Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi faoliyatini tashkil etish toʻgʻrisida (1009-son)

13.12.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Davlat-xususiy sheriklikni rivojlantirishning huquqiy va institutsional bazasini yaratish boʻyicha birinchi navbatdagi chora-tadbirlar toʻgʻrisida” 2018-yil 20-oktabrdagi PQ-3980-son qarori ijrosini hamda Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi faoliyatini samarali tashkil etishni taʼminlash maqsadida Vazirlar Mahkamasi qaror qiladi:

1. Quyidagilar:

Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligining boshqaruv xodimlarining cheklangan soni 30 nafardan iborat tuzilmasi 1-ilovaga muvofiq;

Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi (keyingi oʻrinlarda — Agentlik) toʻgʻrisidagi nizom 2-ilovaga muvofiq;

Davlat-xususiy sheriklik toʻgʻrisidagi bitim muvaffaqiyatli rasmiylashtirilganligi uchun tender gʻolibi yoki toʻgʻridan-toʻgʻri muzokara ishtirokchilaridan undiriladigan bir martalik toʻlov miqdorlari 3-ilovaga muvofiq tasdiqlansin.

2. Agentlik Oʻzbekiston Respublikasi Moliya vazirligi hamda Axborot texnologiyalari va kommunikatsiyalarini rivojlantirish vazirligi bilan birgalikda davlat, rus tili va boshqa chet tillarida batafsil maʼlumot olish imkoniyatini beradigan Oʻzbekiston Respublikasi davlat-xususiy sheriklikning yagona axborot portalini uch oy muddatda ishlab chiqsin hamda ishga tushirsin, barcha manfaatdor yuridik va jismoniy shaxslarning davlat-xususiy sheriklik sohasida oʻtkaziladigan tanlovlar, amalga oshiriladigan loyihalar, koʻrsatiladigan xizmatlar xaqida portalda joylashtiriladigan axborotdan erkin foydalanishini taʼminlasin.

3. Oʻzbekiston Respublikasi Moliya vazirligi Agentlikka uchta, jumladan, ikkita shaxsiy biriktirilgan va bitta navbatchi avtotransport vositasini saqlash uchun limit ajratsin.

4. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 13-dekabr,

1009-son

Vazirlar Mahkamasining 2018-yil 13-dekabrdagi 1009-son qaroriga 1-ILOVA

Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligining

TUZILMASI

Boshqaruv xodimlarining cheklangan soni — 30 nafar. (direktor maslahatchisidan tashqari), yordamchi xodimlar soni belgilangan normativlarga muvofiq belgilanadi.

Vazirlar Mahkamasining 2018-yil 13-dekabrdagi 1009-son qaroriga 2-ILOVA

Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi toʻgʻrisida

NIZOM

1-bob. Umumiy qoidalar

1. Ushbu Nizom Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligining (keyingi oʻrinlarda Agentlik deb ataladi) asosiy vazifalari, funksiyalari, huquqlari, masʼuliyatini va faoliyatini tashkil qilish tartibini belgilaydi.

2. Agentlik Oʻzbekiston Respublikasida davlat-xususiy sheriklik sohasida yagona davlat siyosatini yuritish boʻyicha vakolatli organ hisoblanadi.

3. Agentlik oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, shuningdek, ushbu Nizomga hamda boshqa qonun hujjatlariga amal qiladi.

4. Agentlik oʻz faoliyatida Oʻzbekiston Respublikasi Moliya vazirligi va Vazirlar Mahkamasiga boʻysunadi.

5. Agentlikning oʻz vakolatlari doirasida davlat-xususiy sheriklik masalalari boʻyicha qabul qilgan qarorlari davlat va xoʻjalik boshqaruvi organlari, mahalliy davlat hokimiyati organlari, shuningdek, yuridik va jismoniy shaxslar tomonidan bajarilishi majburiy hisoblanadi.

6. Agentlik yuridik shaxs hisoblanadi, mustaqil balansga, Oʻzbekiston Respublikasi Moliya vazirligining Gʻaznachiligida gʻazna hisob raqamlariga va bank hisob raqamlariga, Oʻzbekiston Respublikasi Davlat gerbi tasviri tushirilgan, oʻz nomi davlat tilida yozilgan muhrga, shuningdek, Oʻzbekiston Respublikasi Davlat gerbi tasviri tushirilgan va Agentlik nomi yozilgan blankalarga ega boʻladi.

7. Agentlikning rasmiy nomi:

a) davlat tilida:

toʻliq — Oʻzbekiston Respublikasi Moliya vazirligi huzuridagi Davlat-xususiy sheriklikni rivojlantirish agentligi;

qisqartirilgani — DXSH agentligi;

b) ingliz tilida:

toʻliq — Public-private partnership development agency under Ministry of finance of the Republic of Uzbekistan;

qisqartirilgani — PPP development agency;

v) rus tilida:

toʻliq — Agentstvo po razvitiyu gosudarstvenno-chastnogo partnerstva pri Ministerstve finansov Respubliki Uzbekistan;

qisqartirilgani — Agentstvo GCHP.

2-bob. Agentlikning asosiy vazifalari va funksiyalari

8. Quyidagilar Agentlikning asosiy vazifalari hisoblanadi:

iqtisodiyot va ijtimoiy sohaning ustuvor yoʻnalishlarida davlat-xususiy sheriklikni rivojlantirish boʻyicha tarmoq dasturlarini ishlab chiqishda ishtirok etish;

davlat-xususiy sheriklik loyihalarining samaradorligi va afzalliklarini baholash uslubini ishlab chiqish, ushbu loyihalarni tayyorlash va amalga oshirishni uslubiy jihatdan qoʻllab-quvvatlash;

davlat-xususiy sheriklik sohasidagi loyihalarni amalga oshirishda idoralararo muvofiqlashtirishni taʼminlash, shuningdek, loyihalar toʻgʻrisidagi axborotni ochiq holda joylashtirish va ularning reyestrini yuritish;

davlat-xususiy sheriklikni rivojlantirish dasturlarini amalga oshirish, shu jumladan muayyan loyihalar konsepsiyalarini ishlab chiqishda vazirliklar, idoralar, xoʻjalik birlashmalari va mahalliy davlat hokimiyati organlariga koʻmaklashish;

davlat-xususiy sheriklikni rivojlantirish masalalarida investorlar, xalqaro moliya va donor tashkilotlari, ilmiy va ekspert hamjamiyatlari, shuningdek, bozorning boshqa ishtirokchilari bilan hamkorlikni tashkil etish;

davlat-xususiy sheriklik loyihalari ishtirokchilarining huquqlari va qonuniy manfaatlarini himoya qilishga har tomonlama koʻmaklashish, loyihalarni moliyalashtirish mexanizmlari, shu jumladan yuzaga kelishi mumkin boʻlgan tavakkalchiliklarni aniqlash va taqsimlash yuzasidan ularning takliflarini koʻrib chiqish;

davlat-xususiy sheriklik loyihalarini, shu jumladan, loyihalarga jalb qilingan budjet tizimi mablagʻlaridan foydalanilishini, shuningdek, tegishli tarmoqlardagi xalqaro tajribani inobatga olgan holda loyihalarni tayyorlash va amalga oshirish amaliyotini monitoring qilish.

9. Agentlik oʻziga yuklangan asosiy vazifalarga muvofiq quyidagi funksiyalarni bajaradi:

a) iqtisodiyot va ijtimoiy sohaning ustuvor yoʻnalishlarida davlat-xususiy sheriklikni rivojlantirish boʻyicha tarmoq dasturlarini ishlab chiqishda ishtirok etish sohasida:

davlat-xususiy sheriklikni rivojlantirish dasturlarini va loyihalar konsepsiyalarini ishlab chiqishda vazirliklar, idoralar va xoʻjalik birlashmalariga koʻmaklashadi;

davlat-xususiy sheriklikni rivojlantirish boʻyicha strategik vazifalarni aniq bilish va amaliy yechimlarni ishlab chiqish asosida iqtisodiyot hamda ijtimoiy sohaning ustuvor yoʻnalishlarida davlat-xususiy sheriklikni kompleks rivojlantirish dasturlarini ishlab chiqish, shakllantirish va kelishishda ishtirok etadi;

davlat-xususiy sheriklik sohasidagi loyihalarni tayyorlash va amalga oshirish uchun maslahatchilarni jalb qilishda, shuningdek, ushbu maqsadlar uchun moliyaviy resurslarni topishda davlat sheriklariga koʻmaklashadi;

davlat-xususiy sheriklik mexanizmlarini joriy qilish uchun istiqbolli tarmoqlarni va ustuvor yoʻnalishlarni tizimli tahlil qiladi hamda natijalari boʻyicha davlat-xususiy sheriklikni yanada rivojlantirish yuzasidan Oʻzbekiston Respublikasi Vazirlar Mahkamasiga taklif kiritadi;

davlat-xususiy sheriklik loyihalarini ishlab chiqadi, shuningdek, vazirliklar, idoralar va xoʻjalik birlashmalari tomonidan ishlab chiqiladigan davlat-xususiy sheriklik loyihalarini kelishadi;

b) davlat-xususiy sheriklik loyihalarining samaradorligi va afzalliklarini baholash uslubini ishlab chiqish, ushbu loyihalarni tayyorlash va amalga oshirishni uslubiy jihatdan qoʻllab-quvvatlash sohasida:

davlat-xususiy sheriklikni joriy qilish va amalga oshirish mexanizmlari boʻyicha uslubiy asoslar, nortmativ-huquqiy hujjatlar loyihalarini va tavsiyalarni, davlat-xususiy sheriklik sohasida hamkorlik shakllarini ishlab chiqadi;

davlat-xususiy sheriklik loyihalarini tayyorlash va amalga oshirish jarayonlarini uslubiy jihatdan qoʻllab-quvvatlashni taʼminlaydi;

davlat-xususiy sheriklik sohasidagi normativ-huquqiy hujjatlarni takomillashtirish va birxillashtirish boʻyicha takliflar ishlab chiqadi;

davlat-xususiy sheriklik toʻgʻrisidagi normativ-huquqiy hujjatlar loyihalari, tanlov hujjatlari, shuningdek, bitimlar loyihalarini tahlil qiladi va kelishadi;

davlat-xususiy sheriklik sohasidagi shartnomalar, hamkorlik qilish shakllari hamda shartlarini ishlab chiqish va tayyorlashga koʻmaklashadi;

ustuvor sohalar va tarmoqlarda davlat-xususiy sheriklik loyihalarining namunaviy shartnomalari, bitimlari va namunaviy tanlov hujjatlarini ishlab chiqadi;

v) davlat-xususiy sheriklik sohasidagi loyihalarni amalga oshirishda idoralararo muvofiqlashtirishni taʼminlash, shuningdek, loyihalar toʻgʻrisidagi axborotni ochiq holda joylashtirish va ularning reyestrini yuritish sohasida:

davlat-xususiy sheriklik asosida loyihalarning amalga oshirilishi toʻgʻrisidagi maʼlumotlarni toʻplaydi, tahlil qiladi va umumlashtiradi;

davlat-xususiy sheriklik masalalari boʻyicha Oʻzbekiston Respublikasi Vazirlar Mahkamasi, davlat sheriklari va xususiy sektor, xalqaro moliya institutlari, donor tashkilotlar va boshqa manfaatdor tomonlar oʻrtasidagi hamkorlikni muvofiqlashtiradi va qoʻllab quvvatlaydi;

davlat-xususiy sheriklik sohasidagi amalga oshiriladigan, shuningdek, ustuvor va istiqbolli loyihalarning muntazam yangilanadigan maʼlumotlar bazasi hamda reyestri tashkil etilishini va yuritilishini taʼminlaydi;

davlat-xususiy sheriklik va respublikaning ushbu sohadagi salohiyati toʻgʻrisidagi maʼlumotlarni tezkor olish imkonini beradigan dasturiy mahsulotlar hamda axborot tizimlarini yaratadi va joriy qiladi;

davlat-xususiy sheriklik sohasidagi loyihalarni amalga oshirishda texnik hamda boshqa tomondan koʻmaklashishni tashkil qiladi;

davlat-xususiy sheriklik sohasiga jalb etilgan davlat sheriklari va boshqa masʼul davlat organlarining maʼlumotlar bazalari bilan elektron hamkorlikni yoʻlga qoʻyadi;

davlat-xususiy sheriklik sohasida amalga oshirilayotgan, ustuvor va istiqbolli loyihalar haqidagi maʼlumotlarning ochiq holda joylashtirilishini taʼminlaydi;

g) davlat-xususiy sheriklikni rivojlantirish dasturlarini amalga oshirish, shu jumladan muayyan loyihalar konsepsiyalarini ishlab chiqishda vazirlik va idoralarga koʻmaklashish sohasida:

davlat-xususiy sheriklik sohasidagi loyihalar uchun hujjatlar paketini tayyorlash, xususiy sheriklar bilan muzokaralar oʻtkazish va bitimlar tuzishda davlat sheriklariga koʻmaklashadi;

davlat-xususiy sheriklik sohasidagi loyihalarni tayyorlash va amalga oshirish uchun maslahatchilarni jalb qilishda davlat sheriklariga koʻmaklashadi;

davlat-xususiy sheriklik sohasidagi loyihalarni amalga oshiradigan davlat sheriklariga ruxsat beruvchi hujjatlarni olish, moliyalashtirish va davlat-xususiy sheriklik sohasidagi loyihalarni amalga oshirishda yuzaga keladigan boshqa masalalarni hal etishda koʻmaklashadi;

kadrlarni tizimli tayyorlash, qayta tayyorlash va ularning malakasini oshirishni, rahbarlar va mutaxassislarning, jumladan, idoraviy mansub tuzilmalarda faoliyat shakllari va uslublarini takomillashtirish, yuklangan vazifalarning oʻz vaqtida hamda sifatli bajarilishi uchun ularning masʼuliyatini oshirishni tashkil etadi;

d) davlat-xususiy sheriklikni rivojlantirish masalalarida investorlar, xalqaro moliya va donor tashkilotlari, ilmiy va ekspert hamjamiyatlari, shuningdek, bozorning boshqa ishtirokchilari bilan hamkorlikni tashkil etish sohasida;

seminarlar, sessiyalar, taqdimotlar, davra suhbatlarini tashkil qiladi hamda ularda ishtirok etadi, shuningdek, davlat-xususiy sheriklik masalalarida davlat sheriklari mutaxassislarining malakasini, jumladan, xorijda oshirishni tashkil etishga koʻmaklashadi;

davlat-xususiy sheriklik loyihalarida ishtirok etish uchun mahalliy va xorijiy investorlarni jalb qilish maqsadida reklama-axborot hamda tushuntirish ishlarini amalga oshiradi;

jamoatchilik, davlat organlari, xususiy sektor va xalqaro moliya institutlarini Oʻzbekiston Respublikasida davlat-xususiy sheriklik qanday rivojlantirilayotgani haqida keng xabardor qilishni taʼminlaydi;

xalqaro moliya institutlari, xorijiy hukumat moliya tashkilotlari, xorijiy banklar, jamgʻarmalar, agentliklar, kompaniyalar va boshqa tashkilotlar bilan birgalikda ularni davlat-xususiy sheriklik sohasida respublika uchun strategik ahamiyatga ega loyihalarni amalga oshirishga jalb qilish boʻyicha takliflar, istiqbolli hamda joriy dasturlarni oʻrganadi, umumlashtiradi va tayyorlaydi;

xorijdagi innovatsion va yuqori texnologiyali loyihalarni tahlil qiladi va tahlil asosida davlat-xususiy sheriklik sohasida Oʻzbekiston Respublikasi sharoitida yangi, istiqbolli loyihalarni shakllantirishga doir takliflar kiritadi;

xalqaro iqtisodiy tashkilotlar ishlarida, davlat-xususiy sheriklikni rivojlantirish muammolariga bagʻishlangan xalqaro tadbirlarda ishtirok etadi;

e) davlat-xususiy sheriklik loyihalari ishtirokchilarining huquqlari va qonuniy manfaatlarini himoya qilishga har tomonlama koʻmaklashish, loyihalarni moliyalashtirish mexanizmlari, shu jumladan yuzaga kelishi mumkin boʻlgan tavakkalchiliklarni aniqlash va taqsimlash yuzasidan ularning takliflarini koʻrib chiqish sohasida:

davlat-xususiy sheriklik loyihalarini amalga oshirishda yuzaga keladigan masalalar boʻyicha tushuntirishlar va sharhlar taqdim etadi;

davlat-xususiy sheriklik sohasidagi loyihalarning salohiyatli ishtirokchilarining takliflari, shu jumladan loyhalarni moliyalashtirish mexanizmlari boʻyicha takliflarini koʻrib chiqadi;

davlat-xususiy sheriklik sohasidagi loyihalarni amalga oshirishda yuzaga kelishi mumkin boʻlgan tavakkalchiliklarni aniqlash maqsadida doimiy asosda tahlil oʻtkazadi va natijalari boʻyicha ularni bartaraf etish yuzasidan takliflar kiritadi;

davlat-xususiy sheriklik loyihalari ishtirokchilarining huquqlari va qonuniy manfaatlari himoya qilinishiga har tomonlama koʻmaklashadi;

jismoniy va yuridik shaxslarning Agentlik vakolatiga kiradigan boshqa masalalar yuzasidan murojaatlarini koʻrib chiqadi;

oʻz vakolati doirasida Agentlik vakolatiga kiradigan masalalar boʻyicha qonun hujjatlari buzilishini bartaraf etishga doir zarur harakatlarni amalga oshiradi;

byurokratizm, Agentlik vakolatiga kiradigan masalalarni hal etish muddatlarini choʻzish holatlarini aniqlaydi va bartaraf etadi;

j) davlat-xususiy sheriklik loyihalarini, shu jumladan loyihalarga jalb qilingan budjet tizimi mablagʻlaridan foydalanilishini, shuningdek, tegishli tarmoqlardagi xalqaro tajribani inobatga olgan holda loyihalarni tayyorlash va amalga oshirish amaliyotini monitoring qilish sohasida:

davlat-xususiy sheriklik loyihalarini amalga oshirish va ular doirasida mablagʻlar oʻzlashtirilishini, shuningdek, davlat-xususiy sheriklik sohasidagi dasturlarga kiritish taklif etilayotgan loyihalarni muntazam monitoring qilib boradi;

tegishli tarmoqlarda ilgʻor xalqaro tajribani inobatga olingan holda, davlat-xususiy sheriklik loyihalarini shakllantirish va amalga oshirishga doir takliflarni ishlab chiqish uchun vazirliklar, idoralar va xoʻjalik birlashmalari mutaxassislari, shuningdek, mahalliy va xorijiy mutaxassislarni jalb qiladi;

davlat-xususiy sheriklikni rivojlantirish bilan bogʻliq jarayonlarni tahlil qiladi, bunday sheriklikni tashkil etishning xususiy sektor uchun oshkoralik va jozibadorlikni taʼminlaydigan yangi shakllari hamda uslublarini joriy etish, shu jumladan davlat-xususiy sheriklik sohasidagi munosabatlarni tartibga soladigan normalarni takomillashtirishga oid takliflar tayyorlaydi;

davlat-xususiy sheriklik loyihalarini amalga oshirish doirasida budjet mablagʻlari va davlat maqsadli jamgʻarmalari mablagʻlaridan maqsadli, oqilona hamda samarali foydalanish monitoringini olib boradi;

qisqa va oʻrta muddatli istiqbolda budjetdan mablagʻ ajratish uchun davlat-xususiy sheriklik sohasidagi ustuvor loyihalarning prognoz parametrlari haqida Oʻzbekiston Respublikasi Moliya vazirligiga axborot kiritadi;

3-bob. Agentlikning huquqlari va javobgarligi

10. Agentlik oʻziga yuklangan vazifa va funksiyalarni bajarish uchun quyidagi huquqlarga ega:

davlat-xususiy sheriklik loyihalarining tashabbuskorlari va ishtirokchilaridan davlat-xususiy sheriklik loyihalarining amalga oshirilishi, texnik-iqtisodiy hamda moliyaviy koʻrsatkichlarning bajarilish holati haqida axborot soʻrash hamda olish;

vazirliklar, idoralar, xoʻjalik birlashmalari, mahalliy davlat hokimiyati organlari va boshqa tashkilotlardan Agentlik vakolatiga kiradigan masalalar yuzasidan hujjatlar, statistika maʼlumotlari, tahliliy materiallar, xulosalar hamda boshqa axborotni soʻrash hamda olish;

davlat-xususiy sheriklik loyihalarining davlat sheriklari va ishtirokchilaridan davlat-xususiy sheriklik loyihalari doirasida budjet mablagʻlari va davlat maqsadli jamgʻarmalarining mablagʻlaridan maqsadli foydalanish haqidagi axborotni belgilangan tartibda olish, Agentlik vakolatiga kiradigan masalalar boʻyicha tekshiruvlar oʻtkazish;

Vazirlar Mahkamasi, vazirliklar, idoralar, xoʻjalik birlashmalari, mahalliy davlat hokimiyati organlariga Agentlik vakolatiga kiradigan masalalar boʻyicha takliflarni koʻrib chiqish uchun kiritish;

Agentlik mutaxassislari va maslahatchilarini xorijiy davlatlarga belgilangan tartibda yuborish;

davlat-xususiy sheriklik sohasidagi mahalliy va xorijiy mutaxassislarni shartnoma asosida Agentlikda ishlash uchun belgilangan tartibda jalb qilish;

konsalting va auditorlik kompaniyalar bilan hamkorlik qilish, muzokaralar oʻtkazish, ishlarni bajarish va xizmatlar koʻrsatish uchun shartnomalar tuzish;

davlat-xususiy sheriklikni rivojlantirish uchun investitsiyalar jalb qilish masadida xalqaro moliya institutlari, donor mamlakatlar, kompaniyalar va banklar bilan hamkorlik oʻrnatish;

davlat-xususiy sheriklik sohasida mutaxassislarni tayyorlash va ularning malakasini oshirish boʻyicha oʻquv markazlari tashkil qilish.

Agentlik qonun hujjatlariga muvofiq boshqa huquqlarga ham ega boʻlishi mumkin.

11. Agentlik:

davlat-xususiy sheriklik sohasidagi yagona davlat siyosatining sifatli va toʻliq amalga oshirilishini taʼminlash;

normativ-huquqiy hujjatlar loyihalarini ishlab chiqish, davlat-xususiy sheriklik loyihalari tayyorlanishi va amalga oshirilishini uslubiy jihatdan qoʻllab-quvvatlash;

Agentlikka yuklangan vazifalar va funksiyalarning samarali bajarilishi uchun masʼul.

4-bob. Agentlik faoliyatini tashkil etish

12. Agentlikka Oʻzbekiston Respublikasi Prezidenti tomonidan lavozimga tasdiqlanadigan va lavozimdan ozod etiladigan direktor — Oʻzbekiston Respublikasi Moliya vazirining oʻrinbosari rahbarlik qiladi.

Direktorning Oʻzbekiston Respublikasi Moliya vaziri tomonidan lavozimga tayinlanadigan va lavozimdan ozod etiladigan birinchi oʻrinbosari va oʻrinbosari boʻladi.

13. Direktor Agentlik ishlarini tashkil etishni va faoliyatiga umumiy rahbarlikni taʼminlaydi, shuningdek, uning faoliyati sifati va yakuniy natijasi uchun masʼul hisoblanadi;

14. Agentlik davlat-xususiy sheriklik masalalarida oʻzining vazifa va funksiyalarini amalga oshirish doirasida vazirliklar, idoralar, xoʻjalik birlashmalari va mahalliy davlat hokimiyati organlari hamda boshqa tashkilotlar bilan oʻzaro hamkorlik qiladi.

15. Agentlik xodimlariga Oʻzbekiston Respublikasi Moliya vazirligi xodimlari uchun belgilangan mehnatga haq toʻlash shartlari joriy etiladi.

5-bob. Agentlik rahbariyatining asosiy funksional majburiyatlari

16. Quyidagilar Agentlik direktorining asosiy funksional majburiyatlari hisoblanadi:

Oʻzbekiston Respublikasining Konstitutsiyasi va qonunlari, shuningdek, boshqa normativ-huquqiy hujjatlari talablariga rioya etish;

Agentlik faoliyatiga umumiy rahbarlik qilish, Oʻzbekiston Respublikasi Prezidentining hujjatlari, Vazirlar Mahkamasining qarorlari va boshqa qonun hujjatlarida Agentlikka yuklangan vazifa va funksiyalarning bajarilishini tashkil etish;

Agentlik faoliyatini yanada takomillashtirish boʻyicha Oʻzbekiston Respublikasi Prezidentining hujjatlari va Oʻzbekiston Respublikasi Vazirlar Mahkamasining qarorlari bilan tasdiqlangan kompleks dasturlar va tadbirlarning bajarilishini chuqur va tanqidiy tahlil qilish;

Oʻzbekiston Respublikasi Prezidentining, Oʻzbekiston Respublikasi Bosh vazirining va uning oʻrinbosarlarining topshiriqlarini bajarish;

Agentlik faoliyatining ayrim uchastkalariga rahbarlik qilish yuzasidan Agentlik mansabdor shaxslarining vakolatlarini aniqlash va ularning shaxsiy javobgarlik darajasini belgilash;

Agentlik faoliyati rejalashtirilishini tashkil etish, Agentlik va mansabdor shaxslarining har choraklik ish rejalarini tasdiqlash, ularning bajarilishi yuzasidan nazoratni taʼminlash;

Oʻzbekiston Respublikasi Prezidenti va Vazirlar Mahkamasining hujjatlari va topshiriqlarini bajarishni tashkil etishning amaliy tizimini yaratish va monitoringini yuritish, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va “Davlat organlari va tashkilotlarida ijro intizomini yanada mustahkamlash chora-tadbirlari toʻgʻrisida” 2018-yil 5-oktabrdagi PQ-3962-son qaroriga hamda Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq Agentlik faoliyatida ijro intizomini mustahkamlash boʻyicha kompleks amaliy chora-tadbirlarni bajarish;

“Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlariga muvofiq Agentlikning qonun loyihalari boʻyicha faoliyatini tashkil etish;

“Normativ-huquqiy hujjatlar toʻgʻrisida”, “Qonunlar loyihalarini tayyorlash va ularni Oʻzbekiston Respublikasi Oliy Majlisi Qonunchilik palatasiga kiritish tartibi toʻgʻrisida”gi Oʻzbekiston Respublikasi qonunlari, Oʻzbekiston Respublikasi Prezidentining 2018-yil 26-avgustdagi PF-5519-son Farmoni bilan tasdiqlangan Oʻzbekiston Respublikasi Prezidenti Adminstratsiyasining Reglamenti (keyingi oʻrinlarda Oʻzbekiston Respublikasi Prezidenti Adminstratsiyasi Reglamenti deb ataladi) hamda Vazirlar Mahkamasining 2005-yil 14-fevraldagi 62-son qarori bilan tasdiqlangan Oʻzbekiston Respublikasi Vazirlar Mahkamasining Reglamenti (keyingi oʻrinlarda Vazirlar Mahkamasining Reglamenti deb ataladi) talablariga qatʼiy muvofiq ravishda faoliyat koʻrsatish masalalari boʻyicha normativ-huquqiy hujjatlar loyihalarining sifatli ishlab chiqilishini tashkil etish va ularning Vazirlar Mahkamasiga oʻz vaqtida kiritilishini taʼminlash;

Agentlikka taqdim etilgan takliflarning va normativ-huquqiy hujjatlar loyihalarining toʻliq va har tomonlama koʻrib chiqilishini taʼminlash, ularning moliyaviy, iqtisodiy, huquqiy va boshqa xil ekspertizadan puxta oʻtkazilishini, shuningdek, Oʻzbekiston Respublikasi Prezidenti Adminstratsiyasining Reglamentida va Vazirlar Mahkamasi Reglamentida belgilangan muddatlarda kelishilishini (vizalanishini) taʼminlash;

Agentlik xodimlarini lavozimga tayinlash va lavozimdan ozod etish;

Agentlikka kadrlarni tanlash va joy-joyiga qoʻyish, ularning samarali faoliyati uchun zarur shart-sharoitlar yaratish, Agentlik kadrlar zaxirasini shakllantirish;

Agentlik xodimlarini tayyorlash, qayta tayyorlash va ularning malakasini oshirish tizimini tashkil etish;

Agentlik faoliyatiga ishlarni tashkil etishning zamonaviy shakllari joriy etilishini taʼminlash;

davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish;

Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Mansabdor shaxslarning xorij mamlakatlariga xizmat safarlari samarasi uchun shaxsiy masʼuliyatlarini yanada oshirish va xorijiy delegatsiyalarning Oʻzbekiston Respublikasiga tashriflarini tashkil etish choralari toʻgʻrisida” 2017-yil 3-avgustdagi PQ-3170-son qarorlariga toʻliq muvofiq holda Agentlik rahbarlari va xodimlarining xizmat safarlarini tashkil etish, xizmat safarlarining asoslanganligi, samaradorligi va natijadorligini, xizmat safarlari xarajatlariga ajratilgan mablagʻlardan maqsadli va oqilona foydalanilishini taʼminlash;

Agentlik xodimlari tomonidan Agentlik xodimlarining odob-axloq qoidalari talablariga rioya etilishini taʼminlash;

“Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Agentlik tizimida korrupsiya va boshqa huquqbuzarliklarning oldini olish chora-tadbirlarini koʻrish, shuningdek, huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashadigan sabablar va sharoitlarni aniqlash, tahlil qilish hamda bartaraf etish;

jismoniy va yuridik shaxslarning Agentlik vakolatiga kiradigan masalalar boʻyicha murojaatlari toʻgʻrisidagi qonun hujjatlari ijrosini taʼminlash, elektron hujjat aylanish tizimini keng joriy qilish va undan samarali foydalanish, yuridik va jismoniy shaxslardan tushadigan murojaatlarning maʼlumotlar bazasini shakllantirish ishlarining nazoratini hamda muvofiqlashtirilishini tashkil qilish;

Agentlik faoliyatiga taalluqli shartnomalarni va Oʻzbekiston Respublikasining vakili sifatida Agentlik vakolatiga kiradigan masalalar boʻyicha xalqaro xususiyatga ega shartnomalarni belgilangan tartibda tuzish hamda imzolash;

Agentlik xodimlari bajarishi majburiy boʻlgan buyruqlar qabul qilish va koʻrsatmalar berish;

Agentlik xodimlarini koʻkrak nishonlari va faxriy yorliqlar bilan mukofotlash toʻgʻrisidagi masalalarni belgilangan tartibda hal etish, Agentlikning alohida namuna koʻrsatgan xodimlarini Oʻzbekiston Respublikasi faxriy unvonlari va davlat mukofotlari bilan taqdirlashga tavsiya etish;

Agentlik xodimlarini ragʻbatlantirish va intizomiy javobgarlikka tortish masalalarini hal etish, shu jumladan ularning bundan buyon egallab turgan lavozimida qolishining maqsadga muvofiqligi, ularning shaxsiy javobgarligini oshirish boʻyicha tizimli masalalarni koʻrib chiqish;

Agentlik mol-mulkini qonun hujjatlarida belgilangan tartibda tasarruf etish.

17. Quyidagilar Agentlik direktori oʻrinbosarlarining va tarkibiy boʻlinmalari rahbarlarining asosiy funksional majburiyatlari hisoblanadi:

Oʻzbekiston Respublikasi Konstitutsiyasi va qonunlari, shuningdek, boshqa normativ-huquqiy hujjatlar talablariga Agentlik tarkibiy boʻlinmalari xodimlari tomonidan rioya etilishini taʼminlash;

tarkibiy boʻlinmalar faoliyatiga bevosita rahbarlik qilish, ushbu boʻlinmalarga yuklangan vazifalar va funksiyalarning bajarilishini tashkil etish;

Oʻzbekiston Respublikasi Prezidenti va Oʻzbekiston Respublikasi Vazirlar Mahkamasining hujjatlari va topshiriqlarini bajarishni taʼminlash, Oʻzbekiston Respublikasi Prezidentining “Oʻzbekiston Respublikasi Prezidentining hujjatlari va topshiriqlari samarali va natijali ijro etilishi, shuningdek, ijro intizomi mustahkamlanishi uchun Oʻzbekiston Respublikasi Prezidenti Davlat maslahatchilarining, Vazirlar Mahkamasi va uning komplekslari, davlat va xoʻjalik boshqaruvi organlari, shuningdek, barcha darajalardagi hokimliklar rahbarlarining shaxsiy javobgarligi toʻgʻrisida” 2017-yil 11-apreldagi PQ-2881-son qaroriga va “Davlat organlari va tashkilotlarida ijro intizomini yanada mustahkamlash chora-tadbirlari toʻgʻrisida” 2018-yil 5-oktabrdagi PQ-3962-son qaroriga hamda Vazirlar Mahkamasining “Ijro intizomini mustahkamlash chora-tadbirlari toʻgʻrisida” 1999-yil 12-yanvardagi 12-son qaroriga muvofiq ijro intizomini mustahkamlash boʻyicha kompleks amaliy chora-tadbirlarni amalga oshirish, topshiriqlarning oʻz vaqtida va sifatli bajarilishi uchun tarkibiy boʻlinmalar xodimlarining shaxsiy javobgarligini oshirish choralarini koʻrish;

Agentlik qarorlarining, direktor buyruqlari va topshiriqlarining oʻz vaqtida va sifatli bajarilishini taʼminlash;

tarkibiy boʻlinmalarning har choraklik ish rejalari ishlab chiqilishini taʼminlash, ularni tasdiqlash uchun kiritish, ularda koʻrsatilgan vazifa va tadbirlarning oʻz vaqtida va sifatli bajarilishini taʼminlash;

tarkibiy boʻlinmalarga yuklangan vazifalarning bajarilishini nazorat qilish va muvofiqlashtirish;

tarkibiy boʻlinmalar faoliyati masalalari boʻyicha qonun hujjatlarini takomillashtirish yuzasidan takliflar ishlab chiqish va ularni koʻrib chiqish uchun Agentlik rahbariyatiga kiritish;

Agentlik tarkibiy boʻlinmalariga kadrlarni tanlash va tayinlash jarayonida direktorga takliflar taqdim etish, ularning professionalligi, oʻz ishini bilishi, amaliy ish tajribasi, yuqori ishchanlik darajasi va maʼnaviy-axloqiy sifatlari kafolatlanganligini taʼminlash, ularning kasbiy malakasini oshirish choralarini koʻrish, tarkibiy boʻlinmalarda kadrlar zaxirasini shakllantirish;

tarkibiy boʻlinmalarda normativ-huquqiy hujjatlar loyihalarining sifatli ishlab chiqilishini tashkil etish, keyinchalik koʻrib chiqish uchun Agentlik tarkibiy boʻlinmalarida tayyorlangan hujjatlar loyihalarini koʻrib chiqish va ularga viza qoʻyish, ularni Agentlik rahbariyati tomonidan imzolash (viza qoʻyish), ularning Oʻzbekiston Respublikasi Prezidenti Adminstratsiyasi Reglamenti va Vazirlar Mahkamasi Reglamenti talablariga qatʼiy ravishda oʻz vaqtida Oʻzbekiston Respublikasi Vazirlar Mahkamasiga kiritilishini taʼminlash;

Agentlikga taqdim etilgan takliflarni va normativ-huquqiy hujjatlar loyihalarini oʻz vakolati doirasida toʻliq va har tomonlama koʻrib chiqish, ularni moliyaviy, iqtisodiy, huquqiy va boshqa ekspertizadan puxta oʻtkazish;

Oʻzbekiston Respublikasi Prezidentining “Mansabdor shaxslarning xorijiy mamlakatlarga chiqish tartibini takomillashtirish choralari toʻgʻrisida” 2014-yil 5-martdagi PQ-2142-son va “Mansabdor shaxslarning xorij mamlakatlariga xizmat safarlari samarasi uchun shaxsiy masʼuliyatlarini yanada oshirish va xorijiy delegatsiyalarning Oʻzbekiston Respublikasiga tashriflarini tashkil etish choralari toʻgʻrisida” 2017-yil 3-avgustdagi PQ-3170-son qarorlariga toʻliq muvofiq holda xizmat safarlarini tashkil etish, xizmat safarlarining asoslanganligi, samaradorligi va natijadorligini, xizmat safarlari xarajatlariga ajratilgan mablagʻlardan maqsadli va oqilona foydalanilishini taʼminlash;

Agentlik tarkibiy boʻlinmalari xodimlarining faoliyati samaradorligi va natijadorligini tizimli ravishda tanqidiy tahlil qilish, ularning shaxsiy hisobotlarini yigʻilishlarda eshitish, yakunlari boʻyicha zarur choralar koʻrish;

Agentlik xodimlari tomonidan xodimlarning axloq-odob qoidalari talablariga rioya etish;

“Korrupsiyaga qarshi kurashish toʻgʻrisida”gi Oʻzbekiston Respublikasi Qonuni talablariga muvofiq Agentlik tizimida korrupsiya va boshqa huquqbuzarliklarning oldini olish chora-tadbirlarini koʻrish, shuningdek, huquqni qoʻllash amaliyotini va qonun hujjatlarini takomillashtirishga doir chora-tadbirlarni ishlab chiqish va amalga oshirish orqali ularning sodir etilishiga koʻmaklashadigan sabablar va sharoitlarni aniqlash, tahlil qilish hamda bartaraf etish;

davlat siriga kiritilgan maʼlumotlar va maxfiy axborot bilan ishlashda qonun hujjatlari talablariga rioya qilish.

6-bob. Agentlik faoliyatining samaradorligi va natijadorligini baholash mezonlari va amaliy koʻrsatkichlari

18. Agentlik faoliyati uning samaradorligi va natijadorligi boʻyicha muntazam baholanadi.

19. Agentlik faoliyatining samaradorligi va natijadorligi Oʻzbekiston Respublikasining Moliya vaziri tasdiqlaydigan Agentlik faoliyatining samaradorligi va natijadorligini baholash mezonlari va amaliy koʻrsatkichlari asosida baholanadi.

20. Agentlik faoliyatining samaradorligi va natijadorligini baholash yakunlariga koʻra quyidagi choralar koʻriladi:

Agentlik rahbarlari va xodimlarini ragʻbatlantirish (mukofotlash) yoki ularga nisbatan intizomiy javobgarlikning tegishli choralarini koʻrish;

aniqlangan kamchiliklarni bartaraf etish va Agentlik faoliyatini yanada takomillashtirish.

21. Agentlik faoliyatining samaradorligi va natijadorligini baholash tartibi va uslubi qonun hujjatlari bilan belgilanadi.

7-bob. Agentlikni moliyalashtirish va moddiy-texnik taʼminlash, uning xodimlari mehnatiga haq toʻlash va moddiy ragʻbatlantirish

22. Quyidagilar Agentlik faoliyatini moliyalashtirish manbarlari hisoblanadi:

Oʻzbekiston Respublikasi Davlat budjeti mablagʻlari, xalqaro va xorijiy hukumatlar moliya tashkilotlari, moliya institutlari hamda boshqa donorlarning grantlari va kreditlari (qarzlari);

davlat-xususiy sheriklik toʻgʻrisidagi bitim muvaffaqiyatli rasmiylashtirilganligi uchun tender gʻolibidan yoki toʻgʻridan-toʻgʻri muzokaralar ishtirokchisidan undiriladigan bir martalik toʻlovlarning 50 foizi miqdoridagi ajratmalar;

yuridik va jismoniy shaxslar — Oʻzbekiston Respublikasi rezidentlari va norezidentlarining xayriya mablagʻlari;

shartnoma asosida koʻrsatiladigan xizmatlardan olinadigan daromadlar;

Agentlik tomonidan DXSH loyihalari boʻyicha oʻtkaziladigan anjumanlar, seminarlar, treninglar hisobidan tushadigan tushumlar;

davlat yoki xususiy sheriklar tomonidan toʻlab beriladigan toʻlovlar, basharti DXSH toʻgʻrisidagi bitimda nazarda tutilgan boʻlsa;

jamgʻarmaning vaqtincha boʻsh mablagʻlarini belgilangan tartibda Oʻzbekiston Respublikasining tijorat banklari depozitiga joylashtirishdan olinadigan daromadlar;

qonun hujjatlarida taqiqlanmagan boshqa manbalar.

221. Agentlik faoliyatini moliyalashtirish uchun kelib tushgan mablagʻlar quyidagi xarajatlarga yoʻnaltiriladi:

vaqtincha mehnatga qobiliyatsizlik nafaqalarini va mavjud kreditorlik qarzlarini toʻlash;

iqtisodiyot va ijtimoiy sohaning ustuvor yoʻnalishlarida davlat va xususiy sheriklar hamkorligini rivojlantirish boʻyicha tarmoq dasturlarini tayyorlash;

DXSH loyihalari boʻyicha konsepsiya, loyihani baholash hujjatlari, uslubiy qoʻllanma, jurnal, reklama va roliklarni ishlab chiqish;

konsalting va auditorlik xizmatlarini koʻrsatish bilan bogʻliq xarajatlarni moliyalashtirish;

respublikada va xorijda DXSH loyihalari boʻyicha konferensiyalar, simpoziumlar, koʻrgazmalar, yarmarkalar, seminarlar, “davra suhbat”larini oʻtkazish;

kadrlarni tayyorlash va qayta tayyorlash, Agentlik xodimlarining xizmat safarlarini amalga oshirish;

Agentlikni saqlash, moddiy-texnika bazasini mustahkamlash va xodimlarni moddiy ragʻbatlantirish;

qonun hujjatlarda nazarda tutilgan boshqa harajatlar.

222. Vazirlar Mahkamasining “Budjet tashkilotlarini mablagʻ bilan taʼminlash tartibini takomillashtirish toʻgʻrisida” 1999-yil 3-sentabrdagi 414-son qarorida belgilangan normalar Agentlikning rivojlantirish jamgʻarmasi mablagʻlarining sarflanishida tatbiq etilmaydi.

23. Agentlik xodimlarining ish haqi Oʻzbekiston Respublikasining amaldagi qonun hujjatlarida nazarda tutilgan lavozim maoshi, mukofotlar, ustama va qoʻshimcha haqdan iborat boʻladi.

24. Agentlik xodimlari qonun hujjatlariga muvofiq moddiy ragʻbatlantiriladi.

25. Agentlikning jalb etilgan xodimlari, ekspertlari va maslahatchilari — Oʻzbekiston Respublikasi norezidentlari xizmatlariga tuzilgan kontraktlarga muvofiq qonun hujjatlarida belgilangan tartibda xorijiy valyutada haq toʻlanadi.

26. Agentlikka yuklangan vazifalarni amalga oshirish uchun kontrakt asosida jalb qilingan mutaxassislar mehnatiga haq toʻlash miqdori umumeʼtirof etilgan xalqaro amaliyot va bozor sharoitlaridan kelib chiqqan holda, Oʻzbekiston Respublikasi Moliya vaziri tomonidan belgilanadi.

27. Agentlik xodimlariga Oʻzbekiston Respublikasi Moliya vaziri tasdiqlaydigan tartibga muvofiq koʻp yillik xizmatlari uchun har oylik ustamalar toʻlanadi.

28. Oʻzbekiston Respublikasi Moliya vaziri Agentlik xodimlari uchun qonun hujjatlarida nazarda tutilgan boshqa toʻlovlardan qatʼi nazar, egallab turgan asosiy lavozimi boʻyicha Agentlikning budjetdan tashqari mablagʻlari va Oʻzbekiston Respublikasi Moliya vazirligi hisobidan lavozim maoshlariga (tarif stavkalariga) ustamalar hamda ragʻbatlantiruvchi boshqa toʻlovlar belgilashi mumkin.

Agentlikning ayrim tashabbuskor va yuqori malakali xodimlarining lavozim maoshiga (tarif stavkasiga) belgilangan tartibda shaxsiy ustamalar belgilanishi mumkin.

8-bob. Yakunlovchi qoida

29. Agentlik qonun hujjatlarida belgilangan tartibda qayta tashkil etiladi va tugatiladi.

Vazirlar Mahkamasining 2018-yil 13-dekabrdagi 1009-son qaroriga 3-ILOVA

Davlat-xususiy sheriklik toʻgʻrisidagi bitim muvaffaqiyatli rasmiylashtirilganligi uchun tender gʻolibi yoki toʻgʻridan-toʻgʻri muzokara ishtirokchilaridan undiriladigan bir martalik toʻlov miqdorlari

T/r Davlat-xususiy sheriklik loyihasining qiymati Bir martalik toʻlov miqdori (foizda) 1. Umumiy qiymati 1 mln AQSh dollaridan 10 mln AQSh dollarigacha boʻlgan loyihalar uchun 0,2% 2. Umumiy qiymati 10 mln AQSh dollaridan 100 mln AQSh dollarigacha boʻlgan loyihalar uchun 0,1% 3. Umumiy qiymati 100 mln AQSh dollaridan 1 mlrd AQSh dollarigacha boʻlgan loyihalar uchun 0,05% 4. Umumiy qiymati 1 mlrd AQSh dollaridan ortiq boʻlgan loyihalar uchun 0,02%

Izoh. Davlat-xususiy sheriklikni rivojlantirish agentligi va tender gʻolibi yoki toʻgʻridan-toʻgʻri muzokara ishtirokchisi oʻrtasida tuziladigan shartnomaga muvofiq bir martalik toʻlovlar undiriladi. Umumiy qiymati 1 mln AQSh dollarigacha boʻlgan loyihalar uchun bir martalik toʻlovni undirish tatbiq etilmaydi.