Oʻzbekiston Respublikasida birjalar faoliyatini muvofiqlashtirish toʻgʻrisida (95-son)

03.03.1992

Oʻzbekiston Respublikasi Prezidenti huzuridagi Vazirlar Mahkamasining

qarori

Oʻzbekiston Respublikasi Prezidentining “Oʻzbekiston Respublikasida birja faoliyatini muvofiqlashtirish toʻgʻrisida” 1991-yil 27-dekabrdagi Farmonini bajarish maqsadida Vazirlar Mahkamasi qaror qiladi:

1. Birjalar Kengashi zimmasiga respublikada birjalar faoliyatini rivojlantirish va muvofiqlashtirish hamda birjalarni ixtisoslashtirish, shuningdek, yangi birjalar tashkil etishning maqsadga muvofiqligi masalalarini kelishib olish vazifasi yuklatilsin.

Birjalar Kengashi bir oy muddat ichida Kengash toʻgʻrisidagi Nizomni tasdiqlasin.

2. Oʻzbekiston Respublikasi hududida faoliyat koʻrsatayotgan birjalarni davlat tomonidan roʻyxatga olishning ilova qilinayotgan Tartibi tasdiqlansin.

3. Belgilab qoʻyilsinki, Oʻzbekiston Respublikasi hududida faoliyat koʻrsatayotgan barcha birjalar, oʻzining mulkchilik shakllaridan qatʼi nazar, birjalarni Yagona davlat roʻyxatiga kiritish uchun 1992-yilning 1-iyuligacha Oʻzbekiston Respublikasi Adliya vazirligida davlat tomonidan roʻyxatga olinadi.

4. Oʻzbekiston Respublikasi Adliya vazirligi birjalarni roʻyxatga olish grafigini oʻn kun muddat ichida tasdiqlasin hamda uni birjalarga va boshqa manfaatdor tashkilotlarga yetkazsin.

Mazkur qarorning 3-bandida koʻrsatilgan muddat ichida belgilangan tartibda roʻyxatga olinmagan birjalarning faoliyati noqonuniy hisoblanadi va ularning daromadi respublika budjetiga oʻtkaziladi.

5. Oʻzbekiston Respublikasi Adliya vazirligi birjalar tomonidan oʻz ustavlariga, ularning vazifalari va faoliyati maqsadlariga muvofiqligi qismiga qanday rioya qilinayotganligini muntazam ravishda nazorat qilishni amalga oshirsin.

Vazirlar Mahkamasi Raisining birinchi oʻrinbosari I. JOʻRABEKOV

Toshkent sh.,

1992-yil 3-mart,

95-son

Vazirlar Mahkamasining 1992-yil 3-martdagi 95-son qarori bilan TASDIQLANGAN

Oʻzbekiston Respublikasi hududida faoliyat koʻrsatayotgan birjalarni davlat tomonidan roʻyxatga olish

TARTIBI

1. Oʻzbekiston Respublikasi Prezidentining “Oʻzbekiston Respublikasida birja faoliyatini muvofiqlashtirish toʻgʻrisida” 1991-yil 27-dekabrdagi Farmoniga muvofiq Oʻzbekiston Respublikasi hududida faoliyat koʻrsatayotgan birjalar va ular taʼsis etgan korxonalarni davlat tomonidan roʻyxatga olish Oʻzbekiston Respublikasi Adliya vazirligi tomonidan amalga oshiriladi. Qoraqalpogʻiston Respublikasi hududida joylashgan birjalar va ularning korxonalarini davlat tomonidan roʻyxatga olish tartibi Qoraqalpogʻiston Respublikasi qonunlari bilan belgilanadi.

2. Birjalar va ular taʼsis etgan korxonalarni davlat tomonidan roʻyxatga olish uchun quyidagi hujjatlar taqdim etiladi.

birjalar yoki ular tomonidan taʼsis etilgan korxonalarni davlat tomonidan roʻyxatga olish haqida ariza;

birja yoki korxona tuzish haqida taʼsischilar yoki ular vakolat bergan organning notarial idora tasdiqlagan shartnoma nusxasi;

taʼsischi (taʼsischilar) tomonidan tasdiqlangan birja yoki korxonaning notarial idora tasdiqlagan ustavi, uning tovar belgisi, emblemasi va boshqalar;

yangidan tashkil etilgan birja uchun birjalar Kengashining roziligi hamda birjaning binolari va zarur asbob-uskunalari borligini tasdiqlovchi hujjatlar;

birjaning roʻyxatga olinganligi uchun davlat boji toʻlanganligi toʻgʻrisida guvohlik beruvchi bank toʻlov hujjati.

3. Birjalarning davlat tomonidan roʻyxatga olinganligi uchun ustav fondining 0,25 foizi miqdorida, lekin eng kam oylik ish haqining besh baravaridan kam va yuz baravaridan koʻp boʻlmagan miqdorlarda davlat boji olinadi.

Olingan mablagʻlarning 20 foizi Oʻzbekiston Respublikasi Adliya vazirligining markazlashtirilgan hisobiga, qolgan qismi respublika budjetiga oʻtkaziladi.

Ustavlar oʻzgartirilganda va toʻldirilganda, shuningdek, birja qayta tashkil etilganda roʻyxatga olinganlik uchun toʻlangan summaning yarmi miqdorida davlat boji toʻlanadi.

4. Birjani davlat tomonidan roʻyxatga olish roʻyxatga olish haqidagi ariza, zarur barcha hujjatlar ilova qilingan holda, olingan vaqtdan boshlab 30 kundan kechikmay amalga oshiriladi. Agar birja yoki uning tomonidan taʼsis etilgan korxona belgilangan muddatda davlat tomonidan roʻyxatga olinmagan yoki taʼsischi asossiz deb hisoblaydigan sabablar bilan rad etilgan taqdirda, taʼsischi sudga murojaat qilishi mumkin.

Birjalarning davlat tomonidan roʻyxatga olinganligi haqidagi maʼlumotlar 10 kun muddat ichida Oʻzbekiston Respublikasi Adliya vazirligi tomonidan olib boriladigan Oʻzbekiston Respublikasi birjalari hamda ular taʼsis etgan korxonalarning Yagona davlat roʻyxatiga kiritiladi (1-ilova).

5. Roʻyxatga olingan birjaga davlat tomonidan roʻyxatga olinganlik haqidagi guvohnoma beriladi (2-ilova).

6. Ishlab turgan birjani yoki u taʼsis etgan korxonani davlat tomonidan roʻyxatga olish rad etilganda roʻyxatga oluvchi organ hisob-kitob ishlarini toʻxtatish uchun bu haqda moliyaviy taʼminlashni amalga oshirayotgan bankka xabar beradi. Birjani tugatish Oʻzbekiston Respublikasi qonunlari bilan belgilangan tartibda amalga oshiriladi.

7. Oʻzbekiston Respublikasi hududida faoliyat koʻrsatayotgan birjalar qaytadan tashkil etilgan yoki tuzilishida, shuningdek, faoliyat turida oʻzgarish boʻlgan taqdirda, ularni roʻyxatga olgan organlarga, shuningdek, Oʻzbekiston Respublikasi Davlat statistika qoʻmitasiga bir hafta muddat ichida bu haqda korxonalarning, muassasalarning va tashkilotlarning respublika klassifikatsiyasini oʻtkazish toʻgʻrisidagi Nizomda belgilangan tartibda ularning aynan tenglashtirish va klassifikatsiyalari belgilarini aniqlash uchun xabar qiladilar.

8. Birja vakolatli davlat organlarini oʻzining pochta manzili oʻzgarganligi toʻgʻrisida oʻn kun muddatda xabardor qilishga majburdir. Vakolatli davlat organlarini pochta manzili oʻzgarganligi toʻgʻrisida xabardor qilmaganlik uchun birjaning mansabdor shaxslari qonun hujjatlarida nazarda tutilgan tartibda javobgarlikka tortiladilar.

Davlat roʻyxatidan oʻtkazilgandan keyin bir yil oʻtgach birja roʻyxatdan oʻtkazgan organga taʼsis hujjatlarida maʼlum qilingan ustav jamgʻarmasini shakllantirish tugallanganligi toʻgʻrisida maʼlumotnoma taqdim etishga majburdir. Ustav jamgʻarmasi shakllantirilmagan, biroq belgilangan eng kam miqdordan kam boʻlmagan, amalda shakllantirilgan miqdorgacha kamaytirilgan yoki boshqacha tashkiliy-huquqiy shakllarga oʻzgartirilgan taqdirda roʻyxatdan oʻtkazuvchi organ korxonalarni tugatish boʻyicha maxsus komissiyaga birjaning bundan buyon faoliyat koʻrsatishining maqsadga muvofiqligi toʻgʻrisidagi masalani koʻrib chiqish uchun taqdimnoma kiritadi.

9. Birja davlat roʻyxatidan oʻtkazilganligi, pochta manzili oʻzgarganligi, qayta tashkil etilganligi yoki faoliyat turlari oʻzgarganligi toʻgʻrisidagi maʼlumotlar Korxona va tashkilotlarning yagona davlat registriga kiritish uchun oʻn kun muddatda statistika organlariga xabar qiladilar.

1-ilova

Oʻzbekiston Respublikasi hududidagi birjalar va ular taʼsis etgan korxonalar ROʻYXATI

2-ilova

Oʻzbekiston Respublikasidagi birjalarning davlat tomonidan roʻyxatga olinganligi toʻgʻrisida GUVOHNOMA

(Oʻzbekiston Respublikasi Hukumatining qarorlari toʻplami, 1992-yil, 3-son, 5-modda; Oʻzbekiston Respublikasi qonun hujjatlari toʻplami, 2001-y., 15-16-son, 106-modda)