“Sirdaryo viloyatining Shirin shahridagi “Farxod GES” UKni modernizatsiya qilish” investitsiya loyihasini amalga oshirish chora-tadbirlari toʻgʻrisida (827-son)

16.10.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “2017 — 2021-yillarda gidroenergetikani yanada rivojlantirish chora-tadbirlari dasturi toʻgʻrisida” 2017-yil 2-maydagi PQ-2947-son qaroriga muvofiq hamda zamonaviy texnologiyalardan foydalanish negizida mavjud gidroelektrostansiyalarni texnik va texnologik qayta jihozlashni taʼminlash, suv resurslarini samarali boshqarish, shuningdek, iqtisodiyot tarmoqlari va respublika aholisining elektr energiyasiga boʻlgan ehtiyojlarini uzluksiz qondirish maqsadida Vazirlar Mahkamasi qaror qiladi:

1. “Sirdaryo viloyati Shirin shahridagi “Farhod GES” UKni modernizatsiya qilish” investitsiya loyihasini (keyingi oʻrinlarda investitsiya loyihasi deb ataladi) amalga oshirish doirasida:

“Oʻzbekgidroenergo” AJ va “Siloviye mashini — ZTL, LMZ, Elektrosila, Energomasheksport” OAJ (Rossiya Federatsiyasi) oʻrtasida Farhod GESni foydalanishga tayyor holda topshirish shartlarida modernizatsiya qilish boʻyicha umumiy qiymati 56,52 mln. yevro boʻlgan kontrakt tuzilgan boʻlib, u boʻyicha Oʻzbekiston Respublikasi Investitsiyalar boʻyicha davlat qoʻmitasi va “Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import kontraktlarini kompleks ekspertiza qilish markazi” DUKning belgilangan tartibda ijobiy xulosalari olingan;

“Gidroproyekt” AJ tomonidan 58,27 mln. yevro ekvivalentidagi kapital qoʻyilmalar summasiga teng investitsiya loyihasining texnik-iqtisodiy asosi ishlab chiqilgan va “Oʻzbekiston Respublikasi Prezidenti huzuridagi Loyiha boshqaruvi milliy agentligi qoshidagi Loyihalar va import kontraktlarini kompleks ekspertiza qilish markazi” DUKda ekspertizadan oʻtkazilib, ijobiy xulosa berilgan;

Rossiya Federatsiyasining “Taraqqiyot va tashqi iqtisodiy faoliyat banki (Tashqi iqtisodiyot banki)” davlat korporatsiyasi (keyingi oʻrinlarda “Tashqi iqtisodiyot banki” deb ataladi) va Oʻzbekiston Respublikasi Tashqi iqtisodiy faoliyat milliy banki (keyingi oʻrinlarda “Oʻzmilliybank” deb ataladi) oʻrtasida kredit liniyasi ochish toʻgʻrisida shartnoma tuzilganligi;

Oʻzbekiston Respublikasi Prezidentining 2018-yil 16-iyuldagi “Xalqaro moliya institutlari va xorijiy hukumat moliya tashkilotlari ishtirokidagi loyihalarni tayyorlash va amalga oshirish samaradorligini oshirish chora-tadbirlari toʻgʻrisida”gi PQ-3857-son qaroriga muvofiq investitsiya loyihasini amalga oshirish doirasida xarid qilinadigan tovarlar (ishlar, xizmatlar) 2021-yil 1-iyulga qadar bojxona toʻlovlari (bojxona yigʻimlaridan tashqari) va qoʻshilgan qiymat soligʻidan ozod etiladi.

2. Quyidagilar investitsiya loyihasini moliyalashtirish manbalari etib belgilansin:

Tashqi iqtisodiy bankning 10 yil muddatga, shu jumladan 3 yil imtiyozli davr bilan, yillik 2,35 foizli stavka bilan beriladigan 45,22 mln. yevro miqdoridagi krediti, shu jumladan qayta moliyalashtiruvchi Oʻzmilliy bankning 0,35 foiz miqdoridagi marjasi;

“Oʻzbekgidroenergo” AJning 13,05 mln. yevroga teng boʻlgan oʻz mablagʻlari.

3. Quyidagilar:

“Sirdaryo viloyati Shirin shahridagi “Farhod GES” UKni modernizatsiya qilish” investitsiya loyihasining asosiy texnik-iqtisodiy parametrlari bilan birgalikdagi texnik-iqtisodiy asosi 1-ilovaga muvofiq;

“Sirdaryo viloyatining Shirin shahrida “Farhod GES” UKni modernizatsiya qilish” investitsiya loyihasini amalga oshirish doirasida jalb etiladigan Vneshekonombank krediti boʻyicha asosiy qarzni qaytarish, foizlar va vositachilik haqini toʻlashning prognoz jadvali 2-ilovaga muvofiq tasdiqlansin.

4. Belgilab qoʻyilsinki:

“Oʻzbekgidroenergo” AJ tashabbuskor va qarz oluvchi hisoblanadi, investitsiya loyihasini samarali amalga oshirish, Tashqi iqtisodiy bankning jalb etilayotgan kreditidan maqsadli va samarali foydalanish uchun masʼul hisoblanadi;

jalb etiladigan kreditlarni qaytarish va ularga xizmat koʻrsatish bilan bogʻliq xarajatlar “Oʻzbekgidroenergo” AJning oʻz mablagʻlari hisobidan amalga oshiriladi;

“Oʻzbekgidroenergo” AJning “1-son qurilish direksiyasi” UK loyiha yechimlarining gidroinshootlardan foydalanish ishonchliligi va xavfsizligi talablariga muvofiqligini aniqlash, shuningdek, investitsiya loyihasini amalga oshirishni kuzatib borish va texnik nazorat qilish uchun masʼul boʻlgan ijro etuvchi organ hisoblanadi.

5. Oʻzmilliybankka “Oʻzbekgidroenergo” AJ bilan Tashqi iqtisodiy bank kreditini qayta moliyalashtirish boʻyicha belgilangan tartibda kredit shartnomasi tuzish tavsiya etilsin.

6. “Oʻzbekgidroenergo” AJ va “Silovie mashini — ZTL, LMZ, Elektrosila, Energomasheksport” OAJga (Rossiya Federatsiyasi) investitsiya loyihasini amalga oshirish doirasida qurilish-montaj ishlarini bir vaqtning oʻzida ishchi hujjatlarni ishlab chiqish va 2019-yil 31-dekabrga qadar belgilangan tartibda ekspertizadan oʻtkazishni taʼminlash bilan amalga oshirishga istisno tariqasida ruxsat berilsin.

7. Oʻzbekiston Respublikasi moliya vaziri quyidagi majburiyatlar boʻyicha belgilangan tartibda Oʻzbekiston Respublikasining davlat kafolatlarini berishga vakil qilinsin:

Oʻzmilliybank Tashqi iqtisodiy bank uchun maqbul boʻlgan shaklda Tashqi iqtisodiy bank oldida;

“Oʻzbekgidroenergo” AJ Tashqi iqtisodiy bankning qayta moliyalashtiriladigan krediti boʻyicha Oʻzmilliybankka.

8. Oʻzbekiston Respublikasi Adliya vazirligi Oʻzmilliybankning Tashqi iqtisodiy bank oldidagi majburiyatlari boʻyicha Oʻzbekiston Respublikasining davlat kafolati yuzasidan Tashqi iqtisodiy bank uchun maqbul boʻlgan shaklda belgilangan tartibda yuridik xulosa bersin.

9. Oʻzbekiston Respublikasi Qurilish vazirligi investitsiya loyihasi doirasida qurilish-montaj ishlarining sifatli bajarilishi ustidan davlat arxitektura-qurilish nazoratini oʻrnatsin.

10. Oʻzbekiston Respublikasi Bandlik va mehnat munosabatlari vazirligi “Oʻzbekgidroenergo” AJ buyurtmanomalari boʻyicha investitsiya loyihasini amalga oshirishda ishtirok etuvchi yuqori malakali xorijiy mutaxassislarni (Oʻzbekiston Respublikasi fuqarolari orasida mavjud boʻlmagan) Oʻzbekiston Respublikasiga jalb etishga ruxsatnomalar berilishini (muddati uzaytirilishini), shuningdek, koʻrsatib oʻtilgan xorijiy fuqarolarga Oʻzbekiston Respublikasi hududida mehnat faoliyatini amalga oshirish huquqiga tasdiqnomalar berilishini (muddati uzaytirilishini) belgilangan tartibda taʼminlasin.

11. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari A.S. Sultonov va “Oʻzbekgidroenergo” AJ boshqaruvi raisi A.A. Sanginov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 16-oktabr,

827-son

Vazirlar Mahkamasining 2018-yil 16-oktabrdagi 827-son qaroriga 1-ILOVA

“Sirdaryo viloyati Shirin shahridagi “Farhod GES” UKni modernizatsiya qilish” investitsiya loyihasini texnik-iqtisodiy asoslashning asosiy texnik-iqtisodiy parametrlari

*Investitsiya davridagi moliyaviy xarajatlar kreditni tanlab olishning haqiqiy summalari va sanalaridan kelib chiqib aniqlashtirilishi lozim.

Vazirlar Mahkamasining 2018-yil 16-oktabrdagi 827-son qaroriga 2-ILOVA

“Sirdaryo viloyati shirin shahridagi “Farhod GES” UKni modernizatsiya qilish” investitsiya loyihasini amalga oshirish doirasida jalb etiladigan Vneshekonombank krediti boʻyicha asosiy qarzni qaytarish, foizlar va komissiyalarni toʻlashning prognoz jadvali

Izohlar:

1. Komissiya foizlari aniqlashtirilishi mumkin.

2. Asosiy qarzni birinchi marta toʻlash muddati kredit shartnomasining kuchga kirish sanasiga bogʻliq boʻladi.

3. Komissiya va foizlar haqiqiy summaga, yetkazib berish (tanlash) sanasiga va kredit shartnomasining kuchga kirish sanasiga bogʻliq.

4. Kreditning imtiyozli davri prognoz davri boʻlib, kredit shartnomasining kuchga kirish sanasiga bogʻliq boʻladi.

* Birinchi toʻlov imtiyozli davr tugagan sanadan boshlab 6 oydan keyin amalga oshiriladi.