Maktabgacha, umumiy oʻrta, oʻrta maxsus, professional va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomni tasdiqlash haqida (392-son)

13.05.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Xalq taʼlimini boshqarish tizimini takomillashtirish boʻyicha qoʻshimcha chora-tadbirlar toʻgʻrisida” 2018-yil 5-sentabrdagi PF-5538-son Farmoniga muvofiq Vazirlar Mahkamasi qaror qiladi:

1. Maktabgacha, umumiy oʻrta, oʻrta maxsus, professional va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizom ilovaga muvofiq tasdiqlansin.

2. Vazirlar Mahkamasining “Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomni tasdiqlash haqida” 2016-yil 7-apreldagi 107-son qarori (Oʻzbekiston Respublikasi QT, 2016-y., 4-son, 25-modda) oʻz kuchini yoʻqotgan deb hisoblansin.

3. Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi manfaatdor vazirliklar va idoralar bilan birgalikda oʻzlari qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining ijtimoiy rivojlantirish masalalari boʻyicha oʻrinbosari A.A. Abduxakimov, Vazirlar Mahkamasi huzuridagi Taʼlim sifatini nazorat qilish davlat inspeksiyasi boshligʻi U.N. Tashkenbayev, maktabgacha taʼlim vaziri A.V. Shin, xalq taʼlimi vaziri Sh.X. Shermatov hamda oliy va oʻrta maxsus taʼlim vaziri I.U. Madjidov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 13-may,

392-son

Vazirlar Mahkamasining 2019-yil 13-maydagi 392-son qaroriga ILOVA

Maktabgacha, umumiy oʻrta, oʻrta maxsus, professional va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisida

NIZOM

1-bob. Umumiy qoidalar

1. Ushbu Nizom maktabgacha, umumiy oʻrta, oʻrta maxsus, professional va maktabdan tashqari davlat taʼlim muassasalari pedagog kadrlarini (keyingi oʻrinlarda pedagog kadrlar deb ataladi) attestatsiyadan oʻtkazish tartibini belgilaydi.

Mazkur Nizom Oʻzbekiston Respublikasi Adliya vazirligining yuridik texnikumlari pedagog kadrlariga nisbatan tatbiq etilmaydi.

2. Pedagog kadrlarning malaka tavsiflariga muvofiqligi tegishlicha Oʻzbekiston Respublikasi Maktabgacha taʼlim vazirligi (keyingi oʻrinlarda Maktabgacha taʼlim vazirligi deb ataladi), Oʻzbekiston Respublikasi Xalq taʼlimi vazirligi (keyingi oʻrinlarda Xalq taʼlimi vazirligi deb ataladi), Oʻzbekiston Respublikasi Oliy va oʻrta maxsus taʼlim vazirligi (keyingi oʻrinlarda Oliy va oʻrta maxsus taʼlim vazirligi deb ataladi), Oʻzbekiston Respublikasi Madaniyat vazirligi (keyingi oʻrinlarda Madaniyat vazirligi deb ataladi), Oʻzbekiston Respublikasi Jismoniy tarbiya va sport vazirligi (keyingi oʻrinlarda Jismoniy tarbiya va sport vazirligi deb ataladi) hamda tizimida taʼlim muassasalari boʻlgan vazirliklar va idoralar tomonidan belgilangan tartibda tasdiqlangan xodimlarning asosiy lavozimlari malaka tavsiflaridagi (keyingi oʻrinlarda malaka tavsiflari deb ataladi) talablar asosida oʻrganiladi.

3. Quyidagilar pedagog kadrlarni attestatsiyadan oʻtkazishning asosiy vazifalari hisoblanadi:

oʻquv fani boʻyicha malakasi, dars oʻtish mahorati, mehnati samaradorligi va ijtimoiy-siyosiy bilimlarini oshirgan pedagog kadrlarni ragʻbatlantirish;

ish haqi miqdorini oshirish imkoniyatlarini yaratish;

xorijiy tillarni oʻrganishni qoʻllab-quvvatlash;

kompyuter texnikasi va axborot-kommunikatsiya texnologiyalari, shu jumladan, Internet jahon axborot tarmogʻidan foydalanish boʻyicha amaliy koʻnikmalarga ega boʻlishning majburiyligini taʼminlash.

4. Attestatsiyaning asosiy prinsiplari majburiylik, davriylik, oshkoralik, kengashib ish koʻrish hamda xolislik hisoblanadi.

5. Attestatsiya pedagog kadrlar uchun har besh yilda bir marta oʻtkaziladi.

Pedagog kadrlar ularning yozma arizasiga binoan navbatdan tashqari attestatsiyadan oʻtkazilishi mumkin.

Pedagog kadrlarning attestatsiyasini tashkil etish va oʻtkazish ushbu Nizomga 1-ilovaga muvofiq sxema boʻyicha amalga oshiriladi.

Pedagog kadrlarni attestatsiyadan oʻtkazish va ularga malaka toifasini berish boʻyicha hujjatlarni qabul qilish Taʼlim sifatini nazorat qilish davlat inspeksiyasining rasmiy veb-saytidagi maxsus portali orqali amalga oshiriladi.

6. Attestatsiyadan belgilangan muddatda malaka oshirish kursini tugatganlik toʻgʻrisidagi sertifikatga ega boʻlgan:

maktabgacha va maktabdan tashqari taʼlim muassasalarining oliy va oʻrta maxsus, professional maʼlumotli;

umumiy oʻrta va oʻrta maxsus taʼlim muassasalarining oliy maʼlumotli;

professional taʼlim muassasalarining oliy, oʻrta maxsus va professional maʼlumotli pedagog kadrlari (ishlab chiqarish taʼlimi ustalari) oʻtkazilishi shart.

7. Maktabgacha, umumiy oʻrta, oʻrta maxsus, professional va maktabdan tashqari taʼlim muassasalarining:

ilmiy darajaga (fan nomzodi, falsafa doktori (Doctor of Philosophy (PhD) yoki fan doktori (Doctor of Science (DSc) darajasiga ega boʻlgan pedagog kadrlari attestatsiyaga jalb etilmaydi;

pensiya yoshida boʻlgan pedagog kadrlar attestatsiyaga oʻz xohishiga koʻra jalb etiladi.

Attestatsiyaga jalb etilmagan pedagog kadrlarning mavjud malaka toifalari va lavozimlari taʼlim muassasalarida ishlagan davrida saqlanib qoladi.

71. Oʻzbekiston Respublikasi Prezidentining “Iqtidorli yoshlarni aniqlash va yuqori malakali kadrlar tayyorlashning uzluksiz tizimini tashkil etish chora-tadbirlari toʻgʻrisida” 2019-yil 3-maydagi PQ-4306-son qarorida roʻyxati belgilangan xalqaro fan olimpiadalarida gʻoliblik (oltin, kumush, bronza medali)ni qoʻlga kiritgan oʻquvchilarni tayyorlagan umumtaʼlim muassasalarining oʻqituvchilariga — oliy, akademik litsey va kasb-hunar maktablarining oʻqituvchilariga — bosh oʻqituvchi malaka toifasi beriladi.

Respublika fan olimpiadalarida va koʻrik-tanlovlarning respublika bosqichida gʻoliblikni qoʻlga kiritgan oʻquvchilarni tayyorlagan oʻqituvchilarning malaka toifasi bir pogʻonaga oshiriladi.

8. Ishga yangi qabul qilingan pedagog kadrlar bir yildan soʻng, oliy yoki oʻrta maxsus, professional taʼlim muassasalarini bitirib birinchi bor ishga kirganlar kasbiy faoliyatiga uch yil toʻlgandan soʻng attestatsiyaga jalb etiladi.

9. Tuzilmasida umumtaʼlim boʻgʻinlari mavjud boʻlgan oʻrta maxsus va professional taʼlim muassasalarining umumiy oʻrta taʼlim bosqichida umumtaʼlim, chuqurlashtirilgan va kasbiy taʼlim fanlaridan dars berayotgan pedagog kadrlari attestatsiyadan oʻrta maxsus va professional taʼlim muassasalari uchun belgilangan tartibda oʻtkaziladi.

10. Uzrli sabablarga koʻra (mehnatga layoqatsizlik, homiladorlik, tugʻish hamda bolani parvarish qilish taʼtili va boshqalar) attestatsiyadan oʻtmagan pedagog kadrlar ish faoliyatiga qaytganlariga bir yil toʻlgandan soʻng attestatsiyaga jalb etiladi va mazkur davr mobaynida ularning malaka toifasi saqlab qolinadi (oʻz tashabbusiga koʻra attestatsiyadan oʻtmoqchi boʻlgan pedagog kadrlar bundan mustasno).

11. Malaka toifasini berish va saqlab qolish boʻyicha maktabgacha, umumiy oʻrta, oʻrta maxsus, professional va maktabdan tashqari taʼlim tashkilotlari pedagog kadrlarini attestatsiyadan oʻtkazish yil davomida amalga oshiriladi.

12. Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi (keyingi oʻrinlarda Davlat inspeksiyasi deb ataladi) Maktabgacha taʼlim vazirligi, Xalq taʼlimi vazirligi, Oliy va oʻrta maxsus taʼlim vazirligi, Madaniyat vazirligi, Jismoniy tarbiya va sport vazirligi hamda tizimida taʼlim muassasalari boʻlgan vazirliklar va idoralar bilan birgalikda har yili 20-yanvarga qadar attestatsiyadan oʻtish muddati kelgan pedagog kadrlarni attestatsiyadan oʻtkazish jadvalini ishlab chiqadi va tasdiqlaydi.

13. Maktabgacha, umumiy oʻrta, oʻrta maxsus, professional va maktabdan tashqari davlat taʼlim muassasalari (keyingi oʻrinlarda taʼlim muassasalari deb ataladi) rahbarlari attestatsiya muddatini bir oy oldin eʼlon qiladi va pedagog kadrlarni attestatsiyadan oʻtkazish tartibi bilan tanishtiradi.

14. Attestatsiyaga doir tashkiliy masalalar taʼlimni boshqarish boʻyicha maxsus vakolat berilgan davlat organlari va taʼlim muassasalari rahbarlari tomonidan amalga oshiriladi.

15. Oʻzbekiston Respublikasi Bandlik va mehnat munosabatlari vazirligi attestatsiyaning mehnat toʻgʻrisidagi qonun hujjatlarida belgilangan tartibda, pedagog kadrlarning huquqlari taʼminlangan holda oʻtishini nazorat qiladi.

16. Attestatsiya oʻtkazishda taʼlimni boshqarish boʻyicha maxsus vakolat berilgan davlat organlari hamda mahalliy davlat hokimiyati organlari faoliyatini muvofiqlashtirish va attestatsiyani nazorat qilish Davlat inspeksiyasi tomonidan amalga oshiriladi.

Muvofiqlashtirish ishlari attestatsiya jadvallarini ishlab chiqish, tasdiqlash, shuningdek, attestatsiyaga oid faoliyatni tashkil etish boʻyicha qoʻshma qarorlar loyihalarini tayyorlashda ishtirok etishdan, birinchi, oliy malaka toifali va yetakchi, bosh oʻqituvchi lavozimidagi hamda ushbu malaka toifalari va lavozimlariga talabgor pedagog kadrlar uchun test (yozma, ijodiy ish, jismoniy tarbiya fani oʻqituvchilari uchun nazariy va amaliy sinovlar) sinovlarini oʻtkazishdan hamda ularning natijalarini eʼlon qilishdan, pedagog kadrlarning attestatsiyadan oʻtganligi toʻgʻrisida sertifikatlar topshirilishini taʼminlashdan iborat.

Attestatsiyani nazorat qilish uning natijalarini tahlil qilish, baholash hamda ushbu Nizom talablari buzilgan holda qabul qilingan qarorlarga oid maʼlumotnomalarni Vazirlar Mahkamasi Taʼlim va sogʻliqni saqlash masalalari kotibiyatiga, tizimida taʼlim muassasalari boʻlgan vazirliklar va idoralarga yuborish orqali amalga oshiriladi.

2-bob. Attestatsiyani tashkil etish va attestatsiya komissiyalarini tuzish

1-§. Umumiy qoidalar

17. Pedagog kadrlar asosiy ish joyi boʻyicha attestatsiyaga jalb etiladi. Taʼlim muassasalarida oʻrindoshlik asosida dars beradigan va asosiy ish joyi boʻyicha pedagogik faoliyat bilan shugʻullanmaydigan pedagog kadrlar oʻrindoshlik asosida faoliyat yuritayotgan taʼlim muassasasida attestatsiyadan oʻtadi.

18. Taʼlim muassasalari pedagog kadrlarining malaka toifalari yoki lavozimlari ushbu taʼlim muassasalarining bir turidan boshqasiga ishga oʻtganda saqlanadi.

Bunda maktabgacha, umumiy oʻrta va maktabdan tashqari taʼlim tizimlari pedagog kadrlarining ikkinchi malaka toifasi oʻrta maxsus va professional taʼlim tizimlarining katta oʻqituvchi lavozimiga, birinchi malaka toifasi — yetakchi oʻqituvchi lavozimiga, oliy malaka toifasi — bosh oʻqituvchi lavozimiga tenglashtiriladi.

19. Pedagog xodimlarning oliy maʼlumot yoki qayta tayyorlash kurslaridan oʻtganligi haqidagi diplomida (keyingi oʻrinlarda — diplom) koʻrsatilgan tayyorlov, taʼlim yoʻnalishlari, mutaxassislik yoki ixtisosliklarga mos keladigan fanlar boʻyicha attestatsiyadan oʻtadi.

20. Taʼlim muassasalari rahbarlari attestatsiyadan oʻtuvchilarning har biri uchun alohida hujjatlar yigʻmajildi tayyorlaydi.

Hujjatlar yigʻmajildida attestatsiyadan oʻtuvchining pasporti, diplomi, attestatsiyadan oʻtganligi toʻgʻrisida olgan va amalda foydalanayotgan sertifikati (agar mavjud boʻlsa), malaka oshirganligi haqidagi sertifikati nusxalari, maʼlumotnoma-tarjimai hol, soʻnggi bir yil davomida oʻtgan darslarining tahlillari, ochiq darslar oʻtganligi haqidagi maʼlumotlar, taʼlim oluvchilari reytingi va erishgan yutuqlari (agar mavjud boʻlsa) toʻplanadi.

21. Pedagog kadrlar attestatsiyasi ularning malaka tavsiflarida belgilangan vazifalarga muvofiq faoliyat koʻrsatishini tasdiqlovchi maktabgacha taʼlim boshqarmalari, xalq taʼlimi boshqarmalari, madaniyat boshqarmalari, jismoniy tarbiya va sport boshqarmalari, kasbiy taʼlimni rivojlantirish va muvofiqlashtirish hududiy boshqarmalari hamda oliy taʼlim muassasalari attestatsiya komissiyalari, tuman (shahar) va muassasalar attestatsiya komissiyalari, tizimida taʼlim muassasalari boʻlgan vazirliklar va idoralar attestatsiya komissiyalari (keyingi oʻrinlarda attestatsiya komissiyalari deb ataladi) tomonidan amalga oshiriladi.

2-§. Maktabgacha davlat taʼlim muassasalari pedagog kadrlari uchun attestatsiyani tashkil etish va attestatsiya komissiyalarini tuzish

22. Qoraqalpogʻiston Respublikasi Maktabgacha taʼlim vazirligida, viloyatlar maktabgacha taʼlim boshqarmalarida, Toshkent shahar maktabgacha taʼlim bosh boshqarmasida (keyingi oʻrinlarda maktabgacha taʼlim boshqarmalari deb ataladi) maktabgacha taʼlim tashkilotlaridagi oliy malaka toifasiga talabgor pedagog kadrlarni attestatsiyadan oʻtkazish uchun maktabgacha taʼlim boshqarmalari attestatsiya komissiyalari tuziladi.

Maktabgacha taʼlim boshqarmalari attestatsiya komissiyalari tarkibi Maktabgacha taʼlim vazirligi va Davlat inspeksiyasining qoʻshma qarori bilan tasdiqlanadi.

Maktabgacha taʼlim boshqarmalari attestatsiya komissiyalari tarkibi maktabgacha taʼlim boshqarmalari boshligʻi (komissiya raisi), Davlat inspeksiyasi yoki uning hududiy boʻlimi vakili (komissiya raisi oʻrinbosari), Oʻzbekiston Kasaba uyushmalari Federatsiyasi (keyingi oʻrinlarda kasaba uyushmasi deb ataladi) vakili, ikki nafar attestatsiyadan oʻtgan, oliy toifali pedagog kadrlardan (bir nafari komissiya kotibi) iborat boʻladi.

23. Quyidagilar maktabgacha taʼlim boshqarmalari attestatsiya komissiyalarining vazifalari hisoblanadi:

oliy malaka toifasiga talabgor pedagog kadrlarni attestatsiyadan oʻtkazish;

tuman (shahar) va muassasalar attestatsiya komissiyalarining birinchi va ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

oliy, birinchi va ikkinchi malaka toifali pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

24. Tuman (shahar) maktabgacha taʼlim boʻlimlarida birinchi malaka toifasiga talabgor pedagog kadrlar attestatsiyasini oʻtkazish uchun tuman (shahar) attestatsiya komissiyalari tuziladi.

Tuman (shahar) attestatsiya komissiyalari tarkibi maktabgacha taʼlim boshqarmasi boshligʻining buyrugʻi bilan tasdiqlanadi.

Tuman (shahar) attestatsiya komissiyalari tarkibi tuman (shahar) maktabgacha taʼlim boʻlimi mudiri (komissiya raisi), Davlat inspeksiyasi yoki uning hududiy boʻlimi vakili (komissiya raisi oʻrinbosari), kasaba uyushmasi vakili, ikki nafar attestatsiyadan oʻtgan, oliy toifali pedagog kadrlardan (bir nafari komissiya kotibi) iborat boʻladi.

25. Quyidagilar tuman (shahar) attestatsiya komissiyalarining vazifalari hisoblanadi:

birinchi malaka toifasiga talabgor pedagog kadrlarni attestatsiyadan oʻtkazish;

muassasalar attestatsiya komissiyalarining ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

birinchi va ikkinchi malaka toifali pedagog kadrlarga sertifikatlar olish uchun maktabgacha taʼlim boshqarmalari komissiyalariga buyurtmanoma berish.

26. Taʼlim muassasalarida ikkinchi malaka toifasiga talabgor pedagog kadrlar attestatsiyasini oʻtkazish uchun muassasalar attestatsiya komissiyalari tuziladi.

Muassasalar attestatsiya komissiyalari tarkibi tuman (shahar) maktabgacha taʼlim boʻlimlari mudirlarining buyruqlari bilan tasdiqlanadi.

Muassasalar attestatsiya komissiyalari tarkibi taʼlim muassasalari rahbari (komissiya raisi), tuman (shahar) maktabgacha taʼlim boʻlimi xodimi (komissiya raisining oʻrinbosari), kasaba uyushmasi va Kuzatuv kengashi vakillari, uch nafar attestatsiyadan oʻtgan, birinchi yoki oliy toifali pedagog kadrlardan (bir nafari komissiya kotibi) iborat boʻladi.

27. Quyidagilar muassasalar attestatsiya komissiyalarining vazifalari hisoblanadi:

ikkinchi malaka toifasiga talabgor pedagog kadrlarni attestatsiyadan oʻtkazish;

ikkinchi malaka toifali pedagog kadrlarga sertifikatlar olish uchun tuman (shahar) attestatsiya komissiyasiga buyurtmanoma berish.

3-§. Umumiy oʻrta taʼlim muassasalari pedagog kadrlari uchun attestatsiyani tashkil etish va attestatsiya komissiyalarini tuzish

28. Qoraqalpogʻiston Respublikasi Xalq taʼlimi vazirligida, viloyatlar xalq taʼlimi boshqarmalarida, Toshkent shahar xalq taʼlimi bosh boshqarmasida (keyingi oʻrinlarda xalq taʼlimi boshqarmalari deb ataladi) umumiy oʻrta taʼlim muassasalaridagi (barcha tip va nomdagi maktablar va maktab-internatlardagi) umumtaʼlim fanlari boʻyicha oliy malaka toifasiga talabgor pedagog kadrlar attestatsiyasini oʻtkazish uchun xalq taʼlimi boshqarmalari attestatsiya komissiyalari tuziladi.

Xalq taʼlimi boshqarmalari attestatsiya komissiyalari tarkibi Xalq taʼlimi vazirligi, tizimida umumiy oʻrta taʼlim muassasalari boʻlgan vazirliklar va idoralar hamda Davlat inspeksiyasining qoʻshma qarori bilan tasdiqlanadi.

Xalq taʼlimi boshqarmalari attestatsiya komissiyalari tarkibi xalq taʼlimi boshqarmalari boshligʻi (komissiya raisi), Davlat inspeksiyasi yoki uning hududiy boʻlimi vakili (komissiya raisi oʻrinbosari), xalq taʼlimi xodimlarini qayta tayyorlash va ularning malakasini oshirish hududiy markazi xodimi, kasaba uyushmasi vakili, uch nafar attestatsiyadan oʻtgan, oliy toifali pedagog kadrlardan (bir nafari — komissiya kotibi) iborat boʻladi.

29. Quyidagilar xalq taʼlimi boshqarmalari attestatsiya komissiyalarining vazifalari hisoblanadi:

oliy malaka toifasiga talabgor pedagog kadrlarni attestatsiyadan oʻtkazish;

tuman (shahar) va muassasalar attestatsiya komissiyalarining birinchi va ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

oliy, birinchi va ikkinchi malaka toifali pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

30. Tuman (shahar) xalq taʼlimi boʻlimlarida birinchi malaka toifasiga talabgor pedagog kadrlar attestatsiyasini oʻtkazish uchun tuman (shahar) attestatsiya komissiyalari tuziladi.

Tuman (shahar) attestatsiya komissiyalari tarkibi xalq taʼlimi boshqarmalari boshliqlarining buyruqlari bilan tasdiqlanadi.

Tuman (shahar) attestatsiya komissiyalari tarkibi xalq taʼlimi boʻlimi mudiri (komissiya raisi), Davlat inspeksiyasi yoki uning hududiy boʻlimi vakili (komissiya raisi oʻrinbosari), xalq taʼlimi xodimlarini qayta tayyorlash va ularning malakasini oshirish hududiy markazi xodimi, kasaba uyushmasi vakili, uch nafar attestatsiyadan oʻtgan, oliy toifali pedagog kadrlardan (bir nafari — komissiya kotibi) iborat boʻladi.

31. Quyidagilar tuman (shahar) attestatsiya komissiyalarining vazifalari hisoblanadi:

birinchi malaka toifasiga talabgor pedagog kadrlarni attestatsiyadan oʻtkazish;

muassasalar attestatsiya komissiyalarining ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

birinchi va ikkinchi malaka toifali pedagog kadrlarga sertifikatlar olish uchun xalq taʼlimi boshqarmalari komissiyalariga buyurtmanoma berish.

32. Taʼlim muassasalarida ikkinchi malaka toifasiga talabgor pedagog kadrlar attestatsiyasini oʻtkazish uchun muassasalar attestatsiya komissiyalari tuziladi.

Muassasalar attestatsiya komissiyalari tarkibi tuman (shahar) xalq taʼlimi boʻlimlari mudirlarining buyruqlari bilan tasdiqlanadi.

Muassasalar attestatsiya komissiyalari tarkibi taʼlim muassasalari rahbari (komissiya raisi), tuman (shahar) xalq taʼlimi boʻlimi xodimi (komissiya raisining oʻrinbosari), kasaba uyushmasi va Kuzatuv kengashi vakillari, uch nafar attestatsiyadan oʻtgan, birinchi yoki oliy toifali pedagog kadrlardan (bir nafari — komissiya kotibi) iborat boʻladi.

33. Quyidagilar muassasalar attestatsiya komissiyalarining vazifalari hisoblanadi:

ikkinchi malaka toifasiga talabgor pedagog kadrlarni attestatsiyadan oʻtkazish;

ikkinchi malaka toifali pedagog kadrlarga sertifikatlar olish uchun tuman (shahar) attestatsiya komissiyasiga buyurtmanoma berish.

4-§. Bolalar musiqa va sanʼat maktablari, ixtisoslashtirilgan sanʼat va madaniyat maktablari hamda maktab-internatlar pedagog kadrlari uchun attestatsiyani tashkil etish va attestatsiya komissiyalarini tuzish

34. Qoraqalpogʻiston Respublikasi Madaniyat vazirligida, viloyatlar madaniyat boshqarmalarida, Toshkent shahar madaniyat bosh boshqarmasida (keyingi oʻrinlarda madaniyat boshqarmalari deb ataladi) bolalar musiqa va sanʼat maktablarining, ixtisoslashtirilgan sanʼat va madaniyat maktablari hamda maktab-internatlarning chuqurlashtirilgan va kasbiy taʼlim fanlari boʻyicha oliy malaka toifasiga talabgor pedagog kadrlarini attestatsiyadan oʻtkazish uchun madaniyat boshqarmalari attestatsiya komissiyalari tuziladi.

Madaniyat boshqarmalari attestatsiya komissiyalari tarkibi Madaniyat vazirligi va Davlat inspeksiyasining qoʻshma qarori bilan tasdiqlanadi.

Madaniyat boshqarmalari attestatsiya komissiyalari tarkibi madaniyat boshqarmasi boshligʻi (komissiya raisi), Davlat inspeksiyasi yoki uning hududiy boʻlimi vakili (komissiya raisi oʻrinbosari), kasaba uyushmasi vakili, ikki nafar attestatsiyadan oʻtgan, oliy toifali pedagog kadrlardan (bir nafari — komissiya kotibi) iborat boʻladi.

35. Quyidagilar madaniyat boshqarmalari attestatsiya komissiyalarining vazifalari hisoblanadi:

oliy malaka toifasiga talabgor pedagog kadrlarni attestatsiyadan oʻtkazish;

tuman (shahar) va muassasalar attestatsiya komissiyalarining birinchi va ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

oliy, birinchi va ikkinchi malaka toifali pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

36. Tuman (shahar) madaniyat boʻlimlarida birinchi malaka toifasiga talabgor pedagog kadrlar attestatsiyasini oʻtkazish uchun tuman (shahar) attestatsiya komissiyalari tuziladi.

Tuman (shahar) attestatsiya komissiyalari tarkibi tegishli madaniyat boshqarmasi boshligʻining buyrugʻi bilan tasdiqlanadi.

Tuman (shahar) attestatsiya komissiyalari tarkibi tuman (shahar) madaniyat boʻlimi mudiri (komissiya raisi), Davlat inspeksiyasi yoki uning hududiy boʻlimi vakili (komissiya raisi oʻrinbosari), kasaba uyushmasi vakili, ikki nafar attestatsiyadan oʻtgan, birinchi yoki oliy toifali pedagog kadrlardan (bir nafari — komissiya kotibi) iborat boʻladi.

37. Quyidagilar tuman (shahar) attestatsiya komissiyalarining vazifalari hisoblanadi:

birinchi malaka toifasiga talabgor pedagog kadrlarni attestatsiyadan oʻtkazish;

muassasalar attestatsiya komissiyalarining ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

birinchi va ikkinchi malaka toifali pedagog kadrlarga sertifikatlar olish uchun madaniyat boshqarmalari attestatsiya komissiyalariga buyurtmanoma berish.

38. Taʼlim muassasalarida ikkinchi malaka toifasiga talabgor pedagog kadrlar attestatsiyasini oʻtkazish uchun muassasalar attestatsiya komissiyalari tuziladi.

Muassasalar attestatsiya komissiyalari tarkibi tegishli tuman (shahar) madaniyat boʻlimi mudirining buyrugʻi bilan tasdiqlanadi.

Muassasalar attestatsiya komissiyalari tarkibi taʼlim muassasasi rahbari (komissiya raisi), tuman (shahar) madaniyat boʻlimi xodimi (komissiya raisining oʻrinbosari), kasaba uyushmasi va taʼlim muassasasi Kuzatuv kengashi vakillari, uch nafar attestatsiyadan oʻtgan, birinchi yoki oliy toifali pedagog kadrlardan (bir nafari — komissiya kotibi) iborat boʻladi.

39 Quyidagilar muassasalar attestatsiya komissiyalarining vazifalari hisoblanadi:

ikkinchi malaka toifasiga talabgor pedagog kadrlarni attestatsiyadan oʻtkazish;

ikkinchi malaka toifali pedagog kadrlarga sertifikatlar olish uchun tuman (shahar) attestatsiya komissiyasiga buyurtmanoma berish.

5-§. Sport turlari boʻyicha ixtisoslashtirilgan davlat maktab-internatlari, olimpiya zaxiralari kollejlari hamda bolalar-oʻsmirlar sport maktablarining pedagog kadrlari uchun attestatsiyani tashkil etish va attestatsiya komissiyalarini tuzish

40. Qoraqalpogʻiston Respublikasi Jismoniy tarbiya va sport vazirligida, viloyatlar hamda Toshkent shahar jismoniy tarbiya va sport boshqarmalarida (keyingi oʻrinlarda jismoniy tarbiya va sport boshqarmalari deb ataladi) sport turlari boʻyicha ixtisoslashtirilgan davlat maktab-internatlari, olimpiya zaxiralari kollejlari hamda bolalar-oʻsmirlar sport maktablarining chuqurlashtirilgan va kasbiy taʼlim fanlari boʻyicha oliy malaka toifasiga talabgor pedagog kadrlarini attestatsiyadan oʻtkazish uchun jismoniy tarbiya va sport boshqarmalari attestatsiya komissiyalari tuziladi.

Jismoniy tarbiya va sport boshqarmalari attestatsiya komissiyalari tarkibi Jismoniy tarbiya va sport vazirligi va Davlat inspeksiyasining qoʻshma qarori bilan tasdiqlanadi.

Jismoniy tarbiya va sport boshqarmalari attestatsiya komissiyalari tarkibi jismoniy tarbiya va sport boshqarmalari boshligʻi (komissiya raisi), Davlat inspeksiyasi yoki uning hududiy boʻlimi vakili (komissiya raisi oʻrinbosari), kasaba uyushmasi vakili, ikki nafar attestatsiyadan oʻtgan, oliy toifali pedagog kadrlardan (bir nafari — komissiya kotibi) iborat boʻladi.

41. Quyidagilar jismoniy tarbiya va sport boshqarmalari attestatsiya komissiyalarining vazifalari hisoblanadi:

oliy malaka toifasiga talabgor pedagog kadrlarni attestatsiyadan oʻtkazish;

tuman (shahar) va muassasalar attestatsiya komissiyalarining birinchi va ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

oliy, birinchi va ikkinchi malaka toifali pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

42. Tuman (shahar) jismoniy tarbiya va sport boʻlimlarida birinchi malaka toifasiga talabgor pedagog kadrlar attestatsiyasini oʻtkazish uchun tuman (shahar) attestatsiya komissiyalari tuziladi.

Tuman (shahar) attestatsiya komissiyalari tarkibi tegishli jismoniy tarbiya va sport boshqarmasi boshligʻining buyrugʻi bilan tasdiqlanadi.

Tuman (shahar) attestatsiya komissiyalari tarkibi tuman (shahar) jismoniy tarbiya va sport boʻlimi mudiri (komissiya raisi), Davlat inspeksiyasi yoki uning hududiy boʻlimi vakili (komissiya raisi oʻrinbosari), kasaba uyushmasi vakili, ikki nafar attestatsiyadan oʻtgan, birinchi yoki oliy toifali pedagog kadrlardan (bir nafari — komissiya kotibi) iborat boʻladi.

43. Quyidagilar tuman (shahar) attestatsiya komissiyalarining vazifalari hisoblanadi:

birinchi malaka toifasiga talabgor pedagog kadrlarni attestatsiyadan oʻtkazish;

muassasalar attestatsiya komissiyalarining ikkinchi malaka toifasiga talabgor pedagog kadrlar attestatsiyasi yakunlari boʻyicha hisobotlarini tahlil qilish;

birinchi va ikkinchi malaka toifali pedagog kadrlarga sertifikatlar olish uchun jismoniy tarbiya va sport boshqarmalari attestatsiya komissiyalariga buyurtmanoma berish.

44. Taʼlim muassasalarida ikkinchi malaka toifasiga talabgor pedagog kadrlar attestatsiyasini oʻtkazish uchun muassasalar attestatsiya komissiyalari tuziladi.

Muassasalar attestatsiya komissiyalari tarkibi tegishli tuman (shahar) jismoniy tarbiya va sport boʻlimi mudirining buyrugʻi bilan tasdiqlanadi.

Muassasalar attestatsiya komissiyalari tarkibi taʼlim muassasasi rahbari (komissiya raisi), tuman (shahar) jismoniy tarbiya va sport boʻlimi xodimi (komissiya raisining oʻrinbosari), kasaba uyushmasi va taʼlim muassasasi Kuzatuv kengashi vakillari, uch nafar attestatsiyadan oʻtgan, birinchi yoki oliy toifali pedagog kadrlardan (bir nafari — komissiya kotibi) iborat boʻladi.

45. Quyidagilar muassasalar attestatsiya komissiyalarining vazifalari hisoblanadi:

ikkinchi malaka toifasiga talabgor pedagog kadrlarni attestatsiyadan oʻtkazish;

ikkinchi malaka toifali pedagog kadrlarga sertifikatlar olish uchun tuman (shahar) attestatsiya komissiyasiga buyurtmanoma berish.

6-§. Professional taʼlim hamda oʻrta maxsus taʼlim pedagog kadrlari uchun attestatsiyani tashkil etish va attestatsiya komissiyalarini tuzish

46. Qoraqalpogʻiston Respublikasi, viloyatlar va Toshkent shahar kasbiy taʼlimni rivojlantirish va muvofiqlashtirish hududiy boshqarmalarida professional taʼlim pedagog kadrlarini (ishlab chiqarish taʼlimi ustalarini) attestatsiyadan oʻtkazish uchun kasbiy taʼlimni rivojlantirish va muvofiqlashtirish hududiy boshqarmalari attestatsiya komissiyalari tuziladi.

Kasbiy taʼlimni rivojlantirish va muvofiqlashtirish hududiy boshqarmalari attestatsiya komissiyalari tarkibi Oliy va oʻrta maxsus taʼlim vazirligi, tizimida professional taʼlim muassasalari boʻlgan vazirliklar va idoralar hamda Davlat inspeksiyasining qoʻshma qarori bilan tasdiqlanadi.

Kasbiy taʼlimni rivojlantirish va muvofiqlashtirish hududiy boshqarmalari attestatsiya komissiyalari tarkibi hududiy kasbiy taʼlimni rivojlantirish va muvofiqlashtirish boshqarmasi rahbar xodimlari (komissiya raisi), Davlat inspeksiyasi yoki uning hududiy vakili (komissiya raisi oʻrinbosari), Kasb-hunar taʼlim tizimini innovatsion rivojlantirish, pedagog kadrlarning malakasini oshirish va ularni qayta tayyorlash institutining masʼul xodimi yoki oliy taʼlim muassasalarining sohaga masʼul prorektorlari, kasaba uyushmasi vakili, uch nafar attestatsiyadan oʻtgan, oliy toifali pedagog yoki bosh oʻqituvchidan (bir nafari — komissiya kotibi) iborat boʻladi.

47. Quyidagilar kasbiy taʼlimni rivojlantirish va muvofiqlashtirish hududiy boshqarmalari attestatsiya komissiyalarining vazifalari hisoblanadi:

ikkinchi, birinchi va oliy malaka toifalari, katta, yetakchi va bosh oʻqituvchi lavozimlariga talabgor pedagog kadrlarni attestatsiyadan oʻtkazish;

ikkinchi, birinchi va oliy malaka toifalari, katta, yetakchi va bosh oʻqituvchi lavozimidagi pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

48. Oliy taʼlim muassasalarida ular tarkibidagi oʻrta maxsus taʼlim muassasalari pedagog kadrlarini attestatsiyadan oʻtkazish uchun oliy taʼlim muassasalarining oʻrta maxsus taʼlim attestatsiya komissiyalari tuziladi.

Oliy taʼlim muassasalarining oʻrta maxsus taʼlim attestatsiya komissiyalari tarkibi Oliy va oʻrta maxsus taʼlim vazirligi, tizimida oʻrta maxsus taʼlim muassasalari boʻlgan vazirliklar va idoralar hamda Davlat inspeksiyasining qoʻshma qarori bilan tasdiqlanadi.

Oliy taʼlim muassasalarining oʻrta maxsus taʼlim attestatsiya komissiyalari tarkibi oliy taʼlim muassasasining sohaga masʼul prorektori (komissiya raisi), Davlat inspeksiyasi yoki uning hududiy vakili (komissiya raisining oʻrinbosari), oliy taʼlim muassasasining taʼlim sifatini nazorat qilish boʻlimi boshligʻi, kasaba uyushmasi vakili, uch nafar attestatsiyadan oʻtgan, oliy toifali pedagog yoki bosh oʻqituvchidan (bir nafari — komissiya kotibi) iborat boʻladi.

49. Quyidagilar oliy taʼlim muassasalarining oʻrta maxsus taʼlim attestatsiya komissiyalarining vazifalari hisoblanadi:

ikkinchi, birinchi va oliy malaka toifalari, katta, yetakchi va bosh oʻqituvchi lavozimlariga talabgor pedagog kadrlarni attestatsiyadan oʻtkazish;

ikkinchi, birinchi va oliy malaka toifalari, katta, yetakchi va bosh oʻqituvchi lavozimidagi pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

7-§. Vazirlik va idoralarning toʻgʻridan toʻgʻri tizimidagi taʼlim muassasalari pedagog kadrlari uchun attestatsiyani tashkil etish va attestatsiya komissiyalarini tuzish

50. Vazirlik va idoralarning toʻgʻridan toʻgʻri tizimidagi taʼlim muassasalari ikkinchi, birinchi va oliy malaka toifasiga talabgor pedagog kadrlarini attestatsiyadan oʻtkazish uchun vazirlik yoki idora attestatsiya komissiyalari tuziladi.

Vazirlik yoki idora attestatsiya komissiyalari tarkibi umumiy oʻrta taʼlim muassasalari boʻysunadigan vazirlik yoki idora va Davlat inspeksiyasining qoʻshma qarori bilan tasdiqlanadi.

Vazirlik yoki idora attestatsiya komissiyalari tarkibi tegishli vazirlik yoki idoraning sohaga masʼul tarkibiy boʻlinmasi rahbari (komissiya raisi), Davlat inspeksiyasining vakili (komissiya raisining oʻrinbosari), ushbu taʼlim muassasasi rahbari, kasaba uyushmasi vakili, uch nafar attestatsiyadan oʻtgan, oliy toifali pedagog yoki bosh oʻqituvchidan (bir nafari — komissiya kotibi) iborat boʻladi.

51. Quyidagilar vazirlik yoki idora attestatsiya komissiyalarining vazifalari hisoblanadi:

ikkinchi, birinchi va oliy malaka toifalariga talabgor pedagog kadrlarni attestatsiyadan oʻtkazish;

ikkinchi, birinchi va oliy malaka toifalaridagi pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

52. Vazirlik va idoralarning Qoraqalpogʻiston Respublikasi, viloyatlar va Toshkent shahar hududiy boʻlinmalari (keyingi oʻrinlarda hududiy boʻlinmalar deb ataladi) hamda tuman (shahar) hududiy boʻlinmalari tizimidagi taʼlim muassasalari ikkinchi, birinchi va oliy malaka toifasiga talabgor pedagog kadrlarini attestatsiyadan oʻtkazish uchun hududiy boʻlinmalar attestatsiya komissiyalari tuziladi.

Hududiy boʻlinmalar attestatsiya komissiyalari tarkibi taʼlim muassasalari boʻysunadigan vazirlik yoki idora va Davlat inspeksiyasining qoʻshma qarori bilan tasdiqlanadi.

Hududiy boʻlinmalar attestatsiya komissiyalari tarkibi hududiy boʻlinma rahbari (komissiya raisi), Davlat inspeksiyasi yoki uning hududiy boʻlimi vakili (komissiya raisi oʻrinbosari), kasaba uyushmasi vakili, ikki nafar attestatsiyadan oʻtgan, oliy toifali pedagog kadrlardan (bir nafari — komissiya kotibi) iborat boʻladi.

Qoraqalpogʻiston Respublikasi va viloyatlar hududida joylashgan vazirliklar va idoralarning toʻgʻridan toʻgʻri tizimidagi taʼlim muassasalari ikkinchi, birinchi va oliy malaka toifasiga talabgor pedagog kadrlarini attestatsiyadan oʻtkazish hududiy boʻlinmalar attestatsiya komissiyalari tomonidan amalga oshiriladi.

53. Quyidagilar hududiy boʻlinmalar attestatsiya komissiyalarining vazifalari hisoblanadi:

ikkinchi, birinchi va oliy malaka toifalariga talabgor pedagog kadrlarni attestatsiyadan oʻtkazish;

ikkinchi, birinchi va oliy malaka toifalaridagi pedagog kadrlarga sertifikatlar olish uchun Davlat inspeksiyasiga buyurtmanoma berish hamda attestatsiya oʻtkazilgandan soʻng bir oy muddatda pedagog kadrlarni sertifikatlar bilan taʼminlash.

54. Attestatsiyadan oʻtuvchi pedagog kadrlar attestatsiya komissiyalari tarkibiga kiritilmaydi.

55. Attestatsiya komissiyalari raislari va aʼzolari attestatsiya ushbu Nizom talablariga hamda attestatsiya jadvaliga muvofiq oʻtkazilishi uchun masʼul hisoblanadilar.

56. Attestatsiyadan oʻtuvchi pedagog kadrlarning malaka tavsiflarida va baholash mezonlarida belgilangan talablarni bajarganliklari haqidagi tavsiyalarni tayyorlash uchun taʼlim muassasalari rahbarlari buyrugʻi bilan ekspert guruhi tuziladi.

57. Ekspert guruhi tarkibi besh nafar aʼzodan iborat boʻladi.

Ekspert guruhi aʼzolari tarkibiga taʼlim muassasalari rahbarining oʻquv ishlari boʻyicha oʻrinbosari (maktabgacha taʼlim tashkiloti metodistlari) va tajribali pedagog kadrlar kiritiladi.

58. Taʼlim muassasalari rahbarlari ekspert guruhi tomonidan tayyorlangan tavsiya va hujjatlar yigʻmajildlarini tegishli attestatsiya komissiyalariga taqdim etadi.

3-bob. Attestatsiyadan oʻtkazish, sertifikatlar berish hamda taʼlim olganlik toʻgʻrisidagi maʼlumotlarga qoʻyilgan talablarni belgilash

59. Attestatsiya ikki bosqichda oʻtkaziladi:

birinchi bosqichda — attestatsiyadan oʻtuvchilarning oʻquv fani boʻyicha malaka sinovi natijalari, dars oʻtish mahorati va mehnati samaradorligi ekspert guruhi tomonidan oʻrganiladi hamda tegishli tavsiyalar tayyorlanadi;

ikkinchi bosqichda — attestatsiya komissiyalari ekspert guruhi tomonidan oʻrganilgan birinchi bosqich natijalarini tahlil qiladi, attestatsiya jarayonida toʻplangan hujjatlar jamlanmasini (portfoliosini) oʻrganadi va pedagog kadrni malaka toifasida (lavozimida) qoldirish yoki boshqa toifa (lavozim) berish toʻgʻrisida qaror qabul qiladi.

591. Taʼlim muassasalarining quyidagi jismoniy tarbiya fani oʻqituvchilariga malaka toifasi (lavozim) toʻgʻridan toʻgʻri (attestatsiyadan oʻtkazilmasdan) beriladi:

tuman (shahar) miqyosidagi sport musobaqalarining birinchi oʻrin sovrindorlarini tayyorlagan taʼlim muassasalari jismoniy tarbiya fani oʻqituvchilariga – ikkinchi malaka toifasi (katta oʻqituvchi lavozimi);

viloyat miqyosidagi sport musobaqalarining birinchi oʻrin sovrindorlarini tayyorlagan taʼlim muassasalari jismoniy tarbiya fani oʻqituvchilariga — birinchi malaka toifasi (yetakchi oʻqituvchi lavozimi);

xalqaro hamda respublika miqyosidagi sport musobaqalarining birinchi, ikkinchi va uchinchi oʻrin sovrindorlarini tayyorlagan taʼlim muassasalari jismoniy tarbiya fani oʻqituvchilariga — oliy malaka toifasi (bosh oʻqituvchi lavozimi).

60. Attestatsiya quyidagi baholash mezonlari boʻyicha oʻtkaziladi:

a) dars oʻtish mahorati — dars tahlillari, ochiq darslar oʻtganligi, taʼlim oluvchilarining reyting koʻrsatkichlari, taʼlim berish vositalari hamda shakllarini maqbul ravishda tanlashi, kompyuter texnikasi va axborot-kommunikatsiya texnologiyalari, shu jumladan, Internet jahon axborot tarmogʻidan foydalanish boʻyicha amaliy koʻnikmalarga hamda xorijiy tillar va ijtimoiy-siyosiy bilimlarga ega ekanligini aniqlash;

b) mehnati samaradorligi — taʼlim oluvchilarning tayyorlaganligi, taʼlim oluvchilar va attestatsiyadan oʻtuvchilarning tuman, shahar, viloyat, respublika, xalqaro koʻrik-tanlovlar, fan olimpiadalari va turli musobaqalarda erishgan yutuqlari;

v) oʻquv fani boʻyicha malaka sinovlari — diplomida koʻrsatilgan tayyorlov, taʼlim yoʻnalishlari, mutaxassisligi yoki ixtisosliklari boʻyicha davlat taʼlim standartlari yoki davlat taʼlim talablari mazmuni asosida oʻtkaziladigan test (qogʻozda, onlayn, oflayn) yozma yoki ijodiy ish (jismoniy tarbiya fani oʻqituvchilari uchun nazariy va amaliy sinovlar) natijalari.

61. Pedagog kadrlarning attestatsiya natijalarini baholash mezonlari Davlat inspeksiyasi, Maktabgacha taʼlim vazirligi, Xalq taʼlimi vazirligi, Oliy va oʻrta maxsus taʼlim vazirligi, Madaniyat vazirligi, Jismoniy tarbiya va sport vazirligi hamda Bandlik va mehnat munosabatlari vazirligi tomonidan ishlab chiqiladi va belgilangan tartibda tasdiqlanadi.

62. Pedagog xodimlarga malaka toifalarini berish boʻyicha navbatdagi attestatsiyadan oʻtkazganlik uchun yigʻim undirilmaydi, navbatdan tashqari attestatsiyadan oʻtkazganlik uchun bazaviy hisoblash miqdorining bir baravari miqdorida yigʻim undiriladi.

Attestatsiyadan oʻtkazganlik uchun yigʻimning 50 foizi Oʻzbekiston Respublikasining Davlat budjeti daromadiga oʻtkaziladi, qolgan 50 foizi Davlat inspeksiyasining budjetdan tashqari Rivojlantirish jamgʻarmasiga yoʻnaltiriladi.

Ariza beruvchi berilgan arizadan voz kechgan taqdirda hamda pedagog kadrga nisbatan “Attestatsiyadan oʻtmadi, tegishli malaka toifasi yoki lavozimi tushirilsin” qarori qabul qilinganda toʻlangan yigʻim summasi qaytarilmaydi.

Pedagog kadrlar attestatsiyaning biror bosqichida uzrli sababga (mehnatga layoqatsizlik varaqasi, taʼlimni boshqarish boʻyicha maxsus vakolat berilgan davlat organi yoki taʼlim muassasalari rahbarlari maʼlumotnomasi) koʻra kelmagan boʻlsa, ularning attestatsiyasi boshqa muddatga koʻchirilgan taqdirda yigʻim summasi takroran undirilmaydi.

63. Birinchi va oliy malaka toifali, yetakchi va bosh oʻqituvchi lavozimidagi hamda ushbu malaka toifalari va lavozimlarga talabgor pedagog kadrlar uchun nazorat materiallari mazmunini shakllantirish, koʻpaytirish va ushbu jarayonni oʻtkazish Davlat inspeksiyasi tomonidan Maktabgacha taʼlim vazirligi, Xalq taʼlimi vazirligi, Oliy va oʻrta maxsus taʼlim vazirligi, Madaniyat vazirligi, Jismoniy tarbiya va sport vazirligi hamda tizimida taʼlim muassasalari boʻlgan vazirliklar va idoralar bilan kelishgan holda amalga oshiriladi.

Jismoniy tarbiya fani oʻqituvchilari uchun amaliy sinovlar normativlari tegishlicha Davlat inspeksiyasi, Maktabgacha taʼlim vazirligi, Xalq taʼlimi vazirligi, Oliy va oʻrta maxsus taʼlim vazirligi hamda Jismoniy tarbiya va sport vazirligi tomonidan belgilanadi.

64. Oʻquv fani boʻyicha malaka sinoviga oid yozma va ijodiy ish (jismoniy tarbiya fani oʻqituvchilari uchun nazariy va amaliy sinovlar) hamda ikkinchi malaka toifasiga va katta oʻqituvchi lavozimiga talabgor pedagog kadrlarning test sinovlarini oʻtkazish tizimida taʼlim muassasalari boʻlgan vazirliklar va idoralar bilan kelishgan holda taʼlim turlari boʻyicha Maktabgacha taʼlim vazirligi, Xalq taʼlimi vazirligi, Oliy va oʻrta maxsus taʼlim vazirligi, Madaniyat vazirligi, Jismoniy tarbiya va sport vazirligi tomonidan amalga oshiriladi.

65. Attestatsiya komissiyalari pedagog kadrlarning dars oʻtish mahorati va mehnati samaradorligi hamda oʻquv fani boʻyicha malaka sinovi natijalarini tahlil qiladi va tegishli qaror qabul qiladi.

66. Attestatsiya komissiyasi aʼzolarining uchdan ikki qismi ishtirok etgan yigʻilish vakolatli hisoblanadi.

67. Attestatsiya komissiyalari quyidagi qarorlardan birini qabul qiladi:

a) oliy malaka toifali yoki bosh oʻqituvchi lavozimidagi pedagog kadr baholash mezonlarining har biridan:

75 foiz va undan yuqori koʻrsatkichga ega boʻlsa — “Attestatsiyadan oʻtdi, oliy malaka toifasi (bosh oʻqituvchi lavozimi) saqlansin”;

75 foizdan past koʻrsatkichga ega boʻlsa — “Attestatsiyadan oʻtmadi, birinchi malaka toifasi (yetakchi oʻqituvchi lavozimi)ga tushirilsin”;

b) birinchi malaka toifali yoki yetakchi oʻqituvchi lavozimidagi pedagog kadr baholash mezonlarining har biridan:

75 foiz va undan yuqori koʻrsatkichga ega boʻlsa — “Attestatsiyadan oʻtdi, oliy malaka toifasi (bosh oʻqituvchi lavozimi) berilsin”;

74 foizdan 65 foizgacha koʻrsatkichga ega boʻlsa — “Attestatsiyadan oʻtdi, birinchi malaka toifasi (yetakchi oʻqituvchi lavozimi) saqlansin”;

65 foizdan kam koʻrsatkichga ega boʻlsa — “Attestatsiyadan oʻtmadi, ikkinchi malaka toifasi (katta oʻqituvchi lavozimi)ga tushirilsin” (navbatdan tashqari attestatsiyaga jalb etilgan pedagog kadrlar bundan mustasno);

v) ikkinchi malaka toifali yoki katta oʻqituvchi lavozimidagi pedagog kadr baholash mezonlarining har biridan:

65 foiz va undan yuqori koʻrsatkichga ega boʻlsa — “Attestatsiyadan oʻtdi, birinchi malaka toifasi (yetakchi oʻqituvchi lavozimi) berilsin”;

64 foizdan 60 foizgacha koʻrsatkichga ega boʻlsa — “Attestatsiyadan oʻtdi, ikkinchi malaka toifasi (katta oʻqituvchi lavozimi) saqlansin”;

60 foizdan kam koʻrsatkichga ega boʻlsa — “Attestatsiyadan oʻtmadi, mutaxassis (oliy yoki oʻrta maxsus, professional maʼlumotli oʻqituvchi) lavozimiga tushirilsin” (navbatdan tashqari attestatsiyaga jalb etilgan pedagog kadrlar bundan mustasno);

g) mutaxassis, oliy yoki oʻrta maxsus, professional maʼlumotli oʻqituvchi lavozimidagi pedagog kadr baholash mezonlarining har biridan:

60 foiz va undan yuqori koʻrsatkichga ega boʻlsa — “Attestatsiyadan oʻtdi, ikkinchi malaka toifasi (katta oʻqituvchi lavozimi) berilsin”;

59 foizdan 55 foizgacha koʻrsatkichga ega boʻlsa — “Attestatsiyadan oʻtdi, mutaxassis (oliy yoki oʻrta maxsus, professional maʼlumotli oʻqituvchi) lavozimi saqlansin”;

55 foizdan kam koʻrsatkichga ega boʻlsa — “Attestatsiyadan oʻtmadi, mutaxassis (oliy yoki oʻrta maxsus, professional maʼlumotli oʻqituvchi) lavozimiga muvofiq emas”.

68. Attestatsiya komissiyalari mutaxassis, oliy yoki oʻrta maxsus, professional maʼlumotli oʻqituvchi lavozimidagi pedagog kadrlar boʻyicha “Attestatsiyadan oʻtmadi, mutaxassis (oliy yoki oʻrta maxsus, professional maʼlumotli oʻqituvchi) lavozimiga muvofiq emas” qarorini qabul qilsa, ular navbatdan tashqari malaka oshirish kurslariga yuboriladi hamda keyingi yilda qayta attestatsiyaga jalb etiladi.

Attestatsiya komissiyalari qayta attestatsiyaga jalb etilgan pedagog kadrlar boʻyicha “Attestatsiyadan oʻtmadi, mutaxassis (oliy yoki oʻrta maxsus, professional maʼlumotli oʻqituvchi) lavozimiga muvofiq emas” qarorini qabul qilsa, ish beruvchi tomonidan ular bilan tuzilgan mehnat shartnomasi mehnat haqidagi qonunlarda belgilangan tartibda bekor qilinadi.

69. Baholash mezonlari boʻyicha oʻrtacha koʻrsatkich chiqarilmaydi hamda baholash mezonlarining birortasi boʻyicha belgilangan koʻrsatkichdan past baholansa “attestatsiyadan oʻtmadi” degan qaror qabul qilinadi.

70. Pedagog kadrlar attestatsiyaning biror bosqichida uzrli sababga (mehnatga layoqatsizlik varaqasi, taʼlimni boshqarish boʻyicha maxsus vakolat berilgan davlat organi yoki taʼlim muassasalari rahbarlari maʼlumotnomasi) koʻra kelmagan boʻlsa, ularning attestatsiyasi boshqa muddatga koʻchiriladi.

71. Pedagog kadr uzrsiz sababga koʻra attestatsiyaning biror bosqichida ishtirok etmagan boʻlsa, attestatsiyadan oʻtmagan hisoblanadi hamda unga nisbatan “Attestatsiyadan oʻtmadi, tegishli malaka toifasi yoki lavozimi tushirilsin”, mutaxassis, oliy yoki oʻrta maxsus, professional maʼlumotli oʻqituvchi lavozimi boʻyicha “Attestatsiyadan oʻtmadi, mutaxassis (oliy yoki oʻrta maxsus, professional maʼlumotli oʻqituvchi) lavozimiga muvofiq emas” qarori qabul qilinadi.

72. Attestatsiya komissiyalari qarori ushbu Nizomga 2-ilovaga muvofiq shaklda rasmiylashtiriladi hamda komissiya raisi, rais oʻrinbosari va kotib tomonidan imzolanadi.

73. Attestatsiya komissiyalari qarori asosida ushbu Nizomga 3-ilovaga muvofiq shakldagi attestatsiya varaqasi rasmiylashtiriladi hamda attestatsiya komissiyasi raisi, rais oʻrinbosari, yigʻilishda ishtirok etgan aʼzolar va kotib tomonidan imzolanadi.

Attestatsiya varaqasi ikki nusxada toʻldiriladi va bir nusxasi pedagog kadrlarning ish joyidagi shaxsiy hujjatlari yigʻmajildida, ikkinchi nusxasi attestatsiya komissiyasida saqlanadi.

74. Pedagog kadrlarning attestatsiyasiga oid hujjatlarining toʻplangan yigʻmajildi navbatdagi attestatsiyagacha taʼlim muassasasida saqlanadi.

75. Attestatsiya komissiyalarining qaroriga koʻra oliy, birinchi, ikkinchi malaka toifasiga yoki bosh, yetakchi, katta oʻqituvchi lavozimiga ega boʻlgan pedagog kadrlarga ushbu Nizomga 4-ilovaga muvofiq shakldagi pedagog kadrning attestatsiyadan oʻtganligi toʻgʻrisidagi sertifikat (keyingi oʻrinlarda sertifikat deb ataladi) attestatsiya oʻtkazilgandan soʻng bir oy muddat ichida topshiriladi.

Sertifikatlarning xatosiz toʻldirilishi uchun attestatsiya komissiyasi raislari masʼul hisoblanadi.

76. Sertifikat qatʼiy hisobda turadigan hujjat hisoblanadi, unda hisob seriyasi, raqami va himoya darajasi boʻladi. Sertifikat blankalari Davlat inspeksiyasi buyurtmasi boʻyicha Oʻzbekiston Respublikasi Markaziy banki huzuridagi “Davlat belgisi” davlat-ishlab chiqarish birlashmasi bosmaxonasida tayyorlanadi.

77. Davlat inspeksiyasi boshligʻi, maktabgacha taʼlim boshqarmalari, xalq taʼlimi boshqarmalari, madaniyat boshqarmalari, jismoniy tarbiya va sport boshqarmalari, kasbiy taʼlimni rivojlantirish va muvofiqlashtirish boshqarmalari boshliqlari, oliy taʼlim muassasalari rektorlari, tuman (shahar) maktabgacha taʼlim, xalq taʼlimi, madaniyat, jismoniy tarbiya va sport boʻlimlari va taʼlim muassasalari rahbarlari, tizimida taʼlim muassasalari boʻlgan vazirliklar va idoralarning rahbarlari sertifikatlarning hisobi, saqlanishi hamda maqsadli ishlatilishi yuzasidan shaxsan javobgar hisoblanadi.

78. Attestatsiya komissiyalari sertifikatlarning pedagog kadrlarga tarqatilishini roʻyxatga olish uchun maxsus daftar (sahifalangan, tikilgan va muhrlangan) yuritadi va unda quyidagilarni qayd etadi:

tartib raqami;

pedagog kadrlarning familiyasi, ismi, otasining ismi;

sertifikatning tartib raqami, seriyasi;

sertifikat berilishiga asos boʻlgan komissiya qarorining sanasi va tartib raqami;

sertifikatni bergan komissiyaning nomi;

sertifikatning amal qilish muddati;

sertifikat nusxasi (dublikati)ning berilishi asosi va sanasi.

79. Pedagog kadrlarning bazaviy tarif stavkalari miqdori, ularning malaka toifasi yoki lavozimi sertifikat asosida belgilanadi.

80. Sertifikatning amal qilish muddati tugagan pedagog kadrlarga mutaxassis, oliy yoki oʻrta maxsus, professional maʼlumotli oʻqituvchi lavozimi boʻyicha haq toʻlanadi.

81. Sertifikatning amal qilish muddati tugab, mutaxassis, oliy yoki oʻrta maxsus, professional maʼlumotli oʻqituvchi lavozimi boʻyicha haq toʻlanayotgan pedagog kadrlar navbatdagi attestatsiyaga oxirgi sertifikatda koʻrsatilgan malaka toifasi yoki lavozimi boʻyicha jalb qilinadi.

82. Davlat inspeksiyasi Maktabgacha taʼlim vazirligi, Xalq taʼlimi vazirligi, Oliy va oʻrta maxsus taʼlim vazirligi, Madaniyat vazirligi, Jismoniy tarbiya va sport vazirligi bilan kelishgan holda sertifikatlarni hisobga olish, saqlash va topshirish tartibini belgilaydi.

83. Attestatsiyadan oʻtganligi toʻgʻrisida sertifikatga ega boʻlmagan ishga yangi qabul qilingan pedagog kadrlarga yoxud oliy yoki professional taʼlim muassasalarini bitirib birinchi bor ishga kirgan pedagog kadrlarga quyidagi tartibda malaka toifasi (lavozimi) beriladi:

oʻrta maxsus, professional maʼlumotli pedagog kadrlarga — oʻrta maxsus, professional maʼlumotli oʻqituvchi lavozimi;

bakalavr darajasiga ega pedagog kadrlarga — mutaxassis yoki oliy maʼlumotli oʻqituvchi lavozimi;

magistr darajasiga ega mutaxassislarga, shuningdek oliy maʼlumot darajasi boʻyicha akademik darajalar joriy etilgunga qadar olingan oliy maʼlumotli pedagog kadrlarga — ikkinchi malaka toifasi yoki katta oʻqituvchi lavozimi (ushbu malaka toifasi yoki lavozimiga ega boʻlgan pedagog kadrlar besh yildan keyin belgilangan tartibda navbatdagi attestatsiyaga jalb qilinadi);

ilmiy darajaga (fan nomzodi, falsafa doktori (Doctor of Philosophy (PhD) yoki fan doktori (Doctor of Science (DSc) ilmiy darajasiga ega boʻlgan pedagog kadrlarga — oliy malaka toifasi yoki bosh oʻqituvchi lavozimi (ushbu malaka toifasi yoki lavozimiga ega boʻlgan pedagog kadrlar keyingi attestatsiyalarga jalb qilinmaydi).

4-bob. Attestatsiya natijalari yuzasidan murojaat qilish

84. Attestatsiya komissiyalari qaroridan norozi boʻlgan pedagog kadrlar attestatsiya natijalari eʼlon qilingan kundan boshlab oʻn kun mobaynida apellatsiya komissiyasiga yozma ravishda ariza (shikoyat) berishlari mumkin.

85. Apellatsiya komissiyasi besh kishidan iborat tarkibda attestatsiya boshlangandan keyin uch kun ichida tegishliligiga koʻra:

maktabgacha taʼlim vaziri, xalq taʼlimi vaziri, madaniyat vaziri, jismoniy tarbiya va sport vazirining tegishli buyruqlari bilan ushbu vazirliklarda — oliy malaka toifasiga talabgor pedagog kadrlarning arizalarini koʻrib chiqish uchun;

maktabgacha taʼlim vaziri, xalq taʼlimi vaziri, madaniyat vaziri, jismoniy tarbiya va sport vazirining tegishli buyruqlari bilan maktabgacha taʼlim, xalq taʼlimi, madaniyat, jismoniy tarbiya va sport boshqarmalarida — birinchi malaka toifasiga talabgor pedagog kadrlarning arizalarini koʻrib chiqish uchun;

maktabgacha taʼlim, xalq taʼlimi, madaniyat, jismoniy tarbiya va sport boshqarmalari boshliqlarining tegishli buyruqlari bilan maktabgacha taʼlim, xalq taʼlimi, madaniyat, jismoniy tarbiya va sport boʻlimlarida — ikkinchi malaka toifasiga talabgor pedagog kadrlarning arizalarini koʻrib chiqish uchun;

Oliy va oʻrta maxsus taʼlim vazirligi, tizimida taʼlim muassasalari boʻlgan vazirliklar va idoralar rahbarlarining tegishli buyruqlari bilan oliy taʼlim muassasalarida, kasbiy taʼlimni rivojlantirish va muvofiqlashtirish boshqarmalarida hamda hududiy boʻlinmalarda ikkinchi, birinchi va oliy malaka toifalari, katta, yetakchi va bosh oʻqituvchi lavozimlariga talabgor pedagog kadrlarning arizalarini koʻrib chiqish uchun tashkil etiladi.

86. Apellatsiya komissiyasining tarkibi va ish tartibi apellatsiya komissiyasini tashkil etish toʻgʻrisidagi buyruqda belgilanadi.

87. Apellatsiya komissiyasi tarkibiga attestatsiya komissiyalari tarkibidan aʼzo kiritilmaydi.

88. Apellatsiya komissiyasi muammoli holatlarga aniqlik kiritish maqsadida jamoatchilik asosida malakali mutaxassislarni jalb etishi mumkin.

89. Apellatsiya komissiyasi yigʻilishida komissiya aʼzolarining uchdan ikki qismi ishtirok etsa, uning qabul qilgan qarori qonuniy kuchga ega boʻladi.

90. Ariza (shikoyat) roʻyxatga olingan kundan boshlab oʻn besh kun muddatda koʻrib chiqiladi.

91. Murojaat etuvchi pedagog kadrlar apellatsiya komissiyasi tomonidan arizasi (shikoyati) koʻrib chiqilishi jarayonida ishtirok etishi mumkin.

92. Apellatsiya komissiyasi attestatsiya komissiyasi qarorini oʻzgartirishsiz qoldirish yoki uni bekor qilib, qayta attestatsiya tashkil etish haqida qaror chiqaradi.

93. Apellatsiya komissiyasi qarori nusxasi murojaat etuvchi pedagog kadrga va tegishli attestatsiya komissiyasiga apellatsiya komissiyasi qarori chiqqan kundan eʼtiboran besh kun muddatda taqdim etiladi.

5-bob. Yakunlovchi qoidalar

94. Attestatsiya komissiyasi yoki apellatsiya komissiyasi qarori yuzasidan qonun hujjatlarida belgilangan tartibda sudga shikoyat qilinishi mumkin.

95. Ushbu Nizom talablari buzilishida aybdor boʻlgan shaxslar qonun hujjatlariga muvofiq javob beradilar.

Maktabgacha, umumiy oʻrta, oʻrta maxsus, professional va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomga 1-ILOVA

Pedagog kadrlarning attestatsiyasini tashkil etish va oʻtkazish

SXEMASI

Bosqichlar Subyektlar Tadbirlar Bajarish muddatlari 1-bosqich Davlat inspeksiyasi, Maktabgacha taʼlim vazirligi, Xalq taʼlimi vazirligi, Oliy va oʻrta maxsus taʼlim vazirligi, Madaniyat vazirligi, Jismoniy tarbiya va sport vazirligi hamda tizimida taʼlim muassasalari boʻlgan vazirliklar va idoralar. Attestatsiyadan oʻtish muddati kelgan pedagog kadrlarni attestatsiyadan oʻtkazish jadvalini ishlab chiqish va tasdiqlash. Har yili 20-yanvarga qadar 2-bosqich Maktabgacha taʼlim vazirligi, Xalq taʼlimi vazirligi, Madaniyat vazirligi, Jismoniy tarbiya va sport vazirligi hamda Davlat inspeksiyasi. 1. Qoraqalpogʻiston Respublikasi, viloyatlar va Toshkent shahar maktabgacha, xalq taʼlimi, madaniyat, jismoniy tarbiya va sport boshqarmalari attestatsiya komissiyalari tarkibini tasdiqlash. Har yili mart oyida Qoraqalpogʻiston Respublikasi, viloyatlar va Toshkent shahar maktabgacha taʼlim, xalq taʼlimi, madaniyat, jismoniy tarbiya va sport boshqarmalari. 2. Tuman (shahar) maktabgacha, xalq taʼlimi, madaniyat, jismoniy tarbiya va sport boʻlimlarida tuman (shahar) attestatsiya komissiyalari tarkibini tasdiqlash. Tuman (shahar) maktabgacha, xalq taʼlimi, madaniyat, jismoniy tarbiya va sport boʻlimlari. 3. Taʼlim muassasalarida muassasa attestatsiya komissiyalari tarkibini tasdiqlash. Oliy va oʻrta maxsus taʼlim vazirligi, tizimida taʼlim muassasalari boʻlgan vazirliklar va idoralar hamda Davlat inspeksiyasi. 4. Kasbiy taʼlimni rivojlantirish va muvofiqlashtirish hududiy boshqarmalari, oliy taʼlim muassasalari, tizimida taʼlim muassasasi boʻlgan vazirliklar va idoralarning hududiy boʻlinmalari attestatsiya komissiyalari tarkibini tasdiqlash. 3-bosqich Taʼlim muassasalari rahbarlari. 1. Attestatsiya muddatini eʼlon qilish va pedagog kadrlarni attestatsiyadan oʻtkazish tartibi bilan tanishtirish. 2. Attestatsiyadan oʻtuvchi pedagog kadrlarning malaka tavsiflarida va baholash mezonlarida belgilangan talablarni bajarganliklari haqidagi tavsiyalarni tayyorlash uchun taʼlim muassasalarida ekspert guruhlari tuzish. Har yili fevral — aprel oyida Taʼlim muassasalarida tuzilgan ekspert guruhlari. 3. Attestatsiyadan oʻtuvchilarning oʻquv fani boʻyicha malaka sinovi natijalarini, dars oʻtish mahorati va mehnati samaradorligini eks�ertlar tomonidan oʻrganish hamda tegishli tavsiyalar tayyorlash 4-bosqich Maktabgacha, xalq taʼlimi, madaniyat, jismoniy tarbiya va sport boshqarmalari, kasbiy taʼlimni rivojlantirish va muvofiqlashtirish hududiy boshqarmalari, oliy taʼlim muassasalari, tizimida taʼlim muassasasi boʻlgan vazirliklar va idoralarning hududiy boʻlinmalari, tuman (shahar) va muassasalar attestatsiya komissiyalari. Ekspert guruhi tomonidan oʻrganilgan birinchi bosqich natijalarini tahlil qilish, attestatsiya jarayonida toʻplangan hujjatlar jamlanmasini (portfolioni) oʻrganish va pedagog kadrni malaka toifasida (lavozimida) qoldirish yoki boshqa toifa (lavozim) berish toʻgʻrisida qaror qabul qilish. Har yili may-iyun oylarida 5-bosqich Davlat inspeksiyasi, maktabgacha, xalq taʼlimi, madaniyat, jismoniy tarbiya va sport boshqarmalari, kasbiy taʼlimni rivojlantirish va muvofiqlashtirish hududiy boshqarmalari, oliy taʼlim muassasalari, tizimida taʼlim muassasasi boʻlgan vazirliklar va idoralarning hududiy boʻlinmalari, tuman (shahar) va muassasalar attestatsiya komissiyalari. Attestatsiya komissiyalari�ing qaroriga koʻra ikkinchi, birinchi, oliy malaka toifasi yoki katta, yetakchi, bosh oʻqituvchi lavozimiga ega boʻlgan pedagog kadrlarga sertifikat topshirish. Har yili iyun-iyul oylarida

Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomga 2-ILOVA

___________________________ (komissiya nomi yoziladi) komissiyasi yigʻilishining _____ yil “___” _____________ dagi ______-son Q A R O R I Raislik qiluvchi: Ishtirok etganlar: _________________________________ _________________________________ _________________________________ _________________________________ _________________________________ _________________________________ _________________________________ — komissiya raisi — komissiya raisining oʻrinbosari — komissiya aʼzosi — komissiya aʼzosi — komissiya aʼzosi — komissiya aʼzosi — komissiya kotibi T/r Taʼlim muassasasining nomi yoki raqami Pedagog kadrning Dars berayotgan oʻquv fani Amaldagi malaka toifasi yoki lavozimi Oʻquv fani boʻyicha malaka sinovi balli Dars oʻtish mahorati balli Mehnati samaradorligi balli Attestatsiya natijalariga koʻra komissiya qarori Attestatsiya natijalariga koʻra berilgan malaka toifasi yoki lavozimi familiyasi ismi otasining ismi Komissiya raisi: Komissiya raisining oʻrinbosari Komissiya kotibi: _______________________ _______________________ _______________________

Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomga 3-ILOVA

Maktabgacha, umumiy oʻrta, oʻrta maxsus, kasb-hunar va maktabdan tashqari davlat taʼlim muassasalari pedagog kadrlarini attestatsiyadan oʻtkazish tartibi toʻgʻrisidagi nizomga 4-ILOVA

(Qonunchilik maʼlumotlari milliy bazasi, 14.05.2019-y., 09/19/392/3121-son; 29.12.2019-y., 09/19/1046/4242-son; 21.02.2020-y., 09/20/106/199-son, 27.06.2020-y., 09/20/411/1000-son, 13.08.2020-y., 09/20/480/1168-son, 31.10.2020-y., 09/20/677/1443-son; Qonunchilik maʼlumotlari milliy bazasi, 28.04.2021-y., 09/21/243/0388-son, 04.06.2021-y., 09/21/345/0522-son, 17.08.2021-y., 09/21/524/0802-son)