Arxeologiya, madaniy meros va muzeyshunoslik sohalarida hamkorlik qilish toʻgʻrisida

05.09.2018

Oʻzbekiston Respublikasi Madaniyat vazirligi bilan Misr Arab Respublikasi Qadimiy yodgorliklar vazirligi oʻrtasida

bitim

Oʻzbekiston Respublikasi Madaniyat vazirligi va Misr Arab Respublikasi Qadimiy yodgorliklar vazirligi, keyingi oʻrinlarda “Tomonlar” deb ataluvchilar,

arxeologiya, madaniy meros hamda muzeyshunoslik sohalaridagi xalqaro hamkorlik muhim ahamiyat kasb etishini inobatga olgan holda,

2003-yil 6-noyabrda imzolangan Oʻzbekiston Respublikasi Hukumati bilan Misr Arab Respublikasi Hukumati oʻrtasida madaniy hamkorlik toʻgʻrisidagi Bitimning qoidalariga tayangan holda,

oʻzaro qiziqish uygʻotadigan masalalarda hamkorlikni birgalikda rivojlantirish istagi mavjudligini hisobga olgan holda,

quyidagilar toʻgʻrisida kelishib oldilar:

1-modda

Tomonlar oʻz tegishli davlatlari qonunchiligiga muvofiq qadimiy yodgorliklarni muhofaza qilish va saqlash sohasida ekspertlar, maʼlumotlar va nashrlar almashinuvini ragʻbatlantiradilar va qoʻllab-quvvatlaydilar.

2-modda

Tomonlar oʻz tegishli davlatlari qonunchiligiga muvofiq arxeologiya va obyektlarni saqlash sohasida stipendiyalar almashinuvi hamda ikki tomonlama tadqiqotlarni nashr etishni qoʻllab-quvvatlaydilar.

3-modda

Tomonlar har bir davlatlarda madaniy meros obyektlarini muhofaza qilish va saqlash boʻyicha tashabbuslarni qoʻllab- quvvatlaydilar.

4-modda

Tomonlar arxeologiya, obyektlarni saqlash va muzeyshunoslik sohalariga taalluqli boʻlgan qonun hujjatlari toʻgʻrisida maʼlumot almashadilar.

5-modda

Tomonlar oʻrtasida almashiladigan barcha maʼlumotlar qatʼiy ravishda maxfiy hisoblanadi va boshqa Tomonning oldindan yozma roziligisiz uchinchi tomonga oshkor etilishi mumkin emas. Shuningdek, ulardan mazkur Bitimda nazarda tutilmagan maqsadlarda ham foydalanilmaydi.

6-modda

Tomonlar oʻz davlatlaridagi qonun va qoidalarga rioya qilish majburiyatini oʻz zimmalariga oladilar.

7-modda

Tomonlar oʻz tegishli davlatlari qonunchiligiga muvofiq har bir davlat sivilizatsiyasini tanishtiruvchi qadimiy yodgorliklar va eksponat nusxalari koʻrgazmalarini tashkil qilishni ragʻbatlantiradilar.

8-modda

Tomonlar mazkur Bitimni tatbiq etishni kuzatib borish va baholash uchun ikki davlat mutaxassislarini oʻz ichiga olgan qoʻshma Texnik-ilmiy qoʻmitani tashkil qiladilar.

9-modda

Tomonlar mazkur Bitimni tatbiq etish bilan bogʻliq boʻlgan har qanday loyihani 8-moddada qayd etilgan Texnik-ilmiy qoʻmita tasdigʻi asosida Tomonlar oʻrtasida alohida bitim imzolash orqali amalga oshirishga kelishib oldilar.

10-modda

Tomonlar har ikki davlat qonunchiligiga muvofiq ularning muzeylari oʻrtasida qoʻshma ilmiy tadqiqot loyihalarini amalga oshirishdagi oʻzaro hamkorlikni ragʻbatlantiradilar.

11-modda

Mazkur Bitimga Tomonlarning oʻzaro kelishuviga muvofiq mazkur Bitimning 12-moddasida belgilangan tarzda kuchga kiradigan alohida bayonnomalar bilan rasmiylashtiriladigan hamda uning ajralmas qismi hisoblanadigan oʻzgartirish va qoʻshimchalar kiritilishi mumkin.

12-modda

Mazkur Bitim imzolangan sanadan boshlab kuchga kiradi va uch (3) yil davomida amal qiladi, Tomonlardan biri uch oy oldin uning amal qilishini tugatish niyati toʻgʻrisida boshqa Tomonni yozma ravishda xabardor qilmasa, uning amal qilishi oʻz-oʻzidan keyingi uch yillik muddatlarga uzayaveradi.

Toshkent shahrida 2018-yil 5-sentabrda har biri oʻzbek, arab va ingliz tillarida boʻlgan ikki asl nusxada tuzildi, bunda barcha matnlar teng autentikdir.

Mazkur Bitim qoidalarini talqin qilishda kelishmovchiliklar yuzaga kelgan taqdirda, ingliz tilidagi matn ustuvor hisoblanadi.

(imzolar)