʻtib boʻlgan ishtirokchilarga qoʻshimcha taklif yoʻllashi mumkin.

24. Barcha takliflar qabul sanasi va vaqti roʻyxatga olish daftarida qayd etilgan holda qabul qilinadi. Roʻyxatga olish daftari tikilgan, tartib raqamlari qoʻyilgan va Maxsus guruh rahbarining imzosi bilan tasdiqlangan boʻlishi shart.

25. Tijorat takliflarini maxfiylik choralariga rioya etgan holda koʻrib chiqish va saqlash tartibi Maxsus guruh tomonidan belgilanadi.

26. Maxsus guruh oʻz ish reglamentini mustaqil ravishda belgilaydi. Mazkur masala yuzasidan qaror Maxsus guruh aʼzolari umumiy sonidan oddiy koʻpchilik ovoz bilan qabul qilinadi.

27. Maxsus guruh yigʻilishini oʻtkazish uchun kvorum guruh tarkibining kamida 75 foizidan iborat. Maxsus guruhning barcha majlislari va barcha qarorlari protokollar bilan rasmiylashtirilishi shart.

28. Taqdim etilgan tijorat takliflari koʻrib chiqish muddati Maxsus guruh tomonidan olingan tijorat takliflari toʻgʻrisidagi toʻliq maʼlumot kelgan vaqtdan boshlab belgilanadi. Biroq ushbu muddat taklifnomalarda koʻrsatilgan muddatdan kech boʻlmasligi lozim.

29. Tanlov quyidagi hollarda oʻtkazilmagan deb eʼlon qilinadi:

buyurtmalar Maxsus guruh tomonidan koʻrib chiqiladigan muddatning oxirigacha bironta ham tijorat taklifi olinmagan boʻlsa;

tanlovga faqat bitta ishtirokchining taklifi taqdim etilgan boʻlsa;

hamma taqdim etilgan tijorat takliflari qoʻyilgan talablarga javob bermasa.

IX. TAQDIM ETILGAN TAKLIFLARNI BAHOLASh TARTIBI

30. Kelgan takliflarni baholash va tanlov gʻolibini aniqlash Maxsus guruh tomonidan quyidagilarga asosan amalga oshiriladi:

tanlov oʻtkazilishi toʻgʻrisidagi taklifnomalarda bayon qilingan mezonlar;

taklif qilingan narxlarning oxirgi narxlarni, shuningdek Oʻzbekiston Respublikasi Tashqi iqtisodiy aloqalar vazirligining tavsiyasiga koʻra tovarni yetkazib berish xarajatlarini izchil kamaytirish zaruratini hisobga olib, jahon bozoridagi oʻrtacha narxlarga va vujudga kelgan bozor konʼyunkturasiga (tanlov sanasida) muvofiq kelishi.

Taqdim etilgan takliflarning qoʻshimcha texnikaviy, tashkiliy va tijorat nuqtai nazaridan afzalliklari hamda tanlov ishtirokchisining nufuzi ham eʼtiborga olinishi mumkin.

31. Takliflarni baholash Maxsus guruh tomonidan belgilangan muddat mobaynida amalga oshiriladi.

Tanlov ishtirokchilari yoki ularning vakillari kelgan takliflarni muhokama qilishda bevosita qatnashish huquqiga ega emas.

32. Tanlov ishtirokchilari taqdim etgan takliflar bilan tanishib chiqqandan keyin Maxsus guruhning har bir aʼzosi, tanlov muddati yakunlangunga qadar, asosli yozma xulosanoma tuzish huquqiga ega.

Maxsus guruh aʼzolarining yozma xulosanomalari (agar shundaylari mavjud boʻlsa) umumlashtirish va protokolga kiritish uchun guruh rahbariga beriladi.

33. Maxsus guruhning takliflar tanlovi gʻolibi toʻgʻrisidagi protokolida quyidagilar koʻrsatilishi kerak:

Maxsus guruh tarkibi;

ovoz berish natijalari;

tanlov qatnashchilaridan tushgan takliflarning yigʻma jadvali;

tanlov gʻolibining nomi;

tanlov gʻolibi bilan kontraktni imzolash muddatlari.

34. Tushgan tijorat takliflarining koʻrib chiqilishi va baholanishi toʻgʻrisidagi axborot Maxsus guruh aʼzolari tomonidan baholash tartibotiga rasmiy daxldor boʻlmagan shaxslarga xabar qilinmaydi. Maxsus guruh aʼzolari va jalb etilgan ekspertlar mazkur axborotning oshkor qilinishi uchun qonun hujjatlariga muvofiq javob beradilar.

35. Maxsus guruhning tanlov gʻolibi toʻgʻrisidagi protokoli yigʻilishda qatnashayotgan Maxsus guruh aʼzolarining hammasi tomonidan imzolanadi hamda shakar xomashyosi yetkazib berishga daʼvogarlar tanlovi oʻtkazilganligi toʻgʻrisidagi toʻliq maʼlumot bilan birga Vazirlar Mahkamasining Isteʼmol tovarlari ishlab chiqarish va savdo kompleksining rahbariga tasdiqlash uchun taqdim etiladi.

36. Maxsus guruh tanlov gʻolibi tomonidan kontrakt kelishilgan miqdorlarda zarur darajada bajarilishi yuzasidan kafolat berilishini taʼminlaydi.

Tanlov gʻolibi kontrakt tuzishni rad etgan yoki tanlov boʻlib oʻtmagan taqdirda belgilangan tartibda takliflarning qayta tanlovi oʻtkaziladi.

37. Tanlovni oʻtkazish bilan bogʻliq nizolar Oʻzbekiston Respublikasining amaldagi qonun hujjatlarida belgilangan tartibda koʻrib chiqiladi.

38. Tanlov natijalari Maxsus guruh tomonidan 1 kun mobaynida pochta, telefaks yoki boshqa yozma shaklda tanlov gʻolibi eʼtiboriga yetkazadi.

X. TANLOV NATIJALARIGA KOʻRA TUZILGAN KONTRAKTLARNI ROʻYXATDAN OʻTKAZISh VA ULARNING BAJARILIShI MONITORINGI

39. Tanlov natijalariga koʻra tuzilgan kontraktlar amaldagi qonun hujjatlariga muvofiq Tashqi iqtisodiy aloqalar vazirligida roʻyxatdan oʻtkaziladi.

40. Kontraktlarning bajarilishi monitoringi ular toʻliq bajarilgungacha, Oʻzbekiston Respublikasi Vazirlar Mahkamasining Isteʼmol tovarlari ishlab chiqarish va savdo kompleksiga hamda tegishli vakolatli bankka majburiy tartibda axborot taqdim etilgan holda, Maxsus guruh tomonidan amalga oshiriladi.