“Egmont” moliyaviy razvedka boʻlinmalari guruhining faoliyatida ishtirok etish doirasida Oʻzbekiston Respublikasining majburiyatlarini taʼminlashga doir tashkiliy chora-tadbirlar toʻgʻrisida (710-son)

05.09.2018

Oʻzbekiston Respublikasi Vazirlar Mahkamasining

qarori

Oʻzbekiston Respublikasi Prezidentining “Budjet mablagʻlaridan foydalanish samaradorligini tubdan oshirish va iqtisodiy jinoyatlarga qarshi kurashish mexanizmlarini takomillashtirish chora-tadbirlari toʻgʻrisida” 2018-yil 23-maydagi PF-5446-son Farmoni ijrosini taʼminlash maqsadida Vazirlar Mahkamasi qaror qiladi:

1. Oʻzbekiston Respublikasi Bosh prokuraturasi huzuridagi Iqtisodiy jinoyatlarga qarshi kurashish departamenti (keyingi oʻrinlarda Departament deb ataladi) “Egmont” moliyaviy razvedka boʻlinmalari guruhining (keyingi oʻrinlarda “Egmont” guruhi deb ataladi) faoliyatida ishtirok etish doirasida Oʻzbekiston Respublikasining majburiyatlari taʼminlanishi uchun masʼul maxsus vakolatli organ etib belgilangani maʼlumot uchun qabul qilinsin.

2. Oʻzbekiston Respublikasi Tashqi ishlar vazirligi, Iqtisodiyot va moliya vazirligi, Kambagʻallikni qisqartirish va bandlik vazirligi, Investitsiyalar, sanoat va savdo vazirligi, Ichki ishlar vazirligi, Adliya vazirligi, Raqamli texnologiyalar vazirligi, Davlat xavfsizlik xizmati, Soliq qoʻmitasi, Iqtisodiyot va moliya vazirligi huzuridagi Bojxona qoʻmitasi, Milliy statistika qoʻmitasi, Davlat aktivlarini boshqarish agentligi, Markaziy banki Departamentni “Egmont” guruhi faoliyatida ishtirok etish doirasida Oʻzbekiston Respublikasining majburiyatlarini bajarish uchun zarur boʻlgan maʼlumotlar bilan taʼminlasin.

3. Departamentga amaliy maqsadga muvofiqlikdan kelib chiqib va ushbu qarorning 2-bandida qayd etilgan tegishli vazirlik hamda idoralar rahbarlari bilan kelishgan holda, “Egmont” guruhi faoliyatiga tegishli qismi boʻyicha, shuningdek, “Egmont” guruhi doirasida oʻtkaziladigan yalpi majlislar va boshqa tadbirlarda ishtirok etish uchun Oʻzbekiston Respublikasi delegatsiyalarini shakllantirishda ularning vakillarini ekspertlar sifatida belgilangan tartibda jalb qilishga ruxsat berilsin.

4. Departament Oʻzbekiston Respublikasi Tashqi ishlar vazirligi va Moliya vazirligi bilan birgalikda Departamentning budjetdan tashqari maxsus fondi mablagʻlari hisobidan quyidagi xarajatlar moliyalashtirilishini belgilangan tartibda taʼminlasin:

“Egmont” guruhi budjetiga Oʻzbekiston Respublikasining har yilgi ulushli badalini toʻlash;

Oʻzbekiston Respublikasi delegatsiyalarining “Egmont” guruhi doirasida oʻtkaziladigan yalpi majlislar va boshqa tadbirlarda ishtirok etish bilan bogʻliq xarajatlarni qoplash.

5. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Moliya vaziri J.A. Qoʻchqorov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 5-sentabr,

710-son