“Avaza” milliy turistik zonasida bolalarni sanatoriy-sogʻlomlashtirish davolash toʻgʻrisida

23.04.2018

Oʻzbekiston Respublikasi Hukumati bilan Turkmaniston Hukumati oʻrtasida

bitim

Oʻzbekiston Respublikasi Hukumati va Turkmaniston Hukumati, keyingi oʻrinlarda “Tomonlar” deb ataluvchilar,

2015-yil 8-oktabrda imzolangan Oʻzbekiston Respublikasi Hukumati bilan Turkmaniston Hukumati oʻrtasida sogʻliqni saqlash va sport sohasida 2016 — 2018-yillarga moʻljallangan hamkorlikni yanada chuqurlashtirish toʻgʻrisida Dasturga amal qilib,

sogʻliqni saqlash va sanatoriy-kurort davolash sohasida uzoq muddatli hamkorlikni qoʻllab-quvvatlash va chuqurlashtirishga boʻlgan oʻzaro intilishga asoslanib,

quyidagilar toʻgʻrisida kelishib oldilar:

1-modda

Mazkur Bitimdan koʻzlangan maqsad sogʻliqni saqlash sohasida va Turkmanistonning sanatoriy-sogʻlomlashtirish markazlarida, shu jumladan, “Avaza” milliy turistik zonasida Oʻzbekistonlik bolalarni sanatoriy-kurort davolashni tashkillashtirishda Tomonlarning oʻzaro hamkorligi hisoblanadi.

Mazkur moddada koʻrsatilgan bolalarning soni Tomonlar oʻrtasida kelishuv asosida belgilanadi.

2-modda

Mazkur Bitimni amalga oshirish maqsadlarida oʻzbek tomoni:

Turkmanistonning sanatoriy-sogʻlomlashtirish markazlariga davolash uchun yuboriladigan Oʻzbekistonlik bolalar va ularga hamrohlik qiluvchi shaxslarning roʻyxati tuzilishini va zarur hujjatlarni ilova qilgan xolda turkman tomoniga taqdim etilishini oldindan taʼminlaydi;

Turkmanistonning sanatoriy-sogʻlomlashtirish markazlariga davolash uchun yuboriladigan bolalarning umumiy sonidan kelib chiqib hamrohlik qiluvchi shaxslarning zarur sonini belgilaydi;

davolash uchun yuboriladigan bolalar va ularga hamrohlik qiluvchi shaxslarning chiqish hujjatlari oʻz vaqtida rasmiylashtirishni taʼminlaydi;

bolalar va ularga hamrohlik qiluvchi shaxslarning temir yoʻl transporti bilan tegishli manzilga va orqaga qaytish masalasini ishlab chiqadi;

mazkur Bitim doirasida amalga oshiriladigan tadbirlarni Oʻzbekiston ommaviy axborot vositalarida keng yoritilishini tashkillashtiradi.

3-modda

Mazkur Bitimni amalga oshirish maqsadlarida turkman tomoni:

tashkiliy masalalarni hal qilishga hamda Turkmanistonning sanatoriy-sogʻlomlashtirish markazlarida, shu jumladan, “Avaza” milliy turistik zonasida boʻlgan bolalar va ularga hamrohlik qiluvchi shaxslar uchun qulay shart-sharoitlar yaratishga koʻmaklashadi;

yoʻllanmaning tasdiqlangan narxidan 50 foizgacha boʻlgan miqdorda chegirma beradi, tasdiqlangan narxdan chegirmaning miqdori har bir holatda Tomonlarning kelishuviga binoan belgilanadi;

bolalar va ularga hamrohlik qiluvchi shaxslar uchun kirish vizalarini rasmiylashtirish va vaqtincha roʻyxatga qoʻyishga konsullik, migratsion va boshqa yigʻimlarni undirmagan holda koʻmaklashadi;

bolalar va ularga hamrohlik qiluvchi shaxslarni tegishli manzilga oboruvchi va olib keluvchi transport vositalarining oʻzbek-turkman Davlat chegarasidan soddalashtirilgan holda oʻtishiga koʻmaklashadi;

bolalar va hamrohlik qiluvchi shaxslar Turkmaniston hududida boʻlgan vaqtida ularning xavfsizligini taʼminlash boʻyicha choralar koʻradi.

4-modda

Har bir Tomon mazkur Bitim qoidalarini amalga oshirish bilan bogʻliq xarajatlarni mustaqil ravishda qoplaydi, basharti har bir aniq holatda boshqacha tartib kelishilmasa.

5-modda

Tomonlarning oʻzaro kelishuviga koʻra mazkur Bitimga alohida bayonnomalar bilan rasmiylashtiriladigan, uning ajralmas qismi hisoblanadigan oʻzgartirish va qoʻshimchalar kiritilishi mumkin.

6-modda

Mazkur Bitim qoidalarini qoʻllash va talqin qilish bilan bogʻliq barcha kelishmovchiliklar Tomonlar oʻrtasida maslahatlashuvlar hamda muzokaralar orqali hal qilinadi.

7-modda

Mazkur Bitim imzolangan sanadan boshlab kuchga kiradi va bir Tomon boshqa Tomonning mazkur Bitimning amal qilishini tugatish niyati toʻgʻrisidagi yozma xabarnomasini olgan sanadan boshlab 2 (ikki) oy oʻtgunga qadar amal qiladi.

Toshkent shahrida 2018-yil 23-aprelda har biri oʻzbek, turkman va rus tillarida boʻlgan ikki asl nusxada tuzildi, bunda barcha matnlar teng autentikdir.

Matnlar oʻrtasida tafovutlar yuzaga kelgan taqdirda, Tomonlar rus tilidagi matnga murojaat qiladilar.

(imzolar)