Hamkorlik toʻgʻrisida memorandum

05.09.2018

Oʻzbekiston Respublikasi Adliya vazirligi bilan Misr Arab Respublikasi Adliya vazirligi oʻrtasida

Oʻzbekiston Respublikasi Adliya vazirligi va Misr Arab Respublikasi Adliya vazirligi, keyingi oʻrinlarda “Tomonlar” deb ataluvchilar,

huquqiy sohadagi xalqaro hamkorlikning muhimligini inobatga olgan holda,

oʻzaro qiziqish uygʻotadigan masalalar boʻyicha hamkorlikni rivojlantirish boʻyicha oʻzaro intilishni hisobga olib,

quyidagilar toʻgʻrisida anglashuvga erishdilar:

1-modda

Tomonlar mazkur Memorandumga muvofiq oʻz vakolatlari doirasida hamda oʻz davlatlarining milliy qonunchiligi va xalqaro majburiyatlariga binoan quyidagi yoʻnalishlarda hamkorlik qiladilar:

1) fuqarolarning huquqiy ongi va huquqiy madaniyatini yuksaltirish;

2) Tomonlar davlatlari qonunchiligiga muvofiq qonun ijodkorligi mexanizmi;

3) yuridik xizmat koʻrsatish;

4) arbitraj va mediatsiya;

5) yuridik kadrlarni tayyorlash va kasbiy rivojlantirish.

2-modda

Mazkur Memorandumning 1-moddasida qayd etilgan hamkorlik sohalari quyidagi shakllarda amalga oshiriladi:

1) Tomonlar davlatlarining adliya organlari va muassasalari faoliyati bilan yanada yaqinroq tanishish uchun Tomonlarning delegatsiyalari bilan almashish;

2) qoʻshma tadqiqotlar tashkil etish va oʻtkazish uchun ishchi guruhlarni tuzish;

3) konferensiyalar, seminarlar, mashgʻulotlar, ishchi guruhlarning ishchi uchrashuvlarini tashkil etish;

4) muntazam ravishda Tomonlar davlatlarining milliy xavfsizligiga zid kelmaydigan huquqiy adabiyotlar va boshqa nashrlarni almashish.

3-modda

Mazkur Memorandumning qoidalarini amalga oshirish uchun Tomonlar oʻzlarining moliyaviy imkoniyatlarini hisobga olgan holda, ikki tomonlama hamkorlik faoliyatlarining yillik rejalarini ishlab chiqadilar.

4-modda

Tomonlar mazkur Memorandum doirasida boshqa Tomondan olingan maʼlumotlar va hujjatlarning maxfiyligini taʼminlaydilar hamda ularni taqdim etgan Tomonning oldindan yozma roziligisiz uchinchi tomonga oshkor etmaydilar.

5-modda

Tomonlar oʻz davlatlaridagi qonun va qoidalarga rioya qilish majburiyatini oʻz zimmalariga oladilar.

6-modda

Tomonlar mazkur Memorandumga muvofiq hamkorlik qilish uchun ingliz tilini ishchi til sifatida qoʻllaydilar.

7-modda

Har bir Tomon mazkur Memorandumni amalga oshirish jarayonida yuzaga keladigan oʻz xarajatlarini, basharti har bir alohida holatda Tomonlar tarafidan oʻzaro boshqacha tarzda kelishilmagan boʻlsa, mustaqil tarzda qoplaydilar.

8-modda

Mazkur Memorandum qoidalari Tomonlarning davlatlari ishtirok etadigan boshqa amaldagi xalqaro shartnomalardan kelib chiqadigan Tomonlarning har qanday huquq va majburiyatlariga daxl qilmaydi.

9-modda

Mazkur Memorandum qoidalarini qoʻllash yoki talqin qilishda kelib chiqadigan har qanday kelishmovchiliklar, kelishish uchun biron-bir milliy, xalqaro va uchinchi tomon sudiga murojaat qilinmasdan, Tomonlar oʻrtasida maslahatlashuvlar va muzokaralar orqali hal etiladi.

10-modda

Mazkur Memorandumga Tomonlarning oʻzaro yozma roziligiga koʻra uning ajralmas qismi hisoblanadigan va Memorandumning 11-moddasida nazarda tutilgan tartibda kuchga kiradigan alohida bayonnomalar shaklida oʻzgartirish va qoʻshimchalar kiritilishi mumkin.

11-modda

Mazkur Memorandum imzolangan sanadan boshlab kuchga kiradi va uch (3) yil davomida amal qiladi, Tomonlardan biri uch oy oldin uning amal qilishini tugatish niyati toʻgʻrisida boshqa Tomonni yozma ravishda xabardor qilmasa, uning amal qilishi oʻz-oʻzidan keyingi uch yillik muddatlarga uzayaveradi.

Toshkent shahrida 2018-yil 5-sentabrda ikki asl nusxada, har biri oʻzbek, arab va ingliz tillarida tuzildi, bunda barcha matnlar teng autentikdir.

Mazkur Memorandumning qoidalarini talqin etishda kelishmovchiliklar yuzaga kelgan taqdirda, ingliz tilidagi matn ustuvor hisoblanadi.

(imzolar)