Oʻzbekiston Respublikasi va Birlashgan Arab Amirliklari oʻrtasida ikki tomonlama hamkorlikni yanada mustahkamlash va kengaytirish chora-tadbirlari toʻgʻrisida (PQ-4256-son)

02.04.2019

Oʻzbekiston Respublikasi Prezidentining

Qarori

Oʻzbekiston Respublikasi Prezidentining 2019-yil 24 — 26-mart kunlari Birlashgan Arab Amirliklariga rasmiy tashrifi Oʻzbekiston va Amirliklarning doʻstlik hamda sheriklik munosabatlari tarixida yangi sahifa ochdi, keng qamrovli hamkorlikni kengaytirishga kuchli turtki berdi.

Ochiq, doʻstona va konstruktiv muhitda oʻtgan oliy darajadagi samarali muzokaralar, Abu-Dabi va Dubay shaharlarida oʻtkazilgan uchrashuvlar tomonlarning oʻzaro manfaatli hamkorlikni rivojlantirishga boʻlgan intilishlari kuchayganligini yana bir bor tasdiqladi.

Birlashgan Arab Amirliklarida ulkan investitsiya imkoniyatlari mavjudligini, ilgʻor texnologiyalarni ildam rivojlantirish, modernizatsiya qilish va samarali tatbiq etish, diversifikatsiya qilingan va barqaror iqtisodiyotni shakllantirishni taʼminlaydigan keng miqyosli investitsiya loyihalarini amalga oshirish sohasida katta tajribaga ega ekanligini eʼtiborga olib, Oʻzbekiston Respublikasi Prezidentining Birlashgan Arab Amirliklariga rasmiy tashrifi davomida eng muhim yoʻnalishlar boʻyicha hamkorlikni yanada faollashtirish chora-tadbirlari belgilandi.

Oʻzbekiston Respublikasi va Birlashgan Arab Amirliklari oʻrtasida Qoʻshma bayonot, 9 ta hukumatlararo va idoralararo hujjatlar, shuningdek, 10 milliard dollardan ortiq miqdorda savdo-iqtisodiy va investitsiyaviy sohalardagi bitimlar imzolandi.

Oʻzbekiston Respublikasi hamda Birlashgan Arab Amirliklari (keyingi oʻrinlarda — BAA) oʻrtasida siyosiy, savdo-iqtisodiy, investitsiyaviy, moliyaviy-texnik, innovatsion va madaniy-gumanitar hamkorlikni yanada kengaytirish boʻyicha imzolangan bitimlar va erishilgan kelishuvlarni soʻzsiz amalga oshirishni taʼminlash maqsadida:

1. Quyidagilar:

Oʻzbekiston Respublikasi Prezidentining Birlashgan Arab Amirliklariga rasmiy tashrifi davomida imzolangan ikki tomonlama hujjatlarni amalga oshirish boʻyicha Amaliy chora-tadbirlar rejasi (“Yoʻl xaritasi”) 1-ilovaga* muvofiq;

Oʻzbekiston Respublikasi hamda Birlashgan Arab Amirliklari oʻrtasida siyosiy, savdo-iqtisodiy va madaniy-gumanitar, shuningdek, xavfsizlik sohasida oʻzaro hamkorlikni yanada kengaytirish boʻyicha 2019-2020-yillarga moʻljallangan Amaliy chora-tadbirlar rejasi (“Yoʻl xaritasi”) 2-ilovaga* muvofiq;

Oʻzbekiston Respublikasi Prezidentining Birlashgan Arab Amirliklariga rasmiy tashrifi davomida imzolangan savdo-iqtisodiy va investitsiyaviy bitimlarni amalga oshirish boʻyicha Amaliy chora-tadbirlar rejasi (“Yoʻl xaritasi”) 3-ilovaga* muvofiq;

Oʻzbekiston Respublikasi Prezidentining Birlashgan Arab Amirliklariga rasmiy tashrifi davomida imzolangan ikki tomonlama bitimlar hamda erishilgan kelishuvlarning oʻz vaqtida va soʻzsiz amalga oshirilishini monitoring va nazorat qilishni taʼminlash mexanizmi 4-ilovaga* muvofiq tasdiqlansin.

2. Oʻzbekiston Respublikasi Vazirlar Mahkamasi ikki hafta muddatda mazkur qarorning 3-ilovasiga* kiritilgan investitsiya loyihalarini amalga oshirishning tarmoq jadvallarini tasdiqlasin.

3. Birlashgan Arab Amirliklariga oliy darajadagi tashrif davomida erishilgan kelishuvlarning soʻzsiz bajarilishini taʼminlash masalalari boʻyicha Ishchi guruh 5-ilovaga* muvofiq tuzilsin.

Ishchi guruhning (S.U. Umurzoqov, Sh.A. Vafoyev) asosiy vazifalari etib quyidagilar belgilansin:

imzolangan hujjatlarning soʻzsiz va sifatli bajarilishini doimiy hamda tizimli monitoring va nazorat qilishni, shu jumladan BAAda oliy darajada erishilgan kelishuvlar hamda ayrim hujjatlarning kuchga kirishi boʻyicha ichki davlat tartib-taomillarining oʻz vaqtida bajarilishini doimiy asosda monitoring va nazorat qilishni tashkillashtirish;

mazkur qaror bilan tasdiqlangan amaliy chora-tadbirlar rejalari (“yoʻl xaritalari”)ning soʻzsiz ijro etilishi boʻyicha masʼul ijrochilar — vazirlik, idoralar, mahalliy davlat hokimiyati organlari va boshqa tashkilotlar rahbarlari tomonidan koʻrilayotgan amaliy choralar toʻgʻrisidagi hisobotlarni har oyda eshitish;

siyosiy, savdo-iqtisodiy, investitsiyaviy, moliyaviy-texnik, innovatsion va madaniy-gumanitar hamkorlikni yanada kengaytirish boʻyicha imzolangan ikki tomonlama bitimlar va erishilgan kelishuvlarni amalga oshirish, shuningdek, ushbu masalalar boʻyicha Amirliklar tomoni, avvalo, Oʻzbekiston — BAA Hukumatlararo komissiyasi doirasida muntazam va samarali hamkorlikni tashkil qilishni taʼminlash;

ikki tomonlama hamkorlikning barcha yoʻnalishlari boʻyicha joriy masalalarni tezkorlik bilan hal etish va olgʻa siljitish, muzokaralar olib borish uchun tegishli vazirlik, idora va kompaniyalarning vakillari bilan birgalikda Ishchi guruh rahbariyatini Birlashgan Arab Amirliklariga muntazam xizmat safarlariga yuborib turish.

4. 2019-2020-yillarda BAA bilan savdo-iqtisodiy, investitsiyaviy va moliyaviy hamkorlik loyihalari va dasturlarini oʻz vaqtida hamda toʻliq hajmda amalga oshirish boʻyicha vazirlik va idoralarning ishlari samarali muvofiqlashtirilishini, shuningdek, Amirliklar tomoni bilan oʻzaro sermahsul hamkorlikni taʼminlash Oʻzbekiston Respublikasi investitsiyalar va tashqi savdo vaziri oʻrinbosari Sh.A. Vafoyev faoliyatining asosiy vazifasi etib belgilansin.

Sh.A. Vafoyev faoliyatining aniq natijalari hisobot yili yakunlari boʻyicha koʻrib chiqiladi.

5. Masʼul ijrochilar — vazirlik, idoralar, mahalliy davlat hokimiyati organlari va boshqa tashkilotlar:

“Ijro.gov.uz” tizimidan foydalangan holda tarmoq jadvallarini va mazkur qaror bilan tasdiqlangan amaliy chora-tadbirlar rejalarini oʻz vaqtida va sifatli bajarishni;

hisobot oyidan keyingi har oyning 3-sanasiga qadar tarmoq jadvallari va mazkur qaror bilan tasdiqlangan amaliy chora-tadbirlar rejalari ijrosi yuzasidan maʼlumotlarni tegishliligi boʻyicha Tashqi ishlar vazirligiga — 1 va 2-ilovalarga* muvofiq, Investitsiyalar va tashqi savdo vazirligiga — 3-ilovaga* muvofiq taqdim etilishini taʼminlasin.

Tashqi ishlar vazirligi, Investitsiyalar va tashqi savdo vazirligi hisobot oyidan keyingi har oyning 7-sanasiga qadar Oʻzbekiston Respublikasi Vazirlar Mahkamasi va Hisob palatasiga tarmoq jadvallari va mazkur qaror bilan tasdiqlangan amaliy chora-tadbirlar rejalarining ijrosi boʻyicha umumlashtirilgan maʼlumotlarni kiritsin.

Oʻzbekiston Respublikasi Vazirlar Mahkamasi va Hisob palatasi hisobot oyidan keyingi har oyning 10-sanasiga qadar Oʻzbekiston Respublikasi Prezidenti Administratsiyasi Ijro etuvchi apparatiga va Oʻzbekiston Respublikasi Prezidenti huzuridagi Xavfsizlik kengashi apparatiga mazkur qaror hamda tasdiqlangan amaliy chora-tadbirlar rejalari ijrosining tanqidiy tahlilini taqdim etib borsin.

6. Oʻzbekiston Respublikasi va BAA oʻrtasidagi investitsiyaviy va savdo-iqtisodiy hamkorlik loyihalarini sifatli tayyorlash va amalga oshirish boʻyicha tizimli hamda uzluksiz ishlarni taʼminlash maqsadida Oʻzbekiston Respublikasi Investitsiyalar va tashqi savdo vazirligining BAAda vakolatxonasi “UzFDI” (keyingi oʻrinlarda — “UzFDI”) tashkil qilinsin.

7. “UzFDI”ning tashkiliy tuzilmasi ushbu qarorning 6-ilovasiga* muvofiq tasdiqlansin.

* 1 — 6-ilovalar rus tili matnda berilgan.

8. Oʻzbekiston Respublikasi Investitsiyalar va tashqi savdo vazirligi:

ikki hafta muddatda “UzFDI”ning xarajatlar smetasi, uni budjet va budjetdan tashqari mablagʻlar hisobidan moliyalashtirish manbalari, xodimlarga haq toʻlash (shu jumladan, aniq faoliyat natijalari uchun mukofotlash) va moddiy-texnik taʼminoti darajasi koʻrsatilgan holda hukumat qarori loyihasini kiritsin;

bir oy muddatda barcha tashkiliy masalalar hal etilishini, vakolatxona malakali mutaxassislar bilan toʻldirilishini va BAAda “UzFDI” faoliyat boshlashini taʼminlasin.

9. Belgilansinki, Oʻzbekiston Respublikasi vazirliklari, idoralari hamda davlat ulushi 50 foizdan oshadigan xoʻjalik yurituvchi subyektlarning xorijiy davlat idoralari, chet el hukumat moliya tashkilotlari va xalqaro moliya institutlari bilan investitsiyaviy masalalar boʻyicha oʻzaro hamkorlikdagi harakati faqat Oʻzbekiston Respublikasi Investitsiyalar va tashqi savdo vazirligi orqali, xorijiy kompaniyalar va salohiyatli investorlar bilan hamkorlik yoʻnalishlari va loyihalari Oʻzbekiston Respublikasi Investitsiyalar va tashqi savdo vazirligi bilan majburiy kelishish orqali amalga oshiriladi.

10. Mazkur qarorning ijrosini nazorat qilish Oʻzbekiston Respublikasining Bosh vaziri A.N. Aripov, Oʻzbekiston Respublikasi Prezidenti Administratsiyasi rahbari Z.Sh. Nizomiddinov va Oʻzbekiston Respublikasi Prezidenti huzuridagi Xavfsizlik kengashi kotibi V.V. Maxmudov zimmasiga yuklansin.

Oʻzbekiston Respublikasi Prezidenti Sh. MIRZIYOYEV

Toshkent sh.,

2019-yil 2-aprel,

PQ-4256-son