Mehmonxona xoʻjaligi faoliyatini yanada rivojlantirish uchun qulay shart-sharoitlar yaratish chora-tadbirlari toʻgʻrisida (433-son)

27.05.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Turizm tarmogʻini jadal rivojlantirishga oid chora-tadbirlar toʻgʻrisida” 2019-yil 5-yanvardagi PQ-4095-son qaroriga muvofiq Vazirlar Mahkamasi qaror qiladi:

1. Investorlarga yangi mehmonxona qurish va uni jihozlash uchun subsidiya ajratish hamda tashkilotlarni franchayzing toʻgʻrisidagi shartnoma asosida qisman moliyalashtirish uchun Davlat budjetidan mablagʻ ajratish tartibi haqidagi nizom ilovaga muvofiq tasdiqlansin.

2. Oʻzbekiston Respublikasi Turizmni rivojlantirish davlat qoʻmitasi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov va Oʻzbekiston Respublikasi Turizmni rivojlantirish davlat qoʻmitasining raisi vazifasini vaqtincha bajaruvchi A.U. Aqqulov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 27-may,

433-son

Vazirlar Mahkamasining 2019-yil 27-maydagi 433-son qaroriga ILOVA

Investorlarga yangi mehmonxona qurish va uni jihozlash uchun subsidiya ajratish hamda tashkilotlarni franchayzing toʻgʻrisidagi shartnoma asosida qisman moliyalashtirish uchun Davlat budjetidan mablagʻ ajratish tartibi haqidagi

Nizom

1-bob. Umumiy qoidalar

1. Ushbu Nizom yangi mehmonxona va boshqa joylashtirish vositalarini (keyingi oʻrinlarda mehmonxonalar deb ataladi) qurib, 2019-yil 5-yanvardan boshlab 2023-yil 31-dekabrga qadar foydalanishga topshirgan tadbirkorlik subyektiga (keyingi oʻrinlarda investor deb ataladi) ushbu mehmonxonani qurish va jihozlash xarajatlarining bir qismini qoplash maqsadida Oʻzbekiston Respublikasi Davlat budjetidan (keyingi oʻrinlarda Davlat budjeti deb ataladi) mablagʻ ajratish, shuningdek, 2019-yil 5-yanvardan boshlab taniqli va nufuzli mehmonxona brendlaridan foydalanish boʻyicha franchayzing toʻgʻrisida shartnoma tuzgan Oʻzbekiston Respublikasi rezidentlari boʻlgan tadbirkorlik subyektlarini (keyingi oʻrinlarda tashkilotlar deb ataladi) qisman moliyalashtirish tartibini belgilaydi.

2. Ushbu Nizomda quyidagi tushunchalardan foydalaniladi:

franchayzing toʻgʻrisidagi shartnoma — tashkilotlar uchun dunyoning taniqli va nufuzli top-50 mehmonxona brendlaridan yoki top-5 mehmonxona tarmoqlaridan foydalanish boʻyicha tuzilgan shartnoma;

subsidiya — investorlarga mehmonxona qurish va uni jihozlash xarajatlarining bir qismini qoplash maqsadida Davlat budjeti hisobidan ajratiladigan mablagʻlar.

yangi qurilgan mehmonxona — tasdiqlangan loyiha asosida kapital bino va inshoot sifatida qurilgan yoki oxirgi oʻn yilda mehmonxona fondida mavjud boʻlmagan holda qayta qurilgan yoxud qurilish jarayonida oʻzgartirilgan loyiha boʻyicha (mehmonxonani rekonstruksiya va (yoki) renovatsiya qilish bundan mustasno) joylashtirish vositasi sifatida qurilib yangidan ishga tushirilgan obyekt.

3. Investorlarga yangi qurilgan mehmonxonasi 3 yulduzli toifaga va 50 ta xonadan kam boʻlmagan xonalar fondiga ega yoki 4 yulduzli toifaga va 100 ta xonadan kam boʻlmagan xonalar fondiga ega boʻlganda subsidiya ajratiladi.

Bunda yangi qurilgan mehmonxona 2023-yil 31-dekabrga qadar foydalanishga topshirilishi lozim.

Investorlarga subsidiya ajratish 2019-yil 5-yanvardan boshlab, qoʻshimcha ravishda yangi tashkil etilayotgan mehmonxonalarning xonalari fondi 50 mingtaga yetguniga qadar amal qiladi.

Oʻzbekiston Respublikasi Turizm va madaniy meros vazirligi (keyingi oʻrinlarda Vazirlik deb ataladi) har chorak yakuni bilan qoʻshimcha ravishda yangi tashkil etilayotgan mehmonxonaning xonalari hisobini yuritadi va Oʻzbekiston Respublikasi Moliya vazirligiga taqdim etadi.

4. Tashkilotlar dunyoning taniqli va nufuzli mehmonxona brendlaridan foydalanish boʻyicha franchayzing toʻgʻrisidagi shartnoma kuchga kirgan vaqtdan boshlab, uch yil mobaynida har yili bir marotaba Oʻzbekiston Respublikasi Davlat budjeti mablagʻlari hisobidan qisman moliyalashtiriladi (keyingi oʻrinlarda qisman moliyalashtirish deb ataladi).

Bunda franchayzing toʻgʻrisidagi shartnomalar 2019-yil 5-yanvardan soʻng kuchga kirgan boʻlishi lozim.

Tashkilotlarni qisman moliyalashtirishning umumiy hajmi koʻpi bilan 10 million AQSh dollari ekvivalentiga teng boʻladi.

5. Investorlar subsidiya olishi va tashkilotlar qisman moliyalashtirilishi uchun hujjatlarni topshirish sanasiga quyidagi talablarga javob berishi zarur:

Oʻzbekiston Respublikasi Soliq kodeksida nazarda tutilgan soliq va yigʻimlar boʻyicha qarzi boʻlmagan;

bankrotlik va tugatish jarayonida boʻlmagan.

6. Investorlarni subsidiyalash va tashkilotlarni qisman moliyalashtirish ushbu Nizomga 1-ilovaga muvofiq sxema boʻyicha amalga oshiriladi.

2-bob. Investorlarga subsidiya ajratish tartibi

7. Investorlarga subsidiya 1 marotaba ajratilib, uning miqdori kelgusi yil uchun Davlat budjeti parametrlarini tasdiqlash jarayonida ushbu miqdorni har yili indeksatsiya qilgan holda:

3 yulduzli toifaga ega mehmonxonalardagi har bir xona uchun 40 million soʻmni;

4 yulduzli toifaga ega mehmonxonalardagi har bir xona uchun 65 million soʻmni tashkil etadi.

8. Investorlar subsidiya ajratilishi uchun Vazirlikka ushbu Nizomga 2-ilovaga muvofiq shaklda subsidiya olish toʻgʻrisida ariza (keyingi oʻrinlarda ariza deb ataladi) bilan murojaat qiladi.

9. Arizaga quyidagi hujjatlar ilova qilinadi:

ariza beruvchining — yuridik shaxs boʻlgan investorning nomi, joylashgan joyi (pochta manzili), STIR va tijorat bankidagi hisobraqami rekvizitlari;

mehmonxona shartnoma asosida boshqa yuridik shaxsga ishonchli boshqaruvga berilgan hollarda — investor va ishonchli boshqaruvchi oʻrtasida belgilangan tartibda tuzilgan mol-mulkni ishonchli boshqarish toʻgʻrisidagi shartnoma nusxasi;

Qoʻmita huzuridagi “Turizm xizmatlarini sertifikatlash markazi” DUK tomonidan arizachiga, mehmonxona ishonchli boshqaruvga berilgan hollarda — ishonchli boshqaruvchiga taqdim etilgan 3 yoki 4 yulduzli mehmonxona toifasi koʻrsatilgan muvofiqlik sertifikatining nusxasi;

koʻchmas mulk obyektlariga boʻlgan huquqlarning davlat reyestridan koʻchirma.

10. Ushbu Nizomning 9-bandiga muvofiq taqdim etilishi belgilangan muvofiqlik sertifikatini investor yoki ishonchli boshqaruvchi tomonidan olinishida ushbu jarayonga xizmatlar sohasidagi xorijiy “Katta toʻrtlik” kompaniyalarini jalb etish (keyingi oʻrinlarda xorijiy kompaniya deb ataladi) sertifikatlashtirishning majburiy sharti hisoblanadi.

Xorijiy kompaniya yoki uning Oʻzbekiston Respublikasidagi vakolatxonasini jalb etish boʻyicha qoʻshimcha xarajatlar sertifikatlashtirish shartnomasiga kiritiladi.

Xorijiy kompaniya yoki uning Oʻzbekiston Respublikasidagi vakolatxonasi tashkilotning tanloviga asosan Qoʻmita tomonidan jalb etiladi.

11. Vazirlik ariza kelib tushgan kundan boshlab oʻn ish kunida uning mazkur Nizomda belgilangan talablarga mosligini oʻrganib chiqadi.

12. Arizani oʻrganib chiqishda qoʻshimcha oʻrganishlar oʻtkazish talab etilsa, Vazirlik ariza beruvchini yozma shaklda yoki elektron axborot tizimi orqali xabardor qiladi hamda arizani oʻrganib chiqishni qoʻshimcha 10 ish kuniga uzaytirishi mumkin.

13. Vazirlik arizani oʻrganib chiqib, bir ish kunida subsidiya berish yoki subsidiya berishni rad etish toʻgʻrisida qaror qabul qiladi va ushbu qaror nusxasini ariza beruvchiga qaror qabul qilingan kuni yuboradi.

Ariza beruvchiga subsidiya berish toʻgʻrisidagi qarorda subsidiya miqdori, davri, mehmonxona nomi, yulduz toifasi va xonalar fondi, joylashgan joyi (pochta manzili) va uning kadastr raqami, subsidiya olayotgan investor -yuridik shaxs nomi va STIR raqami, tijorat bankidagi hisobraqami koʻrsatiladi.

Mazkur qaror nusxasi qaror qabul qilingan kundan boshlab, bir ish kunida Vazirlik tomonidan Oʻzbekiston Respublikasi Moliya vazirligiga (keyingi oʻrinlarda Moliya vazirligi deb ataladi) yuboriladi.

14. Ariza beruvchiga subsidiya berish rad etilgan taqdirda, subsidiya berishni rad etish uchun asos boʻlgan sabablar aniq koʻrsatib oʻtilgan subsidiya berishni rad etish toʻgʻrisidagi qaror arizachiga ushbu qaror qabul qilingan kundan boshlab bir ish kunida yuboriladi.

Ariza beruvchi qarorni olgan kundan boshlab, koʻpi bilan ikki oy davomida koʻrsatib oʻtilgan kamchiliklarni bartaraf etishi va ularning bartaraf etilganini tasdiqlovchi tegishli hujjatlarni ilova qilgan holda, Vazirlikka takroran ariza bilan murojaat qilishi mumkin.

15. Subsidiya berish quyidagi asoslarga koʻra rad etilishi mumkin:

ushbu Nizomning 9-bandida koʻrsatib oʻtilgan hujjatlar va maʼlumotlar toʻliq hajmda taqdim qilinmaganligi;

ariza beruvchi ushbu Nizomning 5-bandida koʻrsatilgan talablarga javob bermasligi.

Subsidiya berishni ushbu bandda koʻrsatib oʻtilmagan asoslar boʻyicha rad etish mumkin emas.

16. Ariza takroran taqdim etilgan kundan boshlab besh ish kuni mobaynida Vazirlik tomonidan qayta koʻrib chiqiladi.

Bunda yangi asoslar boʻyicha subsidiya berishni rad etish mumkin emas.

17. Ushbu Nizomning 14-bandi 2-xatboshisida koʻrsatilgan muddat tugagandan keyin taqdim qilingan ariza yangidan berilgan deb hisoblanadi.

3-bob. Tashkilotlarni qisman moliyalashtirish tartibi

18. Tashkilotlarni qisman moliyalashtirish quyidagi hajmda amalga oshiriladi:

3 yulduzli toifaga ega boʻlgan dastlabki 50 ta mehmonxona — har bir mehmonxonaning bitta xonasi uchun yillik 200 AQSh dollari ekvivalentida;

4 yulduzli toifaga ega boʻlgan dastlabki 30 ta mehmonxona — har bir mehmonxonaning bitta xonasi uchun yillik 400 AQSh dollari ekvivalentida.

19. Tashkilotlarni qisman moliyalashtirish franchayzing toʻgʻrisidagi shartnoma “Brand Finance” kompaniyasining (ushbu kompaniya oʻz faoliyatini yakunlagan taqdirda Turizm, sport, madaniy meros, transport logistikasi va xizmatlar sohalarida davlat-xususiy sheriklik hamda raqamlashtirishni rivojlantirish masalalari boʻyicha muvofiqlashtiruvchi kengash (keyingi oʻrinlarda Kengash deb ataladi) tomonidan boshqa reyting agentligi tanlanadi) top-50 reytingiga yoki top-5 mehmonxona tarmoqlariga kiruvchi (hujjatlarni topshirishdan avval uch yil davomida kamida bir marotaba kirgan boʻlishi lozim) hamda Kengash tomonidan shakllantiriladigan roʻyxat asosida mehmonxonalar bilan tuzilganda amalga oshiriladi.

“Brand Finance” kompaniyasining top-50 reytingiga yoki top-5 mehmonxona tarmoqlariga kiruvchi mehmonxona bilan franchayzing toʻgʻrisida shartnoma tuzilgandan soʻng ushbu mehmonxona top-50 reyting yoki top-5 mehmonxona tarmoqlari roʻyxatidan chiqarilgan taqdirda, franchayzing shartnoma oʻz kuchini yoʻqotmagan boʻlsa ham, top-50 reyting yoki top-5 mehmonxona tarmoqlari roʻyxatidan chiqarilgani eʼlon qilingan yildan keyingi yil uchun qisman moliyalashtirish davom ettirilishi toʻxtatiladi.

20. Tashkilotlar qisman moliyalashtirilishi uchun Vazirlikka ushbu Nizomga 3-ilovaga muvofiq shakldagi franchayzing toʻgʻrisidagi shartnoma boʻyicha qisman moliyalashtirish uchun ariza (keyingi oʻrinlarda franchayzing boʻyicha ariza deb ataladi) bilan murojaat qiladi.

21. Franchayzing boʻyicha arizaga quyidagilar ilova qilinadi:

ariza beruvchining — yuridik shaxs boʻlgan Oʻzbekiston Respublikasi rezidentining nomi, joylashgan joyi (pochta manzili) va STIR raqami va tijorat bankidagi hisobraqami rekvizitlari;

franchayzing toʻgʻrisida tuzilgan shartnoma nusxasi;

Vazirlik huzuridagi “Turizm xizmatlarini sertifikatlash markazi” DUK tomonidan taqdim etilgan 3 yoki 4 yulduzli mehmonxona toifasi koʻrsatilgan muvofiqlik sertifikatining nusxasi.

22. Vazirlik franchayzing boʻyicha ariza kelib tushgan kundan boshlab, oʻn ish kuni ichida uning mazkur Nizomda belgilangan talablarga mosligini oʻrganib chiqadi.

23. Arizani oʻrganib chiqishda qoʻshimcha oʻrganishlar oʻtkazish talab etilsa, Vazirlik ariza beruvchini yozma shaklda yoki elektron axborot tizimi orqali xabardor qiladi hamda arizani oʻrganib chiqishni qoʻshimcha 10 ish kuniga uzaytirishi mumkin.

24. Vazirlik franchayzing boʻyicha arizani oʻrganib chiqib, bir ish kunida qisman moliyalashtirish yoki qisman moliyalashtirishni rad etish toʻgʻrisida qaror qabul qiladi va ushbu qaror nusxasini franchayzing boʻyicha ariza beruvchiga qaror qabul qilingan kuni yuboradi.

Qisman moliyalashtirish toʻgʻrisidagi qarorda moliyalashtirish miqdori, davri, mehmonxona nomi, franchayzing toʻgʻrisidagi shartnomaga muvofiq xorijiy mehmonxona brendi nomi, yulduz toifasi va xonalar fondi, joylashgan joyi (pochta manzili) va moliyalashtirilayotgan tashkilot — yuridik shaxs nomi va STIR raqami, tijorat bankdagi hisobraqami koʻrsatiladi.

Mazkur qaror nusxasi qaror qabul qilingan kundan boshlab, bir ish kunida Moliya vazirligiga yuboriladi.

25. Qisman moliyalashtirish rad etilgan taqdirda, qisman moliyalashtirishni rad etish uchun asos boʻlgan sabablar aniq koʻrsatib oʻtilgan qisman moliyalashtirishni rad etish toʻgʻrisidagi qaror franchayzing boʻyicha ariza beruvchiga ushbu qaror qabul qilingan kundan boshlab bir ish kunida yuboriladi.

Franchayzing boʻyicha ariza beruvchi qarorni olgan kundan boshlab, koʻpi bilan ikki oy davomida koʻrsatib oʻtilgan kamchiliklarni bartaraf etishi va ularning bartaraf etilganini tasdiqlovchi tegishli hujjatlarni ilova qilgan holda, Vazirlikka takroran ariza bilan murojaat qilishi mumkin.

26. Qisman moliyalashtirish quyidagi asoslarga koʻra rad etilishi mumkin:

ushbu Nizomning 21-bandida koʻrsatib oʻtilgan hujjatlar va maʼlumotlar toʻliq hajmda taqdim qilinmaganligi;

franchayzing boʻyicha arizachi ushbu Nizomning 5-bandida koʻrsatilgan talablarga javob bermasligi.

Qisman moliyalashtirishni ushbu bandda koʻrsatib oʻtilmagan asoslar boʻyicha rad etish mumkin emas.

27. Franchayzing boʻyicha ariza takroran taqdim etilgan kundan boshlab, besh ish kuni mobaynida Vazirlik tomonidan qayta koʻrib chiqiladi.

Bunda yangi asoslar boʻyicha qisman moliyalashtirishni rad etish mumkin emas.

28. Ushbu Nizomning 25-bandi 2-xatboshisida koʻrsatilgan muddat tugagandan keyin taqdim qilingan franchayzing boʻyicha ariza yangidan berilgan deb hisoblanadi.

4-bob. Davlat budjetidan subsidiya ajratish va qisman moliyalashtirish tartibi

29. Investorlarga foydalanishga topshirilgan mehmonxonalar uchun qurish va jihozlash xarajatlarining bir qismini qoplash hamda taniqli va nufuzli mehmonxona brendlaridan foydalanish boʻyicha franchayzing shartnomasini qisman toʻlash uchun mablagʻlar 2019-yilda Oʻzbekiston Respublikasi respublika budjetining qoʻshimcha mablagʻlari va 2020-2021-yillarda esa Davlat budjeti parametrlarida nazarda tutiladigan mablagʻlar hisobidan amalga oshiriladi.

30. Investorlarga subsidiya ajratish yoki tashkilotlarga franchayzing toʻgʻrisidagi shartnoma boʻyicha qisman moliyalashtirish uchun Vazirlik Moliya vazirligiga investor va tashkilotlar toʻgʻrisidagi maʼlumotlar va ajratilayotgan mablagʻlar hisob-kitobi aks ettirilgan buyurtmanomani taqdim etadi.

31. Moliya vazirligi Vazirlik tomonidan taqdim etilgan buyurtmanomani uch ish kunida koʻrib chiqadi va tegishli mablagʻlarni Vazirlikning shaxsiy gʻazna hisobvaraqlariga oʻtkazadi.

Bunda investorlarga subsidiya ajratish yoki tashkilotlarga franchayzing toʻgʻrisidagi shartnoma boʻyicha qisman moliyalashtirish uchun Moliya vazirligi tomonidan Vazirlikka belgilangan tartibda shaxsiy gʻazna hisobvaraqlari ochiladi.

32. Mablagʻlar kelib tushganidan soʻng ularni Vazirlik besh ish kunida investor va tashkilotlarning ularga xizmat koʻrsatuvchi tijorat banklardagi hisobraqamlariga mablagʻlarni oʻtkazib beradi.

33. Moliyaviy yil yakuni bilan mazkur shaxsiy gʻazna hisobvaraqlarida foydalanilmay qolgan budjet mablagʻlari Oʻzbekiston Respublikasi Respublika budjetiga qaytariladi.

5-bob. Yakunlovchi qoidalar

34. Subsidiya berish yoki qisman moliyalashtirish uchun Davlat budjetidan mablagʻ ajratilgan tashkilotlar roʻyxati (reyestri) Vazirlikning veb-saytiga joylashtiriladi.

Davlat budjetidan ajratilgan mablagʻlar va qoʻshimcha ravishda tashkil etilayotgan xonalar soni toʻgʻrisidagi maʼlumot har oy yakuni boʻyicha yangilanib boriladi hamda yillar va tashkilotlar kesimida aks ettiriladi.

35. Subsidiya olish yoki franchayzing toʻgʻrisidagi shartnoma boʻyicha qisman moliyalashtirilishi maqsadida taqdim etilgan maʼlumotlar va hujjatlarning toʻgʻriligiga tegishli investorlar va tashkilotlar masʼul hisoblanadi.

36. Vazirlik subsidiya berish hamda qisman moliyalashtirish ishlarini tashkil etish, muvofiqlashtirish va monitoring qilish, Davlat budjetidan ajratilgan mablagʻlarning investorlar va tashkilotlarga yetkazilishi yuzasidan masʼul hisoblanadi.

37. Oʻzbekiston Respublikasi Davlat budjetidan mablagʻlarning ajratilishi va investorlarga yetkazilishini Oʻzbekiston Respublikasi Moliya vazirligi huzuridagi Davlat moliyaviy nazorati inspeksiyasi nazorat qiladi.

38. 3 yoki 4 yulduzli toifaga ega boʻlgan mehmonxona uchun subsidiya ajratilgan davrdan boshlab 5 yildan kam boʻlmagan muddatda mehmonxonaning kamida ushbu toifaga egaligi mehmonxona ishonchli boshqaruvga berilganligidan qatʼiy nazar, investor tomonidan taʼminlanishi lozim, aks holda ajratilgan subsidiya Davlat budjetiga qaytariladi.

39. Dunyoning taniqli va nufuzli mehmonxona brendlaridan foydalanish boʻyicha tuzilgan shartnomalarining amal qilinishi ustidan monitoring Vazirlik tomonidan amalga oshiriladi.

Franchayzing toʻgʻrisidagi shartnoma bekor qilingan vaqtdan boshlab Davlat budjetidan qisman moliyalashtirish toʻxtatiladi.

40. Ushbu Nizom talablari buzilishida aybdor boʻlgan shaxslar qonun hujjatlariga muvofiq javob beradilar.

Investorlarga yangi mehmonxona qurish va uni jihozlash uchun subsidiya ajratish hamda tashkilotlarni franchayzing toʻgʻrisidagi shartnoma asosida qisman moliyalashtirish uchun Oʻzbekiston Respublikasi Davlat budjetidan mablagʻ ajratish tartibi haqidagi Nizomga 1-ILOVA

Investorlarga Davlat budjeti hisobidan subsidiya ajratish va tashkilotlarni qisman moliyalashtirish

SXEMASI

Subyektlar Tadbirlar Bajarish muddati Investor/tashkilot Ushbu Nizomda nazarda tutilgan hujjatlarni tayyorlash va Turizm va madaniy meros vazirligiga subsidiya olish toʻgʻrisida yoki/va franchayzing toʻgʻrisidagi shartnoma boʻyicha qisman moliyalashtirish uchun ariza bilan murojaat etish. Arizachining xohishiga koʻra Turizm va madaniy meros vazirligi Arizani oʻrganib chiqish. 10 ish kunida, qoʻshimcha oʻrganishni talab etgan holatlarda — 20 ish kunida Turizm va madaniy meros vazirligi Subsidiya berish yoki rad etish/Davlat budjeti mablagʻlari hisobidan qisman moliyalashtirish yoki moliyalashtirishni rad etish toʻgʻrisida qaror qabul qilish va arizachiga yuborish. 1 ish kunida Turizm va madaniy meros vazirligi Subsidiya berish yoki rad etish/Davlat budjeti mablagʻlari hisobidan qisman moliyalashtirish yoki moliyalashtirishni rad etish toʻgʻrisidagi qaror nusxasini Moliya vazirligiga taqdim etish. 1 ish kunida Investor/tashkilot Subsidiya berishni rad etish/Davlat budjeti mablagʻlari hisobidan qisman moliyalashtirishni rad etish toʻgʻrisidagi qarorni olganda, qarorda koʻrsatib oʻtilgan kamchiliklarni bartaraf etish va ularning bartaraf etilganini tasdiqlovchi tegishli hujjatlarni ilova qilgan holda, Turizm va madaniy meros vazirligiga takroran ariza bilan murojaat qilish. 2 oydan koʻp emas Turizm va madaniy meros vazirligi Ariza takroran taqdim etilganda, uni qayta koʻrib chiqish. 5 ish kunida Moliya vazirligi Buyurtmanomani koʻrib chiqish va tegishli mablagʻlarni Turizm va madaniy meros vazirligining shaxsiy gʻazna hisobvaraqalariga oʻtkazish. 3 ish kunida Turizm va madaniy meros vazirligi Investor/tashkilotning tijorat banklaridagi hisobraqamlariga mablagʻlarni oʻtkazib berish. 5 ish kunida

Investorlarga yangi mehmonxona qurish va uni jihozlash uchun subsidiya ajratish hamda tashkilotlarni franchayzing toʻgʻrisidagi shartnoma asosida qisman moliyalashtirish uchun Oʻzbekiston Respublikasi Davlat budjetidan mablagʻ ajratish tartibi haqidagi Nizomga 2-ILOVA

(2-ilova Oʻzbekiston Respublikasi Vazirlar Mahkamasining 2022-yil 20-maydagi 278-sonli qarori tahririda — Qonunchilik maʼlumotlari milliy bazasi, 21.05.2022-y., 09/22/278/0439-son)

Investorlarga yangi mehmonxona qurish va uni jihozlash uchun subsidiya ajratish hamda tashkilotlarni franchayzing toʻgʻrisidagi shartnoma asosida qisman moliyalashtirish uchun Oʻzbekiston Respublikasi Davlat budjetidan mablagʻ ajratish tartibi haqidagi Nizomga 3-ILOVA

(3-ilova Oʻzbekiston Respublikasi Vazirlar Mahkamasining 2022-yil 20-maydagi 278-sonli qarori tahririda — Qonunchilik maʼlumotlari milliy bazasi, 21.05.2022-y., 09/22/278/0439-son)