Paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash tartibi toʻgʻrisidagi nizomni tasdiqlash haqida (103-son)

06.02.2019

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Paxta xomashyosini yetishtirishda tomchilatib sugʻorish texnologiyalaridan keng foydalanish uchun qulay shart-sharoitlar yaratishga oid kechiktirib boʻlmaydigan chora-tadbirlar toʻgʻrisida” 2018-yil 27-dekabrdagi PQ-4087-son qarori ijrosini taʼminlash, suv resurslaridan oqilona va samarali foydalanish, yerlarning meliorativ holatini yanada yaxshilash, qishloq xoʻjaligi ekinlari yetishtirishda, ayniqsa paxta yetishtirishda suvni tejovchi texnologiyalarni keng joriy etish orqali ularning hosildorligini yanada oshirishni davlat tomonidan qoʻllab-quvvatlash maqsadida Vazirlar Mahkamasi qaror qiladi:

1. Paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash tartibi toʻgʻrisidagi Nizom ilovaga muvofiq tasdiqlansin.

2. Oʻzbekiston fermer, dehqon xoʻjaliklari va tomorqa yer egalari kengashi “Oʻztoʻqimachiliksanoat” uyushmasi hamda Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda har yili 1-aprelga qadar kelgusi yilda paxta xomashyosi yetishtirishda tomchilatib sugʻorish texnologiyasini joriy etish boʻyicha aniq roʻyxatni shakllantirib Oʻzbekiston Respublikasi Vazirlar Mahkamasiga tasdiqlash uchun taqdim qilib borsin.

3. Oʻzbekiston Respublikasi Moliya vazirligi Oʻzbekiston Respublikasi Vazirlar Mahkamasi tomonidan tasdiqlangan paxta xomashyosi yetishtirishda tomchilatib sugʻorish texnologiyasini joriy etish parametrlariga asosan tomchilatib sugʻorish texnologiyasini joriy etish bilan bogʻliq xarajatlarni qoplash uchun zarur mablagʻlarni:

2019-yilda — hosildorligi past boʻlgan yerlarda davlat ehtiyojlari uchun paxta xomashyosi yetishtiruvchi qishloq xoʻjaligi korxonalarini moliyaviy qoʻllab-quvvatlash mablagʻlari hisobidan ajratib bersin;

kelgusi yillarda — subsidiya ajratish uchun budjet parametrlarini shakllantirishda koʻzda tutib borilishini taʼminlasin.

4. Oʻzbekiston Respublikasi Suv xoʻjaligi vazirligi, Qishloq xoʻjaligi vazirligi, Moliya vazirligi hamda boshqa manfaatdor vazirlik va idoralar bilan birgalikda 2019-yilda tomchilatib sugʻorish texnologiyasini joriy etish tajribasi yakunlarini oʻrganib chiqib zarur hollarda 2020-yil 1-aprelga qadar paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini Oʻzbekiston Respublikasi Davlat budjetidan qoplash tartibini takomillashtirish boʻyicha Oʻzbekiston Respublikasi Vazirlar Mahkamasiga taklif kiritsin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov, Oʻzbekiston Respublikasi Suv xoʻjaligi vaziri Sh.R. Xamrayev va Qishloq xoʻjaligi vaziri J.A. Xodjayev zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 6-fevral,

103-son

Vazirlar Mahkamasining 2019-yil 6-fevraldagi 103-son qaroriga ILOVA

Paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash tartibi toʻgʻrisida

NIZOM

1-bob. Umumiy qoidalar

1. Ushbu Nizom paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash tartibini belgilaydi.

2. Tomchilatib sugʻorish texnologiyasini joriy etish bilan bogʻliq xarajatlarning umumiy summasidan qatʼi nazar, paxta xomashyosi yetishtiruvchilarning tomchilatib sugʻorish tizimi joriy etilgan maydonning har bir gektari uchun Oʻzbekiston Respublikasi Davlat budjetidan bir martalik 8 mln. soʻm subsidiya ajratiladi.

Davlat budjetidan ajratiladigan subsidiya paxta xomashyosi yetishtiruvchilarning tomchilatib sugʻorish texnologiyasini joriy etish bilan bogʻliq xarajatlarini qoplashga, shu jumladan ushbu maqsadga jalb etilgan kredit boʻyicha qarzdorliklarini qoplashga yoʻnaltiriladi.

3. Oʻzbekiston fermer, dehqon xoʻjaliklari va tomorqa yer egalari kengashi “Oʻztoʻqimachiliksanoat” uyushmasi, Oʻzbekiston Respublikasi Suv xoʻjaligi vazirligi, Qishloq xoʻjaligi vazirligi hamda Qoraqalpogʻiston Respublikasi Vazirlar Kengashi va viloyatlar hokimliklari bilan birgalikda paxta xomashyosi yetishtiruvchilarning murojaatlarini oʻrganib har yili 1-aprelga qadar kelgusi yilda paxta xomashyosi yetishtirishda tomchilatib sugʻorish texnologiyasini joriy etish boʻyicha aniq roʻyxatni shakllantirib kelishilgan holda Oʻzbekiston Respublikasi Vazirlar Mahkamasiga taqdim etib boradi.

4. Oʻzbekiston Respublikasi Vazirlar Mahkamasi kalendar yilning 1-mayiga qadar kelgusi yilda tomchilatib sugʻorish texnologiyasini joriy etish parametrlarini Qoraqalpogʻiston Respublikasi va viloyatlar kesimida tasdiqlaydi hamda Oʻzbekiston Respublikasi Moliya vazirligiga, Oʻzbekiston fermer, dehqon xoʻjaliklari va tomorqa yer egalari kengashi “Oʻztoʻqimachiliksanoat” uyushmasi, Oʻzbekiston Respublikasi Suv xoʻjaligi vazirligi, Qishloq xoʻjaligi vazirligi xamda Qoraqalpogʻiston Respublikasi Vazirlar Kengashi va viloyatlar hokimliklariga ijro uchun yuboradi.

Oʻzbekiston Respublikasi Moliya vazirligi kelgusi yil budjet parametrlarini shakllantirishda Oʻzbekiston Respublikasi Vazirlar Mahkamasi tomonidan tasdiqlangan paxta xomashyosi yetishtirishda tomchilatib sugʻorish texnologiyasini joriy etish parametrlariga asosan tomchilatib sugʻorish texnologiyasini joriy etish bilan bogʻliq xarajatlarni qoplash uchun subsidiya ajratishni koʻzda tutib boradi.

5. Paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash mazkur Nizomning 1-ilovasida keltirilgan sxemaga muvofiq amalga oshiriladi.

2-bob. Tomchilatib sugʻorish texnologiyasini joriy qilish bilan bogʻliq xarajatlarini qoplash uchun Davlat budjetidan subsidiya oluvchi paxta xomashyosi yetishtiruvchilar roʻyxatini shakllantirish

6. Har bir tumanda tomchilatib sugʻorish texnologiyasini joriy qilish boʻyicha yakunlangan ishlarni foydalanishga qabul qilish uchun tuman hokimining tegishli qarori bilan quyidagi tarkibda qabul komissiyasi tuziladi:

tuman hokimining qishloq va suv xoʻjaligi masalalari boʻyicha oʻrinbosari — komissiya raisi;

tuman Qishloq xoʻjaligi boʻlimi boshligʻi — komissiya raisining oʻrinbosari;

tuman Moliya boʻlim boshligʻi;

tuman Suv xoʻjaligi boʻlimi boshligʻi;

tuman Elektr tarmoqlari boʻlimi boshligʻi;

Irrigatsiya tizimlari havza boshqarmasi qoshidagi nasos stansiyalari va energetika boshqarmasining tuman uchastkasi boshligʻi;

Irrigatsiya tizimlari havza boshqarmasi qoshidagi meliorativ ekspeditsiya tuman uchastkasi boshligʻi;

xizmat koʻrsatuvchi suv isteʼmolchilari uyushmasi rahbari;

tomchilatib sugʻorish texnologiyasini joriy etish boʻyicha pudrat tashkiloti rahbari;

tomchilatib sugʻorish texnologiyasini joriy qilgan paxta xomashyosini yetishtiruvchi tashkilot rahbari.

Zarur hollarda qabul komissiya talabiga koʻra boshqa ekspertlar jalb etilishi mumkin.

7. Tomchilatib sugʻorish texnologiyasini joriy qilish bilan bogʻliq xarajatlarni qoplashga subsidiya oluvchi paxta xomashyosi yetishtiruvchilari roʻyxatiga kirish uchun paxta xomashyosi yetishtiruvchilar Suvni tejaydigan sugʻorish texnologiyalarini joriy etishga koʻmaklashuvchi ishchi guruhning (keyingi oʻrinlarda ishchi guruh deb ataladi) ishchi organiga — Qoraqalpogʻiston Respublikasi Qishloq xoʻjaligi vazirligi yoki viloyat Qishloq xoʻjaligi boshqarmasiga (keyingi oʻrinlarda ishchi organ deb ataladi) quyidagi hujjatlarni oʻrnatilgan tartibda taqdim qiladi:

tomchilatib sugʻorish texnologiyasini joriy qilish boʻyicha loyiha va “Biznes-reja”ning nusxasi;

tomchilatib sugʻorish texnologiyasini joriy qilish boʻyicha tijorat banki bilan tuzilgan kredit shartnomasi hamda kredit ajratilganligini tasdiqlovchi hujjatlar nusxasi;

tomchilatib sugʻorish texnologiyasining butlovchi qismlarini xarid qilish va qurish boʻyicha pudrat tashkilotlari bilan tuzilgan shartnomalarning nusxasi (agar tomchilatib sugʻorish texnologiyasini paxta xomashyosi yetishtiruvchi oʻz imkoniyatlari bilan qurgan boʻlsa boshqa tegishli hujjatlar taqdim etiladi);

amalga oshirilgan xarajatlarni tasdiqlovchi hujjatlarning nusxasi;

tomchilatib sugʻorish texnologiyasini joriy etish boʻyicha yakunlangan ishlarni foydalanishga qabul qilish komissiyasining dalolatnomasi nusxasi.

8. Ishchi organ 1 kun muddatda:

paxta xomashyosi yetishtiruvchilarni mazkur Nizom 4-bandiga muvofiq shakllantiriladigan roʻyxatda bor yoki yoʻqligini aniqlaydi;

paxta xomashyosi yetishtiruvchilar mazkur Nizomning 4-bandiga muvofiq shakllantirilgan roʻyxatda bor boʻlgan taqdirda, ular tomonidan taqdim qilingan barcha hujjatlarni birma-bir koʻrib chiqib qabul qilib oladi va alohida daftarda qayd qiladi;

taqdim qilingan hujjatlar toʻplamida tegishli maʼlumotlar yetishmagan taqdirda ularni toʻliq holda taqdim qilish uchun paxta xomashyosi yetishtiruvchilarga qaytarib beradi;

tomchilatib sugʻorish texnologiyasini joriy qilish boʻyicha tegishli hujjatlar toʻplamini toʻliq taqdim etgan paxta xomashyosi yetishtiruvchilar boʻyicha ishchi guruh rahbariga axborot beradi.

9. Ishchi guruh rahbari tomchilatib sugʻorish texnologiyasini joriy qilgan paxta xomashyosi yetishtiruvchilarning murojaati asosida ishchi guruh aʼzolari tomonidan paxta xomashyosi yetishtiruvchilarning yer maydonlarida joriy etilgan tomchilatib sugʻorish texnologiyasini uch kun muddatda joyida oʻrganib chiqilishini va mazkur Nizomga 2-ilovaga muvofiq shaklda tegishli xulosa tayyorlanishini tashkil etadi va xulosani tasdiqlaydi.

10. Tomchilatib sugʻorish texnologiyasini joriy etish yakuni boʻyicha ishchi guruhning ijobiy xulosasini olgan hamda tomchilatib sugʻorish texnologiyasini joriy etish bilan bogʻliq xarajatlarini qoplash uchun subsidiya olishga daʼvogar paxta xomashyosi yetishtiruvchilar roʻyxati xar oʻn kunda ishchi organ tomonidan shakllantiriladi.

11. Ishchi organ tomonidan shakllantirilgan tomchilatib sugʻorish texnologiyasini joriy etish bilan bogʻliq xarajatlarni qoplash uchun subsidiya olishga daʼvogar paxta xomashyosi yetishtiruvchilar roʻyxati ishchi guruh rahbari tomonidan tasdiqlanadi.

Ishchi guruh rahbari tomonidan tasdiqlangan subsidiya olishga daʼvogar paxta xomashyosi yetishtiruvchilar roʻyxati ishchi organ tomonidan ikki ish kuni davomida subsidiya ajratish uchun Oʻzbekiston Respublikasi Moliya vazirligiga, Vazirlar Mahkamasi huzuridagi Tadbirkorlik faoliyatini rivojlantirishni qoʻllab-quvvatlash davlat jamgʻarmasiga hamda uning nusxasi Qoraqalpogʻiston Respublikasi Moliya vazirligi, viloyat Moliya Bosh boshqarmalariga rasmiy ravishda taqdim etiladi.

12. Ishchi guruh paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash uchun Davlat budjetidan subsidiya ajratish boʻyicha mazkur Nizomning 4-bandiga muvofiq shakllantirilgan roʻyxatga yil davomida haqiqiy holatdan kelib chiqib tegishli oʻzgartirish va qoʻshimchalar kiritish boʻyicha Oʻzbekiston Respublikasi Vazirlar Mahkamasiga taklif berishi mumkin.

3-bob. Paxta xomashyosi yetishtirishda tomchilatib sugʻorish texnologiyalarini joriy qilish bilan bogʻliq xarajatlarining bir qismini qoplash tartibi

13. Oʻzbekiston Respublikasi Moliya vazirligi ishchi guruhlar tomonidan rasmiy ravishda taqdim etilgan roʻyxat asosida paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash uchun subsidiya ajratish boʻyicha uch kun muddatda tegishli mahalliy budjetlar parametrlariga oʻzgartirishlar kiritadi.

14. Qoraqalpogʻiston Respublikasi Moliya vazirligi va viloyatlar Moliya Bosh boshqarmalari bir kun muddatda Qoraqalpogʻiston Respublikasi Qishloq xoʻjaligi vazirligi hamda viloyatlar qishloq xoʻjaligi boshqarmalarining shaxsiy gʻazna hisobvaragʻlariga tegishli budjet mablagʻlarini oʻtkazib beradi.

Bunda, moliyaviy yil yakuni boʻyicha mazkur shaxsiy gʻazna hisobvaragʻida foydalanilmay qolgan budjet mablagʻlari Oʻzbekiston Respublikasi Davlat budjetiga qaytariladi.

15. Qoraqalpogʻiston Respublikasi Qishloq xoʻjaligi vazirligi va viloyatlar qishloq xoʻjaligi boshqarmalari shaxsiy gʻazna hisobvaragʻiga kelib tushgan mablagʻlar ikki ish kuni ichida tegishliligi boʻyicha tomchilatib sugʻorish texnologiyasini joriy qilgan paxta xomashyosi yetishtiruvchilarning tijorat banklaridagi hisob raqamlariga oʻtkazib beradi.

16. Tomchilatib sugʻorish texnologiyasini joriy qilgan paxta xomashyosi yetishtiruvchilarning tijorat banklaridagi hisob raqamiga kelib tushgan subsidiya mablagʻlariga paxta xomashyosi yetishtiruvchilarning mavjud kreditor qarzlarini qoplash uchun inkasso topshiriqnomalari qoʻyilishi mumkin emas.

17. Tomchilatib sugʻorish texnologiyasini joriy qilgan paxta xomashyosi yetishtiruvchilar tomonidan tomchilatib sugʻorish texnologiyasini joriy etish boʻyicha mazkur Nizomning 4-bandiga muvofiq shakllantirilgan roʻyxatda koʻrsatilgan yer maydonidan ortiq boʻlgan qismiga qilingan xarajatlar paxta xomashyosi yetishtiruvchilarning oʻz mablagʻlari hisobidan amalga oshiriladi.

Qoʻshimcha maydonda tomchilatib sugʻorish texnologiyasini joriy qilish uchun ketgan xarajatlarni kelgusi yilda qoplash uchun Davlat budjetidan qoplash uchun paxta xomashyosi yetishtiruvchi belgilangan tartibda ishchi guruhga murojaat qilishi lozim.

4-bob. Paxta xomashyosi yetishtiruvchilariga tomchilatib sugʻorish tizimlarini koʻrish, rekonstruksiya qilish va ularning butlovchi qismlarini sotib olish uchun ajratiladigan kreditlar boʻyicha foiz xarajatlarini qisman qoplash tartibi

18. Tomchilatib sugʻorish texnologiyasini joriy qilgan paxta xomashyosi yetishtiruvchilarning tomchilatib sugʻorish texnologiyasini joriy qilish va ularning butlovchi qismlarini sotib olish uchun bir gektarga 20 mln. soʻmdan oshmaydigan qismiga ajratiladigan kreditlar boʻyicha belgilangan foiz xarajatlarini qoplash Oʻzbekiston Respublikasi Prezidentining “Paxta xomashyosini yetishtirishda tomchilatib sugʻorish texnologiyalaridan keng foydalanish uchun qulay shart-sharoitlar yaratishga oid kechiktirib boʻlmaydigan chora-tadbirlar toʻgʻrisida” 2018-yil 27-dekabrdagi PQ-4087-son qarori va Oʻzbekiston Respublikasi Vazirlar Mahkamasining 2017-yil 8-sentabrdagi 704-son qarori bilan tasdiqlangan Oʻzbekiston Respublikasi Vazirlar Mahkamasi huzuridagi Tadbirkorlik faoliyatini rivojlantirishni qoʻllab-quvvatlash davlat jamgʻarmasi toʻgʻrisidagi nizom talablari asosida amalga oshiriladi.

19. Tadbirkorlik faoliyatini rivojlantirishni qoʻllab-quvvatlash davlat jamgʻarmasi tomonidan ikki kun muddatda paxta xomashyosi yetishtiruvchining kredit majburiyatlari boʻyicha foiz xarajatlarining 10 foizli punkt miqdorini qoplash boʻyicha budjet mablagʻlari ajratish toʻgʻrisidagi talabnomalar Oʻzbekiston Respublikasi Moliya vazirligiga taqdim etiladi.

20. Oʻzbekiston Respublikasi Moliya vazirligi Tadbirkorlik faoliyatini rivojlantirishni qoʻllab-quvvatlash davlat jamgʻarmasining talabnomalarini koʻrib chiqadi va ikki kun muddatda tegishli budjet mablagʻlarini ilgari ajratilgan budjet mablagʻlaridan foydalanish holatini inobatga olgan holda ajratadi. Bunda, Oʻzbekiston Respublikasi Moliya vazirligi tomonidan qoʻshimcha asoslantiruvchi hisob-kitob maʼlumotlari (tijorat banklari tomonidan kredit resurslarining necha yilga ajratilganligi, oʻtgan moliya yilida ajratilgan mablagʻlar bilan qancha qismi qoplab berilganligi va rejalashtirilayotgan moliya yilida qolgan qismi uchun qancha mablagʻ talab qilinishi hamda olinadigan kredit resurslari boʻyicha prognoz) talab qilib olinishi mumkin.

21. Tomchilatib sugʻorish texnologiyasini joriy qilgan paxta xomashyosi yetishtiruvchilar tomchilatib sugʻorish texnologiyasini joriy qilish va ularning butlovchi qismlarini sotib olish uchun ajratiladigan kreditlar boʻyicha bir gektarga 20 mln. soʻmdan oshgan qismi (kompensatsiya qilinmaydigan qismi) alohida tijorat krediti bilan rasmiylashtiriladi.

22. Tadbirkorlik faoliyatini rivojlantirishni qoʻllab-quvvatlash davlat jamgʻarmasi tomonidan paxta xomashyosi ishlab chiqaruvchilarning tomchilatib sugʻorish texnologiyalarini joriy etish bilan bogʻliq loyihalari amalga oshirilgan yer maydonlari boʻyicha keyingi yillarda amalga oshiriladigan loyihalari kredit majburiyatlarining bir qismini qoplashga yoʻl qoʻyilmaydi.

5-bob. Yakunlovchi qoidalar

23. Paxta xomashyosi yetishtiruvchilar tomonidan tomchilatib sugʻorish texnologiyasini joriy etish boʻyicha tuzilgan shartnoma majburiyatlarini bajarish jarayonida yuzaga keladigan shartnomaviy majburiyatlar boʻyicha nizolar va kelishmovchiliklar muzokaralar oʻtkazish orqali hal qilinadi. Kelishmovchiliklarni muzokaralar oʻtkazish orqali hal qilishning iloji boʻlmaganda, ular sud tartibida hal qilinadi.

24. Paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlari hamda tegishli kredit foizlarining bir qismini qoplash boʻyicha budjetdan ajratiladigan mablagʻlardan samarali foydalanilishi yuzasidan Oʻzbekiston Respublikasi Moliya vazirligi Davlat moliyaviy nazorati bosh boshqarmasi tomonidan doimiy nazorat amalga oshiriladi.

25. Ushbu Nizom talablari buzilishida aybdor boʻlgan shaxslar qonun hujjatlariga muvofiq javob beradilar.

Paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash tartibi toʻgʻrisidagi Nizomga 1-ILOVA

Paxta xomashyosi yetishtiruvchilarning tomchilab sugʻorish texnologiyasini joriy qilish bilan bogʻliq xarajatlarni qoplash

sxemasi

Paxta xomashyosi yetishtiruvchilarning tomchilatib sugʻorish texnologiyasini joriy qilish bilan bogʻliq xarajatlarini qoplash tartibi toʻgʻrisidagi Nizomga 2-ILOVA

(2-ilova Oʻzbekiston Respublikasi Vazirlar Mahkamasining 2019-yil 12-iyuldagi 575-sonli qarori tahririda — Qonun hujjatlari maʼlumotlari milliy bazasi, 13.07.2019-y., 09/19/575/3415-son)