Nazorat qiluvchi organlar tomonidan tadbirkorlik subyektlari faoliyatida oʻtkaziladigan tekshiruvlarni kelishish va oʻtkazish tartibi haqidagi vaqtinchalik nizomni tasdiqlash haqida (3067-son)
07.09.2018
OʻZBEKISTON RESPUBLIKASI BOSh PROKURORINING
buyrugʻi
[Oʻzbekiston Respublikasi Adliya vazirligi tomonidan 2018-yil 7-sentabrda roʻyxatdan oʻtkazildi, roʻyxat raqami 3067]
Oʻzbekiston Respublikasi Prezidentining 2018-yil 27-iyuldagi PF-5490-son “Tadbirkorlik subyektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari toʻgʻrisida”gi Farmoniga asosan buyuraman:
1. Nazorat qiluvchi organlar tomonidan tadbirkorlik subyektlari faoliyatida oʻtkaziladigan tekshiruvlarni kelishish va oʻtkazish tartibi haqidagi vaqtinchalik nizom ilovaga muvofiq tasdiqlansin.
2. Mazkur buyruq rasmiy eʼlon qilingan kundan eʼtiboran kuchga qiradi.
3. Mazkur buyruq Oʻzbekiston Respublikasining “Tadbirkorlik subyektlari faoliyatini davlat tomonidan nazorat qilish toʻgʻrisida”gi Qonuni kuchga kirgunga qadar amal qiladi.
Bosh prokuror O. MURODOV
Toshkent sh.,
2018-yil 6-sentabr,
B-55-son
Oʻzbekiston Respublikasi Bosh prokurorining 2018-yil 6-sentabrdagi B-55-son buyrugʻiga ILOVA
Nazorat qiluvchi organlar tomonidan tadbirkorlik subyektlari faoliyatida oʻtkaziladigan tekshiruvlarni kelishish va oʻtkazish tartibi haqidagi vaqtinchalik
NIZOM
Mazkur Nizom Oʻzbekiston Respublikasi Prezidentining 2018-yil 27-iyuldagi PF-5490-son “Tadbirkorlik subyektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari toʻgʻrisida”gi Farmoniga asosan nazorat qiluvchi organlar va ularning hududiy boʻlinmalari (bundan buyon matnda nazorat qiluvchi organlar deb yuritiladi) tomonidan tadbirkorlik subyektlari faoliyatida oʻtkaziladigan tekshiruvlarni kelishish va oʻtkazishning vaqtinchalik tartibini belgilaydi.
1-bob. Umumiy qoidalar
1. Mazkur Nizom talablari:
Oʻzbekiston Respublikasining “Sud hujjatlari va boshqa organlar hujjatlarini ijro etish toʻgʻrisida”gi Qonuni doirasida;
qoʻzgʻatilgan jinoyat ishlari doirasida;
davlat korxonalari va muassasalari faoliyatida;
norezidentlarning Oʻzbekiston Respublikasidagi doimiy muassasalari va vakolatxonalari faoliyatida;
nodavlat notijorat tashkilotlari faoliyatida;
tadbirkorlik subyektlari oʻz tashabbusi bilan oʻtkaziladigan tekshiruvlarga nisbatan tatbiq etilmaydi.
2. Mazkur Nizomda quyidagi asosiy tushunchalar qoʻllaniladi:
tadbirkorlik subyektlari — belgilangan tartibda davlat roʻyxatidan oʻtgan hamda tadbirkorlik faoliyatini amalga oshirayotgan yuridik va jismoniy shaxslar;
nazorat qiluvchi organlar — tadbirkorlik subyektlari faoliyatini davlat tomonidan nazorat qilishga qonunchilik hujjatlari bilan vakolat berilgan vazirlik va idoralar;
tekshiruv — tadbirkorlik subyektlari tomonidan qonunlar hamda ular faoliyatini tartibga soluvchi boshqa qonunchilik hujjatlari qanday bajarilayotganligini nazorat qiluvchi organlarning bir marta nazorat qilishi;
vakolatli organ — Oʻzbekiston Respublikasi Bosh prokuraturasi, Qoraqalpogʻiston Respublikasi, viloyatlar va Toshkent shahar prokuraturalari.
3. Tekshiruvlarni kelishish va oʻtkazish mazkur Nizomning 1-ilovasidagi sxemaga muvofiq amalga oshiriladi.
4. Tadbirkorlik subyektlari faoliyatida nazorat qiluvchi organlarning markaziy apparati tomonidan tashkil etiladigan tekshiruvlar Oʻzbekiston Respublikasi Bosh prokuraturasi (bundan buyon matnda Bosh prokuratura deb yuritiladi), ularning hududiy boʻlinmalari tomonidan oʻtkaziladigan tekshiruvlar tegishincha Qoraqalpogʻiston Respublikasi, viloyatlar va Toshkent shahar prokuraturalari (bundan buyon matnda viloyat prokuraturalari deb yuritiladi) bilan kelishiladi.
5. Tekshiruv oʻtkazishni vakolatli organ bilan kelishish Tekshiruvlarni elektron roʻyxatga olish yagona tizimi (bundan buyon matnda Yagona tizim deb yuritiladi) orqali amalga oshiriladi.
Yagona tizim toʻliq ishga tushirilgunga qadar tekshiruv oʻtkazishni kelishish bilan bogʻliq boʻlgan yozishmalar qogʻoz shaklida rasmiylashtirilishi mumkin.
Nazorat qiluvchi organ va vakolatli organ oʻrtasidagi davlat siri bilan bogʻliq boʻlgan tekshiruvlarni oʻtkazishga oid axborot almashinuvi davlat sirlarini saqlash toʻgʻrisidagi qonunchilik hujjatlarida belgilangan tartibda amalga oshiriladi hamda bunday tekshiruvlar haqidagi maʼlumotlar Yagona tizimga kiritilmaydi.
6. Muddati bir kun boʻlgan tekshiruvlarni kelishish viloyat prokuraturasi tomonidan, muddati bir kundan ortiq boʻlgan tekshiruvlarni kelishish faqat Bosh prokuratura tomonidan amalga oshiriladi.
Chet el investitsiyalari ishtirokidagi korxonalar, xorijiy korxonalar, shuningdek erkin iqtisodiy zonalarda joylashgan korxonalarda oʻtkaziladigan tekshiruvlarni kelishish faqat Bosh prokuratura tomonidan amalga oshiriladi.
7. Tadbirkorlik subyektlari ularda oʻtkazilayotgan tekshiruv haqidagi hamda ularning faoliyatini tekshirayotgan nazorat qiluvchi organlar toʻgʻrisidagi maʼlumotni Bosh prokuratura yoki viloyat prokuraturalaridan yozma shaklda yoki axborot kommunikatsiya texnologiyalaridan, shu jumladan Yagona tizimdan foydalangan holda elektron shaklda bepul olishga haqlidir.
8. Oʻtkazilgan tekshiruvdan norozi boʻlgan tadbirkorlik subyektlari nazorat qiluvchi organlarning yuqori tashkilotlariga yoki belgilangan tartibda sudga murojaat qilish huquqiga ega.
2-bob. Tekshiruvlarni kelishish
9. Nazorat qiluvchi organlar quyidagi asoslar mavjud boʻlganda:
jismoniy va yuridik shaxslarning qonunchilik hujjatlari buzilishi holatlari haqidagi murojaatlari asosida;
nazorat qiluvchi organlar tomonidan tadbirkorlik subyektlari faoliyatida oʻtkazilgan “xavfni tahlil etish” natijalari, shu jumladan ommaviy axborot vositalaridan yoki boshqa tashqi manbalardan (ijtimoiy tarmoqlar, veb-saytlar) olingan maʼlumotlar asosida vakolatli organga tekshiruv oʻtkazishni soʻrab murojaat qilishga haqli.
Bunda jismoniy va yuridik shaxslar murojaatlarining anonim emasligi hamda tekshiruv oʻtkazilishi rejalashtirilayotgan tadbirkorlik subyektining amalda faoliyat koʻrsatayotganligi nazorat qiluvchi organ tomonidan dastlab oʻrganib chiqilishi lozim.
10. Bir kunlik muddatda oʻtkaziladigan tekshiruvni kelishish uchun buyurtma nazorat qiluvchi organning viloyat darajasidagi hududiy boʻlinmasi orqali viloyat prokuraturasiga kiritiladi.
Muddati bir kundan ortiq boʻlgan tekshiruvni kelishish uchun esa buyurtma nazorat qiluvchi organning viloyat darajasidagi hududiy boʻlinmasi orqali uning markaziy apparati tomonidan Bosh prokuraturaga kiritiladi.
11. Nazorat qiluvchi organning tuman (shahar) boʻlinmasi tashabbusi bilan oʻtkaziladigan tekshiruvlarni kelishish tekshiruvga asos boʻlgan hujjatlarni axborot kommunikatsiya texnologiyalaridan foydalangan holda ushbu organning viloyat darajasidagi boʻlinmasiga taqdim etish orqali amalga oshiriladi.
12. Nazorat qiluvchi organ tomonidan ushbu Nizomning 2-ilovasiga muvofiq taqdim etilgan tekshiruvni kelishish toʻgʻrisidagi buyurtmada quyidagi maʼlumotlar koʻrsatiladi:
tekshiruv oʻtkazuvchi organ nomi;
tekshiruv oʻtkaziladigan tadbirkorlik subyektining nomi (filiali yoki shoxobchasi), soliq toʻlovchining identifikatsiya raqami, manzili;
tekshiruv oʻtkazish uchun asos;
talablari buzilishi mumkin boʻlgan normativ-huquqiy hujjat toʻgʻrisida maʼlumot;
tekshiruv oʻtkazish muddati;
tekshiruv predmeti;
tekshiriladigan faoliyat davri.
13. Buyurtmaga jismoniy yoki yuridik shaxsning qonunbuzilish holatlari haqidagi murojaati nusxasi, “xavfni tahlil etish” tizimi orqali aniqlangan qonunbuzilish holati boʻyicha batafsil maʼlumot hamda tekshiruv dasturi ilova qilinadi.
Tekshiruv dasturi ushbu murojaatda koʻrsatilgan holatlar yoki “xavfni tahlil etish” tizimi orqali aniqlangan qonunbuzilishlar doirasida tuzilishi va nazorat qiluvchi organ rahbari tomonidan tasdiqlanishi shart.
14. Buyurtma vakolatli organ tomonidan uch ish kunidan kechiktirmasdan koʻrib chiqiladi hamda tekshiruvni oʻtkazish kelishilganligi yoki rad etilganligi toʻgʻrisida ushbu Nizomning 3 va 4-ilovalariga muvofiq qaror qabul qilinadi.
Favqulodda vaziyatlar yuzaga kelishi, shu jumladan inson hayoti va sogʻligining xavf ostida qolishi, atrof-muhit zararlanishi, jiddiy moddiy talafotlar kelib chiqishi hamda odamlarning hayot faoliyati sharoiti izdan chiqishiga olib kelishi mumkin boʻlgan holatlar boʻyicha tekshiruvlarni kelishish toʻgʻrisidagi buyurtmalar bir ish kuni ichida koʻrib chiqiladi.
15. Bosh prokuratura tomonidan qabul qilingan qarorlar Oʻzbekiston Respublikasi Bosh prokurorining soliq va bojxona sohalaridagi qonunchilik ijrosi ustidan nazoratni amalga oshirish uchun masʼul oʻrinbosari, yoʻqligida esa uning vakolatini amalga oshirish yuklatilgan Bosh prokurorning boshqa oʻrinbosari tomonidan imzolanadi.
Viloyat prokuraturalari tomonidan qabul qilingan qarorlar tegishincha Qoraqalpogʻiston Respublikasi, viloyatlar va Toshkent shahar prokurorlari tomonidan, ular yoʻqligida esa vazifalarini vaqtincha bajaruvchi prokuror oʻrinbosarlari tomonidan imzolanadi.
16. Tekshiruv oʻtkazish kelishilganligi yoki rad etilganligi toʻgʻrisidagi qaror qabul qilingandan boshlab bir ish kunidan kechikmasdan nazorat qiluvchi organga yuboriladi.
3-bob. Tekshiruvlarni oʻtkazish
17. Nazorat qiluvchi organ tekshiruvni oʻtkazish kelishilgan kundan boshlab uch ish kuni ichida tekshiruv oʻtkazish toʻgʻrisida buyruq qabul qiladi.
Buyruqda tekshiruv oʻtkazish uchun asos boʻlgan hujjat nomi, raqami va sanasi, nazorat qiluvchi organning tekshiruvda ishtirok etadigan masʼul xodimlari tarkibi, tekshiriladigan tadbirkorlik subyektining nomi (filiali yoki shoxobchasi), soliq toʻlovchining identifikatsiya raqami, manzili, tekshiruv maqsadi, muddati va tekshiriladigan faoliyat davri koʻrsatiladi hamda tekshiruv dasturi ilova qilinadi.
18. Nazorat qiluvchi organning tegishli tarkibiy boʻlinmasi tomonidan oʻtkaziladigan tekshiruvga uning boshqa tarkibiy boʻlinmalarining tadbirkorlik subyektlari faoliyatini tekshirish huquqiga ega boʻlgan xodimlari jalb etilishi mumkin.
Nazorat qiluvchi organning yuqori tashkiloti tekshiruvni quyi boʻlinmalariga yuklashga haqli.
19. Nazorat qiluvchi organlar tomonidan tadbirkorlik subyektlari faoliyatida oʻtkaziladigan tekshiruvlar Oʻzbekiston Respublikasi Prezidentining 2018-yil 27-iyuldagi PF-5490-son “Tadbirkorlik subyektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari toʻgʻrisida”gi Farmonining 1 va 2-ilovalarida belgilangan muddatlardan oshmasligi shart.
20. Tekshiruv oʻtkazish jarayonida nazorat qiluvchi organning masʼul xodimlari oʻz vakolatlari va tekshiruv dasturida belgilangan masalalar doirasidan chetga chiqmasligi lozim.
21. Nazorat qiluvchi organning masʼul xodimlari tekshiruv boshlanishidan oldin tadbirkorlik subyekti rahbarini (rahbarning vazifasini bajaruvchi shaxsni) yoki yakka tartibdagi tadbirkorni tekshiruv maqsadi bilan tanishtiradi, unga oʻz xizmat guvohnomasi va tekshiruv oʻtkazish huquqini beruvchi maxsus guvohnomasini koʻrsatadi, Yagona tizimga tekshiruvning unikal kodini kiritish orqali tekshiruvga doir maʼlumotlarni olish huquqini tushuntiradi, shuningdek tekshiruvni oʻtkazishga asos boʻlgan hujjatlar (tekshiruv oʻtkazish kelishilganligini tasdiqlovchi hujjat nusxasi, nazorat qiluvchi organning tekshiruv oʻtkazish toʻgʻrisidagi buyrugʻi va tekshiruv dasturi) nusxalarini tilxat olgan holda topshiradi.
Tadbirkorlik subyekti oʻz soʻroviga koʻra oʻtkazilayotgan tekshiruv haqidagi axborotni Yagona tizimdan qisqa xabar (SMS) koʻrinishida va real vaqt rejimida internet tarmogʻi orqali olishi mumkin.
Oʻzbekiston Respublikasi Soliq kodeksining 92-moddasida nazarda tutilgan hollarda mazkur bandning birinchi xatboshisida koʻrsatilgan harakatlar nazorat qiluvchi organning masʼul xodimlari tomonidan tekshiruv tugallangunga qadar amalga oshiriladi.
22. Tekshiruv oʻtkazish uchun asos boʻlgan hujjatlar nusxasi tekshirilayotgan tadbirkorlik subyektiga tilxat olingan holda topshirilgan kun tekshiruvni oʻtkazish boshlangan kun hisoblanadi.
Tekshirilayotgan tadbirkorlik subyektining mazkur hujjatlarni olishdan bosh tortganligi tekshiruvni bekor qilish uchun asos boʻlmaydi.
Tekshirilayotgan tadbirkorlik subyekti mazkur hujjatlarni olishdan bosh tortgan taqdirda, bu haqda nazorat qiluvchi organning masʼul xodimi tomonidan dalolatnoma tuziladi. Bunda dalolatnoma rasmiylashtirilgan kun tekshiruvni oʻtkazish boshlangan kun hisoblanadi.
23. Nazorat qiluvchi organning masʼul xodimlari tadbirkorlik subyekti tomonidan taqdim etilgan “Tekshiruvlarni roʻyxatga olish kitobi”ni qonunchilik hujjatlarida belgilangan tartibda toʻldirishi shart.
Texnik imkoniyat mavjud boʻlganda majburiy tartibda “Tekshiruvlarni roʻyxatga olish kitobi”ning elektron shakli toʻldiriladi. Bunda qogʻoz shaklini toʻldirish talab etilmaydi.
Tekshiruv natijalari toʻgʻrisidagi dalolatnomaga “Tekshiruvlarni roʻyxatga olish kitobi”ning toʻldirilgan shakli (qogʻoz shakli toʻldirilganda — elektron shakli toʻldirilmaganligi sababi) yoki kitob taqdim etilmaganda — uning taqdim etilmaganligi toʻgʻrisida tekshiruvchi tomonidan tegishli yozuv kiritiladi.
Nazorat qiluvchi organning masʼul xodimlari “Tekshiruvlarni roʻyxatga olish kitobi”ni toʻldirishdan bosh tortgan taqdirda, tadbirkorlik subyekti tekshiruv oʻtkazilishiga yoʻl qoʻymaslikka haqli.
24. Tadbirkorlik subyektlari birlashmalarining aʼzosi boʻlgan tadbirkorlik subyektining faoliyatini tekshirishda ushbu tadbirkorlik subyekti soʻroviga koʻra mazkur birlashmalar vakillari, Oʻzbekiston Respublikasi Savdo-sanoat palatasining aʼzosi boʻlgan tadbirkorlik subyektining faoliyatini tekshirishda esa palata vakillari ishtirok etishi mumkin.
Soliq maslahatchilari va (yoki) advokatlar tomonidan tadbirkorlik subyektiga tekshiruv davomida shartnoma asosida tegishli xizmatlar koʻrsatilishi mumkin.
Nazorat qiluvchi organning masʼul xodimlari tekshiruv boshlanishidan oldin tadbirkorlik subyekti rahbariga (rahbarning vazifasini bajaruvchi shaxsga) yoki yakka tartibdagi tadbirkorga mazkur bandning birinchi va ikkinchi xatboshilarida nazarda tutilgan shaxslarni tekshiruvda ishtirok etishga jalb qilish huquqini tushuntiradi hamda bu haqda tadbirkorlik subyekti rahbari (rahbarning vazifasini bajaruvchi shaxs) yoki yakka tartibdagi tadbirkor tomonidan tekshiruv oʻtkazishga asos boʻlgan hujjatlar nusxalari olinganligini tasdiqlovchi tilxatda maʼlumot qayd etiladi.
Mazkur bandning birinchi va ikkinchi xatboshilarida nazarda tutilgan shaxslarning tekshiruvda ishtirok etish uchun yetib kelmasligi tekshiruv oʻtkazilishiga toʻsqinlik qilmaydi.
25. Tekshiruv davomida nazorat qiluvchi organning masʼul xodimlari hamda tekshirilayotgan tadbirkorlik subyektlari Oʻzbekiston Respublikasi “Xoʻjalik yurituvchi subyektlar faoliyatini davlat tomonidan nazorat qilish toʻgʻrisida”gi Qonunining 16 va 17-moddalarida belgilangan huquqlardan foydalanadilar va majburiyatlarga amal qiladilar.
26. Tekshiruv bilan tadbirkorlik subyektining bevosita tekshiruv oʻtkazish yilidan oldingi uch kalendar yildan koʻp boʻlmagan faoliyati qamrab olinishi mumkin. Bunda:
tekshiruv oʻtkazilayotgan kalendar yilning oʻtgan davri tekshirilishi mumkin;
tekshiruvni oʻtkazayotgan nazorat qiluvchi organ tomonidan ilgari tekshirilgan faoliyat davri boʻyicha qayta tekshiruv oʻtkazilmaydi.
27. Tekshiruvni belgilangan muddatda oʻtkazish imkoni boʻlmagan hollarda, shuningdek tekshiruv boshlangandan keyin tadbirkorlik subyekti rahbari (rahbarning vazifasini bajaruvchi shaxs) yoki yakka tartibdagi tadbirkor tekshiruvda ishtirok eta olmagan, talab etilgan hujjatlar taqdim etilmagan yoki sohaviy mutaxassislar mavjud boʻlmagan taqdirda, tekshiruv nazorat qiluvchi organning buyrugʻi asosida toʻxtatilib, uning asoslantirilgan murojaatiga koʻra tekshiruv yoki uning qolgan muddati vakolatli organning ruxsati bilan boshqa vaqtga koʻchirilishi mumkin.
Muddati koʻchirilgan tekshiruvni oʻtkazish tekshiruv toʻxtatilgan oydan keyingi oyning soʻnggi kunidan kechiktirmasdan taʼminlanishi lozim. Ushbu muddatda oʻtkazilmagan tekshiruv yakunlangan hisoblanadi.
Bunda tekshiruv oʻtkazish muddatini hisoblash ham toʻxtatiladi.
28. Tekshiruv oʻtkazish jarayonida oʻrganish lozim boʻlgan qoʻshimcha holatlar aniqlangan taqdirda, tekshiruv muddati nazorat qiluvchi organning asoslantirilgan murojaatiga koʻra Bosh prokuraturaning ruxsati bilan faqat bir marta, biroq tekshiruv kelishilgan muddatdan oshmagan vaqtga uzaytirilishi mumkin (masalan, olti kunga kelishilgan tekshiruvni uzaytirishda koʻpi bilan yana olti kun qoʻshib berilishi mumkin).
29. Tekshiruv muddatini koʻchirish va uzaytirish tekshiruv oʻtkazishni kelishish uchun belgilangan tartibda amalga oshiriladi.
30. Tekshiruvni tadbirkorlik subyekti roʻyxatdan oʻtgan yoki faoliyat yuritayotgan manzilda oʻtkazish imkoniyati boʻlmagan taqdirda, uni tadbirkorlik subyektining roziligi bilan ushbu subyekt roʻyxatdan oʻtgan yoki faoliyat yuritayotgan hududdagi nazorat qiluvchi organ binosida oʻtkazish mumkin.
31. Tekshiruvlar natijalari dalolatnoma bilan rasmiylashtiriladi. Tekshiruv dalolatnomasi kamida ikki nusxada tuziladi.
Bir kunlik muddatda oʻtkaziladigan tekshiruv dalolatnomasi tekshiruv oʻtkazilgan kunda, muddati bir kundan ortiq boʻlgan tekshiruv boʻyicha esa, tekshiruv muddatining oxirgi kunidan kechiktirmasdan rasmiylashtirilishi shart.
Bunda tekshiruv dalolatnomasining nusxalari nazorat qiluvchi organning masʼul xodimlari va tadbirkorlik subyektining rahbari (rahbar vazifasini bajaruvchi shaxs) yoki yakka tartibdagi tadbirkor tomonidan imzolanadi hamda bir nusxasi tadbirkorlik subyekti rahbariga (rahbar vazifasini bajaruvchi shaxsga) yoki yakka tartibdagi tadbirkorga uni olgan sanani koʻrsatgan holda imzo qoʻydirib topshiriladi.
32. Tekshirilgan tadbirkorlik subyekti oʻtkazilgan tekshiruv natijasi boʻyicha oʻz eʼtirozlarini dalolatnomada yozma ravishda aks ettirishi mumkin.
33. Tekshirilgan tadbirkorlik subyekti tekshiruv dalolatnomasini olishdan va (yoki) uni imzolashdan bosh tortganda, nazorat qiluvchi organning masʼul xodimi bu haqda dalolatnomaga tegishli yozuv kiritadi va shu paytdan eʼtiboran tekshiruv tugagan hisoblanadi.
Bu holda tekshiruv dalolatnomasining bir nusxasi u tuzilgan kundan keyingi ish kunidan kechiktirmasdan tadbirkorlik subyektiga pochta orqali buyurtma xat bilan yuboriladi.
34. Tekshiruv dalolatnomasi nazorat qiluvchi organ tomonidan belgilangan tartibda roʻyxatga olinadi.
35. Oʻtkazilgan tekshiruv natijalari boʻyicha tuzilgan dalolatnomada qayd etilgan qonunbuzilish holatlari toʻgʻrisidagi xulosalar tekshiruv yakunlangandan soʻng uch ish kuni ichida, tadbirkorlik subyektiga nisbatan qoʻllanilgan taʼsir choralari toʻgʻrisidagi maʼlumotlar (yozma koʻrsatma, maʼmuriy huquqbuzarlik toʻgʻrisida bayonnoma, moliyaviy va iqtisodiy jarimalarni qoʻllash toʻgʻrisida qarorlar, sud qarorlari) mazkur choralar qoʻllanilgandan soʻng uch ish kunidan kechiktirmasdan nazorat qiluvchi organlar tomonidan Yagona tizimga kiritilishi lozim.
Bosh prokuratura bilan kelishilgan holda oʻtkazilgan tekshiruvlar natijalari toʻgʻrisidagi maʼlumotlar nazorat qiluvchi organning markaziy apparati, viloyat prokuraturalari bilan kelishilgan tekshiruvlar boʻyicha maʼlumotlar nazorat qiluvchi organning viloyat darajasidagi tegishli boʻlinmasi tomonidan Yagona tizimga kiritiladi.
36. Tekshiruv natijasida aniqlangan bank siriga oid maʼlumotlar Yagona tizimga kiritilmaydi.
4-bob. Vakolatli organni xabardor etish tartibida tekshiruv oʻtkazish
37. Oʻzbekiston Respublikasi Prezidentining 2018-yil 27-iyuldagi PF-5490-son “Tadbirkorlik subyektlarining huquqlari va qonuniy manfaatlarini himoya qilish tizimini yanada takomillashtirish chora-tadbirlari toʻgʻrisida”gi Farmonining 2-ilovasida (bundan buyon matnda Xabardor etish tartibidagi tekshiruvlar roʻyxati deb yuritiladi) belgilangan tekshiruvlar nazorat qiluvchi organlar tomonidan vakolatli organni xabardor etish tartibida oʻtkaziladi.
38. Tekshiruvlar Xabardor etish tartibidagi tekshiruvlar roʻyxatining:
1 va 2-bandlari boʻyicha — ishonchli maʼlumotlar mavjud boʻlgan hollarda;
3, 6, 10 va 15-bandlari boʻyicha — nazorat qiluvchi organ tomonidan belgilangan tartibda tasdiqlangan grafik asosida;
4, 5, 7, 8, 9, 11 — 14, 16 — 25-bandlari boʻyicha — zaruratga qarab oʻtkaziladi.
39. Tekshiruv nazorat qiluvchi organning tekshiruvni oʻtkazish toʻgʻrisidagi buyrugʻi, shuningdek ishonchli maʼlumotlarni tasdiqlovchi hujjatlar yoki tekshiruv oʻtkazish yuzasidan tasdiqlangan grafik Yagona tizimga kiritilgandan soʻng amalga oshiriladi.
40. Xabardor etish tartibidagi tekshiruvlar roʻyxatida koʻrsatilgan ikki yoki undan ortiq nazorat qiluvchi organlar tomonidan oʻtkaziladigan tekshiruvlar toʻgʻrisida vakolatli organni xabardor qilish har bir organ tomonidan alohida amalga oshiriladi.
41. Xabardor etish tartibida oʻtkaziladigan tekshiruvlar kelishiladigan tekshiruvlarni oʻtkazish uchun belgilangan tartibda amalga oshiriladi.
42. Jismoniy va yuridik shaxslarning Xabardor etish tartibidagi tekshiruvlar roʻyxatida nazarda tutilgan masalalar boʻyicha murojaatlari asosida tekshiruvlarni oʻtkazish vakolatli organni xabardor etish tartibida amalga oshiriladi.
Agar jismoniy va yuridik shaxslarning murojaatlarida bir nechta masala koʻrsatilib, ulardan kamida bittasi kelishish tartibida tekshiruv oʻtkazilishini talab etadigan boʻlsa, tekshiruvlar vakolatli organ bilan kelishilgan holda oʻtkaziladi.
5-bob. Tekshiruvlarning oʻtkazilishini monitoring qilish
43. Vakolatli organ nazorat qiluvchi organlar tomonidan tekshiruvlar belgilangan tartibda oʻtkazilganligini Yagona tizim orqali doimiy ravishda monitoring qilib boradi.
44. Vakolatli organ tomonidan monitoring natijalariga koʻra nazorat qiluvchi organlarning masʼul xodimlari tadbirkorlik subyektlari faoliyatida noqonuniy tekshiruv oʻtkazganligi yoki tekshiruv davomida qonunbuzilish holatlariga yoʻl qoʻyganligi aniqlangan holatlarda ularni belgilangan tartibda javobgarlikka tortish choralari koʻriladi.
6-bob. Yakuniy qoidalar
45. Vakolatli organ va nazorat qiluvchi organlarning masʼul xodimlari mazkur Nizom talablariga rioya etilishi, tekshiruv munosabati bilan oʻziga maʼlum boʻlgan tijorat siri, xizmat siri va qonun bilan qoʻriqlanadigan boshqa sirlar, shuningdek oshkor etilmagan axborotlar muhofaza qilinishini taʼminlashi shart.
46. Nazorat qiluvchi organlarning:
rahbarlari tekshiruv oʻtkazishga ruxsat olish yoki vakolatli organni tekshiruv oʻtkazish toʻgʻrisida xabardor etish uchun taqdim etilgan maʼlumotlarning ishonchliligi va toʻliqligi uchun;
masʼul xodimlari oʻz vakolatlari va nazorat sohasidan tashqari masalalar boʻyicha har qanday tekshiruv oʻtkazilmasligi uchun javobgardir.
47. Mazkur Nizom talablarining buzilishida aybdor boʻlgan shaxslar qonunchilik hujjatlariga muvofiq javobgar boʻladilar.
48. Ushbu Nizom Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil va Savdo-sanoat palatasi bilan kelishilgan.
Oʻzbekiston Respublikasi Prezidenti huzuridagi Tadbirkorlik subyektlarining huquqlari va qonuniy manfaatlarini himoya qilish boʻyicha vakil D. KASIMOV
2018-yil 5-sentabr
Savdo-sanoat palatasi raisi A. IKRAMOV
2018-yil 5-sentabr
Nazorat qiluvchi organlar tomonidan tadbirkorlik subyektlari faoliyatida oʻtkaziladigan tekshiruvlarni kelishish va oʻtkazish tartibi haqidagi vaqtinchalik nizomga 1-ILOVA
Nazorat qiluvchi organlar tomonidan tadbirkorlik subyektlari faoliyatida tekshiruvlarni kelishish va oʻtkazish
SXEMASI
Nazorat qiluvchi organlar tomonidan tadbirkorlik subyektlari faoliyatida oʻtkaziladigan tekshiruvlarni kelishish va oʻtkazish tartibi haqidagi vaqtinchalik nizomga 2-ILOVA
Nazorat qiluvchi organlar tomonidan tadbirkorlik subyektlari faoliyatida oʻtkaziladigan tekshiruvlarni kelishish va oʻtkazish tartibi haqidagi vaqtinchalik nizomga 3-ILOVA
Nazorat qiluvchi organlar tomonidan tadbirkorlik subyektlari faoliyatida oʻtkaziladigan tekshiruvlarni kelishish va oʻtkazish tartibi haqidagi vaqtinchalik nizomga 4-ILOVA
(Qonun hujjatlari maʼlumotlari milliy bazasi, 08.09.2018-y., 10/18/3067/1854-son; Qonunchilik maʼlumotlari milliy bazasi, 28.07.2021-y., 10/21/3313/0724-son)