Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini litsenziyalash toʻgʻrisidagi nizomni tasdiqlash haqida (880-son)

27.10.2018

Oʻzbekiston Respublikasi Vazirlar Mahkamasining

qarori

“Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonuniga va Oʻzbekiston Respublikasi Prezidentining “Tadbirkorlik faoliyati sohasidagi litsenziyalash va ruxsat berish tartib-taomillarini yanada qisqartirish va soddalashtirish, shuningdek, biznes yuritish shart-sharoitlarini yaxshilash chora-tadbirlari toʻgʻrisida” 2018-yil 11-apreldagi PF-5409-son Farmoniga muvofiq, yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish sohasini davlat tomonidan samarali tartibga solish, ishlab chiqarish va boshqa obyektlarni yongʻindan saqlashning ishonchli texnik vositalarini yaratishda yagona muhandislik-texnika siyosatini oʻtkazish maqsadida Vazirlar Mahkamasi qaror qiladi:

1. Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini litsenziyalash toʻgʻrisidagi nizom 1-ilovaga muvofiq tasdiqlansin.

2. Belgilab qoʻyilsinki, yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini litsenziyalash Oʻzbekiston Respublikasi Ichki ishlar vazirligi tomonidan amalga oshiriladi.

3. Oʻzbekiston Respublikasi Ichki ishlar vazirligi:

yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatining yangi talablari va shartlari toʻgʻrisidagi axborot bir oy muddatda yuridik shaxslarga — litsenziatlarga yetkazilishi va tushuntirilishini taʼminlasin;

litsenziatlar faoliyati ustidan samarali nazorat qilinishini va ular tomonidan ushbu sohada qonun hujjatlariga, amaldagi normalar va standartlarga rioya qilinishini taʼminlasin;

manfaatdor vazirliklar va idoralar bilan birgalikda ular qabul qilgan normativ-huquqiy hujjatlarni bir oy muddatda ushbu qarorga muvofiqlashtirsin.

4. Oʻzbekiston Respublikasi Hukumatining 2-ilovaga muvofiq ayrim qarorlari oʻz kuchini yoʻqotgan deb hisoblansin.

5. Mazkur qarorning bajarilishini nazorat qilish Oʻzbekiston Respublikasi ichki ishlar vaziri P.R. Bobojonov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 27-oktabr,

880-son

Vazirlar Mahkamasining 2018-yil 27-oktabrdagi 880-son qaroriga 1-ILOVA

Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini litsenziyalash toʻgʻrisida

NIZOM

1-bob. Umumiy qoidalar

1. Ushbu Nizom yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini litsenziyalash tartibini belgilaydi.

Litsenziyalash suvli, gazli, kukunli yongʻinni oʻchirish qurilmalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash va yongʻin haqida xabar berish signalizatsiyalarni loyihalashtirish, montaj qilish, sozlash, taʼmirlash va ularga texnik xizmat koʻrsatish boʻyicha faoliyatga tatbiq etiladi.

2. Ushbu Nizomda foydalaniladigan tushunchalar va taʼriflar:

yongʻinga qarshi avtomatika vositalari — obyektda (bino, inshoot, xona, hududda) yongʻin chiqishi belgilari toʻgʻrisidagi axborotlarni qabul qilish va ularga ishlov berish, yongʻinni avtomatik tarzda oʻchirish hamda yongʻinga qarshi xavfsizlikni taʼminlash uchun masʼul boʻlgan kuchlar va vositalarni xabardor qilish uchun moʻljallangan texnik vositalar kompleksi;

yongʻinni oʻchirish qurilmalari (suvli, gazli, kukunli) — olovni oʻchiradigan moddalar chiqarish hisobiga yongʻinni oʻchirish uchun moʻljallangan turgʻun texnik vositalar yigʻindisi;

xabar berish vositalari — ovozli, nutqli, yorugʻlikli va kombinatsiyalashtirilgan yongʻindan darak beruvchi vositalar, ularni boshqarish priborlari, shuningdek, yongʻin xavfsizligining evakuatsiya belgilari;

qoʻriqlash signalizatsiyasi vositalari — obyektni (bino, inshoot, xona, hududni) qoʻriqlashning holati toʻgʻrisidagi axborotlarni qabul qilish, ularga ishlov berish, uzatish va aks ettirish uchun moʻljallangan texnik vositalar yigʻindisi;

yongʻindan darak beruvchi signalizatsiya qurilmalari — yongʻinni aniqlash, yongʻin, maxsus axborot toʻgʻrisidagi bildirishnomaga (xabar berishga) ishlov berish, berilgan topshiriq shaklida taqdim etish va/yoki yongʻinni oʻchirishning avtomatik qurilmalarini va texnik qurilmalarni ishga tushirish uchun komanda berish moʻljallangan texnik vositalar yigʻindisi;

qoʻriqlash-yongʻindan saqlash signalizatsiyasi vositalari — qoʻriqlash signalizatsiyasi va yongʻindan darak beruvchi signalizatsiyaning qoʻshma tizimlari.

3. Obyektlarda oʻrnatiladigan yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyati litsenziyalanadi va faqat yuridik shaxslar tomonidan amalga oshirilishi mumkin.

Avtotransport vositalarida oʻrnatiladigan yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyati litsenziyalanmaydi.

4. Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va yongʻindan saqlovchi signalizatsiyalarni loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini litsenziyalash Oʻzbekiston Respublikasi Ichki ishlar vazirligi tomonidan (keyingi oʻrinlarda litsenziyalovchi organ deb ataladi) amalga oshiriladi.

5. Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini amalga oshirish uchun namunaviy (oddiy) litsenziyalar beriladi.

6. Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini amalga oshirish huquqi uchun litsenziya amal qilish muddati cheklanmasdan beriladi.

7. Talabgorning arizasiga muvofiq litsenziya litsenziyalanadigan faoliyatning bir qismiga berilishi mumkin.

2-bob. Litsenziya talablari va shartlari

8. Litsenziya talabgoriga va litsenziatga quyidagi talablar qoʻyiladi:

1) yuridik shaxs-litsenziya talabgorining doimiy shtatida maxsus tayyorgarlikka va tegishli ixtisoslik (yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish) boʻyicha kamida uch yil ish stajiga ega boʻlgan, shuningdek, quyidagi malakalar boʻyicha maʼlumotga va maxsus tayyorgarlikka ega boʻlgan kamida ikkita xodimning (ishlarning rahbari va bajaruvchi) mavjud boʻlishi:

a) loyihalashtirish:

ishlarning rahbari va bajaruvchisi “Muhandislik” (elektrotexnika, elektronika, elektromexanika, radiotexnika, telekommunikatsiya, informatika va axborot texnologiyalari, avtomatlashtirish va boshqarish, muhandislik kommunikatsiyalarini qurish, yongʻin xavfsizligi, shuningdek, yongʻinni oʻchirishning suvli qurilmalari uchun — suv taʼminoti va suv chiqarish inshootlari) yoʻnalishi boʻyicha oliy maʼlumotga ega boʻlishi kerak;

b) yongʻindan darak berish, qoʻriqlash signalizatsiyalarini, qoʻriqlash-yongʻindan saqlash va yongʻin haqida xabar berish signalizatsiyalarini montaj qilish, sozlash, taʼmirlash va ularga texnik xizmat koʻrsatish:

ishlarning rahbari “Muhandislik” (elektroenergetika, elektronika va mikroelektronika, avtomatlashtirish va boshqarish, radiotexnika, telekommunikatsiya) yoʻnalishi boʻyicha oliy maʼlumotli boʻlishi kerak;

ishlarni bajaruvchilar elektroenergetika, elektronika va mikroelektronika, avtomatlashtirish va boshqarish, radiotexnika, telekommunikatsiya yoʻnalishlari boʻyicha 3-razryaddan past boʻlmagan tegishli malaka boʻyicha oliy, kasb-hunar-texnik maʼlumotga yoki maxsus tayyorgarlikka ega boʻlishi kerak;

v) yongʻinni oʻchirish (suvli, gazli, kukunli va boshqa) qurilmalarni montaj qilish, sozlash, taʼmirlash va ularga texnik xizmat koʻrsatish:

ishlarni bajaruvchilar quyidagi yoʻnalishlar: qoʻlda payvandlovchi elektr payvandlovchi (gaz bilan payvandlovchi) 5-razryaddan past boʻlmagan, sanitariya-texnik uskunalarni montaj qiluvchi (sanitariya-texnik tizimlar va asbob-uskunalarni montaj qiluvchi) 4-razryaddan past boʻlmagan, qoʻriqlash-yongʻindan saqlash signalizatsiyalari elektromontyori (elektr asbob-uskunalarini taʼmirlash va ularga xizmat koʻrsatish boʻyicha elektromontyor, aloqa apparatlari va qurilmalarini taʼmirlash va ularga xizmat koʻrsatish boʻyicha elektromontyor, radioelektron apparatlar va priborlarni montaj qiluvchi) 3-razryaddan past boʻlmagan, avtomatik nazorat qilish, rostlash va boshqarish priborlari, apparatlari va tizimlarini sozlovchi (nazorat-oʻlchov priborlari va avtomatika sozlovchisi) 5-razryaddan past boʻlmagan tegishli malaka boʻyicha oliy, kasb-hunar-texnik maʼlumotga yoki maxsus tayyorgarlikka ega boʻlishi kerak.

2) litsenziya talabgorida ushbu Nizomga 1-ilovaga muvofiq yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish boʻyicha faoliyatni amalga oshirish uchun zarur moddiy-texnik baza mavjud boʻlishi;

3) litsenziat tomonidan yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish sohasidagi qonun hujjatlariga, normativ hujjatlar va standartlar talablariga rioya etilishi;

4) qonun hujjatlariga muvofiq sertifikatlangan yongʻinga qarshi avtomatika vositalari, qoʻriqlash signalizatsiyalari, yongʻindan darak beruvchi, qoʻriqlash-yongʻindan saqlash signalizatsiyalari vositalari va tizimlaridan foydalanish;

5) yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalari vositalarini montaj qilish loyihalarining hisobini olib borish va ularni ishlatishning butun davrida loyihalarning (yoki ularning nusxalarining) saqlanishini taʼminlash;

6) litsenziat tomonidan obyektlarda oʻrnatilgan yongʻinni oʻchirish qurilmalari, qoʻriqlash signalizatsiyalari, yongʻindan darak beruvchi va qoʻriqlash-yongʻindan saqlash signalizatsiyalari toʻgʻrisidagi axborotlarning, shuningdek, obyektni qoʻriqlash va uning xavfsizligini taʼminlash tizimi toʻgʻrisida litsenziyalanadigan faoliyatni amalga oshirish jarayonida maʼlum boʻlib qolgan boshqa maʼlumotlarni muhofaza qilishga yoʻnaltirilgan chora-tadbirlarning koʻrilishi;

9. Litsenziyalanadigan faoliyatni amalga oshirishda:

ilgari sudlangan va qasddan jinoyat sodir etganligi uchun muddati oʻtalmagan yoki sudlanganligi olib tashlanmagan shaxslarning;

ruhiy kasalliklar, giyohvandlik, toksikomaniya, alkogolizm yuzasidan hisobda turuvchi shaxslarning ishga yollanishiga yoki jalb qilinishiga yoʻl qoʻyilmaydi.

10. Litsenziyalovchi organ va litsenziat oʻrtasida tuziladigan litsenziya bitimida ushbu Nizomning 8-bandida sanab oʻtilganlardan kelib chiquvchi aniq litsenziya talablari va shartlari nazarda tutilishi mumkin.

3-bob. Litsenziya olish uchun zarur hujjatlar

11. Litsenziya olish uchun litsenziya talabgori quyidagi hujjatlarni taqdim etadi:

litsenziya berish toʻgʻrisida ariza, unda quyidagilar koʻrsatiladi: yuridik shaxsning nomi va tashkiliy-huquqiy shakli, uning joylashgan joyi (pochta manzili), bank muassasasining nomi va bank muassasasidagi hisob raqami, litsenziyalanayotgan faoliyatning (uning bir qismining) yuridik shaxs tomonidan amalga oshirilishi moʻljallanayotgan turi;

litsenziyalovchi organ tomonidan litsenziya berish toʻgʻrisidagi ariza koʻrib chiqilganligi uchun yigʻim toʻlanganligini tasdiqlovchi hujjat;

litsenziyalovchi organ tomonidan belgilanadigan shakl boʻyicha mutaxassislarning malaka tarkibi toʻgʻrisida tegishli hujjatlar (mehnat daftarchasining, maʼlumoti yoki maxsus tayyorgarligi toʻgʻrisidagi hujjatlarning nusxalari) ilova qilingan maʼlumotlar;

litsenziyalovchi organ tomonidan belgilanadigan shakl boʻyicha litsenziyalanayotgan faoliyatni amalga oshirish uchun zarur boʻlgan moddiy-texnik bazaning mavjudligi toʻgʻrisidagi maʼlumotlar.

12. Litsenziya talabgoridan ushbu Nizomda nazarda tutilmagan hujjatlarni taqdim etishni talab qilishga yoʻl qoʻyilmaydi.

13. Hujjatlar litsenziya talabgori tomonidan litsenziyalovchi organga bevosita, ularning olinganligi toʻgʻrisidagi bildirishnoma bilan pochta aloqa vositasi orqali yoki elektron shaklda yetkazib beriladi. Elektron shaklda taqdim etilgan hujjatlar litsenziya talabgorining elektron raqamli imzosi bilan tasdiqlanadi.

Litsenziya olish uchun taqdim etilgan hujjatlar litsenziyalovchi organning masʼul shaxsi tomonidan roʻyxat boʻyicha qabul qilinadi, roʻyxatning nusxasi hujjatlar qabul qilib olingan sana toʻgʻrisida belgi qoʻyilgan holda litsenziya talabgoriga yuboriladi (topshiriladi) va ushbu Nizomning 11-bandida koʻrsatilgan hujjatlar roʻyxatiga muvofiqlik yuzasidan tekshiriladi.

14. Ishonchli boʻlmagan yoki buzilgan maʼlumotlar taqdim etilganligi uchun litsenziya talabgori qonun hujjatlariga muvofiq javob beradi.

4-bob. Arizani koʻrib chiqish va litsenziya berish yoki litsenziya berishni rad etish toʻgʻrisida qaror qabul qilish

15. Litsenziyalovchi organ tomonidan litsenziya talabgorining arizasi koʻrib chiqilganligi uchun Oʻzbekiston Respublikasida belgilangan va ariza berilgan kunda amalda boʻlgan bazaviy hisoblash miqdorining bir baravari miqdorida yigʻim undiriladi. Yigʻim summasi litsenziyalovchi organning hisob raqamiga oʻtkaziladi va litsenziyalovchi organ yigʻimni litsenziyalashda ishtirok etgan boʻlinmalar oʻrtasida taqsimlaydi. Litsenziya talabgori berilgan arizadan voz kechgan yoki litsenziyalovchi organ tomonidan litsenziya berishni rad etish toʻgʻrisida qaror qabul qilingan taqdirda toʻlangan yigʻim summasi qaytarilmaydi.

16. Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini litsenziyalash ushbu Nizomga 2-ilova muvofiq sxema boʻyicha amalga oshiriladi.

Litsenziyalovchi organ tomonidan litsenziya berish yoki litsenziya berishni rad etish toʻgʻrisidagi qaror litsenziya talabgorining arizasi va barcha zarur hujjatlar olingan kundan boshlab yigirma kundan ortiq boʻlmagan muddatda qabul qilinadi.

Agar litsenziyalovchi organ litsenziya berish toʻgʻrisidagi arizani koʻrib chiqish muddati mobaynida litsenziya berish yoki litsenziya berishni rad etish toʻgʻrisida qaror qabul qilmagan taqdirda, koʻrsatib oʻtilgan muddat tamom boʻlgandan keyin litsenziya talabgori litsenziyalovchi organni yozma ravishda xabardor qilgan holda oʻzi ariza bergan faoliyatni amalga oshirish huquqiga ega boʻladi. Bunda litsenziyalovchi organ litsenziya talabgorining yozma bildirishnomasi olingan kundan boshlab besh ish kuni mobaynida unga litsenziya berishi shart.

Litsenziyalovchi organ xulosa tayyorlash uchun zarurat boʻlganda oʻz mablagʻlari hisobiga:

litsenziya talabgorida litsenziyalanayotgan faoliyat turini amalga oshirish uchun talab qilinadigan mavjud shart-sharoitlarni joyiga borib baholash;

tegishli xulosalar tayyorlash uchun shartnoma asosida ekspertlarni jalb etish huquqiga ega.

17. Litsenziyalovchi organ litsenziya talabgorini qabul qilingan qaror toʻgʻrisida tegishli qaror qabul qilingandan keyin uch kun mobaynida xabardor qiladi.

Litsenziya berishga qaror qabul qilinganligi toʻgʻrisidagi bildirishnoma litsenziya talabgoriga bank hisob raqami rekvizitlari, davlat boji toʻlash muddati koʻrsatilgan holda yozma shaklda yuboriladi (topshiriladi).

18. Litsenziyalovchi organ va litsenziatning oʻzaro huquq va majburiyatlarini belgilovchi litsenziya bitimida quyidagilar boʻlishi kerak:

bitimni imzolagan shaxslarning familiyasi, ismi, otasining ismi, lavozimi;

tomonlarning rekvizitlari;

amalga oshirilishiga litsenziya berilayotgan faoliyat turi (uning bir qismi)ning nomi;

litsenziatga qoʻyiladigan litsenziya talablari va shartlari;

litsenziya bitimi talablari va shartlari buzilganligi uchun tomonlarning javobgarligi;

litsenziya bitimi talablari va shartlari litsenziat tomonidan bajarilishini litsenziyalovchi organ tomonidan nazorat qilish tartibi.

Litsenziya bitimi ikki nusxada — litsenziat va litsenziyalovchi organ uchun bir nusxadan tuziladi.

19. Litsenziyalar maxsus blankalarda rasmiylashtiriladi. Litsenziya blankalari namunalari litsenziyalovchi organ tomonidan tasdiqlanadi va litsenziyalovchi organ buyurtmasi boʻyicha “Davlat belgisi” davlat-ishlab chiqarish birlashmasida bosmaxona usulida tayyorlanadi. Litsenziyalovchi organ litsenziyalar blankalarining saqlanishi uchun javob beradi.

Litsenziyalovchi organ nomidan litsenziyalar Oʻzbekiston Respublikasi Ichki ishlar vazirligi tomonidan vakolat berilgan shaxs tomonidan imzolanadi hamda litsenziya talabgori tomonidan davlat boji toʻlanganini tasdiqlovchi hujjat taqdim etilgandan va u litsenziya bitimini imzolagandan keyin beriladi.

20. Agar litsenziat litsenziya berish toʻgʻrisida qaror qabul qilinganligi haqidagi bildirishnoma yuborilgan (topshirilgan) vaqtdan boshlab uch oy mobaynida litsenziyalovchi organga litsenziya berilganligi uchun davlat boji toʻlanganligini tasdiqlovchi hujjatni taqdim etmasa yoxud litsenziya bitimini imzolamasa, litsenziyalovchi organ litsenziya berish toʻgʻrisidagi qarorni bekor qilishga haqlidir.

21. Litsenziya berish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 17-moddasida nazarda tutilgan asoslar boʻyicha rad etilishi mumkin.

22. Litsenziya berishni rad etish toʻgʻrisida qaror qabul qilingan taqdirda rad etish toʻgʻrisidagi bildirishnoma litsenziya talabgoriga rad etishning aniq sabablari va litsenziya talabgori koʻrsatib oʻtilgan sabablarni bartaraf etib hujjatlarni takroran koʻrib chiqishga taqdim etishi uchun yetarli boʻlgan muddat koʻrsatilgan holda yozma shaklda yuboriladi (topshiriladi). Litsenziya berishni rad etish haqidagi bildirishnomada koʻrsatilgan muddat kamchiliklarni bartaraf etish uchun zarur boʻlgan vaqtga mutanosib boʻlishi kerak.

23. Litsenziya berishni rad etish uchun asos boʻlgan sabablar litsenziya talabgori tomonidan bartaraf etilgan taqdirda, hujjatlarni takroran koʻrib chiqish litsenziyalovchi organ tomonidan koʻrsatilgan kamchiliklar litsenziya talabgori tomonidan bartaraf etilganligini tasdiqlovchi zarur hujjatlar (dalolatnomalar, maʼlumotnomalar, sertifikatlar, formulyarlar va boshqalar) bilan birgalikda arizasi olingan kundan boshlab oʻn kun mobaynida amalga oshiriladi. Bunda litsenziya talabgorining arizasi takroran koʻrib chiqilganligi uchun yigʻim undirilmaydi.

24. Litsenziya talabgorining arizasini qayta koʻrib chiqishda ilgari litsenziya berishni rad etish toʻgʻrisidagi bildirishnomada koʻrsatilmagan yangi asoslar boʻyicha litsenziya berishni rad etishga yoʻl qoʻyilmaydi.

Litsenziya berish rad etilganligi toʻgʻrisidagi bildirishnomada koʻrsatilgan muddat tamom boʻlgandan keyin berilgan ariza yangidan berilgan ariza hisoblanadi.

25. Litsenziya talabgori litsenziyalovchi organning litsenziya berishni rad etish toʻgʻrisidagi qaroridan norozi boʻlgan taqdirda ushbu qaror, shuningdek, litsenziyalovchi organ mansabdor shaxsining xatti-harakatlari (harakatsizligi) ustidan qonun hujjatlarida belgilangan tartibda shikoyat qilish huquqiga ega.

5-bob. Litsenziyani qayta rasmiylashtirish va dublikat berish

26. Yuridik shaxs-litsenziat qayta tashkil etilgan, uning nomi yoki joylashgan joyi (pochta manzili) oʻzgargan taqdirda, litsenziat yoki uning huquqiy vorisi qayta roʻyxatdan oʻtkazilgandan keyin bir oy muddatda litsenziyalovchi organga koʻrsatib oʻtilgan maʼlumotlarni tasdiqlovchi tegishli hujjatlar ilova qilingan holda litsenziyani qayta rasmiylashtirish toʻgʻrisida ariza berishi shart.

27. Litsenziyalovchi organ tegishli hujjatlar ilova qilingan holda ariza olingan kundan boshlab besh ish kuni mobaynida litsenziyani qayta rasmiylashtiradi hamda litsenziyalar reyestriga tegishli oʻzgartirishlar kiritadi.

Litsenziyalarni qayta rasmiylashtirishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi litsenziyalovchi organning hisob raqamiga oʻtkaziladi.

28. Litsenziat litsenziya qayta rasmiylashtirilgunga qadar unda koʻrsatilgan faoliyatni ilgari berilgan litsenziya asosida amalga oshiradi.

29. Yoʻqolgan yoki yaroqsiz holga kelgan litsenziya oʻrniga litsenziatning arizasiga koʻra dublikat berilishi mumkin. Bunda litsenziat ommaviy axborot vositalarida yoʻqolgan yoki yaroqsiz holga kelgan litsenziyaning haqiqiy emasligi toʻgʻrisida axborot eʼlon qilishi va eʼlonni litsenziyalovchi organga taqdim etishi shart.

Litsenziya dublikatlarini berishda litsenziya talabgorining litsenziya berish toʻgʻrisidagi arizasi koʻrib chiqilganligi uchun toʻlanadigan summaning yarmi miqdorida yigʻim undiriladi. Yigʻim summasi litsenziyalovchi organning hisob raqamiga oʻtkaziladi.

6-bob. Litsenziya talablari va shartlariga rioya etilishini nazorat qilish

30. Litsenziat tomonidan litsenziya talablari va shartlariga rioya etilishi ustidan nazorat litsenziyalovchi organ tomonidan qonun hujjatlarida belgilangan tartibda amalga oshiriladi.

31. Litsenziya talablari va shartlariga rioya etilishi ustidan nazoratni amalga oshirishda litsenziyalovchi organ oʻz vakolatlari doirasida:

litsenziat tomonidan litsenziya talablari va shartlariga rioya etilishini qonun hujjatlarida belgilangan tartibda rejali tekshirish;

litsenziat tomonidan litsenziya talablari va shartlari buzilganligidan dalolat beruvchi hollar mavjud boʻlgan taqdirda litsenziatning ularga rioya etishini qonun hujjatlarida belgilangan tartibda rejadan tashqari tekshirish;

litsenziya talablari va shartlariga rioya etilishini tekshirish chogʻida paydo boʻladigan masalalar yuzasidan litsenziatdan zarur axborotni soʻrash va olish;

tekshirishlar natijalari asosida litsenziat tomonidan litsenziya talablari va shartlarining aniq buzilishlarini koʻrsatgan holda dalolatnomalar (maʼlumotnomalar) tuzish;

aniqlangan buzilishlarni bartaraf etish yuzasidan litsenziatga majburiyat yuklovchi qarorlar qabul qilish;

litsenziyaning amal qilishini toʻxtatib turish, toʻxtatish yoxud bekor qilish toʻgʻrisida qonun hujjatlarida belgilangan tartibda qaror chiqarish yoki sudga murojaat qilish.

32. Litsenziya talablari va shartlariga rioya etilishini tekshirish chogʻida litsenziyalovchi organning tekshiruvchi xodimlari tomonidan ikki nusxada dalolatnoma tuziladi, uning bir nusxasi litsenziatga beriladi, ikkinchi nusxasi litsenziyalovchi organda qoladi.

7-bob. Litsenziyaning amal qilishini toʻxtatib turish, toʻxtatish va litsenziyani bekor qilish

33. Litsenziyaning amal qilishini toʻxtatib turish va toʻxtatish, uni bekor qilish “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonunining 22 — 24-moddalarida nazarda tutilgan hollarda va tartibda amalga oshiriladi.

34. Litsenziyalovchi organning litsenziyaning amal qilishini toʻxtatib turish va toʻxtatish, uni bekor qilish toʻgʻrisidagi qarori yuzasidan sudga shikoyat qilinishi mumkin. Litsenziyalovchi organ tomonidan qabul qilingan qaror asossiz ekanligi sud tomonidan eʼtirof etilgan taqdirda, litsenziyalovchi organ litsenziat oldida litsenziat koʻrgan zarar miqdorida javob beradi.

8-bob. Litsenziyalar reyestri

35. Litsenziyalovchi organ berilgan litsenziyalar reyestrini yuritadi.

36. Reyestrda:

yuridik shaxsning nomi, uning tashkiliy-huquqiy shakli, pochta manzili, telefoni;

litsenziyalanadigan faoliyat turining nomi;

litsenziyaning berilgan sanasi va tartib raqami;

litsenziyani qayta rasmiylashtirish, uning amal qilishini toʻxtatib turish va tiklashning asoslari va sanasi;

litsenziyaning amal qilishini toʻxtatish asoslari va sanasi;

litsenziyani bekor qilish asoslari va sanasi koʻrsatiladi.

37. Litsenziyalar reyestrida mavjud boʻlgan maʼlumotlar litsenziyalovchi organning veb-saytida joylashtiriladi va tanishish uchun ochiq boʻladi.

9-bob. Litsenziya berganlik uchun davlat boji

38. Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini amalga oshirish uchun litsenziya berganlik va uning amal qilish muddatini uzaytirganlik uchun “Davlat boji toʻgʻrisida”gi Oʻzbekiston Respublikasi Qonunida belgilangan miqdorda davlat boji undiriladi.

39. Davlat boji respublika budjetiga oʻtkaziladi.

1. Faoliyatning litsenziyalanadigan turining barcha yoʻnalishlari boʻyicha ishlarni amalga oshirish uchun litsenziat:

xodimlarning ishlashi uchun binoga;

signalizatsiyaning texnik vositalarini va yongʻinni oʻchirish qurilmalarini hamda asboblarni saqlash uchun binoga (yoki ajratilgan joyga);

loyiha-smeta hujjatlarini saqlash uchun temir sandiqqa;

qoʻriqlash-yongʻin tizimlari va yongʻinni oʻchirishning avtomatlashtirilgan tizimlarini loyihalashtirish, montaj qilish, sozlash, taʼmirlash va ularga texnik xizmat koʻrsatish sohasida qonun hujjatlariga, texnik reglamentlarga, ishlarni bajarish va qabul qilish normalari va qoidalariga ega boʻlishi kerak*.

2. Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarini loyihalashtirish boʻyicha faoliyatni amalga oshirish uchun litsenziat 1-bandda koʻrsatilganlardan tashqari:

avtomatlashtirilgan loyihalashtirish uchun dasturiy-grafik kompleksli Pentium IV shaxsiy kompyuterga (undan past emas);

grafik materiallarni bosish uchun qurilmaga ega boʻlishi kerak.

3. Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlovchi signalizatsiyalarni montaj qilish, sozlash, taʼmirlash va ularga texnik xizmat koʻrsatish faoliyatini amalga oshirish uchun litsenziat 1-bandda koʻrsatilganlardan tashqari quyidagi jadvalda koʻrsatilgan priborlarga, asbob-uskunalarga va vositalarga ega boʻlishi kerak:

Pribor, asbob-uskuna va vositaning nomi Pribor, asbob-uskuna va vositaning turi Kombinatsiyalashtirilgan pribor S-4312 (4311) yoki shunga oʻxshash Megommetr M-1101M E6-4A yoki shunga oʻxshash Shumomer Sh-71 yoki shunga oʻxshash Elektr kavsharlagich Istalgan turi Elektr perforator Istalgan turi Elektr parmadasta Istalgan turi Chilangarlik asboblari toʻplami Istalgan turi Elektr montaj asboblari toʻplami Istalgan turi Montaj qiluvchining kaskasi Istalgan turi Montaj qiluvchining kamari Istalgan turi Narvon Istalgan turi Ikki yoqqa ochiladigan narvon Istalgan turi Kompressor SO-7 yoki shunga oʻxshash — faqat yongʻinni oʻchirish qurilmalarini montaj qilish, sozlash va taʼmirlash uchun

* Texnik jihatdan tartibga solish sohasidagi asosiy normativ-huquqiy hujjatlar va normativ hujjatlar roʻyxati litsenziyalovchi organning saytida joylashtiriladi.

Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va qoʻriqlash-yongʻindan saqlash signalizatsiyalarni loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini litsenziyalash toʻgʻrisidagi nizomga 2-ILOVA

SXEMASI

Vazirlar Mahkamasining 2018-yil 27-oktabrdagi 880-son qaroriga 2-ILOVA

Oʻzbekiston Respublikasi Vazirlar Mahkamasining oʻz kuchini yoʻqotgan deb eʼtirof etilayotgan ayrim qarorlari

ROʻYXATI

1. Vazirlar Mahkamasining “Yongʻinga qarshi avtomatika vositalarini, qoʻriqlash signalizatsiyalarini, yongʻindan darak beruvchi va yongʻindan saqlovchi signalizatsiyalarni loyihalashtirish, montaj qilish, sozlash, taʼmirlash va ularga texnik xizmat koʻrsatish faoliyatini litsenziyalash toʻgʻrisidagi nizomni tasdiqlash haqida” 2004-yil 22-martdagi 136-son qarori (Oʻzbekiston Respublikasi QT, 2004-y., 3-son, 32-modda).

2. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (“Tadbirkorlik subyektlarini huquqiy himoya qilish tizimi takomillashtirilganligi hamda ularning moliyaviy javobgarligi erkinlashtirilganligi munosabati bilan Oʻzbekiston Respublikasining ayrim qonun hujjatlariga oʻzgartirish va qoʻshimchalar kiritish toʻgʻrisida” Oʻzbekiston Respublikasining 2006-yil 10-oktabrdagi OʻRQ-59-son Qonuni)” 2006-yil 10-noyabrdagi 235-son qaroriga (Oʻzbekiston Respublikasi QT, 2006-y., 11-son, 86-modda) 1-ilovaning 56-bandi.

3. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida (Oʻzbekiston Respublikasining “Faoliyatning ayrim turlarini litsenziyalash toʻgʻrisida”gi Oʻzbekiston Respublikasi Qonuniga oʻzgartish va qoʻshimchalar kiritish haqida” 2011-yil 7-sentabrdagi OʻRQ-292-son Qonuni)” 2012-yil 1-fevraldagi 26-son qaroriga (Oʻzbekiston Respublikasi QT, 2012-y., 2-son, 5-modda) ilovaning 29-bandi.

4. Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish, shuningdek baʼzilarini oʻz kuchini yoʻqotgan deb hisoblash toʻgʻrisida (Oʻzbekiston Respublikasi Prezidentining “Statistik, soliq va moliyaviy hisobotlarni, litsenziyalanadigan faoliyat turlarini va ruxsat berish tartib-taomillarini tubdan qisqartirish chora-tadbirlari toʻgʻrisida” 2012-yil 16-iyuldagi PF-4453-son Farmoni)” 2012-yil 1-noyabrdagi 313-son qaroriga (Oʻzbekiston Respublikasi QT, 2012-y., 11-son, 79-modda) 1-ilovaning 62-bandi.