Oʻzbekiston Respublikasi ommaviy axborot vositalarini roʻyxatga olish tartibiga qoʻshimchalar kiritish toʻgʻrisida (162-son)

03.04.1992

OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING

qarori

Oʻzbekiston Respublikasida ommaviy axborot vositalarini roʻyxatga olish boʻyicha ishlarni tartibga solish maqsadida Vazirlar Mahkamasi qaror qiladi:

Oʻzbekiston Respublikasi Prezidenti huzuridagi Vazirlar Mahkamasining 1991-yil 25-sentabrdagi 244-son qarori bilan tasdiqlangan Oʻzbekiston Respublikasida ommaviy axborot vositalarini roʻyxatga olish tartibining 1-bandi quyidagi mazmundagi xatboshi bilan toʻldirilsin:

“Roʻyxatga olish uchun ariza Oʻzbekiston Respublikasining “Ommaviy axborot vositalari toʻgʻrisida”gi Qonunning 7-moddasiga muvofiq beriladi”.

Oʻzbekiston Respublikasida ommaviy axborot vositalarini roʻyxatga olish uchun taqdim etiladigan zarur hujjatlar roʻyxati ilova qilinadi.

Oʻzbekiston Respublikasi Bosh vaziri A. MUTALOV

Toshkent sh.,

1992-yil 3-aprel,

162-son

Vazirlar Mahkamasining 1992-yil 3-apreldagi 162-son qaroriga ILOVA

Ommaviy axborot vositalarini roʻyxatga olish uchun taqdim etiladigan zarur hujjatlar

ROʻYXATI

1. Oʻzbekiston Respublikasining “Ommaviy axborot vositalari toʻgʻrisida”gi Qonunining 7-moddasiga muvofiq ommaviy axborot vositasini roʻyxatga olish toʻgʻrisida ariza.

Arizada quyidagilar koʻrsatilishi kerak:

muassis;

nomi;

tili (tillar);

ommaviy axborot vositasi joylashgan joy;

maqsad va vazifalari;

taxmin qilinayotgan auditoriya;

nashrning moʻljallanayotgan davriyligi;

ommaviy axborot vositasi hajmi;

mablagʻ bilan taʼminlash manbalari va moddiy texnika taʼminoti.

Ariza murojaat qilingan kun va oy koʻrsatilgan holda Oʻzbekiston Respublikasi Davlat matbuot qoʻmitasi raisi nomiga beriladi.

2. Arizaga quyidagilar ilova qilinadi:

a) ommaviy axborot vositasining muassisi, uning nomi va manzili;

ustavi va uning Oʻzbekiston Respublikasi Adliya vazirligida, mahalliy davlat boshqaruvi organlarida roʻyxatga olinganligi toʻgʻrisidagi hujjatning nusxasi;

noshirlik faoliyati uchun ruxsatnoma;

b) muassis tomonidan mablagʻ bilan taʼminlash va ommaviy axborot vositasini chiqarishni moddiy texnikaviy taʼminlash masalalarining hal etilishi;

nashrni bosib chiqarishning matbaa bazasi toʻgʻrisidagi maʼlumotnoma yoki dastlabki kelishuv;

qogʻoz olish masalalari;

yetkazib beruvchilar bilan shartnomalar;

birjalar bilan oʻzaro aloqalar;

boshqa manbalar;

tahririyat moddiy-texnika bazasining taʼminlanishi;

orgtexnika;

bino;

nashrni bosib chiqarish uchun moliyaviy mablagʻ ajratilishi (muassis bilan ommaviy axborot vositasi tahririyati oʻrtasida tuzilgan shartnoma yoki muassisning qarori–mablagʻ ajratish toʻgʻrisidagi yigʻilish bayonnomasi);

v) ommaviy axborot vositasining Ustavi;

g) ommaviy axborot vositasini nashr etish daromadlari va xarajatlari smetasi loyihasi;

d) muassis bilan kelishilgan tavsiya etilayotgan shtat jadvali;

bosh muharrir lavozimiga tavsiya etilayotgan nomzod (qisqacha tavsifnoma);

ommaviy axborot vositasi mahsulotlarini tarqatish usullari;

nashrga obuna;

“Soyuzpechat” agentligi yoki boshqa korxonalar orqali chakana savdoda tarqatish toʻgʻrisida shartnoma;

fuqarolar tomonidan.