“Koson va Muborak tumanlari markazlari hamda Kitob-Shahrisabz yerosti suv konidan suv olish quvuriga yaqin boʻlgan qishloq aholi punktlarining suv taʼminoti tizimini rekonstruksiya qilish” loyihasini amalga oshirish chora-tadbirlari toʻgʻrisida (427-son)

23.05.2019

Oʻzbekiston Respublikasi Vazirlar Mahkamasining

qarori

Qashqadaryo viloyatining Koson va Muborak tumanlari aholisi hamda xoʻjalik yurituvchi subyektlarini sifatli ichimlik suvi bilan taʼminlashni yanada yaxshilash, shuningdek, Saudiya taraqqiyot jamgʻarmasi va OPEK xalqaro taraqqiyot jamgʻarmasi bilan hamkorlikni kengaytirish maqsadida Vazirlar Mahkamasi qaror qiladi:

1. “Koson va Muborak tumanlari markazlari hamda Kitob-Shahrisabz yerosti suv konidan suv olish quvuriga yaqin boʻlgan qishloq aholi punktlarining suv taʼminoti tizimini rekonstruksiya qilish” loyihasini (keyingi oʻrinlarda loyiha deb ataladi) amalga oshirish uchun:

a) 2017-yil 17-mayda Oʻzbekiston Respublikasi va Saudiya taraqqiyot jamgʻarmasi (keyingi oʻrinlarda STJ deb ataladi) oʻrtasida qarz berish toʻgʻrisida 5 yillik imtiyozli davrni oʻz ichiga olgan 20 yil mobaynida qaytarish muddati bilan qiymati 98,85 mln saudiya riali (26,6 mln AQSH dollari ekvivalentida) boʻlgan qarz bitimi imzolangani;

b) 2018-yil 3-aprelda Oʻzbekiston Respublikasi va OPEK xalqaro rivojlanish jamgʻarmasi (keyingi oʻrinlarda OPEK jamgʻarmasi deb ataladi) oʻrtasida qarz berish toʻgʻrisida 5 yillik imtiyozli davrni oʻz ichiga olgan 20 yil mobaynida qaytarish muddati bilan qiymati 16,25 mln AQSH dollari boʻlgan qarz bitimi imzolangani;

v) loyihaning umumiy qiymati 50,95 mln AQSH dollarini, shu jumladan:

STJ va OPEK jamgʻarmasi qarzlari 42,85 mln AQSH dollarini;

loyihani amalga oshirishda Oʻzbekiston Respublikasining hissasi soliq va bojxona imtiyozlari koʻrinishda 8,1 mln AQSH dollari ekvivalentini;

g) loyihani amalga oshirish davri 9 yilni (2019 — 2027 yy.) tashkil etishi maʼlumot uchun qabul qilinsin.

2. Belgilab qoʻyilsinki, “Oʻzsuvtaʼminot” aksiyadorlik jamiyati (keyingi oʻrinlarda — “Oʻzsuvtaʼminot” AJ) loyihaning amalga oshirilishi, STJ va OPEK jamgʻarmasining qarz mablagʻlaridan maqsadli va samarali foydalanish uchun masʼul ijro etuvchi organ hisoblanadi.

3. Quyidagilar:

“Koson va Muborak tumanlari markazlari hamda Kitob-Shahrisabz yerosti suv konidan suv olish quvuriga yaqin boʻlgan qishloq aholi punktlarining suv taʼminoti tizimini rekonstruksiya qilish” loyihasi texnik-iqtisodiy asoslanishining asosiy texnik-iqtisodiy parametrlari 1-ilovaga* muvofiq;

“Koson va Muborak tumanlari markazlari hamda Kitob-Shahrisabz yerosti suv konidan suv olish quvuriga yaqin boʻlgan qishloq aholi punktlarining suv taʼminoti tizimini rekonstruksiya qilish” loyihasi boʻyicha STJ qarzini qaytarish va foizlarni toʻlashning prognoz jadvali 2-ilovaga* muvofiq;

“Koson va Muborak tumanlari markazlari hamda Kitob-Shahrisabz yerosti suv konidan suv olish quvuriga yaqin boʻlgan qishloq aholi punktlarining suv taʼminoti tizimini rekonstruksiya qilish” loyihasi boʻyicha OPEK jamgʻarmasining qarzini qaytarish va foizlarni toʻlashning prognoz jadvali 3-ilovaga* muvofiq;

“Koson va Muborak tumanlari markazlari hamda Kitob-Shahrisabz yerosti suv konidan suv olish quvuriga yaqin boʻlgan qishloq aholi punktlarining suv taʼminoti tizimini rekonstruksiya qilish” loyihasi doirasida STJ va OPEK jamgʻarmasining qarz mablagʻlariga xizmat koʻrsatish xarajatlarini qoplash boʻyicha ulushlar taqsimotining prognozi 4-ilovaga* muvofiq tasdiqlansin.

* 1-2-3-4-ilovalar rus tilidagi matnda berilgan.

4. Oʻzbekiston Respublikasi moliya vaziriga STJ va OPEK jamgʻarmasining qarz mablagʻlarini Oʻzbekiston Respublikasi, “Kommunxizmat” agentligi, Qashqadaryo viloyati hokimligi va Qashqadaryo viloyati “Suvoqava” DUK oʻrtasida Qayta kreditlash toʻgʻrisidagi bitimni (keyingi oʻrinlarda Qayta kreditlash toʻgʻrisidagi bitim deb ataladi) imzolash vakolati berilsin.

5. Oʻzbekiston Respublikasi Adliya vazirligi Qayta kreditlash toʻgʻrisidagi bitim boʻyicha belgilangan tartibda yuridik xulosa bersin.

6. Oʻzbekiston Respublikasi uy-joy kommunal xizmat koʻrsatish vaziri, “Oʻzsuvtaʼminot” AJ boshqaruv raisi va Qashqadaryo viloyati hokimiga:

loyihaning tasdiqlangan texnik-iqtisodiy asoslanishining parametrlariga muvofiq loyiha oʻz vaqtida va sifatli amalga oshirilishini taʼminlaydigan tashkiliy-texnik tadbirlar amalga oshirilishi;

Qayta kreditlash toʻgʻrisidagi bitimga muvofiq STJ va OPEK jamgʻarmasi qarz mablagʻlarini qaytarish va u boʻyicha foizlarni toʻlash uchun zarur boʻlgan mablagʻlar Qashqadaryo viloyati “Suvoqava” DUKda oʻz vaqtida jamlanib borilishini taʼminlash uchun shaxsiy javobgarlik yuklansin.

7. Qashqadaryo viloyati hokimligi:

suv inshootlari va tarmoqlarini qurish uchun zarur boʻlgan yer uchastkalari belgilangan tartibda ajratilishini taʼminlasin;

2020-yildan boshlab Qashqadaryo viloyati mahalliy budjeti parametrlarida STJ va OPEK jamgʻarmasining qarzi boʻyicha foizlarni toʻlashga, asosiy qarzni qaytarishga Qashqadaryo viloyati “Suvoqava” DUKning ushbu maqsadlarga yoʻnaltiriladigan oʻz mablagʻlariga qoʻshimcha ravishda mablagʻlarni nazarda tutsin.

8. “Oʻzsuvtaʼminot” AJga loyihani muvofiqlashtirish va boshqarish hamda ushbu guruhni malakali mutaxassislar bilan taʼminlash vazifasi yuklansin.

9. Oʻzbekiston Respublikasi Investitsiyalar va tashqi savdo vazirligi, Moliya vazirligi loyiha 2020-yil va keyingi yillar uchun moʻljallangan Oʻzbekiston Respublikasi Investitsiya dasturlariga belgilangan tartibda kiritilishini taʼminlasin.

10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — transport vaziri A.J. Ramatov, Bosh vazirning investitsiyalar va tashqi iqtisodiy aloqalar masalalari boʻyicha oʻrinbosari E.M. Ganiyev va Oʻzbekiston Respublikasi uy-joy kommunal xizmat koʻrsatish vaziri M.X. Saliyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 23-may,

427-son