Oʻzbekiston Respublikasi Hukumati qarorlarini “Ixtirolar, foydali modellar va sanoat namunalari toʻgʻrisida” gi Oʻzbekiston Respublikasi Qonuniga muvofiqlashtirish haqida (91-son)

20.03.1995

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Oliy Kengashining “Ixtirolar, foydali modellar va sanoat namunalari toʻgʻrisida” gi Oʻzbekiston Respublikasi Qonunini amalga kiritish tartibi haqida” 1994-yil 6-maydagi qaroriga muvofiq Vazirlar Mahkamasi qaror qiladi:

1. Belgilab qoʻyilsinki:

SSSRning ixtiro uchun mualliflik guvohnomalari va SSSR ning sanoat namunalari uchun guvohnomalari, ular boʻyicha talabnomalar berilgan sanadan boshlab tegishli ravishda 20 va 15 yillik muddatlar oʻtmagan boʻlsa, Oʻzbekiston Respublikasining muhofaza hujjatlariga almashtirilishi mumkin.

SSSRning muhofaza hujjatlari bilan muhofaza qilingan ixtirolar yoki sanoat namunalaridan foydalanishni qonuniy ravishda boshlagan jismoniy va yuridik shaxslar ushbu sanoat mulki obyektlaridan litsenziya shartnomasi tuzmasdan bundan buyon ham foydalanish huquqini saqlab qoladilar.

Bunday hollarda mualliflarga mukofot pullari toʻlash SSSR ning muhofaza hujjatlari bilan muhofaza qilingan ixtirolar yoki sanoat namunalari uchun mukofot pullari toʻlash boʻyicha belgilangan tartibda amalga oshiriladi.

2. Quyidagilar oʻz kuchini yoʻqotgan deb hisoblansin:

Vazirlar Mahkamasining “Oʻzbekiston Respublikasining sanoat mulki toʻgʻrisida” Vaqtinchalik nizom haqida 1992-yil 15-sentabrdagi 432-son qarori;

Vazirlar Mahkamasining “Oʻzbekiston Respublikasining sanoat mulki toʻgʻrisida Vaqtinchalik nizom haqida” 1992-yil 15-sentabrdagi 432-son qaroriga oʻzgartirishlar kiritish toʻgʻrisida” 1993-yil 21-iyundagi 298-son qarori;

Vazirlar Mahkamasining “Oʻzbekiston Respublikasi Vazirlar Mahkamasining 1993-yil 21-iyundagi 298-son qarorining amalda boʻlishini uzaytirish toʻgʻrisida” 1994-yil 22-fevraldagi 86-son qarori.

Oʻzbekiston Respublikasining Bosh vaziri A. MUTALOV

Toshkent sh.,

1995-yil 20-mart,

91-son