Oliy taʼlim sohasida hamkorlik toʻgʻrisida

05.09.2018

Oʻzbekiston Respublikasi Hukumati bilan Misr Arab Respublikasi Hukumati oʻrtasida

Bitim

Oʻzbekiston Respublikasi Hukumati va Misr Arab Respublikasi Hukumati, keyingi oʻrinlarda “Tomonlar” deb ataluvchilar,

oliy taʼlimning iqtisodiy taraqqiyot omili, shuningdek, ularning xalqlari oʻrtasidagi aloqalarni mustahkamlash vositasi sifatidagi muhim ahamiyatini eʼtirof etgan holda,

oliy taʼlim sohasidagi hamkorlik ikkala mamlakat uchun ham manfaatli boʻlishiga ishonch bildirib,

ikki davlat oʻrtasidagi doʻstona munosabatlarni kengaytirish istagida,

quyidagilar toʻgʻrisida kelishib oldilar:

1-modda Bitimning maqsadi

Tomonlar mazkur Bitim qoidalari va ikkala davlatning amaldagi qonunchiligiga muvofiq teng huquqlilik va oʻzaro manfaatdorlik asosida ikki davlat oʻrtasida bilim va intellektual taraqqiyotni ilgari surish maqsadida oliy taʼlim sohasidagi hamkorlikka koʻmaklashishga kelishib oldilar.

2-modda Hamkorlik sohalari

Tomonlar oʻz davlatlarining amaldagi qonunchiligiga muvofiq oliy taʼlim sohasida oʻzaro hamkorlikni ragʻbatlantirish va koʻllab-quvvatlash uchun kuyidagi chora-tadbirlarni amalga oshirishga intiladilar:

a) Oʻzbekiston Respublikasi Oliy va oʻrta maxsus taʼlim vazirligi va Misr Arab Respublikasi Oliy taʼlim vazirligi maslahatlashuvlar yordamida oliy taʼlim muassasalari oʻrtasida ikkala Tomon uchun manfaatli boʻlgan dasturlar boʻyicha professor va oʻqituvchilar, ekspertlar va talabalarning almashinuvini ragʻbatlantirish va unga koʻmaklashish. Bunday almashinuv taʼlim mashgʻulotlari va/yoki tadqiqotlar olib borishni oʻz ichiga olishi mumkin, bunda ularning natijalari boʻyicha qoʻshma hisobot tayyorlash, maqola chop etish yoki oʻquv tashriflarini tashkil qilish mumkin. Mazkur almashinuvlar davomiyligi va shartlari maslahatlashuvlar yoki rasmiy xatlar almashinuvi orqali belgilanadi;

b) oliy, texnik va kasb-hunar taʼlim sohalarida oʻzaro yordamni qoʻllab-quvvatlash;

c) oliy taʼlim muassasalari oʻrtasida ikkala Tomon uchun oʻzaro manfaatli boʻlgan ikki tomonlama dasturlarni yanada rivojlantirishga koʻmaklashish;

d) taʼlim sohasi maʼmuriy xodimlari va oʻqituvchilarni, shu jumladan, kadrlar tayyorlashga jalb qilinganlarni tayyorlashga koʻmaklashish;

e) ikkala Tomon oliy taʼlim muassasalari oʻrtasida baholashni hisobga olish va oʻxshash dasturlar imkoniyatini hamda akademik, kasbiy va kasb-hunar malakalarini oʻzaro tan olish imkoniyatlarini oʻrganish;

f) oʻquv adabiyotlari, oʻqitish vositalari, axborot va taqdimot materiallari bilan almashinuvga, shuningdek, tegishli maxsus koʻrgazma va seminarlar tashkil qilishga koʻmaklashish;

g) gumanitar, tabiiy va amaliy fanlar sohasida oʻzaro yordamni qoʻllab-quvvatlash;

h) olimlar bilan almashinuv va grantlar taqdim etish;

i) Tomonlar oʻrtasida oʻzaro kelishiladigan hamkorlikning boshqa shakllarini amalga oshirish.

3-modda Vakolatli organlar

Oʻzbekiston Respublikasi Hukumati nomidan Oliy va oʻrta maxsus taʼlim vazirligi hamda Misr Arab Respublikasi Hukumati nomidan Oliy taʼlim vazirligi mazkur Bitimni amalga oshirish uchun masʼul organ hisoblanadi.

4-modda Almashinuv dasturlari

Har bir almashinuv dasturining shartlari tegishli vakolatli vazirliklar orqali ishlab chiqiladi va ular tomonidan tasdiqlanadi, bunda professor-oʻqituvchilar, talabalar, oliy oʻquv yurtidan keyingi taʼlimga jalb qilingan shaxslar, tadqiqotchilar, stajorlar yoki materiallar bilan almashinuv bir vaqtning oʻzida oʻzarolik asosida amalga oshirilmasligi mumkin.

5-modda Moliyaviy kelishuvlar

Mazkur Bitim doirasida barcha almashinuvlar va tadbirlarga oid moliyaviy shartlar muzokaralar, rasmiy xatlar yoki Tomonlar imzolaydigan alohida bayonnomalar orqali kelishiladi.

6-modda Qoʻshma ishchi guruh

1. Tomonlar mazkur Bitimni amalga oshirish boʻyicha Qoʻshma ishchi guruhni tashkil etadilar.

2. Qoʻshma ishchi guruhga Oʻzbekiston Respublikasi Hukumati nomidan Oliy va oʻrta maxsus taʼlim vazirligining vakili boshqa tegishli muassasalar ishtirokida hamraislik qiladi.

3. Qoʻshma ishchi guruhga Misr Arab Respublikasi Hukumati nomidan Oliy taʼlim vazirligining vakili boshqa tegishli muassasalar ishtirokida hamraislik qiladi.

4. Qoʻshma ishchi guruh mazkur Bitimning amalga oshirilishini muhokama qilish maqsadida Oʻzbekiston yoki Misrda yiliga kamida bir marta yoki Tomonlarning oʻzaro kelishuviga muvofiq oʻzgacha tarzda yigʻilish oʻtkazishi mumkin.

7-modda Maxfiylik

1. Mazkur Bitimga muvofiq almashiladigan barcha maʼlumot va hujjatlar Tomonlar tarafidan maxfiy saqlanadi hamda ulardan har qanday boshqa maqsadlarda ushbu maʼlumot va hujjatlarni taqdim qilgan Tomonning oldindan yozma roziligisiz foydalanilmaydi.

2. Ikkala Tomon mazkur Bitimning amal qilishi tugatilishidan qatʼi nazar, Tomonlar oʻrtasida kelishilgan muddat davomida ushbu moddaning qoidalari oʻz kuchida qolishi toʻgʻrisida kelishib oldilar.

8-modda Intellektual mulk huquqlarini himoya qilish

1. Intellektual mulk huquqlarini himoya qilish Tomonlar davlatlarining tegishli qonun hujjatlari hamda Tomonlar imzolagan boshqa xalqaro shartnomalarga muvofiq amalga oshiriladi.

2. Har bir Tomonning nomi, logotipi va (yoki) rasmiy ramzidan har qanday nashr, hujjat va (yoki) maqolada ushbu Tomonning yozma roziligisiz foydalanish taqiqlanadi.

9-modda Bitimning amal qilishini toʻxtatish

Tomonlar xalqaro huquqiy normalar va milliy manfaatlarga oid sabablar bilan mazkur Bitimning amal qilishini vaqtinchalik toʻliq yoki qisman toʻxtatish huquqiga egalar, bunday toʻxtatish boshqa Tomonga diplomatik kanallar orqali yozma xabarnoma berilgandan boshlab bir (1) oydan soʻng amal qiladi.

10-modda Oʻzgartirish va qoʻshimchalar

Mazkur Bitimga Tomonlarning oʻzaro yozma roziligi bilan uning ajralmas qismi hisoblanadigan xamda mazkur Bitimning 12-moddasida belgilangan tartibda kuchga kiradigan alohida bayonnomalar shaklida oʻzgartirish va qoʻshimchalar kiritilishi mumkin.

11-modda Nizolarni hal etish

Mazkur Bitim qoidalarini amalga oshirish yoki talqin qilishdan kelib chiqadigan har qanday nizolar, kelishish uchun biron-bir milliy, xalqaro va uchinchi tomon sudiga murojaat qilinmasdan, Tomonlar oʻrtasida muzokaralar va maslahatlashuvlar orqali hal etiladi.

12-modda Bitimning kuchga kirishi, amal qilish muddati va tugatilishi

Mazkur Bitim imzolangan sanadan boshlab kuchga kiradi. Mazkur Bitim Tomonlardan biri uning amal qilishini tugatish niyati toʻgʻrisida tugatish sanasidan kamida olti (6) oy oldin diplomatik kanallar orqali boshqa Tomonni yozma ravishda xabardor qilguniga qadar oʻz kuchida qoladi.

Mazkur Bitimning tugatilishi, basharti Tomonlar oʻrtasida oʻzgacha tarzda kelishilmagan boʻlsa, uning tugatilish sanasiga kadar kelishilgan joriy tadbirlar yoki dasturlarni amalga oshirishga daxl qilmaydi.

Toshkent shahrida 2018-yil 5-sentabrda ikki (2) asl nusxada, xar biri oʻzbek, arab va ingliz tillarida tuzildi. Bunda barcha matnlar teng autentikdir.

Talqin qilishda tafovut yuzaga kelgan taqdirda, ingliz tilidagi matn ustuvor hisoblanadi.

(imzolar)