“Andijon, Chirchiq, Buxoro, Samarqand shaharlarida markazlashtirilgan issiqlik taʼminoti tizimini rekonstruksiya qilish va energiya samaradorligini oshirish” loyihasini amalga oshirish chora-tadbirlari toʻgʻrisida (306-son)

12.04.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasining 2019-yilga moʻljallangan Investitsiya dasturini amalga oshirish chora-tadbirlari toʻgʻrisida” 2018-yil 19-dekabrdagi PQ-4067-son qarori ijrosini taʼminlash, shuningdek, Andijon, Chirchiq, Buxoro, Samarqand va Toshkent (TS-8) shaharlari markazlashtirilgan issiqlik taʼminoti tizimlarining energiya samaradorligini oshirish va ularni modernizatsiya qilish hamda Xalqaro taraqqiyot assotsiatsiyasi bilan hamkorlikni kengaytirish maqsadida Vazirlar Mahkamasi qaror qiladi:

1. Quyidagilar:

a) Oʻzbekiston Respublikasi va Xalqaro taraqqiyot assotsiatsiyasi (keyingi oʻrinlarda XTA deb ataladi) oʻrtasida 2018-yil 17-mayda “Andijon, Chirchiq, Buxoro, Samarqand shaharlarida markazlashtirilgan issiqlik taʼminoti tizimini rekonstruksiya qilish va energiya samaradorligini oshirish” loyihasini (keyingi oʻrinlarda loyiha deb ataladi) amalga oshirishni moliyalashtirish toʻgʻrisida 2047 yilgacha qoplash muddati, shu jumladan besh yillik imtiyozli davr bilan qiymati 140 mln AQSh dollari boʻlgan kelishuv imzolangani;

b) loyihani amalga oshirishda ishtirok etadigan Andijon, Buxoro, Samarqand, Toshkent viloyatlari va Toshkent shahri hokimliklari, issiqlik taʼminoti tashkilotlari, Oʻzbekiston Respublikasi Uy-joy kommunal xizmat koʻrsatish vazirligi va vazirlik huzuridagi “Kommunxizmat” agentligi bilan 2018-yil 10-oktabrda XTA kreditini qayta kreditlash toʻgʻrisida kelishuv imzolangani;

2. Belgilansinki:

Qurilish va uy-joy kommunal xoʻjaligi vazirligi loyihaning oʻz vaqtida amalga oshirilishi, XTU kreditidan maqsadli va samarali foydalanilishi uchun masʼul ijro etuvchi organ hisoblanadi;

Qurilish va uy-joy kommunal xoʻjaligi vazirligi bilan yuridik shaxs maqomiga ega boʻlgan XTU ishtirokida “Andijon, Chirchiq, Buxoro va Samarqand shaharlarida markazlashtirilgan issiqlik taʼminoti tizimini rekonstruksiya qilish va energiya samaradorligini oshirish” loyihasini amalga oshirish guruhini tashkil etishga ruxsat beriladi;

Loyihani amalga oshirish davrida loyihani amalga oshirish guruhining xarajatlar smetasi va shtatlar jadvali har yili Iqtisodiyot va moliya vazirligi bilan kelishiladi.

4. Qurilish va uy-joy kommunal xoʻjaligi vazirligi (Hidoyatov), Andijon (Abduraxmanov), Buxoro (Zaripov), Samarqand (Turdimov), Toshkent (Mirzayev) viloyatlari hokimlari zimmasiga:

loyihaning belgilangan muddatlarda samarali amalga oshirilishi, loyihani amalga oshirishga yoʻnaltiriladigan mablagʻlardan maqsadli va samarali foydalanish hamda yakuniy parametrlarga erishish;

loyiha obyektlarida loyiha doirasida xarid qilinadigan uskunalarni oʻrnatish va montaj qilish uchun zarur boʻlgan tegishli maydonchalar hamda binolarning ushbu uskunalar yetkazib berilishidan oldin tayyorlanishini taʼminlash;

Jahon bankining tartib-taomillari va Oʻzbekiston Respublikasi qonun hujjatlariga muvofiq zarur xisobot va hujjatlar oʻz vaqtida tayyorlanishi va taqdim etilishini tashkil etish uchun shaxsiy masʼuliyat yuklansin.

6. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — Oʻzbekiston Respublikasi Transport vaziri A.J. Ramatov, Bosh vazirning investitsiyalar va tashqi iqtisodiy aloqalar masalalari boʻyicha oʻrinbosari E.M. Ganiyev va Oʻzbekiston Respublikasi Uy-joy kommunal xizmat koʻrsatish vaziri M.X. Saliyev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 12-aprel,

306-son