Respublika ilmiy-tadqiqot muassasalari xodimlarining mehnatiga haq toʻlash razryadlariga oʻzgartirishlar kiritish toʻgʻrisida (2790-1-son)

28.12.2018

Oʻzbekiston Respublikasi Innovatsion rivojlanish vazirligi Oʻzbekiston Respublikasi bandlik va mehnat munosabatlari vazirligi Oʻzbekiston Respublikasi Moliya vazirligining

qarori

[Oʻzbekiston Respublikasi Adliya vazirligi tomonidan 2018-yil 28-dekabrda roʻyxatdan oʻtkazildi, roʻyxat raqami 2790-1]

Oʻzbekiston Respublikasi Prezidentining 2018-yil 20-iyuldagi PQ-3876-son “Fan va oliy taʼlim sohasi xodimlarining mehnat haqi miqdorini yanada oshirish, ilmiy va ilmiy-texnik faoliyat natijalari joriy etilishini davlat tomonidan qoʻllab-quvvatlash chora-tadbirlari toʻgʻrisida”gi qaroriga muvofiq Oʻzbekiston Respublikasi Innovatsion rivojlanish vazirligi, Bandlik va mehnat munosabatlari vazirligi va Moliya vazirligi qaror qiladi:

1. Oʻzbekiston Respublikasi Vazirlar Mahkamasi huzuridagi Fan va texnologiyalarni rivojlantirishni muvofiqlashtirish qoʻmitasi, Mehnat vazirligi va Moliya vazirligining 2016-yil 21-apreldagi 4, 7-qq va 25-son qarori (roʻyxat raqami 2790, 2016-yil 24-may) (Oʻzbekiston Respublikasi qonun hujjatlar toʻplami, 2016-y., 21-son, 244-modda) bilan tasdiqlangan Respublika ilmiy-tadqiqot muassasalari xodimlarining mehnatiga haq toʻlash razryadlariga ilovaga muvofiq oʻzgartirishlar kiritilsin.

2. Mazkur qaror rasmiy eʼlon qilingan kundan eʼtiboran kuchga kiradi.

Innovatsion rivojlanish vaziri I. ABDURAXMANOV

Toshkent sh.,

2018-yil 10-dekabr,

10/qq-son

Bandlik va mehnat munosabatlari vaziri Sh. KUDBIYEV

Toshkent sh.,

2018-yil 10-dekabr,

29-qq-son

Moliya vaziri D. KUChKAROV

Toshkent sh.,

2018-yil 10-dekabr,

148-son

Oʻzbekiston Respublikasi Innovatsion rivojlanish vazirligi, Bandlik va mehnat munosabatlari vazirligi va Moliya vazirligining 2018-yil 10-dekabrdagi 10/qq, 29-qq, 148-son qaroriga ILOVA

Respublika ilmiy-tadqiqot muassasalari xodimlarining mehnatiga haq toʻlash razryadlariga kiritilayotgan oʻzgartirishlar

1. Izohning birinchi xatboshisi quyidagi tahrirda bayon etilsin:

“* Oʻzbekiston Respublikasi Fanlar akademiyasi Qishloq xoʻjaligi va oziq-ovqat taʼminoti ilmiy-ishlab chiqarish markazi (QXOOTIIChM) tasarrufidagi muassasalarning shu kabi oʻxshash lavozimlardagi xodimlari mehnatiga haq toʻlash razryadi 1 razryadga yuqori belgilanadi;”.

2. Respublika ilmiy-tadqiqot muassasalari xodimlari mehnatiga haq toʻlash razryadlariga ilovada:

a) 1-band quyidagi tahrirda bayon etilsin:

“1. Respublika ilmiy-tadqiqot muassasalari xodimlari mehnatiga haq toʻlash razryadlarining (bundan buyon matnda mehnatga haq toʻlash razryadlari deb yuritiladi) amal qilishi Oʻzbekiston Respublikasi Fanlar akademiyasi tasarrufidagi muassasalar xodimlari va respublika ilmiy-tadqiqot muassasalarining ilmiy faoliyatni konstruktor-texnologik taʼminlash, ilmiy laboratoriya uskunalariga xizmat koʻrsatish vazifalari yuklatilgan muhandis-texnik xodimlari mehnatiga haq toʻlashga tatbiq etilmaydi.”;

b) 5-band quyidagi tahrirda bayon etilsin:

“5. Quyidagilar:

buxgalterlar va iqtisodchilarning mehnatiga haq toʻlash razryadlari — Oʻzbekiston Respublikasi Vazirlar Mahkamasining 2013-yil 7-fevraldagi 33-son “Ayrim budjet tashkilotlari xodimlari baʼzi toifalarining lavozim razryadlarini belgilash toʻgʻrisida”gi qaroriga muvofiq;

yuridik xizmat xodimlarining mehnatiga haq toʻlash razryadlari — Oʻzbekiston Respublikasi Vazirlar Mahkamasining 2017-yil 1-maydagi 250-son “Oʻzbekiston Respublikasi Prezidentining “Yuridik xizmat faoliyatini tubdan takomillashtirish chora-tadbirlari toʻgʻrisida” 2017-yil 19-yanvardagi PQ-2733-son qarorini amalga oshirish chora-tadbirlari haqida”gi qaroriga muvofiq belgilanadi.”;

v) 8-banddagi “OʻzQXIIChM muassasalari uchun” degan soʻzlar “QXOOTIIChM muassasalari uchun” degan soʻzlar bilan almashtirilsin.

3. Mazkur oʻzgartirishlar Oʻzbekiston Respublikasi Oliy va oʻrta maxsus taʼlim vazirligi, Xalq taʼlimi vazirligi, Sogʻliqni saqlash vazirligi, Qishloq xoʻjaligi vazirligi va Suv xoʻjaligi vazirligi bilan kelishilgan.

Oliy va oʻrta maxsus taʼlim vaziri I. MADJIDOV

2018-yil 10-dekabr,

Xalq taʼlimi vaziri Sh. ShERMATOV

2018-yil 10-dekabr,

Sogʻliqni saqlash vaziri A. ShADMANOV

2018-yil 10-dekabr,

Qishloq xoʻjaligi vaziri B. YUSUPOV

2018-yil 10-dekabr,

Suv xoʻjaligi vaziri Sh. HAMRAYEV

2018-yil 10-dekabr,