Aholi punktlari qismlarining batafsil rejalashtirish loyihalarini ishlab chiqishni moliyalashtirishda davlat-xususiy sheriklikni amalga oshirish tartibi toʻgʻrisidagi nizomni tasdiqlash haqida (169-son)

26.02.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Tadbirkorlik va shaharsozlik faoliyatini amalga oshirish uchun yer uchastkalarini doimiy foydalanishga berish tartibini tubdan takomillashtirish chora-tadbirlari toʻgʻrisida” 2018-yil 20-apreldagi PQ-3677-son qarorini bajarish yuzasidan hamda aholi punktlarining hududlarni rejalashtirish va qurishga oid shaharsozlik hujjatlari, shu jumladan xususiy sektor investitsiyalarini jalb qilish yoʻli bilan batafsil rejalashtirish loyihalari bilan qamrab olinishini taʼminlash, aholi punktlarining arxitekturaviy qiyofasini yanada yaxshilash va aholi turmush darajasi va sifatini tubdan oshirish imkonini beruvchi shaharsozlik sohasidagi davlat-xususiy sheriklik uchun qulay sharoitlar yaratish maqsadida Vazirlar Mahkamasi qaror qiladi:

1. Aholi punktlari qismlarining batafsil rejalashtirish loyihalarini ishlab chiqishni moliyalashtirishda davlat-xususiy sheriklikni amalga oshirish tartibi toʻgʻrisida nizom ilovaga muvofiq tasdiqlansin.

2. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — Oʻzbekiston Respublikasi transport vaziri A.J. Ramatov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 26-fevral,

169-son

Vazirlar Mahkamasining 2019-yil 26-fevraldagi 169-son qaroriga ILOVA

Aholi punktlari qismlarining batafsil rejalashtirish loyihalarini ishlab chiqishni moliyalashtirishda davlat-xususiy sheriklikni amalga oshirish tartibi toʻgʻrisida

NIZOM

1-bob. Umumiy qoidalar

1. Mazkur Nizom aholi punktlari qismlarining batafsil rejalashtirish loyihalarini ishlab chiqishni moliyalashtirishda davlat-xususiy sheriklikni amalga oshirish tartibini belgilaydi.

2. Ushbu Nizomda quyidagi tushunchalardan foydalaniladi:

davlat-xususiy sheriklik (keyingi oʻrinlarda DXSH deb ataladi) — xususiy investitsiyalarni jalb qilish, resurslarni birlashtirish va xavf-xatarlarni taqsimlash maqsadida davlat va xususiy sheriklarning muayyan muddatga yuridik rasmiylashtirilgan aholi punktlari qismlarining batafsil rejalashtirish loyihalarini ishlab chiqish sohasidagi oʻzaro samarali sherikligi;

DXSH toʻgʻrisida bitim (keyingi oʻrinlarda bitim deb ataladi) — tomonlarning huquqlari, majburiyatlari va javobgarligini, shuningdek, davlat-xususiy sheriklik loyihasini ijro etishning boshqa shartlarini belgilaydigan davlat sherigi va xususiy sherik oʻrtasida tuzilgan yozma shartnoma;

bitim muddati — tomonlar bitimni imzolagan vaqt (sana)dan boshlab xususiy sherik tomonidan yer uchastkasiga boʻlgan huquqlar davlat roʻyxatidan oʻtgani toʻgʻrisidagi guvohnoma olingan vaqt (sana)gacha boʻlgan davr.

DXSH toʻgʻrisidagi bitim tomonlari (keyingi oʻrinlarda tomonlar deb ataladi) — davlat sherigi va xususiy sherik;

davlat sherigi — Qoraqalpogʻiston Respublikasi Qurilish vazirligi, viloyatlar va Toshkent shahar qurilish bosh boshqarmalari;

xususiy sherik — bitim tuzgan yuridik yoki jismoniy shaxs. Davlat tashkilotlari xususiy sheriklar boʻla olmaydi, shuningdek, xususiy sheriklar tarafida ishtirok eta olmaydi;

DXSH toʻgʻrisidagi bitim obyekti (keyingi oʻrinlarda obyekt deb ataladi) — aholi punktlari qismlari uchun batafsil rejalashtirish loyihasi (aholi punktining bosh rejasi asosida aholi punktlari hududlarining qismlari uchun ishlab chiqilib,”qizil chiziqlar”, qurilish va yer uchastkalaridan foydalanishni tartibga soluvchi chiziqlar, yerdan foydalanish chegaralari, hududlarni zonalash va ulardagi qurilishlar navbatini, muhofaza qilinadigan zonalardan foydalanish rejimini, koʻchalar, tor koʻchalar, yoʻlovchilar uchun moʻljallangan zonalarni, shuningdek, transport va aloqa inshootlari, muhandislik uskunalari va hududni obodonlashtirish koʻrsatkichlarini, ijtimoiy va madaniy-maishiy soha obyektlarining tarkibi va joylashuvini, qurishning hajmiy-hududiy va arxitektura-rejali yechimini hamda qurish zichligi va koʻrstakichlarini belgilaydigan shaharsozlik hujjati);

DXSH loyihasi — muhim davlat, ijtimoiy va iqtisodiy ahamiyatga ega boʻlgan aholi punktlari qismlarining batafsil rejalashtirish loyihalarini (keyingi oʻrinlarda BRL deb ataladi) ishlab chiqish sohasidagi investitsiyaviy va innovatsion tadbirlar majmui.

3. DXSH quyidagi prinsiplarga asoslanadi:

DXSH toʻgʻrisidagi maʼlumotlarning ochiqligi va ulardan erkin foydalanish imkoniyatining mavjudligi, davlat yoki qonun bilan qoʻriqlanadigan boshqa sirni tashkil etuvchi maʼlumotlar bundan mustasno;

diskriminatsiyaga yoʻl qoʻymaslik, bitim tomonlarining teng huquqligi;

tomonlarning bitim majburiyatlarini vijdonan bajarishi;

bitim tomonlari oʻrtasida xavf-xatar va majburiyatlarning adolatli taqsimlanishi;

DXSH tomonlari oʻzaro munosabatlarining shartnomaviy asosi.

4. DXSH loyihalarining amalga oshirilishi quyidagilarni nazarda tutadi:

bitimda koʻrsatilgan loyiha tashkiloti tomonidan ishlab chiqilgan BRLning xususiy sherik tomonidan moliyalashtirilishi;

ushbu BRLda qayd etilgan chegara doirasida tadbirkorlik va shaharsozlik faoliyatini amalga oshirish uchun bitta yer uchastkasi (keyingi oʻrinlarda — yer uchastkasi) davlat sherigiga doimiy foydalanish huquqi bilan ajratiladi va u tomonidan xususiy sherikka ijaraga beriladi.

BRL ishlab chiqilayotganda va DXSH shartlarida moliyalashtirish hisobiga ishlab chiqish jarayoni yakunlanganidan soʻng u davlat sherigiga tegishli mulk hisoblanadi va tasdiqlangandan keyin xususiy sherikka topshirilmaydi.

Xususiy sherik BRL ni ishlab chiqayotgan loyiha tashkilotlariga hamda BRL ni ishlab chiqish, kelishish va tasdiqlashda ishtirok etayotgan boshqa tashkilotlarga uni ishlab chiqish, kelishish va tasdiqlash jarayonida BRL boʻyicha shaharsozlik yoki boshqa tusdagi talablarni belgilash huquqiga ega emas.

BRL ni ishlab chiqish, kelishish va tasdiqlash qonunchilikda belgilangan tartibda amalga oshiriladi.

5. DXSH loyihalarini amalga oshirish toʻgʻrisidagi bitim tanlov asosida tuziladi.

6. Qoraqalpogʻiston Respublikasi Qurilish vazirligi, viloyatlar va Toshkent shahar qurilish bosh boshqarmalari, Moliya vazirligi, Iqtisodiyot va sanoat vazirligi, Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi (keyingi oʻrinlarda “Davergeodezkadastr” qoʻmitasi deb ataladi) hududiy organlari hamda joylardagi davlat hokimiyati organlari vakillaridan iborat boʻlgan Tanlov komissiyasi (keyingi oʻrinlarda Komissiya deb ataladi) kamida ikki nafar ishtirokchidan ariza kelib tushganda tanlov oʻtkazadi.

Komissiya aʼzolari soni toq boʻlishi va yetti kishidan kam boʻlmasligi lozim. Qoraqalpogʻiston Respublikasi Vazirlar Kengashi Raisining, viloyatlar va Toshkent shahar hokimlarining qurilish masalalari boʻyicha oʻrinbosarlari Komissiya raisi sanaladi.

7. Komissiya quyidagi huquqlarga ega:

a) oʻzining ish reglamentini mustaqil ishlab chiqish va tasdiqlash;

b) tanlov takliflarini taqdim etish muddatlarini uzaytirish yoki tanlovni oʻtkazish sanasini tanlovni oʻtkazish toʻgʻrisidagi xabarnomada belgilangan muddatdan koʻpi bilan bir oyga koʻchirish toʻgʻrisidagi qaror haqida tanlov hujjatlari taqdim etilgan barcha ishtirokchilarni (ular boʻlsa) yozma ravishda xabardor etib, mazkur Nizomning 20-bandida nazarda tutilgan axborot resurslarida tegishli xabarnoma eʼlon qilgan holda qabul qilish;

v) tushunish uchun qulay boʻlgan, umumiy qabul qilingan belgilanish va nomlardan foydalangan holda tuzilgan, ikki maʼnoda talqin etilmaydigan soʻz, jumla va birikmalardan foydalanib tuzilgan tanlov hujjatlarini tasdiqlash;

g) tanlovda ishtirok etish uchun ishtirokchi tomonidan zakalat pulini kiritish tartibini aniqlash;

d) tanlov takliflarini koʻrib chiqish va tanlov gʻolibini aniqlash muddatini belgilash, ushbu muddat konvertlar ochilgan kundan eʼtiboran uch ish kunidan oshmasligi lozim;

e) ishtirokchilarning takliflari tanlov hujjatlariga va tanlovni oʻtkazish shartlariga mos kelmagan taqdirda ishtirokchilarga xabar berib, rad etish sabablarini koʻrsatgan holda ularning takliflarini rad etish;

j) quyidagi holatlarda tanlovni amalga oshmagan deb eʼlon qilish:

xabarnomada koʻrsatilgan muddatda birorta ham buyurtma taqdim etilmasa;

barcha taqdim etilgan tanlov takliflari tanlov hujjatlari shartlariga mos kelmasa;

mazkur Nizom va boshqa qonunchilik hujjatlari talablari buzilganligi aniqlansa, tanlovni oʻtkazish tartibotlarini buzadigan kelishuvlar va kutilmagan vaziyatlar aniqlansa.

8. Komissiya quyidagilar uchun javobgar boʻladi:

oʻz faoliyatining shaxsan ishtirok etish tartibida tashkil etilishini taʼminlash;

konvertlarni ochish va tanlov natijalarini eʼlon qilish chogʻida ishtirokchilar yoki ularning ishonchli vakillari va tegishli tuman (shahar) hokimliklari vakillarining ishtirok etishi uchun sharoitlarni taʼminlash;

konvertlardagi muhrlarning butunligini va buzilmaganini tekshirish;

talablar yagonaligini va tanlov natijalariga koʻra qarorlar qabul qilish vaqtida xolislikni taʼminlash;

tanlov takliflarini koʻrib chiqishda maxfiylikni taʼminlash;

tanlov takliflari solingan konvertlarning birinchi nusxalarini belgilangan kun va soatda ochish, ikkinchi nusxasini esa takliflar mazmuni yuzasidan nizolar yuzaga kelganda ochish;

konvertlarni ochish vaqtida tanlov shartlari va tartibotlariga amal qilinganlikni, tanlov hujjatlarida koʻrsatilgan hujjatlarning mavjudligini tekshirish.

9. Komissiya tomonidan xususiy sherikning arizasi koʻrib chiqilgani uchun Oʻzbekiston Respublikasi qonunchiligida belgilangan bazaviy hisoblash miqdorining bir barobari miqdoridagi yigʻim puli xususiy sherik tomonidan davlat sherigining maxsus hisob raqamiga toʻlanadi.

10. Davlat yoki xususiy sherikning DXSH loyihasi boʻyicha tashabbus bilan chiqishi BRL ishlab chiqishni moliyalashtirishga oid bitim tuzilishi uchun asos hisoblanadi.

2-bob. Xususiy sherik tomonidan DXSH loyihasi boʻyicha tashabbus bilan chiqish tartibi

11. Xususiy sherik sifatida DXSH shartlarida batafsil rejalashtirish loyihasi ishlab chiqilishini moliyalashtirish istagini bildirgan yuridik yoki jismoniy shaxs (keyingi oʻrinlarda talabgor deb ataladi) Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga tegishli ariza beradi.

12. Arizada quyidagilar koʻrsatilgan boʻlishi lozim:

xususiy sherikning nomlanishi va joylashgan joyi — yuridik shaxslar uchun, shaxsiy maʼlumotlar va yashash manzili — jismoniy shaxslar uchun;

loyihani amalga oshirishdan koʻzlanayotgan maqsad;

bitim obyekti haqida maʼlumotlar — BRL ishlab chiqilayotgan aholi punkti hududining taxmin qilinayotgan qismi;

ishlab chiqilayotgan DXSH chegaralaridagi va xususiy sherikka undan ijaraga berilishi huquqi taqdim etilishi koʻzda tutilgan yer uchastkasi (keyingi oʻrinlarda soʻralayotgan yer uchastkasi deb ataladi) toʻgʻrisidagi maʼlumotlar (maqsadli belgilanishi, loyiha tashkilotining tegishli xulosasi bilan asoslangan maydon va boshqalar);

soʻralayotgan yer uchastkasida talabgor tomonidan qurilishi rejalashtirilgan bino yoki inshootning (bino yoki inshootning bosh yoki yon fasadlari va obyektning bosh plani) eskiz loyihasi;

soʻralayotgan yer uchastkasi hududini obodonlashtirish va koʻkalamzorlashtirish boʻyicha talabgorning takliflari;

atrof muhitni muhofaza qilish, ekologiya xavfsizligi hamda sanitariya va yongʻinga qarshi meʼyorlar va qoidalar talablariga amal qilish yuzasidan talabgorning takliflari;

ijtimoiy infratuzilma obyektlariga nogironligi boʻlgan shaxslarning toʻsiqsiz kirib-chiqishi uchun sharoitlar yaratish borasida talabgorning takliflari (turar joy, jamoat, ishlab chiqarish bino va inshootlari, dam olish joylari, madaniy-koʻngil ochar muassasalar va boshqa obyektlar).

13. Talabgordan ariza kelib tushgandan soʻng Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari bir kun muddatda tegishli tuman (shahar) hokimligiga boshqa yuridik va jismoniy shaxslarning arizalarini, tegishli tuman (shahar) hokimligiga xabarnoma kelgan sanadan boshlab, talabgor arizasida ijaraga olish uchun koʻrsatilgan yer uchastkasi taqdim etilishini rad etish toʻgʻrisidagi xabarnomani yuboradi.

14. DXSH loyihasini amalga oshirish toʻgʻrisida kelib tushgan ariza Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari tomonidan davlat sherigi bilan birgalikda besh ish kuni davomida mazkur Nizom talablariga javob berishi yuzasidan koʻrib chiqiladi.

15. Mazkur Nizomda koʻzda tutilgan talablarni buzgan holda ariza berilgani aniqlanganda hujjatlar talabgorga borish kuni davomida qaytariladi.

Taqdim etilgan arizada talablar buzilishi holatlari aniqlangani toʻgʻrisidagi xabarnoma talabgorga yozma ravishda, shu jumladan elektron axborot tizimi orqali, aniqlangan buzilishlarni, qonunchilikning aniq normalari va talabgor buzilishlar va kamchiliklarni bartaraf etib, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga takroran koʻrib chiqish uchun yuborishi mumkin boʻlgan muddat koʻrsatilgan holda topshiriladi (yuboriladi).

Talabgor buzilishlarni bartaraf etish va takroran koʻrib chiqish uchun hujjatlarni taqdim etish huquqiga ega boʻlgan muddat yozma yoxud elektron xabarnoma olgan kundan eʼtiboran oʻn ish kunidan kam boʻlmasligi lozim.

Takroran berilgan hujjatlar aynan takroriy berilgan kunda qabul qilingan deb hisoblanadi.

16. Ariza unda mazkur Nizomning 12-bandida koʻrsatilgan maʼlumotlar yoʻq boʻlsa, shuningdek:

soʻralayotgan yer uchastkasi Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga talabgor ariza berguniga qadar qonunchilik hujjatlarida belgilangan tartibda tadbirkorlik va shaharsozlik faoliyatini amalga oshirish uchun yuridik va jismoniy shaxslarga doimiy foydalanish uchun elektron auksion orqali realizatsiya qilinayotgan yer uchastkalari roʻyxatiga kiritilgan boʻlsa;

Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklariga talabgor ariza berguniga qadar tadbirkorlik va shaharsozlik faoliyatini amalga oshirish uchun boshqa yuridik va jismoniy shaxslar tomonidan soʻralayotgan yer uchastkasidan doimiy foydalanish uchun berilgan ariza boʻyicha davlat hokimiyati organlarida roʻyxatdan oʻtkazish tartiboti amalga oshirilgan boʻlsa talabgorga qaytariladi.

17. Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari kelib tushgan arizani koʻrib chiqqandan soʻng arizaga ijobiy xulosani ilova qilgan holda uni davlat sherigiga tanlov eʼlon qilish uchun yuboradi.

Davlat sherigi kelib tushgan ariza va Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining ijobiy xulosasi asosida:

a) DXSH toʻgʻrisida bitim loyihasini tayyorlaydi va belgilangan tartibda Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan kelishadi;

b) DXSH toʻgʻrisidagi bitim loyihasi Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi bilan kelishilganidan soʻng yer uchastkasini tanlash va ajratish boʻyicha materiallarni tayyorlaydi hamda yer uchastkasi (obyekt) joylashuvi talabgor tomonidan taklif etilgan maqsadli belgilanishiga mosligi yuzasidan quyidagi tashkilotlar bilan kelishadi:

tuman (shahar) hokimi;

tuman (shahar) yer resurslari va davlat kadastri boʻlimi, Toshkent shahrida — yer resurslari va davlat kadastri boshqarmasi;

Qoraqalpogʻiston Respublikasi ekologiya va atrof muhitni muhofaza qilish qoʻmitasi, viloyat va Toshkent shahar ekologiya va atrof muhitni muhofaza qilish boshqarmasi;

Oʻzbekiston Respublikasi Sogʻliqni saqlash vazirligi huzuridagi Sanitariya-epidemiologik osoyishtalik va jamoat salomatligi qoʻmitasining tuman (shahar) boʻlimi, Toshkent shahrida — Toshkent shahar boshqarmasi;

tuman (shahar) yongʻin xavfsizligi boʻlimi (boʻlinmasi), Toshkent shahrida — Toshkent shahar ichki ishlar Bosh boshqarmasining yongʻin xavfsizligi boshqarmasi;

Oʻzbekiston Respublikasi Madaniyat vazirligi madaniy meros obyektlarini muhofaza qilish va ulardan foydalanish bosh ilmiy-ishlab chiqarish boshqarmasining hududlararo (hududiy) davlat inspeksiyasi — madaniy meros yodgorliklari muhofaza qilinadigan zonada obyektni qurish uchun yer uchastkasi tanlanganda;

tegishli hududlar va inshootlardan rejim asosida foydalanadigan hamda ulardan foydalanadigan tashkilotlar — qoʻriqlanadigan tabiat hududlaridagi qoʻriqlash, suvni qoʻriqlash, sanitariya himoyasidagi zonalar, magistral quvurlar oʻtgan, temir yoʻl va avtomobil yoʻllari, elektr uzatish va aloqa liniyalari, shuningdek aerodrom va chiqindi hamda boshqa zaharli moddalar koʻmilgan joylar yaqinidagi yer uchastkalari tanlanganda.

Qoraqalpogʻiston Respublikasi Ichki ishlar vazirligi yoʻl harakati xavfsizligi boshqarmasi, Toshkent shahar ichki ishlar Bosh boshqarmasi, viloyatlar ichki ishlar boshqarmalari — yer uchastkalari avtomobil turargohlari va yoʻl harakati xavfsizligiga taʼsir etadigan boshqa obyektlar uchun ajratilganda.

Yer uchastkasini tanlash boʻyicha materiallarni tayyorlash va manfaatdor tashkilotlar bilan kelishish qonunchilikda belgilangan tartibda amalga oshiriladi.

Davlat sherigi ushbu bandning ikkinchi xatboshida koʻrsatilgan manfaatdor tashkilotlarning ijobiy xulosalari olingandan soʻng tanlov eʼlon qiladi.

Davlat sherigi va mazkur bandning ikkinchi va uchinchi xatboshilarida koʻrsatilgan organlar va tashkilotlar tanlov ishtirokchilari arizasida bayon etilgan maʼlumotlarni oshkor qilish huquqiga ega emas.

Tanlov ishtirokchisining ishonchli vakili va tuman (shahar) hokimligining vakili tanlov ishtirokchilari takliflari solingan konvertlarni ochish jarayonida ishtirok etish huquqiga egadirlar.

Tanlovni oʻtkazish mazkur Nizomning 4-bobida nazarda tutilgan tartibda amalga oshiriladi.

3-bob. Davlat sherigi tomonidan DXSH loyihasi boʻyicha tashabbus bilan chiqish tartibi

18. Davlat sherigi alohida vaziyatlarda (normativ-huquqiy hujjatlarda, Oʻzbekiston Respublikasi Prezidenti, Oʻzbekiston Respublikasi Vazirlar Mahkamasi hamda Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining bayonnoma qarorlarida koʻzda tutilgan BRL ishlab chiqilganda yoki talabgorlar arizalari taqdim etilganda) mazkur Nizomning ilovasidagi sxemaga muvofiq tanlovni eʼlon qilish yoʻli bilan BRL loyihasi amalga oshirilishi boʻyicha tashabbus bilan chiqadi.

19. Davlat sherigi BRL loyihasini oʻz tashabbusiga koʻra amalga oshirish istagida boʻlsa,aholi punktining tasdiqlangan bosh rejasi qoidalari va aholi punkti bosh rejasini amalga oshirish boʻyicha tadbirlar majmuidan kelib chiqqan holda quyidagilarni bajaradi:

BRL ishlab chiqilayotgan hududni tanlaydi;

xususiy sherikka DXSH shartlarida taqdim etilayotgan yer uchastkasini manfaatdor tuman (shahar) hokimligi bilan birgalikda tanlaydi va uning maqsadli belgilanishini aniqlaydi;

yer uchastkasini tanlash va ajratish materiallarini tayyorlaydi;

qonunchilikda belgilangan tartibda mazkur Nizom 17-bandining “b” kichik bandida qayd etilgan tashkilotlar bilan yer uchastkasini tanlash materiallarini kelishadi.

Yer uchastkasini tanlash va ajratish materiallarini tayyorlash ishlarining qiymati Oʻzbekiston Respublikasi Vazirlar Mahkamasining 2018-yil 30-iyundagi 493-son qarori bilan tasdiqlangan Tadbirkorlik va shaharsozlik faoliyatini amalga oshirish uchun yer uchastkalarini elektron auksion orqali doimiy foydalanishga berish tartibi toʻgʻrisida nizomning 5-bandiga muvofiq belgilanadi.

4-bob. Tanlovni oʻtkazish

20. Davlat sherigi tanlov boshlanishidan oʻttiz kalendar kun avval majburiy ravishda Oʻzbekiston Respublikasi Qurilish vazirligi, Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklarining rasmiy saytida, “Oʻzbekiston bunyodkori” gazetasida, shuningdek, boshqa OAVlarida, shu jumladan Internet tarmogʻida tanlov savdolari oʻtkazilayotgani toʻgʻrisidagi eʼlonni joylashtiradi.

21. Tanlov haqidagi eʼlon quyidagi maʼlumotlardan iborat boʻlishi lozim:

Davlat sherigining nomlanishi va pochta manzili, uning aloqa telefonlari va elektron pochta manzili;

BRL ning nomlanishi va u qamrab oladigan hududning gektarlar hisobidagi maydoni;

xususiy sherikka DXSH shartlarida taqdim etilayotgan yer uchastkasining belgilanishi, tavsifi va joylashgan joyi;

obyektning maqsadli belgilanishi, quvvati va muhofaza zonasi kattaligiga (zarurat boʻlsa) qarab loyiha tashkilotining xulosasi asosida belgilangan yer uchastkasining maydoni;

BRL loyihasini amalga oshirish shartlari;

talab etilayotgan investitsiyaviy majburiyatlarning minimal hajmi;

majburiyatlarning boshlangʻich hajmi, ularni bajarish shakli va shartlari;

yer uchastkasiga oid huquqlar boʻyicha cheklovlar (majburiyatlar) belgilangan tartibda roʻyxatdan oʻtkazilgani toʻgʻrisidagi maʼlumotlar;

talabgorlar takliflari solingan konvertlarni ochish sanasi, vaqti va joyi;

tanlov gʻolibini aniqlash sanasi, vaqti, joyi va shartlari;

zakalat toʻlovini kiritish miqdori, muddati va tartibi, uni kiritish uchun bank rekvizitlari;

buyurtmalarni qabul qilishning soʻnggi muddati (kuni va soati koʻrsatiladi);

tanlov hujjatlari va qoʻshimcha maʼlumotlarni olish mumkin boʻlgan manzil;

tanlov hujjatlarini taqdim etishdagi toʻlov miqdori va uni kiritish uchun bank rekvizitlari.

22. Tanlov hujjatlari toʻplami quyidagi hujjatlardan iborat boʻlishi lozim:

talabgorlar uchun yoʻriqnoma;

tanlovning texnik qismi;

tanlovning tijorat qismi.

Shuningdek, tanlov komissiyasi tomonidan tasdiqlanadigan tanlov gʻolibini saralash mezonlari tanlov hujjatlariga ilova qilinadi. Tanlov gʻolibini saralash mezonlarida tanlovning texnik va tijorat qismlariga qoʻyiladigan ballar koʻrsatiladi, bunda tanlovning texnik qismiga qoʻyiladigan ballar miqdori ballar umumiy summasining kamida 70% ni tashkil etishi lozim.

23. Tanlov talabgorlari yoʻriqnomasida quyidagi maʼlumotlar boʻlishi lozim:

davlat sherigi bilan aloqa oʻrnatish uchun tanlovni oʻtkazish qoidalari borasida tushuntirishlar olish mumkin boʻlgan pochta manzili va aloqa telefonlari, faks raqami, elektron pochta manzili;

tanlovda ishtirok etish uchun zarur boʻlgan hujjatlarni rasmiylashtirish tartibi;

tanlov takliflarini rasmiylashtirishga oid talablar;

tanlov taklifini berish tartibotlariga qoʻyilgan talablar;

tanlov takliflari solingan konvertlarni ochish tartibi;

tanlov takliflarini baholash tartibi.

24. Tanlov hujjatlarining texnik qismi quyidagilardan iborat boʻlishi lozim:

DXSH shartlarida yer uchastkasini berish sharti va maqsadlari;

obyekt qurilishini yakuniga yetkazish muddati;

tanlov majburiyatlarini bajarish toʻgʻrisidagi shartnoma loyihasi;

DXSH shartlarida yer uchastkasini taqdim etish boʻyicha materiallar, shu jumladan joylashuv rejasi;

davlat sherigi tomonidan tayyorlangan shaharsozlik topshirigʻi (ushbu yer uchastkasida qurilishi rejalashtirilayotgan bino yoki inshootning tashqi koʻrinishiga qoʻyilayotgan umumiy talablar majmuini belgilab beruvchi, shuningdek, talabgorning tanlov majburiyatlarida, bino va inshootning ishlab chiqilayotgan loyiha smeta hujjatlarida majburiy ravishda hisobga olinadigan ushbu yer uchastkasidagi qurilish maydonini, avtomobil turargohlari, hududga kirish va chiqish yoʻllari, kichik arxitektura shakllarining joylashtirilishini, koʻkalamzorlashtirish va obodonlashtirishning taxminiy maydonlarini nazarda tutuvchi hujjatlar);

atrof muhitni himoya qilish, ekologiya xavfsizligi hamda sanitariya va yongʻinga qarshi meʼyor va qoidalar talablariga amal qilish yuzasidan tanlov gʻolibining majburiyatlari;

ijtimoiy infratuzilma (turar joy, jamoat, ishlab chiqarish bino va inshootlari, dam olish joylari, madaniy-dam olish muassasalari va boshqa obyektlar) obyektlariga nogironligi boʻlgan shaxslar toʻsiqsiz kirib-chiqishi uchun sharoitlar yaratish boʻyicha tanlov gʻolibining majburiyatlari;

qoʻriqlanadigan tabiat hududlari va madaniy meros obyektlarini saqlab qolish qismidagi talablarga amal qilish yuzasidan tanlov gʻolibining majburiyatlari.

Shaharsozlik topshirigʻini ishlab chiqish qiymati Oʻzbekiston Respublikasi Vazirlar Mahkamasining 2013-yil 30-maydagi 150-son qarori bilan tasdiqlangan Qurilish sohasida ruxsat beruvchi tusdagi hujjatlarni berish tartibotlarini amalga oshirish muddatlari va qiymatini belgilashda tabaqalashtirilgan yondashuv tartibi toʻgʻrisidagi nizomning 2-ilovasiga muvofiq belgilanadi.

25. Tanlov hujjatlarining tijorat qismida BRL ishlab chiqilishiga yoʻnaltirilayotgan investitsiyalar hajmi boʻyicha taklif boʻlishi lozim. Qonunchilikda belgilangan tartibda BRL ishlab chiqilishiga jalb qilingan loyiha tashkilotining xulosasida BRL ni ishlab chiqish qiymati koʻrsatiladi.

26. Eʼlon chop etilgandan soʻng talabgorlar tanlov hujjatlarini oladi, hujjatlar har bir talabgorga bazaviy hisoblash miqdorining 50 foizi miqdoridagi toʻlov evaziga taqdim etiladi.

Davlat sherigi tomonidan talabgorlardan axborot-maslahat xizmatlari uchun qoʻshimcha toʻlov talab qilinishiga yoʻl qoʻyilmaydi.

27. Tanlovda ishtirok etish uchun talabgor yoki uning vakili tanlovni oʻtkazish toʻgʻrisidagi eʼlonda qayd etilgan muddatlarda ikki nusxada tanlovda ishtirok etishga buyurtmani quyidagi hujjatlarni ilova qilgan holda oʻzi olib boradi yoki buyurtma xat bilan pochta orqali davlat sherigiga taqdim etadi:

tanlov hujjatlari talablariga muvofiq ravishda tuzilgan tanlov taklifi;

eskiz loyihasi;

loyiha talabgorning oʻz mablagʻlari hamda kredit resurslari hisobiga moliyalashtirilishi taʼminlangani toʻgʻrisidagi maʼlumotlar;

tanlov ishtirokchisining toza aktivlari haqidagi maʼlumot, ishtirokchi tomonidan BRL ni ishlab chiqishga ajratilayotgan va DXSH loyihasini amalga oshirishning moliyaviy imkoniyatlarini tasdiqlaydigan investitsiyalar hajmining kamida 25 foizi miqdorida boshqa tashkilotning kafilligi;

tanlov ishtirokchisi komissiya uning arizasini koʻrib chiqishi uchun davlat sherigining maxsus hisob raqamiga yigʻim toʻlaganini tasdiqlovchi hujjat.

Qayta tashkil etilayotgan, tugatilayotgan yoki toʻlovga qobiliyatsizlik jarayonida boʻlgan, mulkiga arest solingan ishtirokchilarning tanlovda ishtirok etishiga yoʻl qoʻyilmaydi. Qayta tashkil etilayotgan, tugatilayotgan yoki toʻlovga qobiliyatsizlik jarayonida boʻlgan, mulkiga arest solingan ishtirokchilar toʻgʻrisidagi maʼlumotlar Komissiya tomonidan tegishli tashkilotlar va organlarga soʻrovnomalar yuborish yoʻli bilan tasdiqlanadi.

Tanlovda ishtirok etish buyurtmasiga ilova qilingan barcha hujjatlar tanlov haqidagi xabarnomada koʻrsatilgan bank hisobiga tanlov predmeti minimal qiymatining 10 foizi miqdorida oldindan toʻlov amalga oshirilganini tasdiqlovchi toʻlov hujjati nusxasi solingan va muhrlangan (imzo bilan tasdiqlangan) konvertlarda talabgorlar tomonidan taqdim etiladi.

Taqdim etilgan hujjatlarning barcha varaqlari talabgor imzosi bilan tasdiqlangan boʻlishi lozim.

Tanlov takliflarining amal qilish muddati tanlov hujjatlarida belgilanadi.

28. Tanlov takliflari solingan konvertlarning birinchi nusxalari belgilangan kun va soatda ochiladi, ikkinchi nusxasi esa davlat sherigida saqlanadi va takliflar mazmuni yuzasidan nizolar yuzaga kelganda ochiladi.

Tanlovda birgina talabgor ishtirok etgan holatlarda tanlov takliflari solingan konvert ochilmaydi.

Talabgorlar tanlov takliflari konvertlarini ochish vaqtida ishtirok etish huquqiga egadirlar.

Tanlov takliflari konvertlarini ochish chogʻida tanlov komissiyasi tanlov shartlari va tartibotlariga amal qilinganini va tanlov hujjatlarida qayd etilgan hujjatlar mavjudligini tekshiradi.

29. Tanlov takliflarining baholanishi va tanlov gʻolibini aniqlash quyidagi tartibda amalga oshiriladi:

talabgorning tanlov hujjatlari texnik qismi boʻyicha takliflari, shu jumladan loyiha eskizining baholanishi;

talabgorning taxmin etilayotgan investitsiyalar hajmi yuzasidan bergan takliflarining baholanishi;

ishlab chiqarishi rejalashtirilayotgan mahsulot turi, hajmi va assortimenti yoki koʻrsatilayotgan xizmat turlari boʻyicha talabgor tomonidan berilgan takliflarning baholanishi;

BRL ishlab chiqilishiga jalb qilinayotgan investitsiyalar hajmi boʻyicha talabgor tomonidan berilgan takliflarning baholanishi;

DXSH loyihasining talabgor mablagʻlari hisobiga moliyalashtirilishi bilan taʼminlanganligi.

Zarurat boʻlganda, tanlov takliflarini moliyalashtirish uchun Komissiya tomonidan qoʻshimcha ravishda quyidagi hujjatlar talab etilishi mumkin:

auditorlik tashkilotining (yuridik shaxslar uchun) soʻnggi yildagi xulosasi (mavjud boʻlsa);

talabgor — yuridik shaxsning soʻnggi ikki yildagi buxgalteriya balansi (mavjud boʻlsa).

30. Tanlov gʻolibi konvertlarni ochish kunida tanlov komissiyasining yopiq yigʻilishida aniqlanadi.

Qaror Komissiya aʼzolarining umumiy soniga nisbatan koʻpchilik ovoz bilan qabul qilinadi.

Komissiya qarorlari uning majlisida aʼzolarning kamida toʻrtdan uch qismi ishtirok etganida qonuniy hisoblanadi.

31. DXSH loyihasini amalga oshirish uchun eng optimal deb topilgan taklifni taqdim etgan ishtirokchi tanlov gʻolibi sifatida tan olinadi.

Tanlov toʻgʻrisidagi eʼlonda qayd etilgan investitsiya majburiyatlarining minimal hajmidan ortiqroq hajm koʻrsatilgan taklif bilan ishtirok etgan ishtirokchi gʻolib deb topilsa, BRL bilan qamrab olinadigan hudud maydoni tanlov gʻolibi qabul qilgan investitsiyaviy majburiyatlariga proporsional ravishda koʻpaytiriladi.

32. Shuningdek, tanlov yakunlari boʻyicha taqdim etgan takliflarining parametrlari tanlov shartlariga mos boʻlgan, lekin tanlov hujjatlariga koʻra, tanlov gʻolibi taklif etgan parametrlardan pastroq boʻlgan zaxira gʻolib ham aniqlanadi.

Tanlov gʻolibi mazkur Nizomning 37-bandida belgilangan muddatlarda DXSH toʻgʻrisidagi bitimni imzolashni rad etsa yoki undan bosh tortsa, tegishli bitimni zaxira gʻolib bilan imzolashga yoʻl qoʻyiladi. Zaxira gʻolib bilan bitim tuzish xuddi tanlov gʻolibi bilan bitim tuzish tartibiga muvofiq amalga oshiriladi.

Zaxira gʻolib mazkur Nizomning 37-bandida belgilangan muddatlarda DXSH toʻgʻrisidagi bitimni imzolashni rad etsa yoki undan bosh tortsa, tanlov natijalari bekor qilinadi va mazkur Nizomda belgilangan tartibda takroriy tanlov eʼlon qilinadi.

33. Tanlovda ishtirok etish uchun faqat bir ishtirokchidan ariza kelib tushsa, tanlov oʻtkazilmaydi.

34. Davlat sherigi tanlov ishtirokchisini tanlov natijalari haqida Oʻzbekiston Respublikasi Qurilish vazirligi, shuningdek, Qoraqalpogʻiston Respublikasi Vazirlar kengashi, viloyatlar va Toshkent shahar hokimliklarining rasmiy veb-saytlarida Komissiya tanlov natijalari haqida qaror qabul qilgan kunda axborot joylashtirish orqali xabardor qilishi lozim.

35. Qabul qilingan qarorga nisbatan eʼtiroz bildirgan ishtirokchi qaror yuzasidan shikoyat bilan sudga murojaat qilish huquqiga ega.

5-bob. Bitimni tuzish, oʻzgartirish, unga qoʻshimcha kiritish va uni bekor qilish tartibi

36. Komissiyaning ijobiy qarori qabul qilingan kundan keyin oʻn ish kuni mobaynida davlat sherigi va xususiy sherik qonunchilik va ushbu Nizom talablariga rioya qilgan holda bitim tuzishadi.

37. Bitim tarkibida, uning amalga oshirish shakliga bogʻliq ravishda, quyidagilar aks ettirilishi kerak:

obyekt va xususiy investitsiyalar hajmi;

bitim muddati va shartlari;

BRL ni ishlab chiqish, kelishish va tasdiqlash muddatlari;

soʻralayotgan yer uchastkasini xususiy sherikka berish tartibi va muddatlari;

bitim ishtirokchilarining huquqlari va majburiyatlari;

moliyalashtirish manbalari haqidagi maʼlumotlar;

DXSH loyihasining monitoringi va loyiha amalga oshirilishi darajasining baholash tartibi;

xususiy sherik tomonidan oʻz majburiyatlari bajarilishi toʻgʻrisida hisobot taqdim etilishining tartibi va muddatlari;

davlat sherigi va xususiy sherik oʻrtasida tuzilgan bitimni bajarish bilan bogʻliq xavflar taqsimlanishining tartibi va shartlari;

bitim shartlariga rioya qilmaganlik uchun tomonlarning javobgarligi;

bitimga oʻzgartish va qoʻshimchalar kiritish tartibi;

bitimni bekor qilish tartibi, bitimning muddatidan avval bekor qilinishi natijasida koʻrilgan zararlar uchun kompensatsiya toʻlash yoki zararlarni qoplash;

xususiy sherik tomonidan majburiyatlarning bajarilmasligi yoki tegishli ravishda bajarilmasligi uchun sanksiyalar;

bitimni amalga oshirishda yuzaga keladigan nizolarni hal qilish tartibi.

Bitim tarkibida qonunchilik hujjatlariga zid boʻlmagan boshqa shartlar ham boʻlishi mumkin.

38. Bitimni imzolashga tayyorlash uchun davlat sherigi xususiy sherikka bitim loyihasini taqdim etadi.

39. Zarurat boʻlganda, bitim shartlarini kelishish maqsadida, davlat va xususiy sheriklar oʻrtasida muzokaralar olib boriladi. Tanlov gʻolibining tanlov takliflarida koʻrsatilgan majburiyatlar va mazkur Nizom 21-bandining uchinchi — toʻqqizinchi xatboshilarida bayon etilgan tanlov toʻgʻrisida berilgan eʼlondagi maʼlumotlar muzokaralar davomida qayta koʻrib chiqilmaydi.

40. Bitim davlat sherigi va xususiy sherik oʻrtasida ikki nusxada imzolanadi va har bir tomon oʻz nusxasini oladi.

41. Tuzilgan bitimlar reyestri Oʻzbekiston Respublikasi Qurilish vazirligi tomonidan yuritiladi.

42. Bitim uni tomonlar imzolagan kundan boshlab kuchga kiradi va muddati yakunlanishi yoki bekor qilinishigacha amal qiladi.

43. Bitimga oʻzgartirishlar va qoʻshimchalar:

ikkala tomonning roziligi bilan;

davlat sherigining talabiga koʻra — shaharsozlik va yerdan foydalanish sohasidagi qonunchilik hujjatlarining tomonlarning shartnomaviy munosabatlari boʻyicha oʻzgarishi sababli;

sud qaroriga koʻra kiritilishi mumkin.

44. Bitim quyidagi holatlarda bekor qilinadi:

ikkala tomonning roziligi bilan;

xususiy sherik bankrot boʻlganida va/yoki tugatilganda;

davlat sherigining talabiga koʻra — xususiy sherik oʻz majburiyatlarini bajarmaganida;

xususiy sherikning talabiga koʻra — davlat sherigi oʻz majburiyatlarini bajarmaganda;

Ushbu bandning toʻrtinchi va beshinchi xatboshilarida koʻzda tutilgan holatlarda bitim sud tartibida bekor qilinadi.

45. Bitim amal qilish muddati yakunlanganidan keyin tugatiladi.

Bitimning amal qilish muddatining yakunlanishi tomonlarni uning buzilishi uchun javobgarlikdan ozod etmaydi.

46. Bitim rasmiylashtirilgandan keyin bir kun oʻtgach davlat sherigi tomonidan tegishli tuman (shahar) hokimiga taqdim etiladi.

Yer uchastkasini davlat sherigiga doimiy foydalanish huquqi bilan ajratib berish qonunchilikda belgilangan tartibda amalga oshiriladi.

461. Davlat sherigi unga yer uchastkasi ajratilgan kundan boshlab bir kun ichida yer uchastkasini davlat-xususiy sheriklik bitimi doirasida xususiy sherikka ijaraga berish boʻyicha bitimga qoʻshimcha kiritilishini taʼminlaydi.

6-bob. Bitim tomonlarining huquqlari va majburiyatlari

48. Xususiy sherik quyidagi huquqlarga ega:

davlat sherigi tomonidan bitim shartlari buzilsa bitimni sud tartibida bekor qilishni talab qilish;

davlat sherigidan BRL ning ochiq jadval qismi nusxasini olish.

Xususiy sherik qonunchilikda koʻzda tutilgan boshqa huquqlarga ega boʻlishi mumkin.

49. Xususiy sherik quyidagilarga majbur:

loyiha-qidiruv ishlari boshlanishidan oldin BRLni ishlab chiqish qiymatining 15 foizidan kam boʻlmagan mablagʻlarni davlat sherigining hisob raqamiga oʻtkazish;

loyiha tashkiloti tomonidan har oyda taqdim etiladigan loyiha-qidiruv ishlarini bajarish dalolatnomasiga muvofiq davlat sherigining hisob raqamiga loyiha tashkiloti tomonidan hisobot oyida bajarilgan ishlar uchun tegishli summani oʻtkazish;

bitim shartlari va Oʻzbekiston Respublikasi qonunchiligiga qatʼiy rioya qilish.

Xususiy sherik oʻziga DXSH shartlarida berilgan yer uchastkasini, ushbu yer uchastkasidagi obyekt qurilishi yakunlanib, obyekt foydalanishga topshirilmaguniga qadar, boshqa yuridik va jismoniy shaxslarga berish huquqiga ega emas.

Xususiy sherik ushbu Nizomda va qonunchilikda koʻzda tutilgan boshqa majburiyatlarga ega boʻlishi mumkin.

50. Davlat sherigi quyidagi huquqlarga ega:

xususiy sherikdan bitim shartlari bajarilishi toʻgʻrisidagi hisobotni olish;

bitim shartlari bajarilishi yuzasidan monitoringni amalga oshirish va DXSH loyihalari amalga oshirilishini baholash;

qonunchilik hujjatlari talablari va bitim shartlarining bajarilishi boʻyicha oʻtkazilgan monitoring jarayonida aniqlangan buzilishlarni bartaraf qilishni talab qilish;

xususiy sherik aybi bilan yuzaga kelgan zararlarning qoplanishini talab qilish;

xususiy sherik tomonidan bitim shartlari buzilsa bitimni sud tartibida bekor qilishni talab qilish;

DXSH loyihasini amalga oshirishni mahalliy budjet mablagʻlarini jalb qilish va qonunchilikda taqiqlanmagan boshqa manbalar hisobiga moliyalashtirishda ishtirok etish.

Davlat sherigi qonunchilikda koʻzda tutilgan boshqa huquqlarga ega boʻlishi mumkin.

51. Davlat sherigi quyidagilarga majbur:

BRL ni ishlab chiqish boʻyicha buyurtmachi funksiyalarini bajarish;

xususiy sherikdan kelib tushgan mablagʻlarni uch ish kunidan oshmagan muddat ichida tegishli BRL ni ishlab chiqayotgan loyiha tashkilotining bank hisob raqamiga oʻtkazish;

tanlovda ishtirok etish uchun ariza berilgan kundan boshlab hisoblaganda bir oy muddatdan koʻp boʻlmagan holat boʻyicha talabgorda soliq, yigʻimlar va boshqa majburiy toʻlovlar boʻyicha qarzdorlik yoʻqligi va talabgorga nisbatan qoʻllanilgan boshqa moliyaviy sanksiyalar toʻgʻrisidagi maʼlumotlarni mustaqil ravishda olish;

DSHX bajarilishi yuzasidan monitoring olib borish;

xususiy sherik tomonidan amalga oshirilayotgan xoʻjalik faoliyatiga aralashmaslik.

Davlat sherigi ushbu Nizomga va qonunchilikka muvofiq boshqa majburiyatlarga ham ega boʻlishi mumkin.

7-bob. Yakunlovchi qoidalar

52. Xususiy sherikka DXSH shartlarida taqdim etilgan yer uchastkasida obyekt qurilishini loyihalashtirish, qurish va foydalanishga topshirish qonunchilikda belgilangan tartibda amalga oshiriladi.

53. Ushbu Nizom talablari buzilishida aybdor boʻlgan shaxslar qonunchilikda belgilangan tartibda javob beradilar.

Aholi punktlari qismlarining batafsil rejalashtirish loyihalarini ishlab chiqishni moliyalashtirishda davlat-xususiy sheriklikni amalga oshirish tartibi toʻgʻrisidagi nizomga ILOVA

DXSH bitimini tuzish uchun tanlov oʻtkazish

SXEMASI