Davlat hokimiyati va boshqaruvi organlari, sud organlari va notarial idoralar xodimlari mehnatiga haq toʻlashning tarif setkasini joriy etish toʻgʻrisida (147-son)

12.04.1996

Oʻzbekiston Respublikasi Vazirlar Mahkamasining

qarori

Mehnatga haq toʻlashning ragʻbatlantiruvchi ahamiyatini oshirish, yuqori samarali mehnatga intilishni kuchaytirish, davlat hokimiyati va boshqaruvi organlari, sud organlari va notarial idoralar xodimlarining oʻz kasb darajasini oshirishdan manfaatdorligini taʼminlash maqsadida Vazirlar Mahkamasi qaror qiladi:

1. Davlat hokimiyati va boshqaruvi organlari, sud organlari va notarial idoralar xodimlari uchun mehnatga haq toʻlashning Yagona tarif setkasi razryadlari 1 — 27-ilovalarga* muvofiq tasdiqlansin. Ular 1996-yil 1-apreldan boshlab amalga kiritilsin.

* 1—27 ilovalar rus tilida beriladi.

2. Belgilab qoʻyilsinki, davlat hokimiyati va boshqaruvi organlari, sud organlari va notarial idoralar Oʻzbekiston Respublikasi Prezidentining Farmoni bilan belgilangan eng kam oylik ish haqidan kelib chiqqan holda mehnatga haq toʻlashning Yagona tarif setkasida tasdiqlangan razryadlar boʻyicha xodimlar stavka (lavozim maosh)larini mustaqil ravishda belgilaydilar.

3. Davlat hokimiyati va boshqaruvi organlari, sud organlari va notarial idoralar 1—27-ilovalarda koʻrsatilmagan xodimlar ayrim toifalari mehnatiga haq toʻlash shartlarini belgilashda 28-ilovaga muvofiq Davlat hokimiyati va boshqaruvi organlari, sud organlari va notarial idoralarning ayrim toifadagi xodimlari mehnatiga haq toʻlash shartlariga amal qilsinlar.

4. Davlat hokimiyati va boshqaruvi organlari, sud organlari va notarial idoralar rahbarlarida belgilangan mehnat haqi fondi doirasida:

boshqaruvning yangi, progressiv tashkiliy shakllarini, zamonaviy usullarini, texnologiyalar va texnikani joriy etish zaruriyati tugʻilganda boshqaruv apparatining tasdiqlangan tuzilmasiga oʻzgartirishlar kiritish;

oʻz vazifalarini vijdonan, shuningdek alohida muhim va masʼuliyatli ishlarni bajarayotgan xodimlarni, shu maqsadlarga ikki oylik mehnat haqi fondi miqdoridagi mablagʻlarni yoʻnaltirgan holda mukofotlash. Davlat hokimiyati va boshqaruvi organlari, sud organlari va notarial idoralar xodimlarini mukofotlashning miqdorlari ishning umumiy natijalariga ularning shaxsiy ulushiga qarab belgilanadi;

bunga bir oylik ish haqi fondini yoʻnaltirgan holda, xodimlarga moddiy yordam koʻrsatish huquqi saqlab qolinganligi maʼlumot uchun qabul qilinsin.

Davlat hokimiyati va boshqaruvi organi, sud organi va notarial idora rahbarini mukofotlash va ularga moddiy yordam koʻrsatish yuqori turuvchi organning, uning oʻrinbosarlarini esa — mazkur davlat hokimiyati va boshqaruvi organi, sud organi va notarial idora rahbarining qarori bilan amalga oshiriladi.

5. Ushbu qarorning bajarilishini nazorat qilish Oʻzbekiston Respublikasi Bosh vazirining oʻrinbosari B.S. Hamidov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

1996-yil 12-aprel,

147-son

Vazirlar Mahkamasining 1996-yil 12-apreldagi 147-son qaroriga 28-ILOVA

Davlat boshqaruvi organlari, sud organlari va notarial idoralari xodimlarining ayrim toifalari mehnatiga haq toʻlash

SHARTLARI

1. Mazkur qaror bilan tasdiqlangan lavozim razryadlari va tarif koeffitsiyentlarida nazarda tutilmagan lavozimlardagi davlat boshqaruvi organlari, sud organlari va notarial idoralarning ayrim toifadagi xodimlariga Mehnatga haq toʻlashning Yagona tarif setkasiga muvofiq razryadlar:

vazirliklar, idoralar va hokimliklar apparatlari rahbarlari yordamchilariga — bosh va yetakchi mutaxassislar lavozim razryadlari darajasida;

vazirliklar va idoralarning markaziy apparati ishlar boshqarmasi tarkibidagi tarkibiy boʻlinmalar rahbarlariga — bosh mutaxassislar lavozim razryadlari darajasida;

vazirliklar va idoralar markaziy apparati ilmiy-texnika kengashi raislari oʻrinbosarlari va ilmiy kotiblariga — tegishli ravishda mazkur vazirliklar va idoralarning mustaqil boshqarmalari hamda boʻlimlari boshliqlari va yetakchi mutaxassislari lavozim razryadlari darajasida;

davlat ekspert komissiyalari raislariga — boshqarmalar (boʻlimlar) boshliqlari lavozim razryadlari darajasida;

viloyatlar, shaharlar va tumanlar hokimliklari apparatlari Qoraqalpogʻiston Respublikasi Vazirlar Kengashi, viloyatlar va Toshkent shahar hokimliklari Bolalarni himoya qilish masalalari kotibiyati, tuman (shahar) hokimliklari Bolalarni himoya qilish shuʼbalari hamda maʼmuriy komissiyalarining masʼul kotiblariga — tegishli hokimliklarning yetakchi mutaxassislari lavozim razryadlari darajasida, yetakchi mutaxassis lavozimi boʻlmagan joylarda — birinchi toifali mutaxassislar lavozim razryadlari darajasida;

vazirliklar va idoralar apparatlarining tarkibiy boʻlinmalarga boshchilik qiluvchi va hisobga olish hamda hisobotga tashkiliy va uslubiy rahbarlikni amalga oshiruvchi bosh buxgalterlariga — mazkur vazirlik (idora)larning tasdiqlangan lavozim razryadlari tuzilmasiga muvofiq bosh boshqarma va yetakchi boʻlim boshligʻi lavozim razryadi darajasida, boshqa hollarda — mustaqil boshqarma hamda boʻlim, bosh boshqarma boʻlimi, kichik boʻlim boshligʻi lavozim razryadi darajasida; Qoraqalpogʻiston Respublikasi Vazirlar Kengashi, hokimliklar, ularning boshqarma va boʻlimlarida — tarkibiy boʻlinmalar rahbarlari lavozim razryadi darajasida;

hokimlikning arxiv boʻlimlari boshliqlariga — mustaqil boʻlim boshligʻining oʻrinbosari lavozim razryadi darajasida; mustaqil boʻlim boshligʻining oʻrinbosari lavozimi boʻlmagan joylarda — bosh mutaxassislar lavozim razryadi darajasida;

viloyatlar, shaharlar va tumanlar hokimliklarining bosh meʼmorlariga — tegishli hokimliklarning mustaqil boshqarma va boʻlimlari boshliqlari lavozim razryadlari darajasida;

Qoraqalpogʻiston Respublikasi vazirliklari va idoralari, viloyatlar, shaharlar va tumanlar hokimliklari boshqarmalari va boʻlimlarining maktablar, maktab-internatlar, bolalar uylari, oʻrta maxsus va hunar-texnika oʻquv yurtlari inspektorlari, shuningdek inspektor-vrachlarga — mutaxassislar lavozim razryadlari darajasida belgilanadi.

2. Mazkur qaror bilan tasdiqlangan lavozim razryadlari va tarif koeffitsiyentlarida nazarda tutilmagan lavozimlardagi davlat hokimiyati va boshqaruvi organlari, sud organlari va notarial idoralar xodimlarining ayrim toifalari stavkalari:

tarkibiy boʻlinmalar rahbarlarining oʻrinbosarlariga — tegishli rahbar stavkasidan 5 foizgacha kam miqdorda;

kichik boʻlimlar va shuʼbalar rahbarlariga — tegishli boʻlinma rahbari stavkasidan 5 — 8 foiz kam miqdorda belgilanadi.

3. Qoraqalpogʻiston Respublikasi Vazirlar Kengashining doimiy vakolatxonasi xodimlari lavozim razryadlari mazkur qarorda Qoraqalpogʻiston Respublikasi Vazirlar Kengashi boshqarmalari va mustaqil boʻlimlari xodimlari uchun nazarda tutilgan lavozim razryadlari darajasida belgilanadi.

4. Vazirliklar va idoralar apparati boʻlinmalarini yetakchi boʻlimlarga tenglashtirish Oʻzbekiston Respublikasi Bandlik va mehnat munosabatlari vazirligi va Moliya vazirligi bilan kelishgan holda ushbu vazirliklar va idoralar rahbarlari tomonidan amalga oshiriladi.