Oʻzbekiston Respublikasi Milliy gvardiyasining tegishli boʻlinmalarida shaxsiy tarkibning ovqatlanishini tashkil etish boʻyicha autsorsing xizmatlari koʻrsatish tartibi toʻgʻrisidagi nizomni tasdiqlash haqida (323-son)

17.04.2019

Oʻzbekiston Respublikasi Vazirlar Mahkamasining

qarori

Vazirlar Mahkamasining “Oʻzbekiston Respublikasi Milliy gvardiyasi harbiy xizmatchilarining ovqatlanishini tashkil etish tartibini yanada takomillashtirish chora-tadbirlari toʻgʻrisida” 2018-yil 16-maydagi 366-son qaroriga muvofiq, shuningdek, Oʻzbekiston Respublikasi Milliy gvardiyasining tegishli boʻlinmalarida shaxsiy tarkibning ovqatlanish tizimini yanada takomillashtirish maqsadida Vazirlar Mahkamasi qaror qiladi:

1. Oʻzbekiston Respublikasi Milliy gvardiyasining tegishli boʻlinmalarida shaxsiy tarkibning ovqatlanishini tashkil etish boʻyicha autsorsing xizmatlari koʻrsatish tartibi toʻgʻrisidagi nizom ilovaga muvofiq tasdiqlansin.

2. Oʻzbekiston Respublikasi Milliy gvardiyasi qoʻmondoniga quyidagi huquqlar berilsin:

zarur oziq-ovqat va qishloq xoʻjaligi mahsulotlarini saqlash hamda ularni yangilash maqsadida autsorserlarga, transport xarajatlarini qoplashni hisobga olgan holda, Oʻzbekiston Respublikasi Milliy gvardiyasi shaxsiy tarkibining ovqatlanishini taʼminlash uchun amalda xarid qilgan narxlarda berish (tarqatish) yoʻli bilan sotish;

shaxsiy tarkibning uzluksiz ovqatlanishini (shu jumladan doimiy joylashish punktlarida, dala sharoitlarida, tabiiy va texnogen tusdagi favqulodda vaziyatlar yuzaga kelganda hamda boshqa holatlarda) tashkillashtirish maqsadida tegishli zarur lavozimlarni Oʻzbekiston Respublikasi Milliy gvardiyasi boʻlinmalari shtatlariga kiritish yoʻli bilan saqlab turish;

shaxsiy tarkibning ovqatlanishi autsorsing shartlarida amalga oshiriladigan Oʻzbekiston Respublikasi Milliy gvardiyasi boʻlinmalarining roʻyxatini belgilash.

3. Mazkur qarorning bajarilishini nazorat qilish Oʻzbekiston Respublikasi Milliy gvardiyasi qoʻmondoni B.X. Tashmatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 17-aprel,

323-son

Vazirlar Mahkamasining 2019-yil 17-apreldagi 323-son qaroriga ILOVA

Oʻzbekiston Respublikasi Milliy gvardiyasining tegishli boʻlinmalarida shaxsiy tarkibning ovqatlanishini tashkil etish boʻyicha autsorsing xizmatlari koʻrsatish tartibi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Milliy gvardiyasi (keyingi oʻrinlarda Milliy gvardiya deb ataladi) boʻlinmalaridagi ofitserlar, shartnoma asosidagi harbiy xizmatchilar, xodimlar, muddatli harbiy xizmatchilar, kursantlar hamda akademik litsey oʻquvchilarining (keyingi oʻrinlarda shaxsiy tarkib deb ataladi) ovqatlanishini autsorsing shartlarida tashkil etish tartibini belgilaydi.

2. Ushbu Nizomda quyidagi asosiy tushunchalardan foydalaniladi:

autsorsing — buyurtmachining shaxsiy tarkibni ovqatlantirish vazifasini shartnoma asosida autsorserga oʻtkazish;

autsorser — shartnoma asosida buyurtmachiga autsorsing xizmati koʻrsatuvchi yuridik shaxs;

buyurtmachi — Milliy gvardiya boʻlinmalari.

3. Shaxsiy tarkibni ovqatlantirish quyidagilarni oʻz ichiga oladi:

statsionar va dala sharoitida oziq-ovqat taʼminoti;

quruq mahsulotlar taʼminoti.

4. Shaxsiy tarkibni ovqatlantirish buyurtmachining oziq-ovqat xizmati tomonidan autsorser xizmatini jalb qilish orqali amalga oshiriladi.

5. Shaxsiy tarkibni ovqatlantirish uchun pul mablagʻlari yillik talabnomalar boʻyicha belgilanadi va autsorsing xizmatlari uchun kelishilgan hisob-kitoblar, oziq-ovqat meʼyori narxlari belgilangan meʼyorlar asosida yil boʻyicha rejalashtiriladi.

6. Autsorsing xizmati buyurtmachining tasdiqlangan xarajatlar smetasi doirasida budjet mablagʻlari hisobidan moliyalashtiriladi.

7. Autsorsing xizmati koʻrsatish jarayonida maxfiylik tartibiga rioya etish buyurtmachi tomonidan taʼminlanadi.

2-bob. Autsorserni tanlash, shartnoma tuzish va hisob-kitoblarni amalga oshirish tartibi

8. Autsorserlar Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan talabgorlarni oʻrganish hamda eng yaxshi takliflarni tanlash orqali tanlab olinadi. Bunda umumiy ovqatlanish sohasida katta ish tajribasiga, tegishli moliyaviy, moddiy-texnika va logistika bazasiga ega, oshxonalarning holatini yaxshilashga tayyor boʻlgan talabgorlarga ustunlik beriladi.

9. Autsorser talabgorlariga nisbatan quyidagi talablar qoʻyiladi:

yuridik shaxs boʻlishi;

autsorsing xizmati boʻyicha kamida bir oylik shartnoma summasiga teng aylanma mablagʻlarga ega boʻlishi;

moliyaviy ahvolining barqarorligi, soliq va boshqa majburiy toʻlovlardan qarzdorligi mavjud emasligi;

statsionar va dala sharoitida autsorsing xizmati koʻrsatish uchun yetarli moddiy-texnika va logistika bazasiga ega boʻlishi;

shtatida yetarli ish tajribasiga va koʻnikmaga ega xodimlar boʻlishi.

10. Autsorserlarni tanlab olish Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan talabgorlarni oʻrganish hamda belgilangan tartibda tanlovni oʻtkazish yoʻli bilan zarurat tugʻilganda amalga oshiriladi.

11. Autsorserlarni tanlash natijalari maxsus komissiyaning bayonnomasi bilan rasmiylashtiriladi va tasdiqlangan kunning ertasidan kechiktirmay shaxsiy tarkibning ovqatlanishini tashkil qilish boʻyicha autsorsing xizmatlari koʻrsatish yuzasidan Milliy gvardiya boʻlinmalari bilan belgilangan tartibda shartnoma tuzish uchun buyurtmachiga yuboriladi.

12. Oziq-ovqat mahsulotlari narxlarining bozordagi oʻrtacha koʻrsatkichlari tegishli hududda yuzaga kelgan narxlar darajasini har oy oʻrganish orqali Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan belgilanadi.

13. Agar oziq-ovqat mahsulotlarining amaldagi bozor narxlari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining bayonnoma qarorida belgilangan narxlardan baland boʻlsa, buyurtmachi autsorser bilan birgalikda Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga koʻrib chiqish va qaror qabul qilish uchun tegishli hududdagi amaldagi narxlarni oʻrganib chiqish dalolatnomasi ilova qilingan takliflarni belgilangan tartibda yuboradi.

14. Oziq-ovqat mahsulotlarining Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bayonnomalarida belgilangan narxlari ular tasdiqlangandan keyingi kundan eʼtiboran kuchga kiradi.

15. Bayonnoma qarorlarning toʻgʻri tuzilishi uchun javobgarlik Qoraqalpogʻiston Respublikasi Vazirlar Kengashiga, viloyatlar va Toshkent shahar hokimliklariga yuklanadi.

16. Autsorsing xizmati koʻrsatish boʻyicha shartnoma buyurtmachi va autsorser oʻrtasida kalendar yil uchun yozma shaklda ikki nusxada tuziladi.

Shartnomada shaxsiy tarkibning soni, bir nafar ovqatlanuvchi uchun tasdiqlangan meʼyorlardagi kunlik oziq-ovqat qiymati, kalendar kuni va jami yillik summa aks ettiriladi.

17. Oziq-ovqat mahsulotlarining oʻrtacha bozor narxlari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklaridan har oyning 1-sanasiga qadar Milliy gvardiya boʻlinmalari tomonidan olinadi.

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklaridan olingan oziq-ovqat mahsulotlari narxi oʻzgarganda yoki boshqa asosli holatlarda shartnomaga tegishli oʻzgartirish kiritilishi mumkin.

18. Koʻrsatilgan xizmatlar hisob-kitobi shartnoma oylik summasining 15 foizi miqdorida oldindan, 85 foizi haqiqatda koʻrsatilgan xizmatlar summasidan kelib chiqib har 10 kunda, yakuniy hisob-kitob esa — keyingi oyning 5-sanasiga qadar amalga oshiriladi.

Oʻzbekiston Respublikasi Milliy gvardiyasi boʻlinmalarida ovqatlanishni tashkil etish uchun autsorserni tanlash, autsorser va harbiy qism (muassasa) oʻrtasida hisob-kitoblar mazkur Nizomga 2 va 3-ilovalarga muvofiq sxemalar boʻyicha amalga oshiriladi.

3-bob. Autsorsing xizmati koʻrsatishda oziq-ovqatlar sifatiga va xavfsizligiga qoʻyiladigan talablar

19. Autsorsing xizmatlari asosida ovqat bilan taʼminlash qonunchilik hujjatlarida belgilangan xavfsizlik texnikasi va yongʻin xavfsizligi, mehnat muhofazasi hamda sanitariya qoidalari, normalari va gigiyena normativlariga rioya qilingan holda amalga oshirilishi lozim.

20. Autsorser tomonidan foydalaniladigan oziq-ovqat mahsulotlari tegishli muvofiqlik sertifikatlari bilan tasdiqlanishi, shuningdek, xalqaro va milliy standartlar talablariga javob berishi shart.

21. Buyurtmachiga yetkazib berilayotgan oziq-ovqat mahsulotlari sifati yuzasidan nazorat autsorser ishtirokida buyurtmachining tibbiy hamda oziq-ovqat xizmatlari tomonidan amalga oshiriladi, bunda qabul qilish dalolatnomasi tuzilib, u mahsulot sifatini tekshirgan shaxslar tomonidan imzolanadi va buyurtmachi tomonidan tasdiqlanadi.

22. Autsorser xodimlari:

sifatli oziq-ovqat mahsulotlarini qabul qilishi, ularni toʻgʻri saqlashi va belgilangan meʼyorlar asosida sarflashi;

belgilangan meʼyorlar asosida taom tayyorlash texnologiyasiga qatʼiy amal qilishi, ortiqcha isrofgarchilikka yoʻl qoʻymasligi;

taomlarni tayyorlashda, oziq-ovqat mahsulotlarini qabul qilish hamda saqlashda sanitariya qoidalari, normalari va gigiyena normativlariga qatʼiy rioya etishi;

oshpazlik sohasida zarur bilim va koʻnikmalarga ega boʻlishi va oʻz malakasini doimiy ravishda oshirib borishi zarur.

Autsorser xodimlari qonunchilik hujjatlarida belgilangan tartibda tibbiy koʻrikdan oʻtishi va tibbiy daftarchaga ega boʻlishi shart.

Mazkur bandda belgilangan talablarga rioya qilmagan shaxslarning autsorser tomonidan xizmat koʻrsatishga jalb etilishi taqiqlanadi.

23. Oziq-ovqat mahsulotlarini belgilangan tartibda saqlash qoidalariga rioya etilishi boʻyicha javobgarlik autsorserga yuklanadi.

4-bob. Shaxsiy tarkibning ovqatlanish tartibini rejalashtirish, nazorat qilish va monitoringni amalga oshirish

24. Shaxsiy tarkibning ovqatlanish tartibi buyurtmachi tomonidan ishlab chiqiladi.

25. Taomnoma sanitariya qoidalari, normalari va gigiyena normativlari asosida tuziladi, autsorser va buyurtmachi rahbari tomonidan imzo bilan tasdiqlanadi.

26. Taomnoma uch nusxada tuziladi — birinchi nusxasi autsorserga, ikkinchi nusxasi buyurtmachiga hamda uchinchi nusxasi oshxonaga foydalanish uchun beriladi.

27. Taomlar ovqatlanish texnologiyasi qoidalariga amal qilgan holda tayyorlanadi, saqlanadi va tarqatiladi.

28. Shaxsiy tarkibning ovqatlanishi kun mobaynida sutkalik ovqatlanish meʼyorlari boʻyicha oziq-ovqat mahsulotlarining toʻgʻri taqsimlanishi, shuningdek, kun tartibi boʻyicha qatʼiy belgilangan vaqtda ovqatlanish tashkillashtirilishi lozim.

29. Oziq-ovqat mahsulotlarini qozonga solish autsorser va buyurtmachi vakillari ishtirokida amalga oshiriladi.

30. Ovqatlarni tarqatish boshlangunga qadar buyurtmachi vakillari tomonidan ovqatlar sifati, shuningdek, oshxona binosining sanitariya holati, oshxona idishlari va inventarlari tekshiriladi. Buyurtmachi vakillari tekshiruv natijalarini ovqatlarni tayyorlash sifatining nazorat kitobida aks ettiradi. Bunda uning sifati toʻgʻrisidagi xulosa har bir ovqat pishirish (nonushta, tushlik, kechki ovqat) uchun alohida yoziladi.

31. Autsorsing xizmati koʻrsatilishi yuzasidan monitoring buyurtmachi tashkil etadigan komissiya (keyingi oʻrinlarda komissiya deb ataladi) tomonidan amalga oshiriladi.

32. Komissiya tarkibi Milliy gvardiya Moddiy-texnika taʼminoti boshqarmasi moddiy taʼminot boʻlimi, buyurtmachining taʼminot va boshqa boʻlinmalari xodimlaridan shakllantiriladi.

33. Komissiya:

autsorsing xizmati koʻrsatilishi yuzasidan doimiy monitoring olib boradi, jumladan shaxsiy tarkib oʻrtasida soʻrovnomalar oʻtkazadi;

monitoring natijalaridan kelib chiqib, buyurtmachi va autsorserga tegishli taklif va tavsiyalar kiritadi;

oshxona va omborlarda sanitariya qoidalari, normalari va gigiyena normativlariga rioya qilinishi hamda epidemiyaga qarshi tadbirlar talablarining buzilishi holatlarini bartaraf etish choralarini koʻradi;

tayyor taom va oziq-ovqat mahsulotlarining belgilangan kunlik meʼyorlarga mos boʻlishini hamda sifatini oʻrganadi, zarur holatlarda chetdan mutaxassislar jalb etadi.

Komissiya buyurtmachi tomonidan yuklangan boshqa vakolatlarni ham amalga oshirishi mumkin.

34. Komissiya tomonidan oʻtkazilgan oʻrganish natijalari alohida yuritiladigan jurnalda qayd etib boriladi.

5-bob. Shaxsiy tarkibni issiq ovqat bilan taʼminlash

35. Autsorsing sharoitida shaxsiy tarkibni issiq ovqat bilan taʼminlash shaxsiy tarkib yetib kelishi va ketishini hisobga olgan holda belgilangan tartibda amalga oshiriladi.

36. Shaxsiy tarkibni ovqatlantirish boʻyicha hisobga kiritishda yoki hisobdan chiqarishda hisob-kitoblar belgilangan kunlik meʼyor summasiga nisbatan quyidagicha amalga oshiriladi:

nonushta uchun — 25 %;

tushlik uchun — 50 %;

kechki taom uchun — 25 %.

37. Milliy gvardiya akademik litsey oʻquvchilarini ovqatlantirish boʻyicha hisobga kiritishda yoki hisobdan chiqarishda hisob-kitoblar belgilangan kunlik meʼyor summasiga nisbatan quyidagicha amalga oshiriladi:

nonushta uchun — 20 %;

ikkinchi nonushta (yoki tushlik) uchun — 20 %;

tushlik uchun — 40 %;

kechki ovqatlanish uchun — 20 %.

38. Agar shaxsiy tarkibning oziq-ovqat taʼminotini tashkil qilish boʻyicha jami xarajatlar ovqatlanish payogi oʻrniga pul kompensatsiyasining belgilangan miqdoridan oshib ketsa, mavjud tafovut shaxsiy tarkibdan undirilmaydi, xarajatlar esa — Oʻzbekiston Respublikasi Davlat budjeti va Milliy gvardiyaning budjetdan tashqari mablagʻlari hisobidan amalga oshiriladi.

39. Shaxsiy tarkibni ovqatlantirish jismoniy va yuridik shaxslarning homiylik xayriyalari hisobiga tashkil etilganda shaxsiy tarkib uchun belgilangan bir kunlik ovqatlanish ratsioni sanitariya qoidalari, normalari va gigiyena normativlariga muvofiq belgilangan meʼyorlardan oshmasligi lozim.

6-bob. Autsorser va buyurtmachining huquqlari va majburiyatlari

40. Autsorser quyidagi huquqlarga ega:

ijaraga olingan mol-mulkdan foydalanish;

ijaraga olingan bino va inshootlarning ichki qismida texnik jihatdan jihozlash va taʼmirlash ishlarini amalga oshirish;

shaxsiy tarkibning soni va ovqatlanish jadvalini belgilangan tartibda olish;

olingan oziq-ovqat mahsulotlari narxlarining oʻzgarishi munosabati bilan shartnomaga oʻzgartirish kiritish taklifi bilan chiqish;

koʻrsatilgan xizmatlar uchun oʻz vaqtida toʻlovlar amalga oshirilishini talab qilish;

buyurtmachidan shartnoma shartlarining bajarilishini talab qilish.

Autsorser qonunchilik hujjatlariga muvofiq boshqa huquqlarga ham ega boʻlishi mumkin.

41. Autsorser:

shaxsiy tarkibning oziq-ovqat taʼminotini uzluksiz, shu jumladan, zarur holatlarda, dam olish va bayram kunlari hamda dala sharoitida amalga oshirishi;

oziq-ovqat mahsulotlarining yangi va sifatli boʻlishini taʼminlashi;

sogʻliq uchun zararli va yaroqsiz oziq-ovqat mahsulotlaridan foydalanmasligi va taomlarni tarqatmasligi;

dala sharoitida koʻchma oshxona faoliyatini toʻliq tashkil etgan holda, shaxsiy tarkibning oziq-ovqat taʼminotini amalga oshirishi;

ijaraga olingan bino va inshootlar, jihozlardan maqsadli hamda oqilona foydalanishi, saqlashi, nosoz holga kelganda ularni oʻz hisobidan taʼmirlashi, shuningdek, mulkni saqlash xarajatlarini qoplashi;

autsorsing xizmati koʻrsatishda xavfsizlik texnikasi, yongʻin xavfsizligi, mehnat muhofazasi hamda sanitariya qoidalari, normalari va gigiyena normativlariga qatʼiy rioya etishi;

oziq-ovqat mahsulotlarining sifatli saqlanishini taʼminlashi;

maxfiylik tartibiga qatʼiy rioya qilishi lozim.

Autsorserga qonunchilik hujjatlariga muvofiq boshqa majburiyatlar ham yuklanishi mumkin.

42. Buyurtmachi quyidagi huquqlarga ega:

autsorserdan shartnoma shartlarini bajarish bilan bogʻliq jarayonda qatnashuvchi shaxslar (oshxona xodimlari) roʻyxatini olish;

oziq-ovqat mahsulotlarining sifatini tasdiqlovchi hujjatlarni talab qilish;

ovqatlanish jadvaliga oʻzgartirishlar kiritish;

autsorserning ishlab chiqarish faoliyatiga aralashmagan holda shartnoma shartlarining bajarilishini nazorat qilish.

Buyurtmachi qonunchilik hujjatlariga muvofiq boshqa huquqlarga ham ega boʻlishi mumkin.

43. Buyurtmachi:

autsorserga shaxsiy tarkibning sonini va ularning ovqatlanish jadvalini oʻz vaqtida taqdim etishi;

shartnomaga muvofiq belgilangan muddat va shartlar asosida autsorserga koʻrsatilgan xizmatlar uchun toʻlovlarni amalga oshirishi lozim.

Buyurtmachi zimmasiga qonunchilik hujjatlariga muvofiq boshqa majburiyatlar ham yuklanishi mumkin.

7-bob. Obyektlar va moddiy-texnika vositalaridan foydalanish

44. Oshxonada joylashgan moddiy-texnika vositalari buyurtmachi tomonidan tegishli dalolatnoma rasmiylashtirilgan holda autsorsyerga vaqtinchalik foydalanishga beriladi. Dalolatnoma ikki nusxada buyurtmachi komissiyasi va autsorser tomonidan imzolanadi. Dalolatnoma buyurtmachi tomonidan tasdiqlanadi.

45. Autsorsyerga vaqtinchalik foydalanishga beriladigan oshxona binosiga qoʻyiladigan asosiy talablar quyidagilar hisoblanadi:

yetarli oʻringa ega boʻlgan, texnologik jihozlar bilan taʼminlangan, texnik holati belgilangan meʼyorlarga mos boʻlgan ovqatlanish binosining mavjudligi;

mahsulotlarni saqlash uchun omborlarning mavjudligi;

taom tayyorlash uskunalari, oshxona mebellari va ovqatlanish uchun zarur boʻlgan boshqa jihozlarning mavjudligi.

46. Belgilangan foydalanish muddatini oʻtab boʻlgan va yaroqsiz holatga kelgan moddiy-texnika vositalari belgilangan tartibda buyurtmachi tomonidan hisobdan chiqariladi.

8-bob. Yakunlovchi qoidalar

47. Ushbu Nizomda nazarda tutilgan talablarning buzilishi buyurtmachi va autsorserning tuzilgan shartnomani belgilangan tartibda bekor qilishiga asos boʻladi.

48. Mazkur Nizom talablarining buzilishida aybdor boʻlgan shaxslar qonunchilik hujjatlarida belgilangan tartibda javobgar boʻladi.

Oʻzbekiston Respublikasi Milliy gvardiyasining tegishli boʻlinmalarida shaxsiy tarkibning ovqatlanishini tashkil etish boʻyicha autsorsing xizmatlari koʻrsatish tartibi toʻgʻrisidagi nizomga 2-ILOVA

Oʻzbekiston Respublikasi Milliy gvardiyasi boʻlinmalarida ovqatlanishni tashkil etish uchun autsorserlarni tanlash

SXEMASI

Bosqichlar Subyekt Tadbirlar Muddatlar 1-bosqich Oʻzbekiston Respublikasi Milliy gvardiyasi boʻlinmalari Autsorserlarni tanlash uchun (harbiy qismlar, harbiy xizmatchilar soni va xizmat turlari roʻyxati va boshqalar koʻrsatilgan holda) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga talabnomalar taqdim etish. Zarurat boʻlganda. 2-bosqich Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 1. Autsorser talabgorlarini oʻrganish va eng yaxshi takliflarni tanlab olish. 2. Gʻolib autsorserni aniqlash va bayonnomani rasmiylashtirish. 3. Bayonnomadan koʻchirmani (autsorserlar tanlovi natijalarini) harbiy qism (muassasa) komandirlariga yuborish. 1, 2. Talabnoma qabul qilingandan soʻng 10 kun muddatda. 3. Bayonnoma tasdiqlangan kundan keyingi kundan kechiktirmay. 3-bosqich Oʻzbekiston Respublikasi Milliy gvardiyasi boʻlinmalari 1. Autsorserlar bilan amal qilish muddati joriy yilning 31-dekabr kunigacha boʻlgan shartnomani tuzish. 2. Autsorserlarga tovar-moddiy boyliklar va tegishli binolarni dalolatnomaga asosan topshirish. 3 kun muddatda.

Oʻzbekiston Respublikasi Milliy gvardiyasining tegishli boʻlinmalarida shaxsiy tarkibning ovqatlanishini tashkil etish boʻyicha autsorsing xizmatlari koʻrsatish tartibi toʻgʻrisidagi nizomga 3-ILOVA

Milliy gvardiya boʻlinmalari va autsorser oʻrtasida oʻzaro hisob-kitoblarni amalga oshirish

SXEMASI

Bosqichlar Subyekt Tadbirlar Muddatlar 1-bosqich Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari 1. Oziq-ovqat mahsulotlari narxlarining bozordagi oʻrtacha koʻrsatkichlarini belgilash. 2. Oziq-ovqat mahsulotlari narxlarining bozordagi oʻrtacha koʻrsatkichlari haqida bayonnomani rasmiylashtirish. 3. Milliy gvardiya boʻlinmalariga oziq-ovqat mahsulotlari narxlarining bozordagi oʻrtacha koʻrsatkichlari haqida bayonnomani yetkazish. 1,2) Har oyda — joriy oyning 1-sanasigacha. 3) Bir kun mobaynida. 2-bosqich Autsorserlar 1. Koʻrsatilgan xizmatlarning asoslangan hujjatlarini rasmiylashtirish. 2. Milliy gvardiya boʻlinmalari bilan oʻzaro hisob-kitob qilish uchun amalda koʻrsatilgan xizmatlar hisob-fakturasini (bajarilgan ishlar dalolatnomalarini) taqdim etish. Har oyda — joriy oyning 3-sanasigacha 3-bosqich Oʻzbekisto� Respublikasi Milliy gvardiyasi boʻlinmalari Autsorserlar bilan koʻrsatilgan xizmatlar uchun oʻzaro hisob-kitoblarni quyidagi tartibda amalga oshirish: asoslovchi hujjatlarni tekshirish (hisob-fakturalar, bajarilgan ishlar dalolatnomalari), oziq-ovqat mahsulotlarining amaldagi narxlari toʻgʻrisidagi bayonnoma bilan belgilangan oziq-ovqat mahsulotlarining narxi oshirilgani toʻgʻrisidagi maʼlumotlarni taqqoslash; autsorsing xizmatlari koʻrsatishning tegishli jadvalida koʻrsatib oʻtilgan oylik summaning 15 foizi miqdoridagi dastlabki toʻlovni autsorserning bank hisobraqamiga oʻtkazish; tuzilgan shartnoma shartlariga muvofiq qolgan 85 foiz miqdorida haqiqatda koʻrsatilgan xizmatlar summasidan kelib chiqib. Bir kun mobaynida. Har oyda — joriy oyning 10-sanasigacha. 10 bank ish kuni mobaynida.