Maxsus axborot portali operatorining davlat xaridlarini tashkil etish hamda oʻtkazish borasidagi faoliyati toʻgʻrisidagi nizomga oʻzgartirish va qoʻshimchalar kiritish haqida (3015-1-son)

22.04.2019

Oʻzbekiston Respublikasi Moliya vazirining

buyrugʻi

[Oʻzbekiston Respublikasi Adliya vazirligi tomonidan 2019-yil 22-aprelda roʻyxatdan oʻtkazildi, roʻyxat raqami 3015-1]

Oʻzbekiston Respublikasi Prezidentining 2019-yil 10-yanvardagi PF-5624-son “Oʻzbekiston Respublikasi Prezidenti huzuridagi Loyiha boshqaruvi milliy agentligi faoliyatini yanada takomillashtirish chora-tadbirlari toʻgʻrisida”gi Farmoniga muvofiq buyuraman:

1. Oʻzbekiston Respublikasi Prezidenti huzuridagi Loyiha boshqaruvi milliy agentligi direktorining 2018-yil 15-maydagi 186-son buyrugʻi (roʻyxat raqami 3015, 2018-yil 21-may) (Oʻzbekiston Respublikasi qonun hujjatlari toʻplami, 2018-y., 21-son, 444-modda) bilan tasdiqlangan Maxsus axborot portali operatorining davlat xaridlarini tashkil etish hamda oʻtkazish borasidagi faoliyati toʻgʻrisidagi nizomga ilovaga muvofiq oʻzgartirish va qoʻshimchalar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

Vazir D. KUCHKAROV

Toshkent sh.,

2019-yil 11-mart,

37-son

Oʻzbekiston Respublikasi moliya vazirining 2019-yil 11-martdagi 37-son buyrugʻiga ILOVA

Maxsus axborot portali operatorining davlat xaridlarini tashkil etish hamda oʻtkazish borasidagi faoliyati toʻgʻrisidagi nizomga kiritilayotgan oʻzgartirish va qoʻshimchalar

1. 1-banddagi “Oʻzbekiston Respublikasi Prezidenti huzuridagi Loyiha boshqaruvi milliy agentligi (bundan buyon matnda Agentlik deb yuritiladi)” degan soʻzlar “Oʻzbekiston Respublikasi Moliya vazirligi (bundan buyon matnda Moliya vazirligi deb yuritiladi)” degan soʻzlar bilan almashtirilsin.

2. 2-bandning ikkinchi xatboshisidagi va 11-banddagi “Agentlik” degan soʻz “Moliya vazirligi” degan soʻzlar bilan almashtirilsin.

3. 4, 6-bandlardagi va 7-bandning birinchi xatboshisidagi “Agentlik” degan soʻz “Moliya vazirligi” degan soʻzlar bilan almashtirilsin.

4. 5-banddagi “Agentlikka” degan soʻz “Moliya vazirligiga” degan soʻzlar bilan almashtirilsin.

5. 9-band quyidagi tahrirda bayon etilsin:

“9. Operator kelishuvni bekor qilish haqida Moliya vazirligiga kamida besh oy oldin xabarnoma yuborgan holda oʻz tashabbusi bilan Operatorlik funksiyalarini bajarishdan voz kechishga haqli.”.

6. 10-banddagi “Agentlik” degan soʻz “Moliya vazirligi” degan soʻzlar bilan almashtirilsin.

7. 12-bandning yettinchi xatboshisi quyidagi tahrirda bayon etilsin:

“Moliya vazirligi, Oʻzbekiston Respublikasi Investitsiyalar va tashqi savdo vazirligi, Oʻzbekiston Respublikasi Vazirlar Mahkamasi huzuridagi “Oʻzinjiniring” respublika loyihalashtirish instituti va boshqa manfaatdor vazirlik va idoralar bilan hamkorlikni amalga oshiradi;”.

8. 13-bandda:

oʻninchi va oʻn birinchi xatboshilardagi “Agentlikni” va “Agentlikka” degan soʻzlar tegishli ravishda “Moliya vazirligini” va “Moliya vazirligiga” degan soʻzlar bilan almashtirilsin;

quyidagi mazmundagi oʻn toʻrtinchi xatboshi bilan toʻldirilsin:

“portalni uzluksiz ishlashini taʼminlash;”;

oʻn toʻrtinchi va oʻn beshinchi xatboshilar tegishli ravishda oʻn beshinchi va oʻn oltinchi xatboshilar deb hisoblansin.

9. 15-bandning toʻrtinchi xatboshisidagi “shartnomada” degan soʻz “kelishuvda” degan soʻz bilan almashtirilsin.

10. 17-banddan “Oʻzbekiston Respublikasi” degan soʻzlar chiqarib tashlansin.

11. 22, 28, 29 va 43-bandlar oʻz kuchini yoʻqotgan deb topilsin.

12. 35-bandning birinchi xatboshisi quyidagi tahrirda bayon etilsin:

“35. Moliya vazirligi budjet buyurtmachilarining hisob-kitoblarini tashkil etish, shartnoma boʻyicha majburiyatlarini bajarilishi hisobini yuritish va taʼminlash maqsadida Operator uchun Moliya vazirligining axborot tizimida maxsus shaxsiy hisobvaraqlar ochadi va unga ushbu hisobraqamlardagi pul mablagʻlarini boshqarish uchun ruxsat beradi.”.

13. Quyidagi mazmundagi 351-band bilan toʻldirilsin:

“351. Budjet buyurtmachilar elektron davlat xaridlarida ishtirok etish uchun oʻzlarining HKKPdagi hisobraqamlariga operatorning vositachilik yigʻimini oʻtkazadilar.”.

14. 36-band quyidagi tahrirda bayon etilsin:

“36. Budjet buyurtmachisi tomonidan shaxsiy kabinet orqali elektron auksion oʻtkazilishi toʻgʻrisidagi eʼlon (bundan buyon matnda eʼlon deb ataladi) joylashtirilgandan yoki elektron doʻkonda ishtirokchining ofertasi tanlangandan (bundan buyon matnda oferta deb ataladi) soʻng, portal xarajat moddasini koʻrsatgan holda, eʼlon yoki ofertaning summasini shakllantiradi va uni Operator va Moliya vazirligi oʻrtasida elektron axborot almashinuvi orqali Moliya vazirligiga yuboradi.

Axborot olingandan soʻng, Moliya vazirligining davlat moliyasini boshqarish axborot tizimi (bundan buyon matnda DMBAT deb ataladi) elektron davlat xaridlari yakunlariga koʻra tuzilgan shartnomaviy majburiyatlarni bajarish uchun, moliyalashtirish manbalarini inobatga olgan holda, kerakli summaga band qoʻyadi.

Portal, maʼlumotlar bazalari elektron hamkorligi orqali eʼlon yoki oferta boʻyicha band qoʻyilgan summa toʻgʻrisidagi tasdiqlovchi maʼlumotni qabul qilgandan soʻng, budjet buyurtmachisi tomonidan joylashtirilgan eʼlon yoki tanlangan oferta boʻyicha narxlar soʻrovi mexanizmini aktivlashtiradi.”.

15. 37-banddagi “Buyurtmachilar” degan soʻz “Korporativ buyurtmachilar” degan soʻzlar bilan almashtirilsin.

16. Quyidagi mazmundagi 371-band bilan toʻldirilsin:

“371. Budjet buyurtmachilari eʼlon yoki oferta boʻyicha DMBAT tomonidan band qoʻyilgan summasining, shuningdek ularning HKKPdagi hisobraqamlarida operatorning vositachilik yigʻimi summasining yetarli miqdori mavjud boʻlgan taqdirda, elektron davlat xaridlarida ishtirok etadilar.”.

17. 38-bandning uchinchi xatboshisidagi “buyurtmachilari” degan soʻz “korporativ buyurtmachilari” degan soʻzlar bilan almashtirilsin.

18. 40-band quyidagi tahrirda bayon etilsin:

“40. Operator tuzilgan shartnomalar boʻyicha axborotni Moliya vazirligi va Operatorning maʼlumotlar bazalari elektron hamkorligi orqali Moliya vazirligiga yuboradi.”.

19. 41-bandda:

“qonunchilikda belgilangan tartibda hisobga oladi” degan soʻzlar “hisobga oladi va shartnoma summasini HKKPga oʻtkazib beradi” degan soʻzlar bilan almashtirilsin;

quyidagi mazmundagi xatboshi bilan toʻldirilsin:

“Bunda oldindan toʻlov shartlari shartnomada nazarda tutiladi.”.

20. 42-banddagi “oʻn kun” degan soʻzlar “besh ish kuni” degan soʻzlar bilan almashtirilsin.

21. 44-banddagi “buyurtmachi” degan soʻz “korporativ buyurtmachi” degan soʻzlar bilan almashtirilsin.

22. 50-bandning beshinchi xatboshisidagi “buyurtmachining” degan soʻz “korporativ buyurtmachining” degan soʻzlar bilan almashtirilsin.

23. 51-banddagi “, vakolatli organ va Oʻzbekiston Respublikasi Moliya vazirligini (budjet buyurtmachilari boʻyicha)” degan soʻzlar “va Moliya vazirligini” degan soʻzlar bilan almashtirilsin.

24. 52 va 53-bandlar quyidagi tahrirda bayon etilsin:

“52. Buyurtmachi tomonidan shartnoma boʻyicha tovarlar (ishlar, xizmatlar) yetkazib berilganligi haqidagi maʼlumot taqdim qilinmaganda, HKKP shartnoma boʻyicha tovarlar (ishlar, xizmatlar) yetkazib berish muddati tugagach uch ish kunidan soʻng:

budjet buyurtmachilarning shartnoma boʻyicha pul mablagʻlariga sud yoki davlat xaridlari sohasidagi shikoyatlarni koʻrib chiqish boʻyicha komissiyaning tegishli qarori qabul qilinguniga yoki u bekor qilingunga qadar band qoʻyadi;

korporativ buyurtmachi tomonidan shartnoma boʻyicha kiritilgan mablagʻlardan, zakalatdan tashqari, bandni bekor qiladi;

korporativ buyurtmachi va ijrochining zakalatiga sud yoki davlat xaridlari sohasidagi shikoyatlarni koʻrib chiqish boʻyicha komissiyaning tegishli qarori qabul qilinguniga yoki u bekor qilingunga qadar band qoʻyadi;

bajarilmagan shartnomalar boʻyicha maʼlumotlarni Moliya vazirligiga yuboradi.

53. HKKP sudning qonuniy kuchga kirgan qarori yoki davlat xaridlari sohasidagi shikoyatlarni koʻrib chiqish boʻyicha komissiya qarori asosida zakalatni banddan yechishni va/yoki tegishli hisob raqamga oʻtkazishni amalga oshiradi.

Bunda, HKKP ijrochining zakalati jarima sifatida budjet buyurtmachisiga oʻtkazilishi toʻgʻrisidagi sudning qonuniy kuchga kirgan qarori yoki davlat xaridlari sohasidagi shikoyatlarni koʻrib chiqish boʻyicha komissiya qarori asosida zakalatni budjet buyurtmachisining budjetdan tashqari tegishli hisob raqamiga oʻtkazishni amalga oshiradi.”.

25. 57-band quyidagi tahrirda bayon etilsin:

“57. Buyurtmachilar va ishtirokchilar Operatorga taqdim etilgan maʼlumotlarning ishonchliligi va oʻz vaqtida taqdim etish uchun javobgar boʻladi.”.