Chet el diplomatik vakolatxonalarini joylashtirish uchun maʼmuriy binolarni toshkent shahar hokimligi ixtiyoriga berish toʻgʻrisida (108-son)

07.03.1992

OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING

qarori

Oʻzbekiston Respublikasi Prezidenti huzuridagi Vazirlar Mahkamasining “Toshkentda ishbilarmonlar uchrashuvini oʻtkazish yakunlari toʻgʻrisida” 1991-yil 10-oktabrdagi 254-son qaroriga, Oʻzbekiston Respublikasi Prezidentining “Toshkent shahrida chet el diplomatik vakolatxonalari uchun binolar qurish va ajratish, ularning faoliyatini zarur sharoitlar bilan taʼminlash toʻgʻrisida” 1992-yil 11-yanvardagi R-122-son farmoyishiga muvofiq Vazirlar Mahkamasi qaror qiladi:

1. Vazirliklar, idoralar, muassasalar va tashkilotlar chet el diplomatik vakolatxonalarini joylashtirish uchun maʼmuriy binolarni shahar hokimligi bilan 1-ilovaga* muvofiq kelishilgan muddatlarda Toshkent shahar hokimligi ixtiyoriga bersinlar.

* 1-ilova berilmaydi.

2. Koʻchirilayotgan tashkilotlar, vazirliklar, idoralarning apparatlarini joylashtirish uchun 2-ilovaga* muvofiq yotoqxonalar binosi, V.I. Lenin nomidagi ToshDUning falsafa, tarix fakultetlari va malaka oshirish institutining binosi Amir Temur koʻchasi, 60-a uydagi yotoqxona bilan birga, shuningdek, Rus tili va adabiyoti institutining Furqat koʻchasida qurilayotgan binosi Toshkent shahar hokimligi balansiga berilsin.

* 2-ilova berilmaydi.

3. Oʻzbekiston Respublikasi Energetika va elektrlashtirish vazirligi, “Toshkentboshqurilish”, Melioratsiya va suv xoʻjaligi vazirligi 1-ilovada koʻrsatilgan tashkilotlarni ularni zichlashtirish hisobiga joylashtirsinlar.

4. Oʻzbekiston Respublikasi Davlat oʻrmon qoʻmitasi, Davlat jismoniy tarbiya va sport qoʻmitasi, Sogʻliqni saqlash vazirligi, Oʻrta Osiyo Tibbiyot fanlari akademiyasining apparatlari Rus tili va adabiyoti institutining Furqat koʻchasida qurilayotgan binosiga joylashtirilsin.

5. ToshDU falsafa, tarix fakultetlari va malaka oshirish instituti kontingenti bilan Oliy oʻquv yurtlari shaharchasida Sharqshunoslik instituti binolarida joylashtirilsin, Amir Temur koʻchasi, 60-a uydagi shu munosabat bilan boʻshab qolgan joylarga Oʻzbekiston Respublikasi xoʻjalik hisobidagi “Sayyoh-Intur” birlashmasi va “Vatanparvar” MKT Markaziy Kengashining apparatlari joylashtirilsin.

Oʻzbekiston Respublikasi Xalq taʼlimi vazirligi respublika uslubiyat markazining Lohutiy koʻchasida qurilayotgan binosiga Toshkent davlat sharqshunoslik instituti joylashtirilsin.

7. Chkalov nomidagi Toshkent aviatsiya ishlab chiqarish birlashmasi (oʻrtoq Juravlev) “Mineral” ilmiy-tadqiqot institutining 60 kishilik xodimlarini joylashtirish uchun shahar hokimligi bilan kelishilgan muddatlarda, xonalar ajratsin.

8. Buyurtmachilar: Oʻzbekiston Respublikasi Xalq taʼlimi vazirligi, “Oʻzradioelektrotexasbob” konserni Oʻzbekiston hisoblash texnikasi va informatika ishlab chiqarish birlashmasi, bosh pudratchi tashkilot – “Toshkentboshqurilish” Rus tili va adabiyot instituti, Oʻzbekiston Respublikasi Xalq taʼlimi vazirligining uslubiyat markazi, Oʻzbekiston hisoblash texnikasi va informatika ishlab chiqarish birlashmasining texnik xizmat koʻrsatish markazi binolari qurilishini 1992-yil iyun oyida tugallashni taʼminlasinlar.

Oʻzbekiston Respublikasi Moliya vazirligi qayd qilingan inshootlar qurilishini tugallash uchun respublika budjetidan Oʻzbekiston Respublikasi Xalq taʼlimi vazirligiga qoʻshimcha ravishda 26,0 mln. soʻm va Oʻzbekiston hisoblash texnikasi va informatika ishlab chiqarish birlashmasiga 3,5 mln. soʻm ajratsin”.

9. Toshkent shahar hokimligi:

1-ilovada sanab oʻtilgan barcha korxonalar va tashkilotlarning boshqaruv apparatlarini (3, 4, 5, 6 va 7-bandlarda nazarda tutilganlardan tashqari) 2-ilovaga muvofiq Toshkent shahar hokimligiga berilayotgan yotoqxonalar binosiga joylashtirsin;

kelishilgan muddatlarda respublika qurilish tashkilotlarining kuchlari bilan boʻshayotgan binolarni qayta qurish, kapital taʼmirlash va obodonlashtirishga doir ishlarning bajarilishini va ularni 3-ilovaga* muvofiq chet el vakolatxonalarini joylashtirish uchun berishni taʼminlasin;

*3-ilova berilmaydi.

koʻchib oʻtilgandan keyin bir oy muddat ichida vazirliklar, idoralar, tashkilotlar va muassasalar bilan shartnomalar tuzsin, binolarni ijaraga olish uchun tegishli orderlar bersin va maʼmuriy binolardan foydalanish tartibini tasdiqlasin.

10. Mazkur qarorning bajarilishini nazorat qilish Vazirlar Mahkamasining tarmoq komplekslariga va Oʻzbekiston Respublikasi Prezidenti apparati Ishlar Boshqarmasiga yuklatilsin.

Oʻzbekiston Respublikasining Bosh vaziri A. MUTALOV

Toshkent sh.,

1992-yil 7-mart,

108-son