YUNESKO ishlari boʻyicha Oʻzbekiston Respublikasi milliy komissiyasi faoliyatini takomillashtirish toʻgʻrisida (957-son)

26.11.2018

Oʻzbekiston Respublikasi Vazirlar Mahkamasining

qarori

Taʼlim, fan, madaniyat sohasida xalqaro hamkorlikni jadal rivojlantirish, Oʻzbekistonning madaniy, maʼnaviy va tarixiy merosini keng xalqaro jamoatchilik orasida faol targʻib qilish, YUNESKO bilan har tomonlama hamkorlikni yanada kengaytirish va uni samarali amalga oshirish, shuningdek, YUNESKO Ustaviga muvofiq Vazirlar Mahkamasi qaror qiladi:

1. Quyidagilar:

YUNESKO ishlari boʻyicha Oʻzbekiston Respublikasi milliy komissiyasi toʻgʻrisidagi nizom 1-ilovaga muvofiq;

YUNESKO ishlari boʻyicha Oʻzbekiston Respublikasi milliy komissiyasining tuzilmasi 2-ilovaga muvofiq;

YUNESKO ishlari boʻyicha Oʻzbekiston Respublikasi milliy komissiyasining tarkibi 3-ilovaga muvofiq tasdiqlansin.

Komissiya raisiga, zaruratga koʻra, kotibiyat tuzilmasiga boshkaruv xodimlarining umumiy cheklangan soni va mehnatga hak toʻlash fondi doirasida oʻzgartirishlar kiritish huquki berilsin.

4. Oʻzbekiston Respublikasi Huqumatining 4-ilovaga muvofiq ayrim qarorlari oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.A. Abduhakimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 26-noyabr,

957-son

Vazirlar Mahkamasining 2018-yil 26-noyabrdagi 957-son qaroriga 1-ILOVA

YUNESKO ishlari boʻyicha Oʻzbekiston Respublikasi milliy komissiyasi toʻgʻrisida

NIZOM

1-bob. Umumiy qoidalar

1. Ushbu Nizom YUNESKO ishlari boʻyicha Oʻzbekiston Respublikasi milliy komissiyasining (keyingi oʻrinlarda Komissiya deb ataladi) asosiy vazifalari, funksiyalari, huquqlari, tarkibini va ishini tashkil etish tartibini belgilaydi.

2. Komissiya oʻz faoliyatida Oʻzbekiston Respublikasi Konstitutsiyasi va qonunlariga, Oʻzbekiston Respublikasi Oliy Majlisi palatalarining qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Vazirlar Mahkamasining qarorlari va farmoyishlariga, YUNESKO va Taʼlim, ilm-fan va madaniyat masalalari boʻyicha Islom tashkilotining (AYSESKO) hujjatlariga, shuningdek, ushbu Nizomga hamda boshqa qonunchilik hujjatlariga amal qiladi.

3. Komissiya Oʻzbekiston Respublikasi Vazirlar Mahkamasi huzurida tashkil etilgan davlat muassasasi shaklidagi yuridik shaxs hisoblanadi, Oʻzbekiston Respublikasi Davlat gerbi tasviri tushirilgan va oʻz nomi davlat tilida yozilgan muhrga, Oʻzbekiston Respublikasi Moliya vazirligining Gʻaznachiligida shaxsiy gʻazna hisobvaraqlariga, bank hisobvaraqlariga, shu jumladan, xorijiy valyutadagi hisobvaraqlariga ega boʻladi.

31. Komissiyaning oʻz vakolatlari doirasida qabul qilgan qarorlari davlat organlari va boshqa tashkilotlar hamda ularning mansabdor shaxslari tomonidan bajarilishi majburiy hisoblanadi.

4. Komissiya tuzilmasida uning ishchi organi hisoblangan kotibiyat faoliyat yuritadi.

5. Quyidagilar Komissiya faoliyatining asosiy yoʻnalishlari hisoblanadi:

taʼlim;

ilm-fan;

madaniyat;

ommaviy axborot vositalari va kommunikatsiyalar.

2-bob. Komissiyaning asosiy vazifalari va funksiyalari

5. YUNESKO va AYSESKO faoliyatida jahon sivilizatsiyasi va madaniyati markazlaridan biri sifatida Oʻzbekistonning xalqaro obroʻsi va rolini mustahkamlash, Oʻzbekiston Respublikasida YUNESKO va AYSESKO dasturlarini ishlab chiqish va amalga oshirish masalalari boʻyicha vazirliklar va idoralarning faoliyatini muvofiqlashtirish Komissiyaning asosiy vazifalari hisoblanadi.

6. Komissiya oʻziga yuklangan vazifalarni bajarish doirasida quyidagi funksiyalarni amalga oshiradi:

davlat dasturlarida belgilangan Oʻzbekistonning xalqaro obroʻsi va rolini mustahkamlashga qaratilgan chora-tadbirlarning amalga oshirilishini taʼminlash;

oʻzbek xalqining madaniy va tarixiy merosini hamda Oʻzbekiston Respublikasi milliy manfaatlarini xalqaro darajada belgilangan tartibda himoya qilish;

Oʻzbekistonning xalqaro tashabbuslarini fan-taʼlim va madaniy-gumanitar sohalarda hamda mamlakatning hududiy va global rivojlanish boʻyicha pozitsiyasi va yondashuvini ilgari surish;

YUNESKO va AYSESKO tadbirlarida hamda loyihalarida vazirliklar, idoralar va tashkilotlar, shuningdek, mutaxassislarning qatnashishi toʻgʻrisida YUNESKO kotibiyatiga hamda mintaqaviy boʻlinmalariga, AYSESKO Bosh direksiyasiga Oʻzbekiston Respublikasi Tashqi ishlari vazirligi bilan birgalikda takliflar tayyorlash va kiritish;

taʼlim, fan, madaniyat, axborot va kommunikatsiyalar sohasida ikki tomonlama va koʻp tomonlama hamkorlikni rivojlantirish masalalari boʻyicha YUNESKO, AYSESKOning mintaqaviy byurolari va markazlari bilan muntazam konsultatsiyalar oʻtkazish;

Oʻzbekiston Respublikasi hududida va uning tashqarisida YUNESKO va AYSESKO tadbirlarini tashkillashtirish va oʻtkazishda qatnashish;

YUNESKO va AYSESKO tomonidan chaqiriladigan bosh konferensiya hamda boshqa hukumatlararo kengashlarni tashkil etishga va oʻtkazishga koʻmaklashish;

YUNESKO va AYSESKO dasturlarini ishlab chiqish va bajarishda davlat va nodavlat tashkilotlarining ishtirokini ragʻbatlantirish;

YUNESKO va AYSESKO grantlari va homiylik xayriyalarini jalb etish va ulardan maqsadli foydalanishni tashkil etish.

7. Umumjahon merosi roʻyxatiga kiritilgan mamlakatimizdagi tegishli hududlar (obyektlar)da rejalashtirilgan qurilish va obodonlashtirish ishlari loyihalari Komissiya bilan kelishiladi.

3-bob. Komissiyaning huquqlari

8. Komissiya oʻziga yuklangan vazifalar va funksiyalarni bajarish uchun quyidagi huquqlarga ega:

YUNESKO va AYSESKO masalalariga oid normativ-huquqiy hujjatlar loyihalarini ishlab chiqishda ishtirok etish;

davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlardan YUNESKO va AYSESKO masalalariga oid zarur materiallar va maʼlumotlarni belgilangan tartibda soʻrab olish;

davlat va xoʻjalik boshqaruvi, mahalliy davlat hokimiyati organlari va boshqa tashkilotlar tomonidan chiqarilgan YUNESKO va AYSESKO masalalariga oid normativ-huquqiy va boshqa hujjatlar Oʻzbekiston Respublikasi qonunlari va boshqa qonunchilik hujjatlariga, YUNESKO va AYSESKO qoidalariga zid kelgan hollarda aniqlangan nomuvofiqliklarni bartaraf etish yuzasidan Oʻzbekiston Respublikasi Vazirlar Mahkamasiga takliflar kiritish;

Komissiya oʻzining majlislarida vakolati doirasiga kiruvchi masalalar yuzasidan davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlarning mansabdor shaxslarini eshitish;

davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar tomonidan YUNESKO va AYSESKO masalalari boʻyicha muammo va kamchiliklarga yoʻl qoʻyilganligi aniqlangan taqdirda ularni bartaraf etish choralarini koʻrish;

YUNESKO va AYSESKO dasturlarini va boshqa hujjatlarini ishlab chiqish va amalga oshirishda davlat va xoʻjalik boshqaruvi organlari, mahalliy davlat hokimiyati organlari va boshqa tashkilotlar vakillarini, shuningdek, boshqa mutaxassislarni jalb qilish.

9. Komissiya oʻz vakolatlari doirasida faoliyat yoʻnalishlari boʻyicha ekspert kengashlari va ishchi guruhlarni tuzishi mumkin.

4-bob. Komissiyaning tarkibi

10. Komissiya tarkibiga Komissiya raisi, uning oʻrinbosarlari, Bosh kotibi va Komissiya aʼzolari kiradi.

Komissiya tarkibiga vazirliklar, idoralar va tashkilotlar hamda ommaviy axborot vositalarining vakillari, shuningdek, fan, madaniyat va taʼlim arboblari ham kiritilishi mumkin.

Komissiya tarkibi Oʻzbekiston Respublikasi Vazirlar Mahkamasi tomonidan tasdiqlanadi.

Komissiya raisi, uning oʻrinbosarlari va Komissiya aʼzolari Komissiya faoliyatini amalga oshirishda jamoatchilik asosida ishtirok etadilar.

Komissiya Bosh kotibi Komissiya kotibiyati rahbari hisoblanadi va oʻz faoliyatini doimiy asosda olib boradi.

11. Komissiya aʼzolari uning majlislarida almashuv huquqisiz ishtirok etadilar.

Komissiya aʼzolari boshqa ishga oʻtgan taqdirda, uning tarkibiga ushbu lavozimlarga yangidan tayinlangan yoki tegishli vazifalarini bajarish yuklatilgan shaxslar kiritiladi.

5-bob. Komissiya ishini tashkil etish

12. Komissiya majlislarini Komissiya raisi olib boradi, Komissiya raisi qatnashmagan hollarda uning topshirigʻiga koʻra yigʻilishni rais oʻrinbosarlaridan biri olib boradi.

13. Komissiyaning umumiy majlislari navbatdagi va navbatdan tashqari boʻlishi mumkin.

Navbatdagi umumiy majlislar har yilda kamida bir marta chaqiriladi. Bunda, qoida tariqasida, Komissiya raisining va Bosh kotibining Komissiya ishchi guruhlari va kotibiyatining faoliyati toʻgʻrisidagi hisobotlari tinglanadi, Komissiya qarorlarining bajarilishi koʻrib chiqiladi, uning istiqboldagi faoliyati muhokama qilinadi hamda kotibiyat va Komissiyaning ish rejalari tasdiqlanadi.

Navbatdan tashqari umumiy majlislari alohida hollarda Komissiya vakolatlari doirasiga kiradigan, zudlik bilan hal qilinishi zarur boʻlgan masalalar yuzasidan chaqiriladi.

14. Komissiyaning umumiy majlislar oʻrtasidagi davrda barcha ishlarga Komissiya kotibiyati rahbarlik qiladi.

15. Umumiy majlislarning kun tartibi, shuningdek, ularni oʻtkazish joyi va vaqti Komissiya raisi yoki uning topshirigʻiga koʻra rais oʻrinbosarlaridan biri tomonidan belgilanadi.

16. Majlislar Komissiya aʼzolarining umumiy sonidan kamida yarmi qatnashgan taqdirda vakolatli hisoblanadi.

17. Komissiya qarorlari majlisda qatnashayotgan Komissiya aʼzolarining koʻpchilik ovozi bilan qabul qilinadi. Ovozlar teng boʻlgan hollarda, majlisga raislik qiluvchining ovozi hal qiluvchi ovoz hisoblanadi.

18. Komissiya qarorlari bayonnoma bilan rasmiylashtiriladi, uni Komissiya raisi yoki majlisga raislik qilgan uning oʻrinbosari va Komissiya Bosh kotibi imzolaydi.

19. Komissiya majlisi qarorlarining mazmuni (sharhi) ommaviy axborot vositalari orqali eʼlon qilib boriladi.

20. Foydalanish huquqi cheklangan axborotlarni oʻzida mujassam etgan materiallar Komissiyaning yopiq majlislarida Komissiyaning vakolatli aʼzolari ishtirokida koʻrib chiqiladi. Ushbu majlislarda qabul qilingan qarorlar belgilangan tartibda rasmiylashtiriladi va ommaviy axborot vositalarida eʼlon qilinmaydi.

6-bob. Komissiyaning kotibiyati

21. Komissiyaning bosh kotibi va uning oʻrinbosari maqomi va transport xizmati koʻrsatish sharoitlariga koʻra tegishlicha vazirning birinchi oʻrinbosari va vazir oʻrinbosariga tenglashtiriladi.

22. Komissiya kotibiyati quyidagi funksiyalarni amalga oshiradi:

YUNESKO kotibiyati va AYSESKO Bosh direksiyasi, YUNESKO huzuridagi konsultativ maqomga ega boʻlgan komissiyalar hamda YUNESKO va AYSESKOga aʼzo davlatlarning milliy komissiyalari bilan oʻzaro hamkorlik qilish;

Komissiya va uning ishchi organlari ish rejalari tayyorlanishi hamda ular bajarilishini nazorat qilishni taʼminlash;

YUNESKO va AYSESKOning davriy nashrlarida respublika fuqarolari, tashkilotlari, muassasalarining fan, taʼlim va madaniyat masalalari boʻyicha asarlari va boshqa materiallarini chop etishga koʻmaklashish;

YUNESKO va AYSESKO homiyligida oʻtkaziladigan xalqaro tadbirlarni tayyorlash va amalga oshirishda tashkilotlarga yordam koʻrsatish;

fan, madaniyat va taʼlim boʻyicha dasturlarni tayyorlash va ularni Komissiyaga koʻrib chiqish uchun kiritish;

YUNESKO va AYSESKO tadbirlarida ishtirok etish uchun Oʻzbekiston Respublikasi vakillarini tanlash boʻyicha takliflar tayyorlash;

YUNESKO kotibiyatida va uning mintaqaviy boʻlinmalarida, shuningdek, AYSESKO Bosh direksiyasida ishlash uchun ekspertlar sifatida respublika mutaxassislarini tanlash boʻyicha Oʻzbekiston Respublikasi Tashqi ishlar vazirligi bilan birgalikda takliflar tayyorlash;

Komissiya faoliyatiga taalluqli materiallarni yigʻish, umumlashtirish va tahlil qilish;

Komissiya faoliyatiga taalluqli masalalar yuzasidan xorijiy mamlakatlar tajribasini oʻrganish, tahlil qilish va ularning ilgʻor tajribasini amaliyotga tatbiq etish boʻyicha Oʻzbekiston Respublikasi Vazirlar Mahkamasiga takliflar kiritish;

tegishli davlat organlari va xalqaro tashkilotlar bilan xizmat doirasida yozishmalar olib borish;

Komissiya majlisi kun tartibiga kiritilgan masalalar yuzasidan zarur hujjatlarni, materiallarni va takliflarni tayyorlash;

amalga oshirilgan ishlar boʻyicha hisobotlar nusxalarini Oʻzbekiston Respublikasi Tashqi ishlari vazirligiga muntazam kiritib borish;

Oʻzbekiston Respublikasining YUNESKO Umumjahon merosi roʻyxatiga kiritilgan obyektlarini asrash masalalari boʻyicha YUNESKO mezonlariga muvofiq taklif va tavsiyalar kiritish va bu borada tegishli vazirliklar va idoralar faoliyatini muvofiqlashtirish;

YUNESKO konvensiyalari talablari amalga oshirilishi va Milliy komissiya qarorlari ijrosining taʼminlanishi yuzasidan nazorat olib borish hamda ushbu maqsadlar uchun ekspert kengashlari va ishchi guruhlarini tuzish;

Milliy komissiya qarorlarini sifatli va oʻz vaqtida bajarilishini taʼminlamagan mansabdor shaxslarga nisbatan qonunchilikka muvofiq taʼsir choralarini qoʻllash toʻgʻrisida Vazirlar Mahkamasiga takliflar kiritish;

YUNESKOning Umumjahon merosi roʻyxatiga kiritilgan hududlarda hamda ularning bufer zonalarida joylashgan obyektlar boʻyicha elektron maʼlumotlar bazasini yaratilishi hamda uning yuritilishi yuzasidan monitoring olib borish;

YUNESKOning Umumjahon madaniy merosi roʻyxatiga kiritilgan obyekt va hududlarda, shu jumladan ularning bufer zonalarida olib boriladigan moddiy madaniy merosning koʻchmas mulk obyektlarini asrashga doir ishlar davomida oʻtkaziladigan davlat nazoratida ishtirok etish hamda tegishli soha mutaxassislarini jalb qilish;

Komissiya faoliyatini taʼminlash uchun zarur boʻlgan boshqa topshiriqlarni bajarish.

23. Komissiya Bosh kotibi va uning oʻrinbosari Oʻzbekiston Respublikasi Prezidenti bilan kelishgan holda Vazirlar Mahkamasi tomonidan lavozimga tayinlanadi va lavozimidan ozod etiladi.

24. Komissiya kotibiyati xodimlari Komissiya Bosh kotibi tomonidan belgilangan tartibda lavozimga tayinlanadilar va lavozimidan ozod etiladilar.

241. Kotibiyat xodimlariga nisbatan Oʻzbekiston Respublikasi Vazirlar Mahkamasi apparati xodimlari uchun belgilangan mehnatga haq toʻlash shartlari (xodimlarni qisqartirish hisobidan qoʻllaniladigan ustamalar, umumiy ish staji uchun qoʻllaniladigan ustamalar, Yagona tarif setkasi boʻyicha mehnatga haq toʻlash razryadlaridan tashqari) tatbiq etiladi hamda Vazirlar Mahkamasining qarori bilan tasdiqlangan Yagona tarif setkasi boʻyicha mehnatga haq toʻlash razryadlari qoʻllaniladi.

Komissiya kotibiyati xodimlarining har oylik lavozim maoshlariga 40% miqdorida ustama haq (mehnatni ragʻbatlantirish koeffitsiyenti) toʻlanadi.

Kotibiyat xodimlarining erishgan natijalaridan kelib chiqqan holda, har oylik lavozim maoshlariga (ragʻbatlantirish koeffitsiyentini hisobga olgan holda) nisbatan 100 foizgacha ustamalar belgilanadi, ularning 50 foizi Oʻzbekiston Respublikasi Davlat budjeti mablagʻlari hisobidan, 50 foizgacha ustamalar esa — xodimlarni moddiy ragʻbatlantirish maxsus fondi hisobidan qoplanadi.

Kotibiyat xodimlari har oylik lavozim maoshiga kotibiyatda xizmat qilgan umumiy ish staji uchun 3 yildan 5 yilgacha — 10 foiz, 5 yildan 10 yilgacha — 20 foiz, 10 yildan 20 yilgacha — 30 foiz, 20 yildan ortiq — 40 foiz oylik ustamalar qoʻllaniladi.

25. Komissiya kotibiyati davlat muassasasi shaklidagi yuridik shaxs hisoblanadi.

26. Komissiyaning faoliyati Oʻzbekiston Respublikasi Vazirlar Mahkamasining Turizm, madaniyat va ommaviy kommunikatsiyalar masalalari kotibiyati tomonidan muvofiqlashtiriladi.

7-bob. Komissiya faoliyatini moliyalashtirish

27. Komissiya faoliyatini moliyalashtirish quyidagilar hisobiga amalga oshiriladi:

YUNESKO va AYSESKO Bosh direksiyasi kotibiyatining mablagʻlari;

Komissiya kotibiyatini taʼminlashga ajratiladigan budjet mablagʻlari;

YUNESKO va AYSESKO bilan hamkorlikda oʻtkaziladigan tadbirlarni tashkil etishdan tushgan mablagʻlar;

qonunchilikda taqiqlanmagan boshqa mablagʻlar.

28. Komissiyaning yillik xarajatlar smetasi Komissiya raisi tomonidan tasdiqlanadi. Komissiya pul mablagʻlari xarajatlar smetasiga muvofiq Komissiya Bosh kotibi tomonidan tasarruf etiladi.

Vazirlar Mahkamasining 2018-yil 26-noyabrdagi 957-son qaroriga 2-ILOVA

YUNESKO ishlari boʻyicha Oʻzbekiston Respublikasi milliy komissiyasining

TUZILMASI

Komissiya, Rais Komissiya aʼzolari — 15 nafar, jamoatchilik asosida Kotibiyat, Bosh kotib 1 Bosh kotib oʻrinbosari 1 Taʼlim va ilm-fan masalalari boʻlimi 3 Kommunikatsiya va axborot masalalari boʻlimi 2 Yuriskonsult, kadrlar boʻyicha mutaxassisi 1 Madaniyat masalalari boʻlimi 3 Xalqaro maslahat qoʻmitasi koordinatori 1 Bosh buxgalter 1

Izoh. Komissiya raisiga, zaruratga koʻra, Komissiya kotibiyati tuzilmasiga boshqaruv xodimlarining umumiy soni va ish haqi fondi doirasida oʻzgartirishlar kiritish huquqi beriladi.

Boshqaruv xodimlarining cheklangan soni 13 shtat birligidan iborat. Texnik va xizmat koʻrsatuvchi xodimlar soni belgilangan normalarga muvofiq belgilanadi.

Vazirlar Mahkamasining 2018-yil 26-noyabrdagi 957-son qaroriga 3-ILOVA

YUNESKO ishlari boʻyicha Oʻzbekiston Respublikasi milliy komissiyasining

TARKIBI

Lavozimiga koʻra — Vazirlar Mahkamasi huzuridagi Madaniyat va sanʼatni rivojlantirish jamgʻarmasi raisi, milliy komissiya raisi B.O. Saidov — tashqi ishlar vaziri, milliy komissiya raisining oʻrinbosari I.Y. Abdurahmonov — oliy taʼlim, fan va innovatsiyalar vaziri, milliy komissiya raisining oʻrinbosari O.A. Nazarbekov — madaniyat va turizm vaziri A.I. Ikramov — yoshlar siyosati va sport vaziri Sh.X. Shermatov — raqamli texnologiyalar vaziri H.Oʻ. Umarova — maktabgacha va maktab taʼlimi vaziri A.R. Karimov — iqtisodiyot va moliya vaziri oʻrinbosari B.S. Yoʻldashev — Fanlar akademiyasi prezidenti A.V. Nuriddinov — Badiiy akademiya raisi A.A. Xodjayev — Axborot va ommaviy kommunikatsiyalar agentligi direktori A. Koʻchimov — Oʻzbekiston Milliy axborot agentligi bosh direktori A.D. Xadjayev — Milliy teleradiokompaniya raisi lavozimiga koʻra — Milliy komissiya Bosh kotibi

Izoh. Milliy komissiya aʼzolari boshqa ishga oʻtganda uning tarkibiga ushbu lavozimlarga yangidan tayinlangan yoki tegishli vazifalarini bajarish zimmasiga yuklangan shaxslar kiritiladi.

Vazirlar Mahkamasining 2018-yil 26-noyabrdagi 957-son qaroriga 4-ILOVA

Oʻzbekiston Respublikasi Hukumatining oʻz kuchini yoʻqotayotgan ayrim qarorlari roʻyxati

1. Vazirlar Mahkamasining “YUNESKO ishlari boʻyicha Oʻzbekiston Respublikasi milliy komissiyasini tashkil etish toʻgʻrisida” 1994-yil 29-dekabrdagi 629-son qarori.

2. Vazirlar Mahkamasining “Taʼlim, ilm-fan va madaniyat masalalari boʻyicha Islom tashkiloti (AYSESKO) bilan hamkorlik toʻgʻrisida” 2017-yil 12-oktabrdagi 821-son qarorining 3-bandi va unga ilova.

3. Vazirlar Mahkamasining 1996-yil 16-yanvardagi 26-f-son farmoyishi.