Xalqaro tiklanish va taraqqiyot banki ishtirokida “Qishloq xoʻjaligi korxonalarini qoʻllab-quvvatlash” loyihasini amalga oshirishga tayyorlanish chora-tadbirlari toʻgʻrisida (461-son)

26.11.2001

Oʻzbekiston Respublikasi Vazirlar Mahkamasining

qarori

Qishloq xoʻjaligida iqtisodiy islohotlarni yanada chuqurlashtirish, qishloq xoʻjaligi ishlab chiqarishi samaradorligini oshirish va qishloq infratuzilmasini rivojlantirish, shuningdek Xalqaro tiklanish va taraqqiyot banki bilan hamkorlikni kengaytirish maqsadida Vazirlar Mahkamasi qaror qiladi:

1. Maʼlumot uchun qabul qilinsinki, Xalqaro tiklanish va taraqqiyot banki tomonidan uning “Qishloq xoʻjaligi korxonalarini qoʻllab-quvvatlash” loyihasini amalga oshirishga qarz berishga tayyorligi bildirilgan va loyihaning umumiy parametrlari belgilangan, ularga muvofiq:

loyiha respublikaning beshta tumanida — Ellikqalʼa (Qoraqalpogʻiston Respublikasi), Marhamat (Andijon viloyati), Nishon (Qashqadaryo viloyati), Sherobod (Surxondaryo viloyati), Ohangaron (Toshkent viloyati) tumanlarida amalga oshiriladi;

loyihaning 43,46 mln AQSh dollari miqdoridagi umumiy qiymati va tomonlarning uni mablagʻ bilan taʼminlashdagi ishtiroki belgilangan, shu jumladan Xalqaro tiklanish va taraqqiyot banki tomonidan 5 yildan iborat imtiyozli davrni qoʻshgan holda 20 yil muddatga 36,1 mln AQSh dollari miqdorida kredit berilishi koʻrsatilgan (1-ilova*);

* 1-ilova berilmaydi.

loyihani amalga oshirish davri besh yildan iborat qilib belgilangan;

xoʻjaliklararo va xoʻjaliklar ichidagi irrigatsiya shoxobchalarini rekonstruksiya qilish va qurish ishlari, muqobil mashina-traktor parklarini va agroservis markazlarini jihozlash uchun moʻljallangan revolver kredit liniyalari, shuningdek loyihada qatnashuvchi tumanlar xoʻjaliklari tomonidan aylanma mablagʻlarni toʻldirish hamda texnika va asbob-uskunalar sotib olish hajmlari belgilangan;

loyihada qatnashuvchi tumanlarda ishlab chiqarishni tashkil etishning yangi metodlarini va qishloq xoʻjaligi mahsulotlari marketingini sinab koʻrish nazarda tutilgan.

2. Belgilab qoʻyilsinki, loyihada qatnashuvchi tumanlarda tajriba tariqasida:

2002-yil hosilidan boshlab davlat ehtiyojlari uchun paxta xomashyosi va boshoqli don xarid qilish boʻyicha topshiriqlar oʻrniga ularga 2-ilovaga* muvofiq qatʼiy belgilangan xarid kvotalari belgilanadi;

* 2-ilova berilmaydi.

belgilangan xarid kvotalaridan ortiqcha yetishtirilgan paxta xomashyosi va boshoqli don qishloq xoʻjaligi korxonalari va fermer xoʻjaliklari tomonidan shartnomaviy narxlar boʻyicha sotiladi;

paxta xomashyosi boʻyicha xarid kvotalarini bajargan qishloq xoʻjaligi tovar ishlab chiqaruvchilari, qayta ishlovchi korxonalarga qayta ishlash xarajatlari qaytarilgandan soʻng, paxta xomashyosini qayta ishlashdan olingan qoʻshimcha mahsulotlarni oʻz xohishlariga koʻra tasarruf etadilar.

3. Belgilansinki:

xarid kvotalari loyihada qatnashuvchi tumanlarning qishloq xoʻjaligi tovar ishlab chiqaruvchilari oʻrtasida ular tomonidan foydalaniladigan qishloq xoʻjaligi yer maydonlari va sifatini hisobga olgan holda taqsimlanadi;

har bir alohida xoʻjalik paxta xomashyosi va boshoqli don boʻyicha oʻziga belgilangan xarid kvotalarining bajarilishi uchun mustaqil ravishda javob beradi.

4. Loyihani amalga oshirishga doir birinchi navbatdagi tadbirlar roʻyxati 3-ilovaga* muvofiq tasdiqlansin.

* 3-ilova berilmaydi.

5. Oʻzbekiston Respublikasi Makroiqtisodiyot va statistika vazirligi, Qishloq va suv xoʻjaligi vazirligi:

Qoraqalpogʻiston Respublikasi Vazirlar Kengashi va manfaatdor viloyatlar hokimliklari bilan birgalikda loyihada qatnashuvchi tumanlarning qishloq xoʻjaligi korxonalari va fermer xoʻjaliklari uchun paxta xomashyosi va boshoqli don boʻyicha xarid kvotalarini taqsimlashning ularni bajarish yuzasidan javobgarlikni nazarda tutuvchi mexanizmini ikki oy muddatda ishlab chiqsinlar va joriy etsinlar;

Oʻzbekiston Respublikasi Moliya vazirligi va Tashqi iqtisodiy aloqalar vazirligi bilan birgalikda loyihada qatnashuvchi tumanlarning qishloq xoʻjaligi tovar ishlab chiqaruvchilari tomonidan belgilangan xarid kvotalaridan ortiqcha yetishtirilgan qishloq xoʻjaligi mahsulotlarini sotish tartibi toʻgʻrisidagi vaqtinchalik nizomni bir oy muddatda ishlab chiqsinlar va belgilangan tartibda tasdiqlasinlar.

6. Oʻzbekiston Respublikasi Qishloq va suv xoʻjaligi vazirligi, Moliya vazirligi:

Xalqaro tiklanish va taraqqiyot banki Direktorlar Kengashi tomonidan loyihani koʻrib chiqish yakunlari boʻyicha bir oy muddatda Vazirlar Mahkamasiga uni amalga oshirish chora-tadbirlari, shu jumladan loyihani tashkiliy boshqarish va kreditni qaytarish masalalari toʻgʻrisida takliflar kiritsinlar;

Oʻzbekiston Respublikasi Makroiqtisodiyot va statistika vazirligi bilan birgalikda oʻtkazilayotgan eksperimentning borishini va natijalarini chuqur tahlil qilsinlar, zarurat boʻlganda Vazirlar Mahkamasiga tegishli takliflar kiritsinlar.

7. Vazirlar Mahkamasining “Xalqaro tiklanish va taraqqiyot banki qarzi doirasida “Oʻzbekiston Respublikasi qishloq xoʻjaligi korxonalarini tarkibiy qayta tuzish” loyihasi amalga oshirilishini jadallashtirish chora-tadbirlari toʻgʻrisida” 1998-yil 19-avgustdagi 356-son qarori 1-bandining toʻrtinchi xatboshi oʻz kuchini yoʻqotgan deb hisoblansin.

8. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari R.S. Azimov va T.X. Xoltoyev zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2001-yil 26-noyabr,

461-son