11-modda. Oʻzbekiston Respublikasi Qishloq xoʻjaligi vazirligining urugʻchilik sohasidagi vakolatlari

Oʻzbekiston Respublikasi Qishloq xoʻjaligi vazirligi:

qishloq xoʻjaligi ekinlari urugʻchiligi sohasidagi davlat dasturlarini va boshqa dasturlarni ishlab chiqishda hamda amalga oshirishda ishtirok etadi;

qishloq xoʻjaligi ekinlari urugʻliklarini, shu jumladan paxta chigitini va boshoqli don ekinlarining urugʻliklarini tayyorlash, ulardan foydalanish hamda ularni eksport qilishning zamonaviy tizimini shakllantiradi;

mahalliy va xorijiy seleksiya navlarining, shu jumladan biotexnologik navlarning birlamchi urugʻchiligini tashkil etadi hamda rivojlantiradi;

qishloq xoʻjaligi ekinlarining urugʻliklarini yetishtirish, qayta ishlash hamda saqlash boʻyicha normativ talablarni xalqaro standartlarga va texnik reglamentga muvofiq ishlab chiqadi;

urugʻchilik sohasida ilmiy va tajriba-eksperimental tadqiqotlarning ustuvor yoʻnalishlarini belgilaydi;

urugʻchilik boʻyicha xalqaro va milliy tashkilotlar bilan hamkorlik qiladi, urugʻliklarga ekishdan oldin ishlov berishga hamda ularni qayta ishlashga oid innovatsion texnologiyalarni, ushbu sohadagi nou-xaularni joriy etadi;

qishloq xoʻjaligi ekinlari urugʻliklarining navlarini sinashga doir ishlarni tashkil etadi;

Oʻzbekiston Respublikasi hududida ekish uchun tavsiya qilingan qishloq xoʻjaligi ekinlarining davlat reyestrini yuritadi;

urugʻchilik toʻgʻrisidagi qonunchilikni takomillashtirish yuzasidan takliflar ishlab chiqadi;

qishloq xoʻjaligi ekinlari urugʻliklari navlarining sinoviga doir ishlarni tashkil etadi;

paxta chigitini va boshoqli don ekinlarining urugʻliklarini olib chiqish uchun ruxsat beradi;

qishloq xoʻjaligi ekinlari urugʻliklarini yetishtirish hajmlariga doir maqsadli prognoz koʻrsatkichlarni belgilaydi;

urugʻlik ekinlarni joylashtirish uchun urugʻchilik xoʻjaliklarini aniqlaydi;

urugʻlik ekinlarni aprobatsiyadan oʻtkazishda ishtirok etadi.