Federal davlat avtonom oliy taʼlim muassasasi “Milliy texnologik tadqiqotlar universiteti “MISiS”ning Olmaliq shahridagi filiali faoliyatini tashkil etishning qoʻshimcha chora-tadbirlari toʻgʻrisida (750-son)

21.09.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Federal davlat avtonom oliy taʼlim muassasasi “Milliy texnologik tadqiqotlar universiteti “MISiS”ning Olmaliq shahridagi filiali faoliyatini tashkil etish toʻgʻrisida” 2018-yil 11-maydagi PQ-3714-son qarori ijrosini taʼminlash maqsadida Vazirlar Mahkamasi qaror qiladi:

1. Federal davlat avtonom oliy taʼlim muassasasi “Milliy texnologik tadqiqotlar universiteti “MISiS”ning Olmaliq shahridagi filialining (keyingi oʻrinlarda Filial deb ataladi) tuzilmasi ilovaga muvofiq tasdiqlansin.

Filial direktoriga, zarur hollarda, muassislar bilan kelishgan holda, Filialning tuzilmasiga oliy taʼlim muassasasi uchun belgilangan normativlarga muvofiq xodimlarning umumiy cheklangan soni va mehnatga haq toʻlash jamgʻarmasi doirasida oʻzgartirishlar kiritish huquqi berilsin.

2. Oʻzbekiston Respublikasi Oliy va oʻrta maxsus taʼlim vazirligi hamda “Olmaliq kon-metallurgiya kombinati” AJ Federal davlat avtonom oliy taʼlim muassasasi “Milliy texnologik tadqiqotlar universiteti “MISiS” bilan birgalikda 2018-yilning 25-sentabriga qadar Filialda pedagogik va ilmiy salohiyatga ega, yuqori malakali, rus va ingliz tillarini mukammal biladigan, axborot texnologiyalarini hamda fan va texnikaning eng soʻnggi yutuqlarini oʻquv jarayoniga joriy eta oladigan professor-oʻqituvchilar tarkibini shakllantirish hamda Filial kutubxona fondini oʻquv, oʻquv-metodik, ilmiy-texnik, badiiy adabiyotlar bilan toʻldirib borish hamda zamonaviy kompyuter texnologiyalari bilan jihozlash choralarini koʻrsin.

3. “Olmaliq kon-metallurgiya kombinati” AJning oʻz mablagʻlari hisobidan Filialning rahbar xodimlari hamda mahalliy professor-oʻqituvchilar tarkibiga bir oylik maoshidan kam boʻlmagan miqdorda har oylik ustamalar toʻlash toʻgʻrisidagi taklifiga rozilik berilsin.

4. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosarlari A.A. Abduxakimov va A.S. Sultanov zimmalariga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 21-sentabr,

750-son

Vazirlar Mahkamasining 2018-yil 21-sentabrdagi 750-son qaroriga ILOVA

Federal davlat avtonom oliy taʼlim muassasasi “Milliy texnologik tadqiqotlar universiteti “MISiS”ning Olmaliq shahridagi filialining

TUZILMASI

Filial (fakultetlar, kafedralar va boshqa tarkibiy boʻlinmalar) xodimlarining cheklangan umumiy soni oliy taʼlim muassasalari uchun oʻrnatilgan normativlarga muvofiq aniqlanadi.

Kafedralar oʻquv yuklamalari shakllanib borishiga muvofiq bosqichma-bosqich tashkil etiladi.