Oʻzbekiston Respublikasi Iqtisodiyot va sanoat vazirligi huzuridagi Urbanizatsiya agentligi faoliyatini tashkil etish chora-tadbirlari toʻgʻrisida (450-son)

31.05.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Urbanizatsiya jarayonlarini tubdan takomillashtirish chora-tadbirlari toʻgʻrisida” 2019-yil 10-yanvardagi PF-5623 Farmoniga muvofiq, shuningdek, Oʻzbekiston Respublikasi Prezidentining “Oʻzbekiston Respublikasi Iqtisodiyot va sanoat vazirligi faoliyatini tashkil etish toʻgʻrisida” 2019-yil 10-yanvardagi PQ-4105-son qarorini ijro etish yuzasidan Vazirlar Mahkamasi qaror qiladi:

1. Oʻzbekiston Respublikasi Iqtisodiyot va sanoat vazirligi huzuridagi Urbanizatsiya agentligi (keyingi oʻrinlarda Agentlik deb ataladi) toʻgʻrisidagi nizom ilovaga muvofiq tasdiqlansin.

2. Agentlik Toshkent shahar, Islom Karimov koʻchasi, 45a-uy manzilidagi binoga bepul foydalanish huquqi bilan joylashtirilsin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A.Qoʻchqorov va Oʻzbekiston Respublikasi iqtisodiyot va sanoat vaziri B.A.Xoʻjayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 31-may,

450-son

Vazirlar Mahkamasining 2019-yil 31-maydagi 450-son qaroriga ILOVA

Oʻzbekiston Respublikasi Iqtisodiyot va sanoat vazirligi huzuridagi Urbanizatsiya agentligi toʻgʻrisida

NIZOM

1-bob. Umumiy qoidalar

1. Oʻzbekiston Respublikasi Iqtisodiyot va sanoat vazirligi huzuridagi Urbanizatsiya agentligi (keyingi oʻrinlarda Agentlik deb ataladi) urbanizatsiya jarayonlarini davlat tomonidan tartibga solishni, shuningdek, yer uchastkalari muomalasi va ulardan foydalanish sohasida zamonaviy bozor mexanizmlari joriy etilishini taʼminlash sohasida vakolatli davlat organi hisoblanadi.

2. Agentlik oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, Oʻzbekiston Respublikasi Iqtisodiyot va sanoat vazirligining buyruqlariga, ushbu Nizomga, shuningdek, boshqa normativ-huquqiy hujjatlarga amal qiladi.

3. Agentlik oʻz faoliyatini unga yuklangan vazifalarni bajarish bilan bogʻliq masalalar boʻyicha boshqa davlat va xoʻjalik boshqaruvi organlari, mahalliy ijro etuvchi hokimiyat organlari, nodavlat notijorat tashkilotlar va boshqa tashkilotlar, xalqaro va xorijiy tashkilotlar bilan hamkorlikda amalga oshiradi.

Agentlik oʻz faoliyatida Oʻzbekiston Respublikasi Iqtisodiyot va sanoat vazirligiga va Oʻzbekiston Respublikasi Vazirlar Mahkamasiga hisobot beradi.

Agentlikning urbanizatsiyani rivojlantirish masalalari boʻyicha oʻz vakolatlari doirasida qabul qilgan qarorlari davlat va xoʻjalik boshqaruvi organlari, mahalliy davlat hokimiyati organlari, shuningdek, yuridik va jismoniy shaxslar tomonidan bajarilishi majburiydir.

4. Agentlik yuridik shaxs hisoblanadi, oʻzining mustaqil balansiga, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga, boshqa zarur muhrlar va shtamplarga, gʻaznachilik va bank hisob raqamlariga, shu jumladan, valyuta hisob raqamlariga egadir.

5. Agentlikning rasmiy nomi:

a) davlat tilida:

toʻliq nomi — Oʻzbekiston Respublikasi Iqtisodiyot va sanoat vazirligi huzuridagi Urbanizatsiya agentligi, qisqartirilgan nomi — Urbanizatsiya agentligi;

b) rus tilida:

toʻliq nomi — Agentstvo urbanizatsii pri Ministerstve ekonomiki i promishlennosti Respubliki Uzbekistan, qisqartirilgan nomi — Agentstvo urbanizatsii;

v) ingliz tilida:

toʻliq nomi — Urbanization Agency under the Ministry of Economy and Industry of the Republic of Uzbekistan, qisqartirilgan nomi — Urbanization Agency.

6. Agentlik joylashgan joy (pochta manzili): Toshkent shahri, Islom Karimov koʻchasi, 45a-uy.

2-bob. Agentlikning vazifalari va funksiyalari

7. Quyidagilar Agentlikning asosiy vazifalari hisoblanadi:

urbanizatsiya jarayonlarini tartibga solish sohasida yagona davlat siyosatini amalga oshirish;

sanoatlashtirish siyosatining surʼatlari, bosqichlari va natijalarini uzoq muddatli rejalashtirish, shahar va qishloqlardagi uzoq muddatli demografik tendensiyalarni tahlil qilish, jadal sanoatlashtirish sharoitida shaharlarning demografik sigʻimlari hamda ishchi kuchiga boʻlgan ehtiyojlarini hisoblash;

“oʻsish polyuslari”ni aniqlash, boshqaruv markazlari joylarini tanlash, taʼlim, mehnat bozorini shakllantirishni kelishish, ichki va tashqi migratsiya sohalaridagi siyosatni tartibga solish;

qishloq aholisini yangi sanoat oʻqitish va qayta tayyorlashga qaratilgan qator institutsional va tashkiliy chora-tadbirlarni belgilashni nazarda tutuvchi, ishchi kuchining qishloqlardan shaharlarga harakatlanishini ragʻbatlantirish boʻyicha kompleks chora-tadbirlar dasturini ishlab chiqish;

ilgʻor energiyani tejaydigan, ekologik toza texnologiyalar va materiallarni joriy etish asosida hamda ijtimoiy, muhandislik-kommunal va yoʻl-transport infratuzilmalarini qamrab olgan yoʻldosh shaharlar bunyod etilishini hisobga olgan holda shahar aglomeratsiyalarini shakllantirishni boshqarish;

jahon amaliyotini hisobga olgan holda shahar aholisini joylashtirish tizimini kompleks rivojlantirishni tartibga solish, kichik, oʻrta, katta va yirik shaharlarning samarali nisbatini shakllantirish.

8. Agentlik oʻziga yuklangan vazifalarni bajarish uchun quyidagi funksiyalarni amalga oshiradi:

a) urbanizatsiya jarayonlarini tartibga solish sohasida yagona davlat siyosatini amalga oshirish sohasida:

ijtimoiy va ishlab chiqarish infratuzilmalari bilan birgalikda yangi sanoat korxonalarini kompleks joylashtirish orqali aholi punktlarida urbanizatsiya jarayonlarini faollashtirish boʻyicha takliflar ishlab chiqadi;

muhandislik, transport va ijtimoiy infratuzilma bilan taʼminlangan, ipoteka krediti berish va tadbirkorlik subyektlarining moliyaviy resurslarini jalb qilish mexanizmlaridan foydalangan holda, shu jumladan, kam va oʻrta daromadli oilalar uchun arzonlashtirilgan turar joylarni qurishga yoʻnaltirilgan investitsiyalarni qoʻllab-quvvatlash boʻyicha maxsus chora-tadbirlarni nazarda tutuvchi mutlaqo yangi uy-joy siyosatini amalga oshirishda urbanizatsiya jarayonlarini muvofiqlashtirib boradi;

manfaatdor vazirliklar va idoralar bilan birgalikda yer uchastkalarini xususiylashtirish va bozor narxini aniqlash sohasida umuman urbanizatsiya sohasida va yer munosabatlarini tartibga solish boʻyicha davlat siyosatini takomillashtirish masalalari boʻyicha takliflarni ishlab chiqadi;

Oʻzbekiston Respublikasida shaharlar, yirik qishloq aholi punktlari va shahar posyolkalarini istiqbolli rivojlantirishning asosiy yoʻnalishlarini ishlab chiqadi, shuningdek, tegishli konsepsiya doirasida dasturlar va loyihalar tayyorlanishi va amalga oshirilishini metodik qoʻllab-quvvatlashni taʼminlaydi;

respublikada urbanizatsiya jarayonlarini tartibga solish maqsadida aholi punktlari urbanizatsiyasini rivojlantirishni baholash uchun milliy indikatorlar tizimini ishlab chiqadi va takomillashtiradi;

urbanizatsiyani rivojlantirish masalalari boʻyicha Oʻzbekiston Respublikasi Vazirlar Mahkamasi, davlat organlari va xususiy sektor, xalqaro moliya institutlari, donor tashkilotlar va boshqa manfaatdor tomonlar oʻrtasidagi oʻzaro hamkorlikni muvofiqlashtiradi va tizimli qoʻllab-quvvatlaydi;

urbanizatsiya jarayonlarini tartibga solish sohasida xalqaro va davlatlararo hamkorlikni rivojlantiradi;

muammolarni tizimli oʻrganish va islohotlar amalga oshirilishi yakunlari asosida ilgʻor xalqaro tajribani hisobga olgan holda urbanizatsiyani rivojlantirish boʻyicha davlat konsepsiyalari va dasturlarni ishlab chiqadi va amalga oshiradi;

b) sanoatlashtirish siyosatining surʼatlari, bosqichlari va natijalarini uzoq muddatli rejalashtirish, shahar va qishloqlardagi uzoq muddatli demografik tendensiyalarni tahlil qilish, jadal sanoatlashtirish sharoitida shaharlarning demografik sigʻimlari hamda ishchi kuchiga boʻlgan ehtiyojlarini hisoblash sohasida:

chuqur tahlil qilish asosida mavjud salohiyatni hisobga olgan holda korxonalarni joylashtirish hamda shaharlar, yirik qishloq aholi punktlari va shahar posyolkalarining samarali sanoat tuzilmasini shakllantirish boʻyicha takliflarni ishlab chiqadi;

shahar aholisi boʻyicha hisobga olish va statistika hisobotini, shuningdek, xalqaro talablarga muvofiq urbanizatsiya darajasini hisoblab chiqish metodologiyasini takomillashtirishda ishtirok etadi;

shaharlar, yirik qishloq aholi punktlari va shahar posyolkalarida turar joy, ijtimoiy va ishlab chiqarish infratuzilmasi obyektlarini va sanoat korxonalarini joylashtirishda hisobga olish maqsadida demografik sigʻim hisob-kitobini amalga oshiradi;

shaharlar, yirik qishloq aholi punktlari va shahar posyolkalarida uy-joy, ijtimoiy, muhandislik infratuzilmalari va sanoat korxonalarini rekonstruksiya qilish va qurishning samaradorligi va maqsadga muvofiqligi toʻgʻrisidagi takliflarni ishlab chiqadi;

v) “oʻsish polyuslari”ni aniqlash, boshqaruv markazlari joylarini tanlash, taʼlim, mehnat bozorini shakllantirishni kelishish, ichki va tashqi migratsiya sohalaridagi siyosatni tartibga solish sohasida:

xalqaro tajribani hisobga olgan holda “oʻsish polyuslari”ni aniqlash metodikalarini ishlab chiqadi va tasdiqlaydi;

davlat va jamoat tashkilotlari bilan birgalikda shaharlar, yirik qishloq aholi punktlari va shahar posyolkalarini rivojlantirish boʻyicha boshqaruv funksiyalarini takomillashtirish boʻyicha takliflarni ishlab chiqishda ishtirok etadi;

urbanizatsiya jarayonlarini ustuvor rivojlantirish uchun mintaqalarni aniqlash va tanlash maqsadida vakolatli davlat organlari bilan birgalikda shaharlar va shahar posyolkalarini ularni demografik, mehnat, infratuzilma va ishlab chiqarish salohiyati jihatidan oʻrganish yuzasidan xatlovdan oʻtkazadi;

mehnat bozori holatining doimiy monitoringini olib boradi va shaharlarda uni shakllantirish va rivojlantirish boʻyicha takliflar kiritadi;

ichki va tashqi migratsiyani tartibga solish chora-tadbirlarini ishlab chiqishda ishtirok etadi;

g) qishloq aholisini yangi sanoat oʻqitish va qayta tayyorlashga qaratilgan qator institutsional va tashkiliy chora-tadbirlarni belgilashni nazarda tutuvchi, ishchi kuchining qishloqlardan shaharlarga harakatlanishini ragʻbatlantirish boʻyicha kompleks chora-tadbirlar dasturini ishlab chiqish sohasida:

ish kuchlarining qishloqdan shaharga erkin harakatlanishi yoʻlidagi mavjud toʻsiqlarni aniqlaydi va vakolatli davlat organlari bilan birgalikda ularni bartaraf etish boʻyicha takliflarni ishlab chiqadi;

davlat-xususiy sheriklik asosida va tegishli hududlarda joylashgan taʼlim muassasalari negizida (yangi sanoat mutaxassislarini ochish hisobga olingan holda) qishloq aholisini oʻqitish va qayta oʻqitish dasturini ishlab chiqadi;

davlat va xoʻjalik boshqaruvi organlari, mahalliy ijro etuvchi hokimiyat organlari, tadbirkorlik subyektlari uchun urbanizatsiya sohasida mutaxassislarni qayta tayyorlash va malakasini oshirishni tashkil etadi;

d) ilgʻor energiyani tejaydigan, ekologik toza texnologiyalar va materiallarni joriy etish asosida hamda ijtimoiy, muhandislik-kommunal va yoʻl-transport infratuzilmalarini qamrab olgan yoʻldosh shaharlar bunyod etilishini hisobga olgan holda shahar aglomeratsiyalarini shakllantirishni boshqarish sohasida:

shahar aglomeratsiyalarini shakllantirish imkoniyatlarini aniqlash maqsadida ilgʻor xorijiy tajribani hisobga olgan holda yirik shahar (yadro) va uning atrofidagi aholi punktlari oʻrtasidagi oʻzaro munosabatlarni oʻrganadi;

shahar aglomeratsiyalarini shakllantirish uchun istiqbollarni oʻrganish maqsadida yirik shahar chekkasida joylashgan shaharlashgan manzilgohlarning ijtimoiy, muhandislik-kommunal va yoʻl-transport infratuzilmalari holatini baholaydi;

tegishli davlat organlari bilan birgalikda yirik shaharlar chekkasida yoʻldosh shaharlar tashkil etish boʻyicha takliflarni ishlab chiqadi;

shaharlarda ijtimoiy, muhandislik-kommunal va yoʻl-transport infratuzilmalarini tashkil etishda ilgʻor energiyani tejaydigan (energiya jihatidan samarali), ekologik toza texnologiyalar va materiallarni joriy etish boʻyicha takliflarni ishlab chiqishda ishtirok etadi;

energiya jihatidan samarali va ekologik texnologiyalar joriy etilishini nazarda tutuvchi aholi punktlarini “yashil shaharlar”ga aylantirish mexanizmini ishlab chiqadi va joriy etadi;

Oʻzbekiston Respublikasi Qurilish vazirligi va Yer resurslari, geodeziya, kartografiya va davlat kadastri davlat qoʻmitasi, mahalliy ijro etuvchi hokimiyat organlari bilan birgalikda tegishli hududlar va aholi punktlarining bosh rejalariga muvofiq 2030-yilgacha Oʻzbekiston Respublikasida urbanizatsiyani rivojlantirish konsepsiyasini (keyingi oʻrinlarda Konsepsiya deb ataladi) amalga oshirish maqsadida qishloq xoʻjaligidan boshqa maqsadda foydalaniladigan yer uchastkalarini aniqlaydi;

manfaatdor vazirliklar va idoralar bilan birgalikda Konsepsiya doirasida belgilangan yer uchastkalarini zarur muhandislik, transport va ijtimoiy infratuzilmalar bilan jihozlash ustidan nazorat qilinishini taʼminlaydi;

e) jahon amaliyotini hisobga olgan holda shahar aholisini joylashtirish tizimini kompleks rivojlantirishni tartibga solish, kichik, oʻrta, katta va yirik shaharlarning samarali nisbatini shakllantirish sohasida:

manfaatdor vazirliklar va idoralar bilan birgalikda shaharsozlikni rejalashtirish, Oʻzbekiston Respublikasi, Qoraqalpogʻiston Respublikasi va viloyatlar hududlarini rejalashtirish, hududlar va tarmoqlarni rivojlantirish sxemalarini ishlab chiqishda qatnashadi;

xalqaro amaliyotni hisobga olgan holda kichik, oʻrta, katta va yirik shaharlarning samarali nisbatlarini shakllantirish tendensiyalarini oʻrganadi;

suburbanizatsiya yoʻli bilan yoʻldosh shaharlarning rivojlanishi uchun qulay shart-sharoitlar yaratish boʻyicha takliflarni ishlab chiqadi;

oʻzining rasmiy veb-saytida va ommaviy axborot vositalarida urbanizatsiya masalalariga oid axborot va maʼlumotlar eʼlon qilinishini taʼminlaydi;

urbanizatsiya masalalariga oid xalqaro va milliy ilmiy anjumanlar, simpoziumlar, konferensiyalar, seminarlar va boshqa tadbirlarni tashkil etadi va ularda ishtirok etadi.

3-bob. Agentlikning huquqlari va javobgarligi

9. Agentlik oʻziga yuklangan vazifalar va funksiyalarni bajarish uchun quyidagi huquqlarga egadir:

urbanizatsiyani tartibga solish masalalari boʻyicha normativ-huquqiy hujjatlar loyihalarini ishlab chiqish va ishlab chiqishda qatnashish, shuningdek, ular haqida oʻz xulosalarini berish;

oʻz vakolatiga kiradigan masalalar boʻyicha maʼlumot va materiallarni davlat va xoʻjalik boshqaruvi organlaridan, respublika tashkilotlaridan belgilangan tartibda soʻrash va olish;

tegishli Konsepsiyalar doirasida tashkil etiladigan yangi shaharlar va yoʻldosh shaharlar loyihalarini moliyalashtirish maqsadida bosh rejalarni ishlab chiqish boʻyicha oʻz takliflarini kiritish;

urbanizatsiya jarayonlarini tartibga solish sohasida xalqaro loyihalar va dasturlarni ishlab chiqish va amalga oshirishni moliyalashtirish uchun grantlar va kreditlarni jalb etish masalalari boʻyicha xalqaro moliya institutlari bilan oʻzaro hamkorlik qilish;

urbanizatsiyani tartibga solish sohasida davlat organlari va boshqa tashkilotlarning, nodavlat notijorat tashkilotlar, yetakchi loyiha institutlari, ilmiy-taʼlim muassasalari, xalqaro va xorijiy tashkilotlarning yuqori malakali xodimlarini hamda mutaxassislarni jalb etish.

Agentlik qonun hujjatlariga muvofiq boshqa huquqlarga ham ega boʻlishi mumkin.

10. Agentlik oʻziga yuklangan vazifalar va funksiyalar samarali bajarilishi uchun javob beradi.

4-bob. Agentlik faoliyatini tashkil etish

1-§. Agentlik faoliyatini tashkil etish

11. Agentlikka Oʻzbekiston Respublikasi Prezidenti tomonidan lavozimga tayinlanadigan va lavozimdan ozod qilinadigan direktor — Oʻzbekiston Respublikasi iqtisodiyot va sanoat vazirining oʻrinbosari boshchilik qiladi.

12. Agentlik direktorining birinchi oʻrinbosari va oʻrinbosari boʻladi.

Agentlik direktorining oʻrinbosarlari direktorning taqdimnomasi boʻyicha Oʻzbekiston Respublikasi iqtisodiyot va sanoat vazirining buyrugʻi bilan lavozimga tayinlanadilar va lavozimidan ozod qilinadilar.

2-§. Agentlik rahbarlarining funksional vazifalari

13. Agentlikka yuklangan vazifalarga muvofiq Agentlik rahbarlari quyidagi funksional vazifalarni bajaradilar:

a) Agentlik direktori:

yakkaboshchilik asosida Agentlik faoliyatiga umumiy rahbarlik qiladi hamda Agentlikka yuklangan vazifalar va funksiyalar bajarilishi uchun shaxsan javob beradi;

direktor oʻrinbosarlari va Agentlik boshqa mansabdor shaxslarining vakolatlarini hamda faoliyatning ayrim yoʻnalishlari va uchastkalariga rahbarlik qilish uchun shaxsiy javobgarligi darajasini belgilaydi;

Agentlik yuritishi sohasiga kiradigan masalalar boʻyicha Oʻzbekiston Respublikasi Vazirlar Mahkamasiga kiritilgan takliflar va normativ-huquqiy hujjatlar loyihalarini koʻrib chiqishda urbanizatsiyani rivojlantirish sohasida davlat siyosatiga qatʼiy rioya qilinishini taʼminlaydi, hujjatlarning tayyorlangan loyihalariga viza qoʻyadi. Tegishli hujjatlar qabul qilingandan keyin ularning amalga oshirilishi ustidan tizimli nazorat tashkil etilishini taʼminlaydi;

oʻz vakolatlari doirasida Agentlik xodimlari ijro etishi majburiy boʻlgan buyruqlar chiqaradi va koʻrsatmalar beradi;

Agentlik xodimlarini belgilangan tartibda ishga qabul qiladi va ular bilan mehnat shartnomalarini bekor qiladi;

Agentlik tarkibiy boʻlinmalari toʻgʻrisidagi nizomni va uning xodimlarining lavozim yoʻriqnomalarini tasdiqlaydi;

“Jismoniy va yuridik shaxslarning murojaatlari toʻgʻrisida”gi Oʻzbekiston Respublikasi Qonuniga muvofiq jismoniy va yuridik shaxslarning murojaatlarini ijro etish muddatlariga qatʼiy rioya qilinishini taʼminlaydi;

qonun hujjatlariga muvofiq boshqa vakolatlarni amalga oshiradi.

b) direktorning oʻrinbosari:

Agentlikka yuklangan vazifalarni amalga oshirishda Agentlikning tegishli boʻlinmalari bilan oʻzaro hamkorlik qiladi;

rahbariyatning topshirigʻi boʻyicha urbanizatsiyani rivojlantirishning ustuvor vazifalari va dasturlari bajarilishini muvofiqlashtiradi;

Agentlikning topshirilgan va mutasaddilik qilinadigan boʻlinmalariga bevosita rahbarlik qiladi;

Agentlikning, shuningdek, Jamgʻarmaning boshliqlari va mutaxassislari lavozimlariga nomzodlarni belgilangan tartibda direktorning tasdiqlashi uchun kiritadi;

Agentlikning mutasaddilik qilinadigan tarkibiy boʻlinmalari boshliqlari va mutaxassislarini qayta tayyorlash, malakasini oshirish, ragʻbatlantirish va ularga nisbatan intizomiy jazo choralarini qoʻllash toʻgʻrisida takliflar kiritadi;

mutasaddilik qilinadigan boʻlinmalarda kadrlar zaxirasini shakllantirish ishlarini tizimli asosda tashkil etadi;

v) Agentlik tarkibiy boʻlinmalari boshliqlari:

tegishli tarkibiy boʻlinma toʻgʻrisidagi tasdiqlangan nizom doirasida aniq yoʻnalishlar boʻyicha vazifalar sifatli va oʻz vaqtida bajarilishini taʼminlaydi;

funksional vazifalarni bajarishda Agentlikning boshqa tarkibiy boʻlinmalari va rahbariyati bilan oʻzaro hamkorlikni tashkil etadi;

tarkibiy boʻlinmaning vazifalarini amalga oshirish doirasida maʼlumotlar bazalarini boshqarish tizimlari yaratilishini tashkil etadi va ularning ishini taʼminlaydi;

Agentlik oldiga qoʻyilgan vazifalar va funksiyalar amalga oshirilishining amaliy chora-tadbirlari va mexanizmlari boʻyicha Agentlik rahbariyatiga aniq takliflar kiritadi.

3-§. Agentlik rahbarlarining javobgarligi

14. Direktor:

ushbu Nizom va boshqa qonun hujjatlari bilan unga yuklangan vazifalar sifatli va oʻz vaqtida bajarilishi, shuningdek, Agentlik ishidagi kamchiliklarni bartaraf etish yuzasidan chora-tadbirlar koʻrilishi;

amalga oshiriladigan dasturlar, strategiyalar va konsepsiyalar natijalariga erishish;

Agentlikda ijro intizomiga soʻzsiz rioya qilinishi uchun javob beradi.

15. Direktorning oʻrinbosarlari:

tegishli yoʻnalishlar boʻyicha topshiriqlar bajarilishining natijadorligi va oʻz vaqtidaligi;

mutasaddilik qilinadigan yoʻnalishlar boʻyicha urbanizatsiyani rivojlantirish vazifalari va dasturlari samarali amalga oshirilishini taʼminlash yuzasidan koʻrilayotgan chora-tadbirlarning samaradorligi va natijadorligi uchun javob beradilar.

16. Agentlikning tarkibiy boʻlinmalari boshliqlari:

qonun hujjatlari, Agentlik rahbariyatining topshiriqlari, shuningdek, tarkibiy boʻlinma va Agentlikka yuklangan vazifalar va funksiyalar oʻz vaqtida va sifatli bajarilishi ustidan taʼsirchan nazorat qilinishi;

urbanizatsiyani rivojlantirish dasturlari belgilangan tartibda ishlab chiqilishi va tegishli yoʻnalishlar boʻyicha ular amalga oshirilishi nazorat qilinishini taʼminlash uchun javob beradilar.

4-§. Agentlikning davlat va xoʻjalik boshqaruvi boshqa organlari, mahalliy davlat hokimiyati organlari va boshqa tashkilotlar bilan oʻzaro hamkorlik qilishi tartibi

17. Agentlik, davlat va xoʻjalik boshqaruvi boshqa organlari, mahalliy davlat hokimiyati organlari va boshqa tashkilotlar bilan oʻzaro hamkorlik qilishda:

Agentlik vakolatlariga taalluqli masalalar boʻyicha davlat va xoʻjalik boshqaruvi organlari, mahalliy davlat hokimiyati organlari faoliyatini muvofiqlashtiradi:

Agentlik vakolatlariga tegishli masalalar boʻyicha takliflar tayyorlanishida va belgilangan tartibda kiritilishida ishtirok etadi;

urbanizatsiyani tartibga solish sohasida, shuningdek, Agentlik vakolatlariga taalluqli boshqa masalalar boʻyicha yagona davlat siyosatini amalga oshirish doirasida davlat va xoʻjalik boshqaruvi organlari, mahalliy davlat hokimiyati organlari bilan, shu jumladan, axborot tizimlari va maʼlumotlar bazalarining integratsiyasi orqali hamkorlik qiladi.

5-bob. Agentlikni moliyalashtirish va moddiy-texnik taʼminlash, uning xodimlari mehnatiga haq toʻlash va moddiy ragʻbatlantirish

18. Agentlik faoliyatini moliyalashtirish Oʻzbekiston Respublikasi Davlat budjeti mablagʻlari, Agentlikning budjetdan tashqari mablagʻlari, vaqtincha boʻsh mablagʻlarni tijorat banklarining depozitlariga joylashtirishdan olingan daromadlar, xalqaro moliya institutlari va xorijiy tashkilotlarning grantlari, shuningdek, qonun hujjatlarida taqiqlanmagan boshqa manbalar hisobiga amalga oshiriladi.

19. Agentlik xodimlariga Oʻzbekiston Respublikasi Iqtisodiyot va sanoat vazirligining markaziy apparati xodimlari uchun belgilangan mehnatga haq toʻlash, moddiy ragʻbatlantirish va ijtimoiy himoya qilish shartlari tatbiq etiladi.

Agentlik xodimlarining lavozim maoshlariga har oylik ustamalar va ragʻbatlantiruvchi tusdagi qoʻshimcha haqlar Oʻzbekiston Respublikasi Iqtisodiyot va sanoat vazirligi bilan kelishgan holda Agentlik direktori tomonidan tasdiqlanadigan nizomlarga muvofiq toʻlanadi.

20. Oʻzbekiston Respublikasi Davlat budjeti mablagʻlari va qonun hujjatlarida taqiqlanmagan boshqa manbalar Agentlik xodimlari mehnatiga haq toʻlash va ularni moddiy ragʻbatlantirish manbalari hisoblanadi.

6-bob. Yakunlovchi qoida

21. Agentlikni qayta tashkil etish va tugatish qonun hujjatlarida belgilangan tartibda amalga oshiriladi.