“Madad” agentligini tashkil etish va uning faoliyati masalalari toʻgʻrisida (292-son)

26.07.1995

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Xususiy tadbirkorlik va kichik biznesni sugʻurta yoʻli bilan himoya qiluvchi Agentlikni tashkil qilish toʻgʻrisida” gi Farmoniga muvofiq Vazirlar Mahkamasi qaror qiladi:

1. Quyidagilar maʼlumot uchun qabul qilinsin:

Oʻzbekiston Respublikasi Tashqi iqtisodiy faoliyat Milliy banki, “Oʻzsanoatqurilishbank”, “Oʻzdehqonchiliksanoatbank”, “Oʻztadbirkorbank”, “Oʻzsavdogarbank”, “Mevasabzavotbank”, Tadbirkorlar uyushmasi, Shaxsiy yordamchi xoʻjaliklar uyushmasi, Ishbilarmon xotin-qizlar uyushmasi tomonidan aksionerlik jamiyati shaklidagi “Madad” sugʻurta agentligi tashkil etiladi;

2. Agentlik boshqaruvining taklif etilayotgan tashkiliy tuzilmasi, markaziy apparati tuzilmasi hamda uning viloyat filiallari namunaviy tuzilmasi 1, 2 va 3-ilovalarga muvofiq maʼqullansin.

3. Xususiy tadbirkorlik va kichik biznes subyektlarini (shu jumladan kichik biznes korxonalari tomonidan olinadigan kreditlarni taʼminlash uchun qoʻyilgan garovlarni) sugʻurta qilish tartibi 4-ilovaga muvofiq tasdiqlansin.

4. “Madad” agentligi biznes-fond bilan birgalikda qarzdorning masʼuliyatini sugʻurtalashga oid imtiyozli stavkani belgilasin.

5. Makroiqtisodiyot va statistika vazirligi, Oʻzbekiston Respublikasi Davlat mulki qoʻmitasi xususiy tadbirkorlik va kichik biznesni rivojlantirishning ahvoli hamda istiqbollari toʻgʻrisidagi axborot-tahliliy materiallar bilan “Madad” agentligi taʼminlab tursinlar.

6. Oʻzbekiston Respublikasi Adliya vazirligi “Madad” agentligini ochiq turdagi aksionerlik jamiyati sifatida belgilangan tartibda roʻyxatdan oʻtkazsin.

7. Qoraqalpogʻiston Respublikasi Vazirlar Kengashi, viloyatlar hokimliklari bir oy muddatda agentlikning filiallari uchun tegishli xizmat xonalarini ajratib bersinlar.

9. Ushbu qarorning bajarilishini nazorat qilish Bosh vazirning oʻrinbosarlari B.S. Hamidov va V.A. Chjen zimmasiga yuklansin. Ularga “Madad” agentligini tashkil etishga oid taʼsis yigʻilishini tayyorlash va oʻtkazish topshirilsin.

Vazirlar Mahkamasining Raisi I. KARIMOV

Toshkent sh.,

1995-yil 26-iyul,

292-son

Vazirlar Mahkamasining 1995-yil 26-iyuldagi 292-son qaroriga 1-ILOVA

“Madad” sugʻurta agentligini boshqarishning tashkiliy tuzilmasi

Vazirlar Mahkamasining 1995-yil 26-iyuldagi 292-son qaroriga 2-ILOVA

“Madad” sugʻurta agentligi markaziy tuzilmasi

Markaziy apparat xodimlari soni — 53 kishi

Vazirlar Mahkamasining 1995-yil 26-iyuldagi 292-son qaroriga 3-ILOVA

Viloyat filiallarining namunaviy sxemasi

1. Qoraqalpogʻiston filiali — 7 kishi

2. Andijon filiali — 9 kishi

3. Buxoro filiali — 10 kishi

4. Jizzax filiali — 7 kishi

5. Qashqadaryo filiali — 9 kishi

6. Navoiy filiali — 8 kishi

7. Namangan filiali — 10 kishi

8. Samarqand filiali — 12 kishi

9. Sirdaryo filiali — 7 kishi

10. Surxondaryo filiali — 9 kishi

11. Fargʻona filiali — 10 kishi

12. Xorazm filiali — 8 kishi

13. Toshkent viloyati filiali — 10 kishi

14. Toshkent shahar filiali — 12 kishi

Vazirlar Mahkamasining 1995-yil 26-iyuldagi 292-son qaroriga 4-ILOVA

Xususiy tadbirkorlik va kichik biznes subyektlarini sugʻurta qilish

tartibi

1. “Madad” agentligi kichik biznes korxonalariga kredit beruvchi bank bilan uzviy aloqada ishlaydi, takliflar va loyihalarni belgilangan tartibda ekspertizadan oʻtkazishni, shuningdek, qarz oluvchilarga biznes-fond tomonidan kredit ajratilishida asos hisoblanadigan sugʻurta polisini berishni taʼminlaydi.

2. Tadbirkor hujjatlar paketi (Ustav, balans, loyihaning biznes-rejasi) bilan “madad” agentligiga murojaat qiladi.

3. “Madad” agentligi taqdim etilgan hujjatlarni ekspertizadan oʻtkazadi va quyidagilarni oʻrganib chiqadi:

— loyihaning xususiy tadbirkorlikni va kichik biznesni rivojlantirishning ustuvor yoʻnalishlariga muvofiqligi;

— loyihaning kichik va xususiy korxonalar mezonlariga muvofiqligi;

— loyihaning realligi, qoplanishi, tadbirkorning moliyaviy-iqtisodiy ahvoli;

— tavakkalchilik darajasini belgilash imkonini beradigan boshqa masalalar.

Ekspertiza natijalari agentlik Boshqaruviga maʼlum qilinadi, u sugʻurta kafolatini berishning maqsadga muvofiqligi yoki muvofiq emasligi toʻgʻrisida qaror chiqaradi. Boshqaruv qarori tadbirkorga yetkaziladi va u bilan sugʻurta shartnomasi tuziladi, shu shartnoma asosida sugʻurta polisi beriladi.

4. Tadbirkor sugʻurta shartnomasi asosida agentlikka sugʻurta toʻlovini oʻtkazadi. Agar tadbirkorda sugʻurta haqini toʻlashga mablagʻ boʻlmasa, toʻlovlar boʻyicha hisob-kitoblarni kichik biznes korxonalariga kredit beruvchi bankdan kredit olganidan keyin amalga oshiradi.

Tadbirkor kredit mablagʻlarni kichik biznes korxonalariga kredit beruvchi bankda rasmiylashtiradi va oladi. Kredit berishda sugʻurta polisi va kichik va oʻrta biznes korxonalariga kredit beruvchi bank bilan tadbirkor oʻrtasida tuzilgan kredit shartnomasi huquqiy asos hisoblanadi.

5. Kredit va sugʻurta shartnomalari amalda boʻlgan davrda “Madad” agentligi ajratilgan va sugʻurtalangan kreditdan maqsadli foydalanilayotganligini tekshiradi.

6. Kredit shartnomasining amalda boʻlish muddati tugagandan keyin kredit yoki uning bir qismi toʻlanmay qolgan taqdirda “Madad” agentligi kichik biznes korxonalariga kredit beruvchi bank taqdimnomasi boʻyicha sugʻurta holati boshlangani haqida Dalolatnoma tuzadi va 10 kun muddatda toʻlov topshirigʻi orqali tegishli mablagʻni kichik va oʻrta biznes korxonalariga kredit beruvchi bankning hisob-kitob schyotiga oʻtkazadi.

7. Sugʻurta qoplamasi toʻlagandan keyin sugʻurtalanuvchi (foyda koʻruvchi) sugʻurta natijasida koʻrilgan zararlar uchun masʼul boʻlgan shaxsga qoʻyiladigan talablar huquqining toʻlagan summasi doirasida “Madad” agentligiga oʻtadi.

8. “Madad” agentligining bosh tashkiloti bilan uning hududiy boʻlinmalari oʻrtasidagi oʻzaro munosabatlar:

— bosh tashkilot boʻlinmalarga metodik rahbarlikni amalga oshiradi;

— hududiy boʻlinmalar — filiallar toʻgʻrisidagi nizom va bosh tashkilotdan olingan ishonchnoma asosida ish yuritadilar hamda oʻzlarining ishlab chiqarish faoliyatlari toʻgʻrisida unga hisob beradilar;

— filiallar sugʻurta faoliyatini mustaqil ravishda amalga oshiradilar;

— sugʻurta holati yuzaga kelgan taqdirda filiallar sugʻurta tovonini sugʻurta toʻlovlarini jamlash yoʻli bilan hosil qilingan oʻz mablagʻlari hisobidan toʻlaydilar.

Filialning mablagʻlari yetmay qolgan taqdirda bosh tashkilot ushbu summani oʻzining sugʻurta fondidan toʻlaydi.

9. Mijoz, “Madad” agentligi va kichik biznes korxonalariga kredit beruvchi bank oʻrtasidagi oʻzaro munosabat sxemasi ilova qilinadi.

ILOVA

Korxona (mijoz), “Madad” agentligi va Biznes-fond oʻrtasidagi oʻzaro munosabat sxemasi