Avtotransport vositalari oynalarining tusini oʻzgartirishga (qoraytirishga) ruxsatnoma berish, uni roʻyxatga olish va ruxsatnomaning amal qilishini bekor qilish tartibi toʻgʻrisidagi nizomni tasdiqlash haqida (3059-son)

25.08.2018

Oʻzbekiston Respublikasi Ichki ishlar vazirligi Oʻzbekiston Respublikasi Bosh prokuraturasi Oʻzbekiston Respublikasi Davlat xavfsizlik xizmatining

Qarori

[Oʻzbekiston Respublikasi Adliya vazirligi tomonidan 2018-yil 25-avgustda roʻyxatdan oʻtkazildi, roʻyxat raqami 3059]

Oʻzbekiston Respublikasi Vazirlar Mahkamasining 2018-yil 18-iyuldagi 547-son “Tusi oʻzgartirilgan (qoraytirilgan) oynali avtotransport vositalaridan foydalanishni tartibga solish chora-tadbirlari toʻgʻrisida”gi qaroriga muvofiq Oʻzbekiston Respublikasi Ichki ishlar vazirligi, Bosh prokuraturasi va Davlat xavfsizlik xizmati qaror qiladi:

1. Avtotransport vositalari oynalarining tusini oʻzgartirishga (qoraytirishga) ruxsatnoma berish, uni roʻyxatga olish va ruxsatnomaning amal qilishini bekor qilish tartibi toʻgʻrisidagi nizom ilovaga muvofiq tasdiqlansin.

2. Mazkur qaror rasmiy eʼlon qilingan kundan eʼtiboran kuchga qiradi.

Ichki ishlar vaziri P.R. BOBOJONOV

Toshkent sh.,

2018-yil 24-avgust,

58-son

Bosh prokuror O.B. MURODOV

Toshkent sh.,

2018-yil 24-avgust,

50-qq-son

Davlat xavfsizlik xizmati raisi I.B. ABDULLAYEV

Toshkent sh.,

2018-yil 24-avgust,

7-son

Oʻzbekiston Respublikasi Ichki ishlar vazirligi, Bosh prokuraturasi va Davlat xavfsizlik xizmatining 2018-yil 24-avgustdagi 58, 50-qq, 7-son qaroriga ILOVA

Avtotransport vositalari oynalarining tusini oʻzgartirishga (qoraytirishga) ruxsatnoma berish, uni roʻyxatga olish va ruxsatnomaning amal qilishini bekor qilish tartibi toʻgʻrisidagi

NIZOM

1-bob. Umumiy qoidalar

1. Mazkur Nizom Oʻzbekiston Respublikasi Ichki ishlar vazirligi Davlat yoʻl harakati xavfsizligi xizmatining (bundan buyon matnda DYHXX deb yuritiladi) boʻlinmalari tomonidan avtotransport vositalari oynalarining tusini oʻzgartirishga (qoraytirishga) ruxsatnoma berish, uni roʻyxatga olish va ruxsatnomaning amal qilishini bekor qilish tartibini belgilaydi.

2. Mazkur Nizomda quyidagi asosiy tushunchalar qoʻllaniladi:

avtotransport vositasining egasi — avtotransport vositasiga mulk huquqi yoki boshqa ashyoviy huquqlar asosida egalik qiluvchi yuridik yoki jismoniy shaxs;

murojaat etuvchi shaxs — avtotransport vositasi oynalarining tusini oʻzgartirishga (qoraytirishga) ruxsat berishni soʻrab murojaat qilgan Oʻzbekiston Respublikasining jismoniy yoki yuridik shaxsi, chet el fuqarosi yoki Oʻzbekiston Respublikasida yashash maqomiga ega boʻlgan fuqaroligi boʻlmagan shaxs yoki chet el fuqarosining ichki ishlar organlarida doimiy yoki vaqtinchalik yashash joyi qayd etilgan milliy pasportiga ega boʻlgan shaxs, chet el davlatlarining Oʻzbekiston Respublikasida faoliyat koʻrsatuvchi vakolatxonalari yoki yuridik shaxslari;

ruxsatnoma — avtotransport vositalari oynalarining tusini oʻzgartirishga (qoraytirishga) DYHXX boʻlinmasi tomonidan beriladigan hujjat;

stiker — ichki ishlar organlarining ruxsatnomasi asosida avtotransport vositalari oynalarining tusi oʻzgartirilganligini (qoraytirilganligini) bildiruvchi maxsus emblema (gologramma).

2-bob. Ruxsat berishning talab va shartlari

3. Ruxsatnomani berish Qoraqalpogʻiston Respublikasi Ichki ishlar vazirligi, Toshkent shahar ichki ishlar bosh boshqarmasi va viloyatlar ichki ishlar boshqarmalari yoʻl harakati xavfsizligi boshqarmalarining roʻyxatlash va imtihon olish boʻlinmalari (boʻlim, boʻlinma, punkt) (bundan buyon matnda DYHXXning hududiy boʻlinmalari deb yuritiladi) tomonidan amalga oshiriladi.

Bunda DYHXXning hududiy boʻlinmalari tomonidan avtotransport vositaci oynalarining tusini oʻzgartirishga (qoraytirishga) ruxsatnoma avtotransport vositasining roʻyxatga olingan joyidan qatʼiy nazar, beriladi.

4. Avtotransport vositalari oynalarining tusini oʻzgartirish (qoraytirish) ishlari ruxsatnoma va tasdiqlangan davlat standartiga muvofiq avtotransport vositasi egasi tomonidan mustaqil ravishda, shuningdek Oʻzbekiston Respublikasi Ichki ishlar vazirligi huzuridagi “Innovatsiya loyihalari va aholiga servis xizmatlar koʻrsatish markazi” DUK yoki ushbu faoliyat bilan shugʻullanuvchi tadbirkorlik subyektlari (bundan buyon matnda ish bajaruvchilar deb yuritiladi) tomonidan kelishuv asosida amalga oshirilishi mumkin.

5. Ruxsatnomaga hamda tasdiqlangan davlat standartiga muvofiq avtotransport vositalari oynalarining tusi:

yengil avtomobillarda — ular orqa yon oynalari tusining yorugʻlik oʻtkazuvchanligi cheklanmagan darajada, old yon oynalari tusining yorugʻlik oʻtkazuvchanligi 50 foizdan kam boʻlmagan darajada;

turistik yoʻnalishlarda yoʻlovchi tashish faoliyatini amalga oshiruvchi avtobus, mikroavtobus va minivenlarda — ular yon oynalari tusining yorugʻlik oʻtkazuvchanligi 50 foizdan kam boʻlmagan darajada oʻzgartirilishi (qoraytirilishi) mumkin.

Oynalarni koʻzgusimon tusda oʻzgartirishga (qoraytirishga) ruxsat etilmaydi.

6. Avtotransport vositasi orqa oynasining tusini yorugʻlik oʻtkazuvchanligi cheklanmagan darajada oʻzgartirish (qoraytirish), shuningdek old oynasining tepa qismi tusini 14 sm.dan koʻp boʻlmagan polosa shaklida, yorugʻlik oʻtkazuvchanligi cheklanmagan darajada oʻzgartirish (qoraytirish) ruxsatnomasiz, tasdiqlangan davlat standarti asosida amalga oshiriladi.

3-bob. Avtotransport vositalari oynalarining tusini oʻzgartirish (qoraytirish) va ruxsatnoma berish hamda ularni hisobini yuritish tartibi

7. Ruxsatnoma berish mazkur Nizomning 1-ilovasiga muvofiq sxema boʻyicha amalga oshiriladi.

8. Ruxsatnoma olish uchun DYHXXning hududiy boʻlinmalariga mazkur Nizomning tegishliligiga koʻra 2 yoki 3-ilovasiga muvofiq shakldagi ariza bilan murojaat qilinadi.

9. Arizaga quyidagi hujjatlar ilova etilishi lozim:

a) avtotransport vositasi egasining shaxsini tasdiqlovchi hujjat nusxasi (jismoniy shaxslarga — Oʻzbekiston Respublikasi fuqarosining pasporti, harbiy xizmatchilar uchun — harbiy qism yoki harbiy muassasalar qoʻmondonligi tomonidan beriladigan shaxsni tasdiqlovchi hujjat yoki harbiy bilet (harbiy xizmatga majbur fuqarolarning harbiy biletlari bundan mustasno), chet el fuqarolari uchun — Oʻzbekiston Respublikasida yashash guvohnomasi yoki ichki ishlar organlarining doimiy yoki vaqtinchalik propiska joyi haqida belgi qoʻyilgan chet el fuqarosining milliy pasporti, fuqaroligi boʻlmagan shaxslar uchun — fuqaroligi boʻlmagan shaxslarning shaxsini tasdiqlovchi Oʻzbekiston Respublikasida yashash guvohnomasi);

b) avtotransport vositasining egasiga tegishliligini tasdiqlovchi (texnik pasport, texnik talon) roʻyxatdan oʻtkazilganligi haqidagi guvohnoma nusxasi;

v) yuridik shaxsga tegishli boʻlgan avtotransport vositalari oynalarining tusini oʻzgartirishga (qoraytirishga) ruxsatnomani olishgaishonchnoma (yuridik shaxs rahbariga talab etilmaydi) va ishonchnoma berilgan shaxsning shaxsini tasdiqlovchi hujjat;

g) avtotransport vositalari oynalarining tusini oʻzgartirishga (qoraytirishga) ruxsatnoma olish uchun toʻlov amalga oshirilganligini tasdiqlovchi toʻlov hujjati.

10. Masʼul xodim tomonidan ruxsatnoma olish uchun zarur boʻlgan maʼlumotlar, shuningdek hujjatlarning namunalari Oʻzbekiston Respublikasi Ichki ishlar vazirligining rasmiy veb-saytiga joylashtiriladi.

11. DYHXX hududiy boʻlinmasining arizani koʻrib chiqish va ruxsatnomani berish uchun masʼul boʻlgan xodimi:

murojaat etuvchi shaxsdan mazkur Nizomning 9-bandida koʻrsatilgan hujjatlarni qabul qiladi;

mazkur Nizomning 4-ilovasiga muvofiq (qogʻoz yoki elektron shaklda) ruxsatnomalarni berishni maxsus roʻyxatga olish kitobida qayd etadi;

mazkur Nizomning 5-ilovasiga muvofiq namunadagi ruxsatnomani rasmiylashtiradi, imzolaydi va DYHXX hududiy boʻlinmasining muhrini bosadi.

12. Rasmiylashtirilgan ruxsatnoma murojaat etuvchi shaxsga Ruxsatnomalarni berishni maxsus roʻyxatga olish kitobiga imzo qoʻyilgan holda beriladi.

Bunda ruxsatnoma bilan birgalikda uning amal qilish muddati nazarda tutilgan, mazkur Nizomning 5a-ilovasiga muvofiq namunadagi stiker hamda oynalar tusini oʻzgartirishga (qoraytirishga) moʻljallangan plyonka bepul qoʻshib berilishi lozim.

14. DYHXXning hududiy boʻlinmasi masʼul xodimi avtotransport vositasining hisobga olish (elektron va qogʻoz shakldagi) maʼlumotlariga tegishli oʻzgartirishlar kiritadi (ruxsatnomaning seriyasi, raqami, berilgan joyi, vaqti va amal qilish muddati, stiker raqami).

15. Barcha ishlar arizani qabul qilishdan boshlab ruxsatnoma berilgunga qadar ikki soat ichida amalga oshirilishi shart.

16. Quyidagilarga asosan ruxsatnoma berish rad etilishi mumkin:

murojaat etuvchi shaxs tomonidan mazkur Nizomning 9-bandida koʻrsatilgan hujjatlar toʻliq taqdim etilmaganda;

murojaat etuvchi shaxs tomonidan taqdim etilgan hujjatlarda haqqoniy boʻlmagan yoki notoʻgʻri maʼlumotlar koʻrsatilganligi aniqlanganda;

Ruxsatnomani berishning boshqa asoslarga, shu jumladan, maqsadga muvofiq emasligiga koʻra rad etilishiga yoʻl qoʻyilmaydi.

17. Ruxsatnoma berish rad etilgan taqdirda Ruxsatnomalarni berishni maxsus roʻyxatga olish kitobida rad etish sabablari haqida yozuv kiritiladi hamda darhol murojaat etuvchi shaxsga rad etish sabablari koʻrsatilgan holda yozma ravishda xabar beriladi.

4-bob. Ruxsatnomani qayta rasmiylashtirish, amal qilish muddatini uzaytirish, dublikatini berish

18. Ruxsatnoma faqatgina:

avtotransport vositasining hisobga olish maʼlumotlariga oʻzgartirish kiritilganida (qayta jihozlash, davlat raqam belgisi va roʻyxatga olish guvohnomasi oʻzgartirilganda);

egasining maʼlumotlarida oʻzgarish boʻlganida (jismoniy shaxsning familiyasi, ismi, sharifi oʻzgarganida, yuridik shaxs qayta tashkil etilganda, uning turar joyi (pochta manzili) yoki nomlanishi oʻzgartirilganda) qayta rasmiylashtiriladi;

Ruxsatnomani qayta rasmiylashtirish uning egasi tomonidan qayd etilgan maʼlumotlarni tasdiqlovchi hujjatlarni ilova qilgan holda taqdim etilgan arizasi asosida amalga oshiriladi.

Ruxsatnoma avval berilgan ruxsatnomaning amal qilish muddatigacha qayta rasmiylashtiriladi va yangi ruxsatnomaga stiker raqami yozib qoʻyiladi.

19. Avtotransport vositasining egasi oʻzgarganda yangi egasiga avvalgi ruxsatnomaning qolgan amal qilish muddatiga DYHXXda qayta roʻyxatdan oʻtkazish vaqtida qayta rasmiylashtirib beriladi.

Bunday holda avval berilgan ruxsatnoma avtotransport vositasi qayta roʻyxatga olinayotgan joydagi DYHXX boʻlinmasiga topshirilishi shart.

20. Ruxsatnomaning amal qilish muddatini uzaytirish uni berish uchun nazarda tutilgan tartib asosida amalga oshiriladi.

21. Ruxsatnoma yoʻqolgan yoki yaroqsiz holatga keltirilgan taqdirda uning dublikati murojaat etuvchi shaxsning arizasiga asosan beriladi. Yaroqsiz holga keltirilgan ruxsatnomaning asli arizaga ilova qilinadi.

Ruxsatnoma dublikatini berish va qayta rasmiylashtirish uchun bazaviy hisoblash miqdorining ikkidan bir qismi miqdorida toʻlov undiriladi.

DYHXXning hududiy boʻlinmasi ruxsatnoma dublikatini hujjatlar qabul qilinganidan soʻng ikki soat ichida berishi shart.

Dublikat berilganda avval berilgan ruxsatnoma bekor qilinadi, yoʻqotilgan ruxsatnoma dublikat berilganidan soʻng topilganda u haqiqiy emas deb hisoblanadi va hududiy DYHXXga belgilangan tartibda yoʻq qilish uchun topshirilishi lozim.

5-bob. Yakuniy qoidalar

22. Ruxsatnoma 1 yil muddatga beriladi, egasi uni amal qilish muddati tugashidan oldin foydalanishdan voz kechgan taqdirda, toʻlovning qolgan qismi qaytarilmaydi.

Ruxsatnoma asosida oynalari tusi oʻzgartirilgan (qoraytirilgan) avtotransport vositalaridan mazkur avtotransport vositasini boshqarish huquqi boʻlgan shaxslar foydalanishi mumkin.

23. Ruxsatnoma blankasi qatʼiy hisobda turuvchi hujjat hisoblanadi, uni tayyorlash, saqlash, sarflash va uning hisobini yuritish DYHXX organlari tomonidan belgilangan tartibda amalga oshiriladi.

25. Oynalari tusi oʻzgartirilgan (qoraytirilgan) avtotransport vositalaridan ruxsatnoma olmasdan foydalanish, shuningdek avtotransport vositasining oynalarini tusini oʻzgartirish (qoraytirish) uchun ruxsatnoma olgan holda oynalarning yorugʻlik oʻtkazuvchanligini mazkur Nizomning 5-bandida koʻrsatilganidan yuqori foizga oʻzboshimchalik bilan oʻzgartirish qonunchilikda belgilangan tartibda javobgarlikka sabab boʻladi.

Avtotransport vositalari oynalarining tusini oʻzgartirishga (qoraytirishga) ruxsatnoma berish, uni roʻyxatga olish va ruxsatnomaning amal qilishini bekor qilish tartibi toʻgʻrisidagi nizomga 1-ILOVA

Avtotransport vositasi oynalarining tusini oʻzgartirishga (qoraytirishga) ruxsatnoma berish

sxemasi

Subyektlar Tadbirlar Muddati Murojaat etuvchi shaxs Avtotransport vositasi egasi tegishli hujjatlarni DYHXXning hududiy boʻlinmasiga taqdim qiladi Murojaat etuvchi shaxsning xohishiga koʻra DYHXXning hududiy boʻlinmasi xodimi 1. Murojaat etuvchi shaxsdan tegishli hujjatlarni qabul qilib oladi va Ruxsatnomalarni berishni maxsus roʻyxatga olish kitobida qayd etadi. 2. Avtotransport vositalari oynalarining tusini oʻzgartirishga (qoraytirishga) ruxsatnomani rasmiylashtiradi va murojaat etgan shaxsga hujjatlar hamda ruxsatnomani stiker hamda oynalar tusini oʻzgartirishga (qoraytirishga) moʻljallangan plyonka bilan birga taqdim etadi. Umumiy navbat asosida Shu kunning oʻzida (barcha ishlar arizani qabul qilishdan boshlab ruxsatnoma berilgunga qadar ikki soat ichida amalga oshirilishi shart)

Izoh. Yuridik shaxs nomi, joylashgan joyi (pochta manzili) va tashkiliy-huquqiy shakli koʻrsatilgan holda firma blankasida toʻldiriladi.

Izoh. Jismoniy shaxs tomonidan uning familiyasi, ismi, otasining ismi, shaxsini tasdiqlovchi hujjat maʼlumotlari koʻrsatilgan holda toʻldiriladi.

Avtotransport vositalari oynalarining tusini oʻzgartirishga (qoraytirishga) ruxsatnomalarni berishni maxsus roʻyxatga olish

KITOBI

T/r Murojaat kelib tushgan sana ATV egasi Roʻyxat manzili ATV rusumi ATV turi ATV ROʻDRB Ruxsatnoma seriyasi va raqami Stiker raqami Amal qilish muddati (sanasi) Plyonka kv.m ATV egasining imzosi 1. 2.

Avtotransport vositasi oynalarining tusini oʻzgartirishga (qoraytirishga) beriladigan ruxsatnomalar

NAMUNALARI

II. Orqa va old yon oynalarning tusini oʻzgartirish (qoraytirish) uchun:

III. Turistik avtobus, mikroavtobus va minivenlar chap va oʻng yon oynalarining tusini oʻzgartirish (qoraytirish) uchun:

Avtotransport vositasi oynalarining tusini oʻzgartirishga (qoraytirishga) beriladigan ruxsatnomalar namunalarining

TAVSIFI

Avtotransport vositasi oynalarining tusini oʻzgartirishga (qoraytirishga) ruxsatnoma (keyingi oʻrinlarda ruxsatnoma deb ataladi) 3 turda, toʻrtburchak shakldagi, oʻlchamlari 80x130 mm. boʻlgan, zichligi bir kvadrat metrga 140+/-5 grammli 100 % paxtadan olingan qogʻozdan tayyorlanadi.

I — turi och havo rangda boʻladi — avtotransport vositasi orqa yon oynalarining tusi oʻzgartirilganligini (qoraytirilganligini) bildiradi;

II — turi och yashil rangda boʻladi — avtotransport vositasi orqa va yon oynalarining tusi oʻzgartirilganligini (qoraytirilganligini) bildiradi;

III — turi och yashil rangda boʻladi — turistik avtobuslar chap va oʻng yon oynalarining tusi oʻzgartirilganligini bildiradi.

Qogʻoz qatlami orasiga joylashgan, ultrabinafsha nurda koʻrinadigan koʻk va och yashil rangli tola hamda nurda yaxshi ajralib turadigan “paxta chanogʻi” koʻrinishidagi umumiy “suv belgi”si mavjud.

Ofsetli yozuv, seriyasi ikki harfli, nomeri yettita raqamdan iborat boʻladi.

Blanka quyidagi maxsus himoyalarga ega:

kimyoviy taʼsirga bardoshli poligraf boʻyoqdan foydalanilgan, yuza qismidagi kataklarda nusxa olishga va skaner qilishga qarshi ingichka chiziqlar mavjud. Bir rangdan boshqa rangga rasm chiziqlari buzilmasdan ohista jilovlanishi taʼminlangan. Juda kattalashtirilganda mikromatn koʻrinadi, ultrabinafsha nurda koʻrinmaydigan tasvirlar va yetti raqamli son koʻrinadi. Maxsus qabariq va oʻyiqlar mavjud.

Lotin alifbosi harflaridagi oʻzbek tili qoʻllangan.

Ruxsatnomaning old tomonida uning nomlanishi yozilgan, seriya va raqamlari mavjud, avtotrasnport vositasining turi, rusumi, roʻyxatdan oʻtkazish davlat raqami belgisi, rangi, egasining maʼlumotlari, berilgan Davlat yoʻl harakati xavfsizligi xizmati hududiy boʻlinmasining nomi, bergan mansabdor shaxsning lavozimi, F.I.O. koʻrsatiladi.

Ruxsatnomaning orqa tomonida avtotransport vositasi oynalarining yorugʻlik oʻtkazuvchanligi koʻrsatkichlari, berilgan sanasi va amal qilish muddati hamda stiker raqami koʻrsatiladi.

Ruxsatnomadagi yozuvlar ruchkada yoki chop etish printerida kiritiladi, Davlat yoʻl harakati xavfsizligi xizmati mansabdor shaxsining imzosi va muhri bilan tasdiqlanib, bir yil muddatga beriladi.

Ichki ishlar organlarining ruxsatnomasi asosida tusi oʻzgartirilganligini (qoraytirilganligini) bildiruvchi stiker

NAMUNALARI

I. Orqa yon oynalarning tusini oʻzgartirish (qoraytirish) uchun:

II. Orqa va old yon oynalarning tusini oʻzgartirish (qoraytirish) uchun:

III. Turistik avtobus, mikroavtobus va minivenlar chap va oʻng yon oynalarining tusini oʻzgartirish (qoraytirish) uchun:

Ichki ishlar organlarining ruxsatnomasi asosida tusi oʻzgartirilganligini (qoraytirilganligini) bildiruvchi stikerlar namunalarining

TAVSIFI

Ichki ishlar organlarining ruxsatnomasi asosida avtotransport vositalari oynalarining tusi oʻzgartirilganligini (qoraytirilganligini) bildiruvchi stikerlar 3 turda, doira shakldagi, diametri 63 mm. boʻlgan, zichligi bir kvadrat metrga 140+/-5 grammli 100% paxtadan olingan qogʻozdan tayyorlanadi va old tomoni oʻzi yopishadigan boʻladi.

I turi och havo rangda boʻladi — avtotransport vositasi orqa yon oynalarining tusi oʻzgartirilganligini bildiradi;

II turi och yashil rangda boʻladi — avtotransport vositasi orqa va yon oynalarining tusi oʻzgartirilganligini bildiradi;

III turi och qizil rangda boʻladi — Turistik avtobus, mikroavtobus va minivenlar ning chap va oʻng yon oynalarining tusi oʻzgartirilganligini bildiradi.

Qogʻoz qatlami orasiga joylashgan, ultrabinafsha nurda koʻrinadigan koʻk va och yashil rangli tola hamda nurda yaxshi ajralib turadigan aylana shakldagi umumiy “suv belgisi” mavjud.

Stiker quyidagi maxsus himoyalarga ega:

Lotin alifbosi harflaridagi oʻzbek tili qoʻllangan.

Old tomonida stikerning turiga koʻra I, II va III rim raqamlari, Oʻzbekiston Respublikasi Ichki ishlar vazirligining emblemasi, “oyna qoraytirishga ruxsatnoma” soʻzlari, stiker markazida “2020” raqami hamda doira cheti boʻylab yil oylari rim raqamlarida tushirilgan.

Orqa tomoniga stiker raqami va Oʻzbekiston Respublikasining gerbi namunasidagi gologramma tushirilgan.

Stiker raqami ikkita harf va yettita raqamdan iborat. Stiker old tomoni, oʻzi yopishadigan qatlamli boʻlib, ustki qismi plyonka bilan qoplangan.

Stiker raqamidagi ikkita harf hududlarni bildiradi (KR — Qoraqalpogʻiston Respublikasi, AN — Andijon , BV — Buxoro, JV — Jizzax, KD — Qashqadaryo, NV — Navoiy, NA — Namangan, SV — Samarqand, SI — Sirdaryo, SD — Surxondaryo, TV — Toshkent, FA — Fargʻona, XV — Xorazm viloyatlari, TN — Toshkent shahri).

Stiker avtotransport vositalarini old oynasi oʻng tomoni yuqori qismiga yopishtiriladi.

Stiker bir yil muddatga beriladi. Stikerni berayotgan Davlat yoʻl harakati xavfsizligi xizmati xodimi stikerning rim raqamlaridagi yil oylarining bittasini qirqib oladi (va) yoki kompostyor qiladi. Qirqib olingan (va) yoki kompostyor qilingan oy raqami stikerning amal qilish muddatini belgilaydi.