Fermer xoʻjaligini yuritish uchun yer uchastkalarini berishda tanlov gʻolibini aniqlash tartibi toʻgʻrisidagi nizomga oʻzgartirishlar kiritish haqida (1523-4-son)

07.12.2018

Oʻzbekiston Respublikasi qishloq xoʻjaligi vazirining

buyrugʻi

[Oʻzbekiston Respublikasi Adliya vazirligi tomonidan 2018-yil 7-dekabrda roʻyxatdan oʻtkazildi, roʻyxat raqami 1523-4]

Oʻzbekiston Respublikasining 2018-yil 18-apreldagi OʻRQ-476-son “Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida”gi Qonuni hamda Oʻzbekiston Respublikasi Prezidentining 2018-yil 17-apreldagi PQ-3671-son “Oʻzbekiston Respublikasi Qishloq xoʻjaligi vazirligi faoliyatini tashkil etish chora-tadbirlari toʻgʻrisida”gi qaroriga muvofiq buyuraman:

1. Oʻzbekiston Respublikasi qishloq va suv xoʻjaligi vazirining 2005-yil 18-noyabrdagi 237a-son buyrugʻi (roʻyxat raqami 1523, 2005-yil 19-noyabr) (Oʻzbekiston Respublikasi qonun hujjatlari toʻplami, 2005-y., 47-48-son, 358-modda) bilan tasdiqlangan Fermer xoʻjaligini yuritish uchun yer uchastkalarini berishda tanlov gʻolibini aniqlash tartibi toʻgʻrisidagi nizomga ilovaga muvofiq oʻzgartirishlar kiritilsin.

2. Mazkur buyruq rasmiy eʼlon qilingan kundan eʼtiboran kuchga kiradi.

Vazir B. YUSUPOV

Toshkent sh.,

2018-yil 6-noyabr,

53-son

Oʻzbekiston Respublikasi qishloq xoʻjaligi vazirining 2018-yil 6-noyabrdagi 53-son buyrugʻiga ILOVA

Fermer xoʻjaligini yuritish uchun yer uchastkalarini berishda tanlov gʻolibini aniqlash tartibi toʻgʻrisidagi nizomga kiritilayotgan oʻzgartirishlar

1. Muqaddima quyidagi tahrirda bayon etilsin:

“Mazkur Nizom fermer xoʻjaligini yuritish uchun yer uchastkalarini berishda tanlov gʻolibini aniqlash tartibini belgilaydi.”.

2. 1-banddan “v” va “g” kichik bandlar chiqarib tashlansin.

3. 1-bob 1-paragrafining nomi quyidagi tahrirda bayon etilsin:

“§ 1. Yuridik va jismoniy shaxslarga berilmagan qishloq xoʻjaligi maqsadidagi yerlardan va (yoki) zaxiradagi yerlardan fermer xoʻjaligi yuritish uchun yer uchastkalari ajratib berishning umumiy shartlari”.

4. 3-band quyidagi tahrirda bayon etilsin:

“3. Yuridik va jismoniy shaxslarga berilmagan qishloq xoʻjaligi maqsadidagi yerlardan va (yoki) zaxiradagi yerlardan yer uchastkalari ajratish toʻgʻrisida, shuningdek ushbu yerlarni fermer xoʻjaliklariga berish boʻyicha tanlov oʻtkazish toʻgʻrisida tuman hokimi qaror qabul qiladi.”.

5. 7-bandning ikkinchi xatboshisi quyidagi tahrirda bayon etilsin:

“Yuridik va jismoniy shaxslarga berilmagan qishloq xoʻjaligi maqsadidagi yerlardan va (yoki) zaxiradagi yerlardan yer ajratishga doir ikki loyihasi boʻyicha oʻtkazilgan tanlovda gʻolib chiqqan fuqarolarning, shu jumladan faoliyat koʻrsatayotgan fermer xoʻjaliklari boshliqlarining koʻrsatilgan yer uchastkalari boʻyicha boshqa loyihalar yuzasidan oʻtkaziladigan tanlovlardagi ishtiroki toʻxtatiladi.”.

6. 8-banddan “qishloq xoʻjaligi kooperativi (shirkat xoʻjaligi)ning nomi,” degan soʻzlar chiqarib tashlansin.

7. 1-bobning 2-paragrafi oʻz kuchini yoʻqotgan deb topilsin.

8. 20-bandning “d” kichik bandidagi “tuman qishloq va suv xoʻjaligi boʻlimi” degan soʻzlar “tuman qishloq xoʻjaligi boʻlimi” degan soʻzlar bilan almashtirilsin.

9. 39-band quyidagi tahrirda bayon etilsin:

“39. Komissiyaning talabgorlarni tanlash va tanlov oʻtkazish bilan bogʻliq barcha hujjatlari tuman hokimligida har bir qishloq xoʻjaligi korxonasi yoki yuridik va jismoniy shaxslarga berilmagan qishloq xoʻjaligi maqsadidagi yerlardan va (yoki) zaxiradagi yerlardan ajratilgan yerlar boʻyicha alohida yigʻma jildlarda saqlanadi. Mazkur hujjatlar fermer xoʻjaliklarining barchasi roʻyxatdan oʻtkazilgandan soʻng 2 hafta mobaynida tuman hokimligining idoraviy arxiviga topshiriladi.”.

10. 40-banddan oʻn birinchi xatboshi chiqarib tashlansin.

11. 2-ilovaning 6-bandi quyidagi tahrirda bayon etilsin:

“ 6. Oilaviy pudratchi yoki fermer xoʻjaligi boshligʻi hamda boshqa qishloq xoʻjalik korxonalari va tashkilotlari rahbari va xodimlari (fermer xoʻjaliklari xodimlari va oilaviy pudratchilar bundan mustasno) uchun soʻnggi uch yil davomida mahsulot yetkazib berish boʻyicha shartnomalarning bajarilishi (eng yuqori ball barcha turdagi mahsulot yetkazish shartnomalari bajarilganda beriladi) tuman statistika boʻlimi yoki qishloq xoʻjaligi boʻlimi tomonidan berilgan maʼlumotnoma 3 yil surunkali bajarganda 8 ― 10 ball 3 yildan 2 yil bajarganda 6 ― 8 ball 3 yildan 1 yil bajarganda 4 ― 6 ball ”.

12. Mazkur oʻzgartirishlar Oʻzbekiston Respublikasi Iqtisodiyot vazirligi, Yer resurslari, geodeziya, kartografiya va davlat kadastri davlat qoʻmitasi hamda Oʻzbekiston fermer, dehqon xoʻjaliklari va tomorqa yer egalari kengashi bilan kelishilgan.

Iqtisodiyot vaziri B. XODJAYEV

2018-yil 1-noyabr,

Yer resurslari, geodeziya, kartografiya va davlat kadastri davlat qoʻmitasi raisi A. ABDULLAYEV

2018-yil 22-oktabr,

Oʻzbekiston fermer, dehqon xoʻjaliklari va tomorqa yer egalari kengashi raisi A. XAITOV

2018-yil 29-oktabr,