Mehnat qilish sharoitlari gʻoyat ogʻir va zararli, oʻta ogʻir ishlab chiqarishlarda ishlaydigan fuqarolarning ayrim toifalari daromadlaridan imtiyozli soliq olish toʻgʻrisida (72-son)

01.03.1995

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Fuqarolarning daromadlaridan olinadigan soliqlar darajasini kamaytirish toʻgʻrisida” 1995-yil 24-fevraldagi PF-1083-son Farmonini bajarish yuzasidan hamda mehnat qilish sharoitlari gʻoyat ogʻir va zararli, oʻta ogʻir ishlab chiqarishlarda ishlaydigan fuqarolarning ayrim toifalarini ijtimoiy himoya qilishni kuchaytirish maqsadida Vazirlar Mahkamasi qaror qiladi:

1. Vazirlar Mahkamasining 1994-yil 12-maydagi 250-son qarori bilan tasdiqlangan ishlab chiqarishlar, muassasalar, ishlar, kasblar, lavozimlar va koʻrsatkichlarning 1, 2, 3-roʻyxatlariga kiruvchi mehnat qilish sharoitlari gʻoyat ogʻir va zararli, oʻta ogʻir ishlab chiqarishlarda ishlaydigan xodimlarning daromadlaridan soliqlar olishning imtiyozli tartibi belgilansin.

Belgilab qoʻyilsinki, fuqarolarning yuqorida qayd etilgan toifalari daromadlarining ushlab qolinadigan darajasi 25 foizdan oshmasligi kerak.

2. Oʻzbekiston Respublikasi Davlat soliq qoʻmitasi ushbu qarorga muvofiq daromad soligʻini toʻgʻri hisoblab chiqarilishi va toʻlanishi ustidan nazoratni taʼminlasin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1995-yil 1-mart,

72-son