Qurilish obyektlarini roʻyxatdan oʻtkazish va qurilish-montaj ishlarini boshlashga ruxsatnoma berish tartibi toʻgʻrisidagi nizomni tasdiqlash haqida (509-son)

29.12.2000

Oʻzbekiston Respublikasi Vazirlar Mahkamasining

qarori

Oʻzbekiston Respublikasida obyektlarni qurish va rekonstruksiya qilishni tashkil etishni tartibga solish, mulkchilik shakllaridan qatʼi nazar, qurilish subyektlari tomonidan kapital qurilish sohasidagi amaldagi normativ va qonun hujjatlariga rioya etilishini samarali nazorat qilishga erishish maqsadida Vazirlar Mahkamasi qaror qiladi:

1. Qurilish obyektlarini roʻyxatdan oʻtkazish va qurilish-montaj ishlarini boshlashga ruxsatnomalar berish tartibi toʻgʻrisidagi Nizom ilovaga muvofiq tasdiqlansin.

2. Vazirliklar va idoralar oʻz normativ hujjatlarini ushbu qarorga muvofiqlashtirsinlar.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.N. Isayev zimmasiga yuklansin.

Oʻzbekiston Respublikasi Bosh vaziri Oʻ. SULTONOV

Toshkent sh.,

2000-yil 29-dekabr,

509-son

Vazirlar Mahkamasining 2000-yil 29-dekabrdagi 509-son qaroriga ILOVA

Qurilish obyektlarini roʻyxatdan oʻtkazish va qurilish-montaj ishlarini boshlashga ruxsatnomalar berish tartibi toʻgʻrisida

NIZOM

I. Umumiy qoidalar

1. Ushbu Nizom “Boshdavarxitektqurilishnazorat” boshqarmasi organlarida qurilish obyektlarini roʻyxatdan oʻtkazish va qurilish-montaj ishlariga ruxsatnomalar berish tartibini belgilaydi.

Ushbu Nizomning amal qilishi yakka tartibdagi uy-joy qurilishi obyektlariga joriy etilmaydi.

2. Idoraviy mansubligidan va mulkchilik shakllaridan qatʼi nazar, yangi qurilayotgan, rekonstruksiya qilinayotgan (kengaytirilayotgan), texnika bilan qayta jihozlanayotgan va zamonaviylashtirilayotgan mavjud ishlab chiqarish va noishlab chiqarish yoʻnalishidagi obyektlar “Boshdavarxitektqurilishnazorat” boshqarmasi (keyingi oʻrinlarda roʻyxatdan oʻtkazuvchi organ deb ataladi) organlarida roʻyxatdan oʻtkazilishi kerak.

3. “Boshdavarxitektqurilishnazorat” boshqarmasi tomonidan qurilish obyektlarini roʻyxatdan oʻtkazish, shuningdek qurilish-montaj ishlarini boshlashga ruxsatnomalar berish quyidagi qurilish obyektlari boʻyicha amalga oshiriladi:

respublikaning bir nechta mintaqalari hududlarini qamrab oladigan muhandislik kommunikatsiyalari va infratuzilmalari obyektlari;

respublikaning turli mintaqalarida amalga oshirilayotgan, buyurtmachilari Toshkent shahrida joylashgan obyektlar;

eksperiment tariqasida amalga oshirilayotgan va kapital qurilishda tashkiliy-texnik jihatdan yangilik boʻlgan obyektlar.

Qolgan barcha qurilish obyektlari boʻyicha roʻyxatdan oʻtkazish va qurilish-montaj ishlarini boshlashga ruxsatnomalar berish Qoraqalpogʻiston Respublikasi, viloyatlar va Toshkent shahar davlat arxitektura-qurilish nazorati hududiy inspeksiyalari tomonidan amalga oshiriladi.

II. Roʻyxatdan oʻtkazish uchun zarur hujjatlar

4. Qurilish obyektini roʻyxatdan oʻtkazish uchun buyurtmachilar tomonidan roʻyxatdan oʻtkazuvchi organga quyidagilar taqdim etiladi:

a) belgilangan shakldagi ariza (1-ilova);

b) davlat ekspertiza organlarining ishchi loyiha boʻyicha ijobiy yigʻma ekspert xulosasi yoki obyekt qurilishi loyihalash bilan ayni bir vaqtda olib borilgan taqdirda — Oʻzbekiston Respublikasi Vazirlar Mahkamasining qarori;

v) ekologiya ekspertizasining ijobiy xulosasi — ishlab chiqarish sharoitlari zararli boʻlgan obyektlar boʻyicha;

v1) loyiha hujjatlariga sanoat xavfsizligi ekspertizasining ijobiy xulosasi — xavfli ishlab chiqarish obyektlari boʻyicha;

g) qurilish-montaj ishlarining ayrim litsenziyalanadigan turlarini amalga oshirish uchun pudrat tashkiloti litsenziyasi nusxasi;

d) arxitektura organlari bilan kelishib olingan obyektning bosh rejasi va fasadlari nusxasi yoki Qoraqalpogʻiston Respublikasi, viloyatlar va Toshkent shahar arxitektura va qurilish bosh boshqarmasi Shaharsozlik kengashining tegishli protokoli;

e) qurilish obyektining aniq roʻyxati.

III. Qurilish obyektlarini roʻyxatdan oʻtkazish va qurilish-montaj ishlarini boshlashga ruxsatnomalar berish tartibi

5. Roʻyxatdan oʻtkazuvchi organ texnik-iqtisodiy asoslashlari Vazirlar Mahkamasi tomonidan tasdiqlanadigan obyektlar boʻyicha koʻpi bilan 10 kun muddatda va qolgan obyektlar boʻyicha 5 kun muddatda buyurtmachi tomonidan taqdim etilgan hujjatlarni koʻrib chiqadi, shular asosida qurilish obyektini roʻyxatdan oʻtkazish toʻgʻrisida qaror qabul qiladi.

6. Quyidagi hollarda qurilish obyektini roʻyxatdan oʻtkazish rad etilishi mumkin:

hujjatlar va materiallarning belgilangan roʻyxati toʻla hajmda taqdim etilmaganda;

hujjatlar zarur darajada rasmiylashtirilmasdan taqdim etilganda;

taqdim etilgan hujjatlarda ishonchli boʻlmagan yoki chalkash maʼlumotlar mavjud boʻlganda;

taqdim etilgan hujjatlar va materiallar koʻrib chiqilayotganda ularni berishda Oʻzbekiston Respublikasi qonun hujjatlari meʼyorlari buzilganligi aniqlanganda.

Rad etish asoslangan va yozma holda boʻlishi kerak.

Qurilish obyektini roʻyxatdan oʻtkazish va qurilish-montaj ishlarini bajarishga ruxsatnoma berishning rad etilganligi ustidan yuqori organlarga yoxud sudga shikoyat qilinishi mumkin.

7. Buyurtmachi takroran murojaat qilgan taqdirda qurilish obyektini roʻyxatdan oʻtkazish toʻgʻrisidagi qaror tegishli hujjatlar taqdim etilgan sanadan boshlab koʻpi bilan besh kun muddatda qabul qilinadi.

8. Hujjatlarni koʻrib chiqish yakunlariga koʻra roʻyxatdan oʻtkazuvchi organ tomonidan 2 nusxada obyektni roʻyxatdan oʻtkazish varaqchasi rasmiylashtiriladi (2-ilova) va obyektlar qurilishini roʻyxatdan oʻtkazish jurnaliga tegishli yozuv yozib qoʻyiladi. Roʻyxatdan oʻtkazilgan qurilish obyekti uchun inventar hujjatlar yigʻma jildi yuritiladi.

Jurnalni va inventar hujjatlar yigʻma jildini yuritish va saqlash tartibi Davlat arxitektura-qurilish nazorati bosh boshqarmasi tomonidan belgilanadi.

9. Arxitektura-qurilish nazorati inspeksiyalari tomonidan buyurtmachiga qurilish-montaj ishlarini bajarish uchun ruxsatnoma 3-ilovaga muvofiq shakl boʻyicha qurilish obyektini roʻyxatdan oʻtkazish varaqchasi asosida beriladi.

10. Buyurtmachilar ruxsatnoma olganlaridan soʻng bir oy davomida roʻyxatdan oʻtkazgan organga obyektda qurilish-montaj ishlari boshlab yuborilganligi toʻgʻrisida xabar qilishlari shart. Mazkur qoida bajarilmagan taqdirda roʻyxatdan oʻtkazgan organ qurilish-montaj ishlarini toʻxtatishga yoxud ularni boshlab yuborish uchun berilgan ruxsatnomani bekor qilishga haqlidir.

11. Obyekt qurilishi loyihalash bilan ayni bir vaqtda olib borilayotgan qurilish obyektlarini roʻyxatdan oʻtkazish Vazirlar Mahkamasining 2000-yil 5-avgustdagi 305-son qarori bilan tasdiqlangan Nizomga muvofiq amalga oshiriladi.

12. Roʻyxatdan oʻtkazilgan qurilish obyekti har yili aniqlab borilishi kerak (kalendar yilda uni qurilishlar roʻyxatiga kiritish yoki chiqarib tashlash uchun).

Buning uchun buyurtmachi roʻyxatdan oʻtkazgan organga qurilish obyektining roʻyxatdan oʻtkazish varaqchalari maʼlumotlarini aniqlash boʻyicha xabarlarni va joriy davr uchun aniq roʻyxatni taqdim etadi.

IV. Yakunlovchi qoidalar

13. Davlat arxitektura-qurilish nazorati bosh boshqarmasi inspektorlari qurilish qatnashchilari tomonidan amaldagi normativlar talablariga rioya qilinishini taʼminlash uchun qurilish (montaj)ning borishini uning barcha bosqichlarida belgilangan tartibda nazorat tekshiruvini oʻtkazadilar. Aniqlangan buzilishlar faktlari boʻyicha tegishli dalolatnomalar tuziladi yoki yozma koʻrsatmalar beriladi, ishlarni amalga oshirish jurnallariga yozib qoʻyiladi, zarur boʻlgan hollarda qonun hujjatlarida nazarda tutilgan sanksiyalar qoʻllaniladi.

14. Ruxsatnomalar berishga asos boʻlgan shart-sharoitlar oʻzgargan hollarda (ishlarni yurituvchi, obyektda texnik va mualliflik nazoratini amalga oshiruvchi shaxslar almashganda, litsenziyaning amalda boʻlish muddati tugaganda, loyihaviy yechimlarda jiddiy oʻzgarishlar va boshqalar boʻlganda) buyurtmachi roʻyxatdan oʻtkazuvchi organga tegishli oʻzgarishlarni tasdiqlovchi hujjatlarni 10 kun mobaynida taqdim etishi kerak.

15. Mazkur Nizomni buzganlik uchun aybdor shaxslar qonun hujjatlarida belgilangan tartibda javob beradilar.

Qurilish obyektlarini roʻyxatdan oʻtkazish tartibiga 1-ILOVA

Qurilish obyektlarini roʻyxatdan oʻtkazish tartibiga 2-ILOVA

Oʻzbekiston Respublikasi “Davarxitektqurilish” qoʻmitasi “Boshdavarxitektqurilishnazorat” boshqarmasi

Qurilish obyektlarini roʻyxatdan oʻtkazish tartibiga 3-ILOVA

Oʻzbekiston Respublikasi “Davarxitektqurilish” qoʻmitasi “Boshdavarxitektqurilishnazorat” boshqarmasi