Xalqaro moliya institutlari mablagʻlaridan foydalanish mexanizmini takomillashtirish chora-tadbirlari toʻgʻrisida (40-son)

16.01.2019

Oʻzbekiston Respublikasi Vazirlar Mahkamasining

qarori

Soʻnggi yillarda respublikamizda chet el investitsiyalarini, shu jumladan xalqaro moliya institutlari va xorijiy hukumat moliya tashkilotlarining (keyingi oʻrinlarda XMI va XHMT deb ataladi) mablagʻlarini investitsiya loyihalari, avvalambor, aholining hayot darajasi va sifatini oshirishga qaratilgan loyihalarni amalga oshirish uchun faol jalb qilish chora-tadbirlari amalga oshirildi.

Mavjud holat yuzasidan oʻtkazilgan tahlil investitsiya loyihalarini samarali amalga oshirishga toʻsqinlik qilayotgan, investitsiya loyihalarining loyihaoldi va loyiha hujjatlarini ishlab chiqish uchun moliyalashtirish manbalarini belgilashning choʻzilishi, shuningdek, hujjatlarning dastlabki bosqichda sifat jihatidan past darajada ishlab chiqilishi bilan bogʻliq tizimli muammolar mavjudligidan dalolat beradi va bu koʻpincha loyihalarni tayyorlash choʻzilib ketishiga hamda loyihalarni XMI va XHMT, shuningdek, manfaatdor vazirlik va idoralar bilan kelishish jarayonida koʻp marotaba qayta ishlashga sabab boʻlmoqda.

XMI va XHMT mablagʻlaridan foydalanish mexanizmini yanada takomillashtirish, shuningdek, jalb qilinadigan qarz mablagʻlarini oʻzlashtirish samaradorligini oshirish maqsadida Vazirlar Mahkamasi qaror qiladi:

1. Oʻzbekiston Respublikasi Iqtisodiyot va sanoat vazirligi, Moliya vazirligi va Investitsiyalar boʻyicha davlat qoʻmitasining Oʻzbekiston Respublikasi Vazirlar Mahkamasi huzuridagi Oʻzbekiston Respublikasining rivojlanish davlat dasturlarini moliyalashtirish jamgʻarmasi (keyingi oʻrinlarda Jamgʻarma deb ataladi) mablagʻlarining bir qismini XMI hamda XHMT mablagʻlari ishtirokidagi investitsiya loyihalarining loyihaoldi va loyiha hujjatlarini ishlab chiqish ishlarini moliyalashtirishga yoʻnaltirish toʻgʻrisidagi taklifiga rozilik berilsin.

2. Belgilab qoʻyilsinki, XMI hamda XHMT mablagʻlari ishtirokidagi investitsiya loyihalarining loyihaoldi va loyiha hujjatlarini ishlab chiqish ishlari quyidagicha moliyalashtiriladi:

a) Jamgʻarma mablagʻlarini faqat tashabbuskor budjet tashkilotlarining loyihalariga jalb qilish:

bunda investitsiya loyihasini Oʻzbekiston Respublikasining XMI va XHMT bilan hamkorlik strategiyasiga (dasturiga) kiritish sharti bilan;

Oʻzbekiston Respublikasi Investitsiyalar boʻyicha davlat qoʻmitasi va Moliya vazirligi bilan belgilangan tartibda kelishilgan loyiha tashabbuskori — vazirlik va idoraning har yili tasdiqlanadigan loyiha-qidiruv ishlarining manzilli roʻyxatiga asosan;

b) Jamgʻarma mablagʻlarini quyidagi holatlarda jalb qilmagan holda:

XMI va XHMT ushbu maqsadga grant taqdim etsa (texnik koʻmaklashish);

loyihaoldi va loyiha hujjatlarini investitsiya loyihalari doirasida jalb etiladigan qarz mablagʻlar hisobidan ishlab chiqish nazarda tutilsa.

3. Oʻzbekiston Respublikasi Investitsiyalar boʻyicha davlat qoʻmitasi:

Moliya vazirligi bilan birgalikda kelgusi yillar uchun Oʻzbekiston Respublikasining rivojlanish davlat dasturlarini shakllantirishda XMI va XHMT mablagʻlari ishtirokida amalga oshirilishi rejalashtirilayotgan investitsiya loyihalarining loyihaoldi va loyiha hujjatlarini ishlab chiqish uchun budjet mablagʻlari ajratilishini nazarda tutsin;

“OʻzInjiniring” respublika loyiha instituti bilan birgalikda XMI va XHMT mablagʻlarini jalb etgan holda amalga oshiriladigan loyihalar tashabbuskorlari — vazirliklar va idoralarning investitsiya boʻlinmalari xodimlarining malakasi oshirilishini tizimli asosda taʼminlash maqsadida loyiha jarayoni boʻyicha oʻquv kurslari hamda seminarlarni muntazam tashkil qilsin va bunda investitsiya loyihalarining loyihaoldi hamda loyiha hujjatlarini ishlab chiqish borasidagi oʻquv dasturlarining mazmuni va samaradorligiga alohida eʼtibor qaratsin.

4. Oʻzbekiston Respublikasi Qurilish vazirligi manfaatdor vazirlik va idoralar bilan birgalikda, shuningdek, yetakchi mahalliy loyiha tashkilotlarini jalb qilgan holda, investitsiya loyihalari boʻyicha loyiha-qidiruv ishlarining qiymatini belgilash tartibi toʻgʻrisidagi nizomni 2019-yil 1-aprelgacha boʻlgan muddatda ishlab chiqsin hamda tasdiqlasin.

6. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Investitsiyalar boʻyicha davlat qoʻmitasi raisi S.R. Xolmuradov va Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2019-yil 16-yanvar,

40-son