Integral mikrosxemalar topologiyalarini roʻyxatdan oʻtkazish uchun talabnomalarni tuzish va topshirish qoidalari va davlat ekspertizasini oʻtkazish tartibini tasdiqlash toʻgʻrisida (1168-son)

27.08.2002

OʻZBEKISTON RESPUBLIKASI DAVLAT PATENT IDORASI direktorining

buyrugʻi

[Oʻzbekiston Respublikasi Adliya vazirligi tomonidan 2002-yil 27-avgustda roʻyxatdan oʻtkazildi, roʻyxat raqami 1168]

Oʻzbekiston Respublikasi Oliy Majlisining 2001-yil 30-avgustdagi “Tovar belgilari, xizmat koʻrsatish belgilari va tovar kelib chiqqan joy nomi toʻgʻrisida”gi Oʻzbekiston Respublikasi Qonunini amalga kiritish haqida”gi Qaroriga muvofiq buyuraman:

1. “Integral mikrosxemalar topologiyalarini roʻyxatdan oʻtkazish uchun talabnomalarni tuzish va topshirish qoidalari va davlat ekspertizasini oʻtkazish tartibi” tasdiqlansin.

2. Ushbu buyruq Oʻzbekiston Respublikasi Adliya vazirligiga davlat roʻyxatidan oʻtkazish uchun yuborilsin.

3. 2002-yil20-iyundagi 36-sonli buyruq oʻz kuchini yoʻqotgan deb hisoblansin.

4. Ushbu buyruqning ijro etilishi yuzasidan nazorat qilish direktor oʻrinbosari V.V. Yermolayeva zimmasiga yuklatilsin.

Direktor A. AZIMOV

Toshkent sh.,

2002-yil 19-avgust,

42-son

Davlat patent idorasi direktorining 2002-yil 19-avgustdagi 42-son buyrugʻi bilan “TASDIQLANGAN”

Integral mikrosxemalar topologiyalarini roʻyxatdan oʻtkazish uchun talabnomalarni tuzish va topshirish qoidalari va davlat ekspertizasini oʻtkazish

tartibi

Mazkur Qoidalar Oʻzbekiston Respublikasining “Integral mikrosxemalar topologiyalarini huquqiy muhofaza qilish toʻgʻrisida”gi Qonuniga (bundan buyon matnda Qonun deb yuritiladi) muvofiq ishlab chiqilgan hamda integral mikrosxemalar topologiyalarini roʻyxatdan oʻtkazish uchun talabnomalarni (bundan buyon matnda roʻyxatdan oʻtkazish uchun talabnoma deb keltiriladi) tuzish va topshirish qoidalarini hamda davlat ekspertizasini oʻtkazish tartibini belgilaydi.

1-§. Umumiy qoidalar

1. Integral mikrosxemalar topologiyalarining (bundan buyon matnda topologiya deb yuritiladi) Oʻzbekiston Respublikasi Intellektual mulk agentligi tomonidan (bundan buyon matnda Agentlik deb keltiriladi) roʻyxatdan oʻtkazilishi, ilgari tijorat maqsadlarida qoʻllanilmagan topologiyani huquqiy muhofaza qilishning asosiy sharti hisoblanadi.

2. Roʻyxatdan oʻtkazish uchun talabnoma bitta topologiyaga oid boʻlishi lozim. Bazaviy matritsaviy kristall topologiyasini roʻyxatdan oʻtkazish uchun talabnoma bazaviy matritsaviy kristallning topologiyasiga oid va xuddi shuningdek, uning asosida amalga oshirilgan buyurtma integral mikrosxemalar topologiyasiga oid materiallardan iborat boʻlishi mumkin.

3. Roʻyxatdan oʻtkazish uchun talabnoma muallif (mualliflar), ish beruvchi yoki ularning huquqiy vorislari (bundan buyon matnda talabnoma beruvchi deb keltiriladi) tomonidan bevosita yoki ishonchli shaxs orqali Agentlikka topshiriladi.

4. Agar topologiyadan tijorat maqsadlarida foydalanilgan holatlar mavjud boʻlsa, Qonunning 8-moddasiga muvofiq roʻyxatdan oʻtkazish uchun talabnoma topologiyadan birinchi marta foydalanilgan sanadan eʼtiboran ikki yildan oshmagan muddatdan kechiktirilmay topirilishi lozim.

I BOʻLIM. TALABNOMANI TUZISh

2-§. Roʻyxatdan oʻtkazish uchun talabnoma tarkibi

5. Roʻyxatdan oʻtkazish uchun talabnoma quyidagi hujjatlarni oʻz ichiga oladi:

a) integral mikrosxemalar topologiyasini roʻyxatdan oʻtkazish uchun ariza (bundan buyon matnda roʻyxatdan oʻtkazish uchun ariza deb keltiriladi);

b) topologiyani identifikatsiyalovchi depozitga qoʻyiladigan materiallar, shu jumladan, referat;

v) davlat ekspertizasini oʻtkazish uchun belgilangan miqdorda patent boji toʻlanganligini tasdiqlovchi yoxud patent boji toʻlashdan ozod qilish, shuningdek, uning miqdorini kamaytirish asoslarini tasdiqlovchi hujjat;

g) ishonchli shaxs orqali talabnoma topshirilgan hollarda talabnomada qoʻshimcha ravishda ishonchli shaxs vakolatlarini tasdiqlovchi ishonchnoma mavjud boʻlishi lozim;

d) ilgari tijorat maqsadlarida foydalanilgan topologiyaga doir roʻyxatdan oʻtkazish uchun talabnomada qoʻshimcha ravishda mazkur topologiyadan tijorat maqsadlarida birinchi marta foydalanish sanasini tasdiqlovchi hujjat mavjud boʻlishi lozim.

3-§. Roʻyxatdan oʻtkazish uchun talabnoma hujjatlarini rasmiylashtirishga qoʻyiladigan umumiy talablar

6. Roʻyxatdan oʻtkazish uchun talabnoma hujjatlari ularni bevosita reproduksiya qilish imkoniyati boʻlgan tarzda rasmiylashtirilishi lozim.

7. Roʻyxatdan oʻtkazish uchun talabnoma hujjatlari A4 210 x 297 mm formatdagi pishiq, oq, tekis, yarqiramaydigan qogʻozda bajarilishi va har bir hujjat alohida varaqdan boshlanishi lozim.

8. Roʻyxatdan oʻtkazish uchun talabnoma hujjatlari varaqlaridagi hoshiyalar oʻlchami quyidagidan kam boʻlmasligi lozim, mm.:

chapdan — 20;

yuqoridan — 15;

oʻngdan va pastdan — 10.

9. Roʻyxatdan oʻtkazish uchun talabnoma hujjatlarining har birida ikkinchi va undan keyingi barcha varaqlar arab sonlari bilan raqamlanishi lozim.

10. Roʻyxatdan oʻtkazish uchun talabnoma hujjatlari qora rangli shriftda bosilishi lozim.

11. Roʻyxatdan oʻtkazish uchun talabnoma hujjatlari, odatda oʻzbek yoki rus tilida taqdim etilishi lozim. Agar roʻyxatdan oʻtkazish uchun talabnoma boshqa tilda tuzilgan boʻlsa, u holda uning tarjimon tomonidan bajarilgan va tasdiqlangan oʻzbek yoki rus tilidagi toʻliq tarjimasi ilova qilinishi lozim.

12. Roʻyxatdan oʻtkazish uchun talabnoma hujjatlarining matni toʻliq va aniq boʻlishi, bir-biridan farqlanmasligi lozim.

13. Roʻyxatdan oʻtkazish uchun talabnoma hujjatlaridagi imzolar imzo qoʻyuvchining familiyasi, ismi va otasi ismining bosh harflari koʻrsatilgan holda ochib berilishi lozim.

Yuridik shaxs nomidan qoʻyilgan imzoda uning rahbari lavozimi koʻrsatiladi, rahbar imzosi tegishli muhr bilan tasdiqlanadi.

14. Roʻyxatdan oʻtkazish uchun talabnoma hujjatidagi ism, familiya va sharifi bosh kelishikda koʻrsatiladi.

15. Roʻyxatdan oʻtkazish uchun talabnomada yuridik shaxsning toʻliq rasmiy nomi keltiriladi.

4-§. Arizaga qoʻyiladigan talablar

16. Roʻyxatdan oʻtkazish uchun ariza mazkur Qoidalar ilovasiga muvofiq TO-1 shaklda taqdim etiladi.

17. Agar baʼzi maʼlumotlarni tegishli grafalarda toʻliq joylashtirishning iloji boʻlmasa, u holda ular arizaning tegishli grafasida: “davomini qoʻshimcha varaqda qarang” deb koʻrsatilgan holda, xuddi oʻsha shaklda qoʻshimcha varaqda keltiriladi.

18. Arizaning “ariza” soʻzi tepasidagi grafalari ariza Agentlikka kelib tushgandan keyin rekvizitlarni kiritish uchun moʻljallangan va talabnoma beruvchi tomonidan toʻldirilmaydi.

19. Topologiyani roʻyxatdan oʻtkazish soʻralgan 71-kod ostidagi grafada talabnoma beruvchi (talabnoma beruvchilar) toʻgʻrisida maʼlumotlar keltiriladi: yuridik shaxsning rasmiy nomi (taʼsis hujjatiga muvofiq) yoki jismoniy shaxsning familiyasi, ismi (va otasining ismi, agar u bor boʻlsa), bunda familiya ism oldida keltiriladi. Shuningdek, ushbu grafada talabnoma beruvchilarning turar joylari yoki manzillari, shu jumladan mamlakatning rasmiy nomi va toʻliq pochta manzili haqidagi maʼlumotlar koʻrsatiladi. Topologiya mualliflari boʻlgan talabnoma beruvchilarning turar joyi bu grafada keltirilmaydi, balki faqat arizaning ikkinchi varagʻidagi 97-kod ostidagi grafada bayon etiladi.

20. Soʻngra shu grafaning oʻzida, “nomiga” degan soʻzlardan keyin nomiga guvohnoma berilishi soʻralayotgan shaxs (shaxslar) toʻgʻrisida shu kabi maʼlumotlar keltiriladi.

21. Nomiga guvohnoma soʻralayotgan Oʻzbekiston Respublikasi korxonalari, tashkilotlari uchun OKPO kodi (agar u oʻrnatilgan boʻlsa) koʻrsatiladi. Agar OKPO kodi oʻrnatilmagan boʻlsa, tegishli oʻrinda “oʻrnatilmagan” deb koʻrsatiladi.

22. Nomiga guvohnoma soʻralayotgan Oʻzbekiston Respublikasidan tashqarida yashovchi chet ellik yuridik shaxslar yoki jismoniy shaxslar uchun Butunjahon intellektual mulk tashkiloti (BIMT) ST.3 boʻyicha mamlakat kodi (agar u belgilangan boʻlsa) koʻrsatiladi.

23. Agar nomiga guvohnoma soʻralayotgan shaxslar va/yoki talabnoma beruvchilar bir nechta boʻlsa, koʻrsatilgan maʼlumotlar ularning har biri uchun keltiriladi.

24. Agar talabnoma beruvchi (talabnoma beruvchilar) nomiga guvohnoma soʻralayotgan boʻlsa, u holda nomiga guvohnoma soʻralayotgan shaxs (shaxslar) haqidagi maʼlumotlar oʻrniga, “nomiga” degan soʻzlardan keyin “talabnoma beruvchi” (“talabnoma beruvchilar”) degan soʻzlar keltiriladi.

25. 54-kod ostidagi grafada topologiyaning nomi keltiriladi.

26. Keyingi grafada topologiyaning alternativ nomi (agar u bor boʻlsa) keltiriladi.

27. “Eng yaqin analogi haqida maʼlumotlar” grafasida talabnoma berilgan topologiyaning eng yaqin analogi haqida zaruriy bibliografik maʼlumotlar roʻyxati keltiriladi.

28. Keyingi grafada topologiyadan tijorat maqsadlarida birinchi marta foydalanilganda hujjatlashtirilgan holda qayd etilgan sana va joy nomi koʻrsatiladi.

29. “Ushbu topologiyadan tijorat maqsadlarida birinchi marta foydalanilgan sanaga nisbatan huquq egasi haqida maʼlumotlar” grafasida talabnoma berilgan topologiyadan tijorat maqsadlarida birinchi marta foydalanilgan sanaga nisbatan huquq egasining nomi (ismi), joylashgan manzili (turar joyi), fuqaroligi koʻrsatiladi.

30. “Mazkur topologiyani yaratishda foydalanilgan, muhofazaga olingan topologiyalar haqida maʼlumotlar” grafasida talabnoma berilgan topologiyani yaratishda foydalanilgan, muhofazaga olingan topologiyalar haqida zaruriy bibliografik maʼlumotlar keltiriladi.

31. 98-kod ostidagi grafada pochta orqali tez yetkazib berish boʻyicha odatdagi talablarni qondiradigan yozishmalar uchun manzil, xat oluvchining ismi yoki nomi, va telefon, teleks, faks raqamlari (agar ular boʻlsa) keltiriladi.

32. Arizaning ikkinchi varagʻidagi “Ilova qilinadigan hujjatlar roʻyxati” grafasi ilova qilinadigan hujjatlar nusxalari va har bir nusxasidagi varaqlar soni koʻrsatilgan holda tegishli katakchalarda “X” belgisini qoʻyib chiqish orqali toʻldiriladi.

33. “Talabnoma topshirish va muhofaza hujjatini olish huquqi yuzaga kelishi uchun asos” grafasida talabnoma topshirish va guvohnoma olish uchun tegishli asos (asoslar) “X” belgisini qoʻyish bilan belgilanadi. Koʻrsatilgan grafa guvohnoma talabnoma beruvchi (talabnoma beruvchilar) nomiga soʻralgan holatlarda toʻldiriladi, talabnoma beruvchilar tarkibi mualliflar tarkibi bilan bir xil boʻlgan holatlar bundan mustasno.

34. 72-, 97-kodlar ostidagi grafada topologiya muallifi (mualliflari) haqidagi maʼlumotlar keltiriladi: familiyasi, ismi (otasining ismi, agar bor boʻlsa), shuningdek mamlakat nomi va uning BIMT ST.3 standarti boʻyicha kodini oʻz ichiga olgan toʻliq turar joyi manzili.

35. Keyingi grafada arizada koʻrsatilgan maʼlumotlarning toʻgʻriligi va ularning depozit qilingan materiallarga mos kelishi talabnoma beruvchilar va mualliflarning imzosi bilan tasdiqlanadi.

36. Arizaning oxirgi “Imzo” grafasini, imzo qoʻyish sanasini koʻrsatgan holda toʻldirish barcha hollarda majburiydir. Ariza talabnoma beruvchi, shuningdek, nomiga guvohnoma berilishi soʻralayotgan shaxs tomonidan (agar u talabnoma beruvchi boʻlmasa) imzolanadi. Yuridik shaxs nomidan ariza tashkilot rahbari tomonidan uning lavozimi koʻrsatilgan holda imzolanadi, imzo muhr bilan tasdiqlanadi.

37. Talabnoma ishonchli shaxs orqali topshirilganda, ariza eslatib oʻtilgan ishonchli shaxs tomonidan imzolanadi.

38. Ariza grafalaridagi imzolar imzo qoʻyuvchi familiyasi, ismi va otasi ismining bosh harflari koʻrsatilgan holda ochib beriladi.

39. Imzo qoʻyishni talab qiladigan u yoki bu maʼlumotlar qoʻshimcha varaqda keltirilgan hollarda, u ham shunday tartibda imzolanadi. Talabnoma beruvchi yoki ishochli shaxsning imzosi har bir qoʻshimcha varaqda keltirilishi majburiydir.

5-§. Roʻyxatdan oʻtkazish uchun talabnomaning deponent materiallarini rasmiylashtirish uchun qoʻyiladigan talablar

40. Roʻyxatdan oʻtkazilayotgan topologiya, jumladan referat identifikatsiyasini taʼminlovchi materiallar Agentlik tomonidan depozitga qoʻyiladi.

41. Depozitga qoʻyiladigan talabnoma materiallari quyidagilardan iborat boʻlishi lozim:

topologiyaning har bir qatlamini aks ettiradigan vizual qabul qilinadigan materiallarning quyida keltirilgan turlaridan birining toʻliq toʻplami, bitta nusxada:

a) fotoshablonlar;

b) topologiyaga oid yigʻma chizma yoki qatlam shaklli topologik chizmalar;

v) integral mikrosxemada belgilangan topologiyaning har bir qatlami fotosurati;

rasmiy byulletenda chop etish uchun moʻljallangan quyidagi maʼlumotlar kiritilgan referat, ikkita nusxada:

a) integral mikrosxema topologiyasining nomi;

b) talabnoma beruvchining nomi;

v) topologiyasi uchun muhofaza soʻralgan integral mikrosxemaning foydalanish sohasi, qoʻllanilishi yoki vazifasi;

g) topologiyasi uchun muhofaza soʻralgan integral mikrosxemani tayyorlashda qoʻllaniladigan texnologiya turi.

Referat matnining oʻrtacha hajmi – 700 bosma belgidan iborat.

42. Talabnoma topshirilayotgan sanadan bir muncha ilgari tijorat maqsadlarida foydalanilgan topologiyani roʻyxatdan oʻtkazish uchun talabnoma topshirishda talabnomaning depozitga qoʻyilgan materiallari qoʻshimcha ravishda mazkur topologiyani, undan tijorat maqsadlarida foydalanilgan paytdagi shaklini oʻz ichiga olgan toʻrtta integral mikrosxema namunasiga ega boʻlishi, referat esa — qoʻshimcha ravishda topologiyadan tijorat maqsadlarida birinchi marta foydalanilgan sana haqida maʼlumotlarga va integral mikrosxema namunasining asosiy texnik tavsifiga ega boʻlishi lozim.

43. Vizual qabul qilinadigan materiallardagi tasvirlar masshtabi 20:1dan kam boʻlmasligi lozim.

44. Topologik chizmalarning grafik tasvirlari tekis oq qogʻozda bajariladi.

Varaqlar formati taxlangan holda 210 x 297 mm boʻlishi lozim.

Grafik tasvirlar bajarilgan varaq hoshiyalarining minimal oʻlchami quyidagicha, mm.:

yuqoridan va chapdan — 20;

oʻngdan — 15;

pastdan — 10.

45. Fotosuratlardagi tasvirlar aniq-ravshan boʻlishi lozim.

46. Chizmalar va fotosuratlarning barcha nusxasida tasvirlarning masshtabi koʻrsatilishi lozim.

47. Roʻyxatdan oʻtkazish uchun talabnoma tarkibiga kirgan integral mikrosxema namunalari zarurat tugʻilganda ulardan topologiya har bir qatlamining vizual qabul qilinadigan tasvirini olish imkoniyati bilan bajariladi.

48. Agar topologiya qatlamlaridan birortasida maxfiy maʼlumotlar (masalan, “nou-xau”ga oid) boʻlsa, vizual qabul qilinadigan materiallarda ushbu qatlamning tegishli qismi (yoki butun qatlam) chiqarib olinishi va kodlangan shakldagi topologiyani identifikatsiya qiluvchi depozitga qoʻyilgan materiallar tarkibiga kiritilishi mumkin.

6-§. Patent boji toʻlanganiga doir hujjatlarga qoʻyiladigan talablar

49. Talabnomaga belgilangan miqdorda patent boji toʻlanganini tasdiqlaydigan hujjat, yoki patent bojini toʻlashdan ozod qilish uchun asoslarni tasdiqlovchi hujjat, tegishli iltimosnoma bilan birga ilova etiladi.

50. Patent boji belgilangan miqdordan kam toʻlangan boʻlsa, boj toʻlanganini tasdiqlaydigan hujjatdan tashqari, boj miqdorini kamaytirish uchun asoslarni tasdiqlovchi hujjat va tegishli iltimosnoma taqdim etiladi.

7-§. Talabnoma beruvchi tomonidan ishonchli shaxsga berilgan vakolatlarni tasdiqlovchi ishonchnomaga qoʻyiladigan talablar

51. Ishonchli shaxs orqali topshirilgan talabnomaga ishonchli shaxsga talabnoma beruvchi tomonidan berilgan va uning vakolatlarini tasdiqlaydigan ishonchnoma, yoxud ishonchnoma nusxasi ilova etiladi. Ishonchnoma talabnoma bilan bir vaqtda taqdim etiladi.

52. Ishonchnomada ishonchli shaxsning vakolatlari koʻlami belgilangan va ishonchnoma berilgan sana koʻrsatilgan boʻlishi lozim, aks holda u haqiqiy hisoblanmaydi. Ishonchnoma uni bergan shaxs tomonidan imzolangan boʻlishi lozim.

53. Ishonchnomaning amal qilish muddat uch yildan ortiq boʻlmasligi lozim. Agar ishonchnomada koʻrsatilgan muddat uch yildan ortiq boʻlsa, u berilgan sanadan eʼtiboran uch yil davomida haqiqiy hisoblanadi. Agar amal qilish muddati koʻrsatilmagan boʻlsa, ishonchnoma berilgan sanadan eʼtiboran bir yil davomida haqiqiy hisoblanadi.

54. Oʻzbekiston Respublikasidan tashqarida rasmiylashtirilgan ishonchnoma uni bergan mamlakat qonunchiligida nazarda tutilgan tartibda tuziladi.

II BOʻLIM. TALABNOMANI TOPShIRISh

8-§. Talabnoma beruvchi tomonidan talabnomani topshirish

55. Talabnoma muallif, ish beruvchi yoki ularning huquqiy vorisi (bundan buyon matnda talabnoma beruvchi deb yuritiladi) tomonidan bevosita Agentlikka topshiriladi yoki pochta xizmati orqali joʻnatiladi.

56. Talabnoma bir nechta talabnoma beruvchilar tomonidan topshirilishi mumkin. Bunda talabnoma beruvchilardan birining muhofaza hujjatini berish boʻyicha tadbirlarda qatnashishni rad etishi qolgan talabnoma beruvchi yoki talabnoma beruvchilarning muhofaza hujjatini olish uchun kerakli xatti-harakatlarni amalga oshirishiga toʻsiq boʻlmaydi.

57. Talabnoma bevosita talabnoma topshiruvchi tomonidan yoxud ishonchli shaxs orqali topshirilishi mumkin.

58. Qonunning 8-moddasiga muvofiq, agar ilgari topologiyadan tijorat maqsadlarida foydalanilgan boʻlsa, talabnoma Agentlikka topologiya birinchi marta foydalanilgan sanadan eʼtiboran ikki yildan oshmagan muddatdan kechiktirilmay topirilishi lozim.

III BOʻLIM. TALABNOMANING DAVLAT EKSPERTIZASI

9-§. Davlat ekspertizasini oʻtkazish

59. Roʻyxatdan oʻtkazish uchun talabnomada kerakli hujjatlarning mavjudligi va ularning belgilangan talablarga muvofiqligi Agentlik tomonidan talabnoma materiallari taqdim etilgan sanadan eʼtiboran ikki oy muddatda koʻrib chiqiladi.

60. Talabnomani davlat ekspertizasidan oʻtkazishda quyidagilar tekshiriladi:

a) roʻyxatdan oʻtkazish uchun talabnomada boʻlishi lozim boʻlgan hujjatlarning mavjudligi (2-§);

b) roʻyxatdan oʻtkazish uchun talabnoma hujjatlarining belgilangan talablarga muvofiq tarzda toʻgʻri rasmiylashtirilgani (3-§).

61. Mazkur Qoidalarining 60-bandida keltirib oʻtilgan talabnomani Davlat ekspertizasidan oʻtkazish natijalariga koʻra, Agentlik talabnoma beruvchiga talabnoma roʻyxatga olish uchun qabul qilingani toʻgʻrisida chop etish va guvohnoma berish uchun bojni toʻlash muddati koʻrsatilgan yoki sabablari koʻrsatilgan holda roʻyxatga olishni rad etish toʻgʻrisida bildirishnoma, yohud talabnoma hujjatlaridagi kamchiliklarni bartaraf etish uchun kiritilishi kerak boʻlgan maʼlumotlar koʻrsatilgan soʻrovnomani joʻnatadi.

62. Talabnoma beruvchi tomonidan Qonunning ikkinchi boʻlimi 8-moddasida belgilangan talablarga rioya etilmaganda, yaʼni, topologiyadan tijorat maqsadlarida birinchi marta foydalanilgan sanadan eʼtiboran roʻyxatdan oʻtkazish uchun talabnoma topshirilgunga qadar belgilangan ikki yillik muhlatga talabnoma beruvchi amal qilmaganda Agentlik talabnomani roʻyxatdan oʻtkazish uchun qabul qilmaslik huquqiga ega. Bunda talabnoma materiallari talabnoma beruvchiga qaytarilmaydi.

63. Agar roʻyxatdan oʻtkazish uchun talabnoma rasmiy ekspertizasi jarayonida roʻyxatdan oʻtkazish uchun talabnoma uning hujjatlariga qoʻyilgan talablarga rioya etilmagan holda rasmiylashtirilgani aniqlansa, talabnoma beruvchiga kamchiliklar koʻrsatilib soʻrovnoma joʻnatiladi va etishmagan yoki tuzatilgan hujjatlarni soʻrovnoma joʻnatilgan sanadan eʼtiboran uch oy ichida taqdim etish taklif qilinadi.

64. Agar talabnoma beruvchi belgilangan muddatda soʻralgan materiallarni yoki ularni topshirish muddatlarini uzaytirish haqidagi iltimosnomani taqdim etmasa, talabnoma chaqirib olingan deb hisoblanadi va bu haqda talabnoma beruvchiga xabar beriladi.

65. Topologiyani roʻyxatdan oʻtkazish toʻgʻrisida qaror qabul qilingunga qadar talabnoma beruvchi talabnoma materiallariga tuzatishlar, aniqliklar va qoʻshimchalar kiritish huquqiga ega.

66. Agar talabnoma barcha kerakli hujjatlarni oʻz ichiga olgan, ularni tuzishda mazkur Qoidalarda belgilangan talablarga rioya etilgan boʻlsa, va talabnomada koʻrsatilgan taklif Qonunning 8-moddasi ikkinchi qismiga zid boʻlmasa, u holda Agentlik topologiyani roʻyxatdan oʻtkazish haqida qaror qabul qiladi va bu haqida talabnoma beruvchini xabardor qiladi.

TO-1 Forma

(Oʻzbekiston Respublikasi intellektual mulk agentligi Bosh direktorining 2011-yil 26-avgustdagi 36-son buyrugʻi (roʻyxatdan oʻtgan sanasi 30.09.2011-y 1168-1-son)