Oʻzbekiston Respublikasida oʻrmon xoʻjaligi sohasini yanada rivojlantirish va innovatsion texnologiyalarni joriy etish chora-tadbirlari toʻgʻrisida (819-son)

11.10.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasida oʻrmon xoʻjaligi sohasini rivojlantirish, oʻrmon maydonlarini kengaytirish, mavjud oʻrmon fondi yerlarining holatini yaxshilash, yaylovlardan samarali foydalanish, pista, bodom, yongʻoq plantatsiyalarini barpo etish hamda dorivor oʻsimliklarni yetishtirishni koʻpaytirish, innovatsion gʻoyalar va texnologiyalarni joriy etishni tezlashtirish maqsadida Vazirlar Mahkamasi qaror qiladi:

1. Oʻzbekiston Respublikasi Oʻrmon xoʻjaligi davlat qoʻmitasi hamda Innovatsion rivojlanish vazirligining:

Oʻrmon xoʻjaligi ilmiy-tadqiqot instituti huzurida davlat muassasasi shaklidagi Oʻrmon xoʻjaligini rivojlantirish innovatsiya markazini (keyingi oʻrinlarda Innovatsiya markazi deb ataladi);

Oʻzbekiston Respublikasi Oʻrmon xoʻjaligi davlat qoʻmitasi muassisligida “Oʻrmoninvest” davlat unitar korxonasini (keyingi oʻrinlarda “Oʻrmoninvest” DUK deb ataladi) tashkil etish toʻgʻrisidagi takliflariga rozilik berilsin.

2. Quyidagilar Innovatsiya markazining asosiy vazifalari va faoliyat yoʻnalishlari etib belgilansin:

respublika hududining tuproq-iqlim sharoitidan kelib chiqib, oʻrmon barpo etish, oʻrmon fondini har tomonlama kengaytirish, ularni muhofaza qilish va oʻrmon boyliklaridan oqilona foydalanishga doir tadbirlarni amalga oshirish uchun innovatsion texnologiyalarni ishlab chiqish hamda amaliyotga joriy etish;

manzarali, mevali va dorivor oʻsimliklar plantatsiyalarini barpo etish hamda koʻchatxonalar tashkil etishning innovatsion usullarini ishlab chiqish;

yangi oʻsimlik turlarini introduksiya qilish va mahalliy tuproq-iqlim sharoitiga moslashtirish boʻyicha tadqiqotlar olib borish va ularni joriy etish boʻyicha aniq takliflar ishlab chiqish;

oʻrmon fondi yerlarida shoʻrlanishga va suvsizlikka chidamli oʻsimliklarni yetishtirishning ilmiy asoslangan innovatsion texnologiyasini yaratish boʻyicha ilmiy-tadqiqot ishlanmalarini joriy etish;

ilmiy-tadqiqot natijalarini amaliyotga tizimli joriy etishni tashkil qilish;

yangi innovatsion gʻoyalarni qoʻllab-quvvatlash va amaliyotga tatbiq etish takliflarini ishlab chiqish;

noqulay iqlim sharoitiga, zararkunanda va kasalliklarga chidamli oʻrmon oʻsimliklarini introduksiya qilish boʻyicha ilmiy-tadqiqot ishlarini amalga oshirish;

noyob, manzarali, mevali va dorivor oʻsimliklar turlarini jadal koʻpaytirish usullarini ishlab chiqish;

rivojlangan davlatlarning sohaga oid tajribalarini oʻrganish, shu jumladan xorijiy mutaxassislarni va olimlarni hamkorlikda ilmiy-tadqiqotlar olib borish uchun jalb etish;

sohada faoliyat koʻrsatayotgan ilmiy xodimlarning salohiyatini oshirish, ularning chet ellarda muntazam malaka oshirishini tashkil etish va iqtidorli yoshlarni jalb qilish;

xalqaro ilmiy va oʻquv seminarlar hamda anjumanlar tashkil etish.

3. Quyidagilar “Oʻrmoninvest” DUKning asosiy vazifalari va faoliyat yoʻnalishlari etib belgilansin:

oʻrmon xoʻjaliklarida ishlab chiqarish (mahsulotlar, xizmatlar) sifatini yaxshilash uchun xorijiy va mahalliy investorlarni jalb qilish va eksport potensialini oshirish;

ishlab chiqarilayotgan mahsulot va xizmatlar imidjini oshirish va xizmatlar brendini yaratish va jahon bozorida ularning raqobatbardoshligini taʼminlash;

oʻrmon resurslaridan samarali foydalanish va ularni boshqarish boʻyicha loyihalarni ishlab chiqish, amalga oshirish va boshqarish;

sayyohlar uchun qulay shart-sharoitlar yaratish maqsadida investorlarni ekoturizm, ov turizmi va oʻrmon xoʻjaligi rekreatsiya zonalarini rivojlantirish uchun jalb qilish;

qoʻshma korxonalar, savdo uylari, reklama agentliklari, shu jumladan chet elda ishlab chiqarishni tashkil etish;

yuqori likvidli va raqobatbardosh mahsulot ishlab chiqarish va xizmatlar koʻrsatish uchun tuzilmaviy qoʻshma korxonalar uchun zamonaviy korporativ boshqaruv usullarini qoʻllash;

ishlab chiqarilgan va sotilgan mahsulot (tovarlar) va koʻrsatiladigan xizmatlarni realizatsiya qilish uchun marketing tadqiqotlari oʻtkazish va isteʼmol bozorini oʻrganish, shu jumladan eksport qilish strategiyasini amalga oshirish;

oʻrmon xoʻjaligida innovatsion texnologiyalarni joriy etish boʻyicha loyihalarni ishlab chiqish va amalga oshirish;

mahsulotlar (tovarlar) va xizmatlar uchun ichki tizim narxlarining monitoringi va ularning raqobatbardoshligi boʻyicha takliflar tayyorlash;

taqdimot va konsepsiyalarni tayyorlash, oʻtkazish, potensial investorlar bilan uchrashuvlar tashkil etish, xalqaro fondlar va banklardan investitsiyalarni jalb qilish, loyihalarni qoʻllab-quvvatlash uchun kreditlar va grantlar berish boʻyicha muzokaralar olib borish.

4. Oʻrmon xoʻjaligini rivojlantirish innovatsiya markazining tuzilmasi ilovaga muvofiq tasdiqlansin.

5. Oʻzbekiston Respublikasi Oʻrmon xoʻjaligi davlat qoʻmitasi bir oy muddatda:

Innovatsiya markazi hamda “Oʻrmoninvest” DUKning ustavlari tasdiqlanishini va belgilangan tartibda davlat roʻyxatidan oʻtkazilishini taʼminlasin;

“Oʻrmoninvest” DUKning tuzilmasi, shtatlar jadvalini tasdiqlash, moddiy-texnika bazasini shakllantirish hamda bino va malakali kadrlar bilan taʼminlash choralarini koʻrsin.

6. Oʻzbekiston Respublikasi Xususiylashtirilgan korxonalarga koʻmaklashish va raqobatni kuchaytirish davlat qoʻmitasi Andijon viloyat hokimligi va Oʻrmon xoʻjaligi davlat qoʻmitasi bilan birgalikda bir oy muddatda Oʻrmon xoʻjaligini rivojlantirish innovatsiya markazini bino va inshootlar bilan taʼminlash choralarini koʻrsin.

7. Quyidagilar Innovatsiya markazi faoliyatini moliyalashtirishning asosiy manbalari etib belgilansin:

Oʻrmon xoʻjaligi davlat qoʻmitasining Oʻrmon xoʻjaligini rivojlantirish jamgʻarmasidan ajratiladigan mablagʻlar;

Oʻzbekiston Respublikasi respublika budjetidan ajratiladigan mablagʻlar;

davlat ilmiy dasturlari doirasida ajratiladigan grantlar;

xalqaro moliyaviy institutlar va xorijiy donor davlatlarning grantlari, shuningdek homiylik xayriyalari hamda qonun hujjatlarida taqiqlanmagan boshqa manbalar.

8. Quyidagilar “Oʻrmoninvest” DUK faoliyatini moliyalashtirishning asosiy manbalari etib belgilansin:

xoʻjalik faoliyatidan tushadigan mablagʻlar;

xalqaro moliya institutlari va tashkilotlarning grantlari;

qonun hujjatlarida taqiqlanmagan boshqa manbalar.

9. Belgilab qoʻyilsinki, Innovatsiya markazi xodimlariga respublika ilmiy-tadqiqot institutlari xodimlari uchun belgilangan mehnatga haq toʻlash va moddiy ragʻbatlantirish tartibi tatbiq etiladi.

10. Oʻzbekiston Respublikasi Moliya vazirligi 2019-yildan boshlab Innovatsiya markazi faoliyatini Oʻrmon xoʻjaligi davlat qoʻmitasi tomonidan taqdim etiladigan hisob-kitoblar asosida davlat budjeti mablagʻlari hisobidan moliyalashtirsin.

Innovatsiya markazining 2018-yilgi faoliyati Oʻzbekiston Respublikasi Oʻrmon xoʻjaligi davlat qoʻmitasining Oʻrmon xoʻjaligini rivojlantirish jamgʻarmasi va boshqa budjetdan tashqari mablagʻlar hisobidan moliyalashtirilishi maʼlumot uchun qabul qilinsin.

11. Oʻzbekiston Respublikasi Oʻrmon xoʻjaligi davlat qoʻmitasi Moliya vazirligi va Iqtisodiyot vazirligi bilan birgalikda Innovatsiya markazining moddiy-texnika bazasini mustahkamlash choralarini koʻrsin.

Bunda:

talab etiladigan zamonaviy laboratoriya asbob-uskunalari, zarur mebel, kompyuter texnikasi, aloqa vositalari va boshqa moddiy vositalar bilan taʼminlash;

mavsumdan tashqari paytlarda oʻsimliklarni oʻstirish va ilmiy-tadqiqotlar olib borish uchun fitotronlar tashkil etish;

Andijon tajribasini va boshqa innovatsion gʻoyalarni oʻrmon xoʻjaliklarida joriy qilishni tatbiq etish nazarda tutilsin.

12. Andijon viloyati hokimligi, Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Oʻrmon xoʻjaligi davlat qoʻmitasi ikki oy muddatda Andijon viloyatining Xoʻjaobod, Buloqboshi, Marhamat, Jalaquduq tumanlarida xandon pista, yongʻoq va eksportbop mahsulotlar yetishtirishga qulay boʻlgan, hozirgi vaqtda samarasiz foydalanilayotgan hamda tuman hokimligi zaxirasida boʻlgan yer maydonlarini xatlovdan oʻtkazib, ularning belgilangan tartibda Andijon davlat oʻrmon xoʻjaligiga oʻtkazib berilishini taʼminlasin.

13. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi Oʻrmon xoʻjaligi davlat qoʻmitasi va Andijon viloyati hokimligi bilan birgalikda Andijon viloyatidagi chorva mollarini ozuqa bazasi bilan taʼminlash uchun yaylov sifatida foydalanish hamda bosqichma-bosqich dorivor oʻsimliklar yetishtirish maqsadida, Oxangaron davlat oʻrmon xoʻjaligi hududidan 20 ming gektar yer maydonini Andijon davlat oʻrmon xoʻjaligiga belgilangan tartibda uzoq muddatli ijara asosida foydalanish uchun ajratsin.

14. Andijon viloyati hokimligi viloyatda eksportbop dorivor oʻsimliklarni saqlash va dastlabki qayta ishlashni tashkil qilish maqsadida Andijon viloyati Xonobod shahar hokimligining Xonobod shahrida joylashgan sobiq mexanizatsiyalashgan koʻchma kolonna korxonasi binosini tekin foydalanish huquqi asosida Andijon davlat oʻrmon xoʻjaligiga bir oy muddatda oʻtkazib bersin.

15. Oʻzbekiston Respublikasi Oʻrmon xoʻjaligi davlat qoʻmitasi Andijon viloyati hokimligi bilan birgalikda Andijon davlat oʻrmon xoʻjaligining Qirgʻiziston Respublikasi bilan chegaradosh hududida Davlat chegarasi chizigʻidan 100 metr mintaqadan soʻng oʻrmonzorlar va davlat chegarasi boʻylab yongʻinga qarshi mintaqa barpo etsin hamda uni doimiy ish holatida saqlasin.

16. Oʻzbekiston Respublikasi Vazirlar Mahkamasining 2017-yil 19-iyuldagi 530-son qarori bilan tasdiqlangan Oʻzbekiston Respublikasi Oʻrmon xoʻjaligi davlat qoʻmitasi Oʻrmon xoʻjaligini rivojlantirish jamgʻarmasi mablagʻlarini shakllantirish va ulardan foydalanish tartibi toʻgʻrisidagi nizomga asosan, tarmoqqa oid ilmiy ishlar, innovatsiya loyihalari va ilgʻor texnologiyalarni ishlab chiqish va joriy etish, ixtirolar, ilmiy ishlar yaratishni ragʻbatlantirish Oʻrmon xoʻjaligini rivojlantirish jamgʻarmasi hisobidan moliyalashtirilishi maʼlumot uchun qabul qilinsin.

17. Oʻzbekiston Respublikasi Oʻrmon xoʻjaligi davlat qoʻmitasi Turizmni rivojlantirish davlat qoʻmitasi bilan birgalikda 2025-yilga qadar oʻrmon fondi yerlarida ekoturizmni rivojlantirish dasturini ikki oy muddatda ishlab chiqsin va tasdiqlasin.

18. Oʻzbekiston Respublikasi Vazirlar Mahkamasining 2017-yil 19-iyuldagi 530-son qarori (Oʻzbekiston Respublikasi QHT, 2017-y., 30-son, 734-modda) bilan tasdiqlangan Oʻrmon xoʻjaligi ilmiy-tadqiqot institutining tuzilmasiga “Choʻl hududlarida oʻrmonchilikni rivojlantirish ilmiy markazi” blokidan soʻng “Oʻrmon xoʻjaligini rivojlantirish innovatsiya markazi” bloki qoʻshilsin.

19. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov, Oʻzbekiston Respublikasi Bosh vazirining oʻrinbosari Z.T. Mirzayev, Oʻrmon xoʻjaligi davlat qoʻmitasi raisi N.J. Bakirov, Andijon viloyati hokimi Sh.Q. Abduraxmonov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 11-oktabr,

819-son

Vazirlar Mahkamasining 2018-yil 11-oktabrdagi 819-son qaroriga ILOVA

Oʻrmon xoʻjaligini rivojlantirish innovatsiya markazining

TUZILMASI

Boshqaruv xodimlarining umumiy cheklangan soni — 9 nafar.

Texnik va xizmat koʻrsatuvchi xodimlar soni oʻrnatilgan meʼyorlarga muvofiq belgilanadi.

* Ilmiy loyihalarni amalga oshirish uchun mutaxassislar va ilmiy xodimlar qoʻshimcha ravishda shartnoma asosida jalb etiladi.