Uy-joy fondida va ijtimoiy-madaniy maqsadlardagi obyektlarda suv va gazni hisobga olish asboblarini oʻrnatish va ulardan foydalanish haqidagi nizomni tasdiqlash toʻgʻrisida (185-son)

26.05.1995

Oʻzbekiston Respublikasi Vazirlar Mahkamasining

qarori

Ichimlik suv va tabiiy gazni tejab sarflash maqsadida Vazirliklar Mahkamasi qaror qiladi:

1. Uy-joy fondida va ijtimoiy-madaniy maqsadlardagi obyektlarda suv va gazni hisobga olish asboblarini oʻrnatish va ulardan foydalanish haqidagi Nizom ilovaga muvofiq tasdiqlansin.

2. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari, vazirliklar, idoralar, korporatsiyalar, uyushmalar, konsernlar:

yangidan qurilayotgan uy-joy va ijtimoiy-madaniy obyektlarni foydalanishga topshirishni 1996-yil 1-yanvardan boshlab isteʼmolchida suv va gazni hisobga olish asboblari oʻrnatilgandan keyingina amalga oshirsinlar;

1995-yil 1-sentabrgacha mavjud uy-joy va ijtimoiy-madaniy maqsadlardagi obyektlarni suv va gazni hisobga olish asboblaridan foydalangan holda energiya manbalarining tijorat yoʻli bilan hisobga olinishiga bosqichma-bosqich oʻtkazishga doir viloyat (shahar) dasturlarini ishlab chiqsinlar va tasdiqlasinlar.

3. Oʻzbekiston Respublikasi Kommunal xizmat koʻrsatish vazirligi tegishli vazirliklar va idoralar bilan birgalikda uy-joy va ijtimoiy-madaniy maqsadlardagi obyektlarni quruvchilarni ularning buyurtmanomalariga muvofiq roʻzgʻor gaz va suv hisoblagichlari bilan taʼminlasin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.R.Yunusov zimmasiga yuklansin.

Oʻzbekiston Respublikasining Bosh vaziri A. MUTALOV

Toshkent sh.,

1995-yil 26-may,

185-son

Vazirlar Mahkamasining 1995-yil 26-maydagi 185-son qaroriga ILOVA

Uy-joy fondida va ijtimoiy-madaniy maqsadlardagi obyektlarda suv va gazni hisobga olish asboblarini oʻrnatish va ulardan foydalanish haqida

nizom

I. Umumiy qoidalar

1. Mazkur Nizom uy-joylarda va ijtimoiy-madaniy obyektlarda energiya manbalari (suv va gaz)ni hisobga olish asboblarini oʻrnatish va ulardan foydalanish tartibini, shuningdek energiya manbalarini yetkazib beruvchi tashkilotlar bilan isteʼmolchilar oʻrtasidagi oʻzaro hisob-kitoblarni tartibga soladi.

2. Nizomda energiya manbalari (suv va gaz) isteʼmolchilari bilan hisob-kitob qilishda hisobga olish asboblarini yalpi qoʻllashga bosqichma-bosqich oʻtish nazarda tutilgan.

II. Asosiy atamalar va tushunchalar

Energiya manbalarini hisobga olish asboblari — quvur orqali haqiqatda oʻtadigan suv va gaz hajmini bevosita miqdoriy hisobga olishni amalga oshiruvchi hamda energiya manbalari (suv, gaz) ni oʻlchashning aniqligi, barqarorligi xususida har ikkala tarafni (isteʼmolchini va yetkazib beruvchini) qoniqtiradigan hisoblagich qurilma.

Suv va gazni hisobga olish asboblari Oʻzbekistonda qabul qilingan oʻlchov birliklarida ifodalangan shkalaga ega boʻlishi, har xil hajmdagi oqimlarni oʻlchash uchun zarur va yetarli boʻlgan gradatsiyalarda chiqarilishi hamda xavfsizlik texnikasi, foydalanish, tuzatish mumkinligi, oʻzaro almashtirish, qurilma indikatorlarini koʻrishning osonligi boʻyicha texnik reglamentlari yoki standartlari talablarini qoniqtirish kerak.

Energiya manbalari — yetkazib beruvchi tomonidan isteʼmolchiga beriladigan va texnik reglamentlar yoki standartlar talablariga javob beradigan yonadigan gaz va ichimlik suv.

Yetkazib beruvchi — “Oʻzkommunxizmat” agentligi, “Oʻztransgaz” aksiyadorlik kompaniyasi tarkibiga kiruvchi va boshqa idoralarning suv va gazni bevosita isteʼmolchiga berishga tayyorlash va yetkazib berishni amalga oshiruvchi korxonasi.

Isteʼmolchi — oʻz ehtiyojlarini qondirish uchun energiya manbalaridan foydalanuvchi uy-joyning, ijtimoiy-madaniy maqsadlardagi obyektning va boshqa korxonalarning egasi (mulkdor, kvartirani ijaraga oluvchi, xususiylashtirilgan uy-joy egalari shirkati, mahalla qoʻmitasi).

III. Energiya manbalarini hisobga olish asboblariga qoʻyiladigan talablar

1. Energiya manbalarini hisobga olish uchun sinovdan oʻtgan va Oʻzbekiston Respublikasi oʻlchov vositalari davlat reyestriga kiritilgan, suv taʼminoti va gaz taʼminoti tarmoqlarining isteʼmolchilarga kirish joylarida oʻrnatiladigan suv va gazni oʻlchaydigan maxsus asboblar qoʻllaniladi.

2. Energiya manbalarini hisobga olish asboblari oʻlchanadigan mahsulotning aniqligi boʻyicha isteʼmolchini va yetkazib beruvchini qoniqtiradigan boʻlishi hamda gradatsiyasiga koʻra ehtimol tutilgan eng yuqori isteʼmolga muvofiq kelishi kerak.

3. Hisobga olish asboblari shkalalari oʻlchov birliklari Xalqaro birliklar tizimi (SI) ning Oʻzbekiston Respublikasida qabul qilingan fizik miqdorlarida ifodalanadi.

4. Oʻrnatish uchun energiya manbalarini hisobga olish asboblarining texnik reglamentlari yoki standartlari talablarini qoniqtiruvchi, energiya manbalarining oʻlchanadigan hajmlariga muvofiq keluvchi va ushbu mintaqada ixtisoslashtirilgan tuzatish va sinab koʻrib asbob-uskunalari bilan taʼminlangan har qanday turi qoʻllaniladi.

IV. Energiya manbalarini hisobga olishga oʻtish tartibi

1. Energiya manbalarini hamma joyda hisobga olishga bozor suv va gazni hisobga olish asboblari bilan toʻldirilishi davomida bosqichma-bosqich oʻtish belgilanadi.

2. Yangi qurilishda obyekt energiya manbalarini hisobga olish asboblari oʻrnatilgan holda foydalanishga qabul qilib olinadi, asboblar va hisobga olish asboblarini oʻrnatish ishlari qiymati smetalarda nazarda tutiladi.

Mukammal tuzatish va rekonstruksiya qilishda asboblar va ularni oʻrnatish ishlari qiymati mukammal va rekonstruksiyalash smetalari bilan belgilanadi.

3. Mavjud uy-joy fondida, ijtimoiy-madaniy maqsadlardagi obyektlarda, boshqa korxonalarda suv va gazni hisobga olish asboblarini oʻrnatish obyekt egalari bilan tuziladigan kontrakt-shartnoma asosida amalga oshiriladi.

V. Energiya manbalarini hisobga olish asboblarini oʻrnatish

1. Yangidan qurilayotgan va mavjud uy-joylarda, ijtimoiy-madaniy maqsadlardagi muassasalarda va boshqa korxonalarda energiya manbalarini hisobga olish asboblari oʻrnatish bu ishlarni amalga oshirish huquqiga ega boʻlgan ixtisoslashtirilgan tashkilotlar tomonidan loyiha-smeta hujjatlariga muvofiq amalga oshiriladi.

2. Energiya manbalarini hisobga olishning har bir oʻrnatiladigan asbobiga yakka tartibdagi loyiha yoki takroriy yechimni bogʻlash loyihasi ishlab chiqiladi.

3. Energiya manbalarini hisobga olish asboblari xizmat koʻrsatuvchi xodimlarning ularga erkin yaqinlashishini, asboblarning butligi va texnik holatini koʻz bilan koʻrishni, qurilmaning shkalali-raqamli koʻrsatkichlarini yozib olish mumkinligini taʼminlaydigan hamda xavfsizlik texnikasi talablariga javob beradigan joylarda oʻrnatiladi.

4. Energiya manbalarini hisobga olish asboblari uy-joy yoki ijtimoiy-madaniy maqsadlardagi obyekt egasining hisobiga oʻrnatiladi.

Yetkazib beruvchining mablagʻlari hisobidan oʻrnatiladigan hisobga olish asboblari qiymati uy-joy yoki ijtimoiy-madaniy maqsadlardagi obyekt egasi tomonidan asboblardan foydalanishning kafolati muddati davomida toʻlanadi.

VI. Energiya manbalarini hisobga olish asboblaridan foydalanish

1. Energiya manbalarini hisobga olish asboblaridan foydalanish:

asboblarni oʻrnatish va ishdan chiqqanlarini almashtirishni;

koʻrsatkichlarni va asboblarning texnik holatini nazorat qilishni, vaqti-vaqti bilan sinab koʻrish ishlarini, asboblarni tuzatishni oʻz ichiga oluvchi hisobga olish asboblariga texnik xizmat koʻrsatishni;

shartnoma hujjatlarini tuzishni nazarda tutadi.

2. Energiya manbalarini hisobga olish asboblaridan foydalanishni, texnik xizmat koʻrsatishni, koʻrsatkichlarni nazorat qilishni sinash va tuzatish ishlarini tegishli sinab koʻrish asbobiga va koʻrsatib oʻtilgan ishlarni amalga oshirish huquqini beruvchi litsenziyaga ega boʻlgan ixtisoslashtirilgan tashkilotlar amalga oshiradi.

3. Hisobga olish asboblaridan foydalanish ishlari qiymati energiya manbalari tannarxiga tegishli boʻladi va energiya manbai uchun toʻlanadigan haqqa kiritiladi.

4. Toʻlovlarning barcha turlari, texnik foydalanish qiymati va energiya manbalarini hisobga olish asboblari qiymatini undirib olish isteʼmolchi bilan yetkazib beruvchi oʻrtasida tuziladigan shartnoma belgilanadi.

VII. Energiya manbalarini hisobga olish asboblaridan foydalanish qoidalari va nomalari buzilganligi uchun javobgarlik

1. Isteʼmolchi oʻrnatilgan energiya manbalarini hisobga olish asbobiga ehtiyotlik bilan munosabatda boʻlishga, xizmat koʻrsatuvchi xodimlarning asbob oʻrnatilgan joyga toʻsiqsiz oʻtishlarini taʼminlashga va olingan energiya manbalari (suv va gaz) qiymatini uning koʻrsatkichlari boʻyicha amaldagi tariflarga muvofiq muntazam toʻlab borishga majburdir.

2. Asbobning nosozligi aniqlangan taqdirda isteʼmolchi bu haqda energiya manbai yetkazib beruvchiga darhol maʼlum qilishi shart.

3. Energiya manbalarini hisobga olish asboblariga shikast yetkazilishi bilan bogʻliq barcha nizoli masalalar isteʼmolchi bilan yetkazib beruvchi oʻrtasida tuziladigan shartnomaga koʻra va Oʻzbekiston Respublikasi qonunchiligiga muvofiq belgilangan tartibda hal etiladi.