Oʻzbekiston Respublikasi Oliy Majlisi palatalarida “Elektron parlament” tizimini joriy etish chora-tadbirlari toʻgʻrisida (1899-III-son)

15.08.2018

Oʻzbekiston Respublikasi Oliy Majlisi Qonunchilik palatasi Kengashining va Oʻzbekiston Respublikasi Oliy Majlisi Senati Kengashining

Qoʻshma qarori

Oʻzbekiston Respublikasi Oliy Majlisi palatalari tomonidan 2017-yil 7-dekabr kuni tasdiqlangan Axborot texnologiyalarini yanada rivojlantirish va “Elektron parlament” tizimini joriy etish boʻyicha Kompleks chora-tadbirlar dasturida parlament faoliyati samaradorligi va shaffofligini oshirish, uning faoliyatiga axborot-kommunikatsiya texnologiyalarini keng joriy etish orqali xalq bilan muloqotni takomillashtirish, deputatlarga saylangan saylov okruglaridan mahalliy hokimiyat idoralarining qarorlarini elektron tarzda majburiy yuborish orqali ularning hududdagi ahvoldan xabardorligini oshirish imkoniyatini yaratish belgilangan.

Oʻzbekiston Respublikasi Oliy Majlisi faoliyatida axborot-kommunikatsiya texnologiyalarini joriy etish orqali parlament aʼzolarining aholi bilan oʻzaro onlayn muloqoti, muammolarni amaliy hal etish va bu borada ijro hokimiyati organlariga koʻmaklashish mexanizmlari joriy etiladi, parlament nazorati taʼsirchanligi kuchaytiriladi.

Bugungi kunda fuqarolarning jamoaviy elektron murojaatlari va tashabbuslari yagona platformasi — “meningfikrim.uz” veb-portali joriy etildi. Parlament aʼzolarining ijtimoiy tarmoqlarda faol ishtirokini taʼminlash orqali mamlakatimizda amalga oshirilayotgan keng koʻlamli islohotlarning mazmun-mohiyati va ahamiyati toʻgʻrisida jamoatchilik bilan toʻgʻridan toʻgʻri muloqot olib borishning samarali tizimi joriy qilindi.

Yuqoridagilardan kelib chiqib, parlament faoliyati samaradorligi va shaffofligini oshirish, uning faoliyatiga axborot-kommunikatsiya texnologiyalarini keng joriy etish orqali xalq bilan muloqotni takomillashtirish maqsadida Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashi qaror qiladilar:

1. Oʻzbekiston Respublikasi Oliy Majlisi palatalarida axborot texnologiyalarini joriy etish va “Elektron parlament” tizimini rivojlantirishga koʻmaklashuvchi Idoralararo guruh ilovaga muvofiq tasdiqlansin.

2. Quyidagilar Idoralararo guruhning asosiy vazifalari etib belgilansin:

Oʻzbekiston Respublikasi Oliy Majlisida “Elektron parlament” tizimini joriy etish va rivojlantirish konsepsiyasini muhokama qilish va tegishli xulosa taqdim etish;

jarayonlarni avtomatlashtirishni va axborot-kommunikatsiya texnologiyalarini qoʻllashni hisobga olgan holda Oliy Majlis palatalari faoliyatining samaradorligini oshirish yuzasidan takliflar ishlab chiqish;

zamonaviy axborot-kommunikatsiya texnologiyalaridan foydalanish hisobiga Oliy Majlis palatalari faoliyatining ochiqligini taʼminlashga koʻmaklashish;

zamonaviy axborot-kommunikatsiya texnologiyalari sohasida Qonunchilik palatasi deputatlarining, Senat aʼzolarining hamda palatalar devonlari xodimlarining kasb malakasini oshirish chora-tadbirlarini tashkil etish;

zamonaviy axborot-kommunikatsiya texnologiyalaridan foydalanish sohasidagi xalqaro tajribani oʻrganish va tahlil etish hamda ularni Oliy Majlis palatalari faoliyatida qoʻllash yuzasidan takliflar kiritish;

Oʻzbekiston Respublikasi Oliy Majlisi palatalarida, xalq deputatlari viloyat, tuman va shahar Kengashlarida axborot xavfsizligi siyosatini muhokama qilish va tegishli xulosa taqdim etish;

“Elektron parlament” tizimi tarkibiy qismlarini shakllantirish va joriy etish yuzasidan olib borilayotgan ishlarning har chorakda muhokamasini tashkil etish;

“Elektron parlament” tizimi tarkibiy qismlarini yaratish uchun Texnik topshiriqni ishlab chiquvchi tashkilotni aniqlash va jarayonni nazorat qilish;

“Elektron parlament” tizimi tarkibiy qismlari yaratuvchisini aniqlash boʻyicha konkurs yoki tender savdosini tashkil etish va gʻolibni aniqlash;

“Elektron parlament” tizimi tarkibiy qismlarini yaratish uchun moliyaviy manbani aniqlash va zaruriy hujjatlarni rasmiylashtirishga koʻmaklashish;

“Elektron parlament” tizimi amaliyotga joriy etilganidan soʻng uni topshirish-qabul qilish uchun xulosa berish.

3. Oʻzbekiston Respublikasi Oliy Majlisi palatalari qoʻmitalari raislari, shuningdek palatalar devonlari tarkibiy boʻlinmalari rahbarlari Idoralararo guruhga ushbu Qoʻshma qarorda belgilangan vazifalar toʻliq va sifatli bajarilishiga koʻmaklashsin.

4. Ushbu Qoʻshma qarorning ijrosini nazorat qilish Oʻzbekiston Respublikasi Oliy Majlisi Qonunchilik palatasi devonining rahbari M. Miralimov va Oʻzbekiston Respublikasi Oliy Majlisi Senati devonining rahbari A. Tamiqayev zimmalariga yuklansin.

5. Ushbu Qoʻshma qaror qabul qilingan kundan eʼtiboran kuchga kiradi.

Oʻzbekiston Respublikasi Oliy Majlisi Qonunchilik palatasining Spikeri N. ISMOILOV

Toshkent sh.,

2018-yil 15-avgust,

1899-III-son

Oʻzbekiston Respublikasi Oliy Majlisi Senatining Raisi N. YOʻLDOShEV

Toshkent sh.,

2018-yil 15-avgust,

KQ-395-III-son

Oʻzbekiston Respublikasi Oliy Majlisi Qonunchilik palatasining Kengashi va Oʻzbekiston Respublikasi Oliy Majlisi Senatining Kengashining 2018-yil 15-avgustdagi 1899-III/KQ-395-III-sonli Qoʻshma qaroriga ILOVA

Oʻzbekiston Respublikasi Oliy Majlisi palatalarida axborot texnologiyalarini joriy etish va “Elektron parlament” tizimini rivojlantirishga koʻmaklashuvchi

Idoralararo guruh

Abdullayev Ilxom Zairovich — Oʻzbekiston Respublikasi Oliy Majlisi Qonunchilik palatasining Innovatsion rivojlanish, axborot siyosati va axborot texnologiyalari masalalari qoʻmitasi raisi, Idoralararo guruh rahbari Maxmudov Oʻtkir — Oʻzbekiston Respublikasi Prezidenti huzuridagi Loyiha boshqaruvi Milliy agentligi boʻlim boshligʻi oʻrinbosari Stimban German — Oʻzbekiston Respublikasi Prezidenti huzuridagi Loyiha boshqaruvi Milliy agentligi bosh mutaxassisi Yusupov Viktor Axatovich — Oʻzbekiston Respublikasi Oliy Majlisi Qonunchilik palatasi Axborot-kommunikatsiya texnologiyalari boʻlimi sektor rahbari Roʻzimurodov Orif Norbekovich — Oʻzbekiston Respublikasi Oliy Majlisi Senati Axborot-kommunikatsiya texnologiyalari boʻlimi mudiri Shaymardanov Ilyos Ergashevich — Oʻzbekiston Respublikasi Oliy Majlisi huzuridagi Qonunchilik muammolari va parlament tadqiqotlari institutining Strategiya va menejment boʻlimi boshligʻi Shadmonov Zuxriddin — Oʻzbekiston Respublikasi Vazirlar Mahkamasining Elektron hukuma�, telekommunikatsiya infratuzilmasini rivojlantirish va axborot xavfsizligini taʼminlash masalalari axborot-tahlil departamenti yetakchi mutaxassisi Aripjanov Fayzulla Abdullayevich — Oʻzbekiston Respublikasi Axborot texnologiyalari va kommunikatsiyalarini rivojlantirish vazirligi huzuridagi “Elektron hukumat” tizimini rivojlantirish markazi direktori oʻrinbosari Nishonov Fazliddin Muxammadqulovich — Oʻzbekiston Respublikasi Moliya vazirligi Boshqaruv organlarini moliyalashtirish boshqarmasi bosh iqtisodchisi Sharipov Shaxobiddin Vaxobjonovich — Oʻzbekiston Respublikasi Iqtisodiyot vazirligi Transport va transport kommunikatsiyalari masalalari boshqarmasi bosh mutaxassisi Rizayeva Kamola Ravshanovna — Oʻzbekiston Respublikasi Investitsiyalar boʻyicha davlat qoʻmitasi bosh mutaxassisi