Iqtisodiy tadqiqotlarni tashkil etishni takomillashtirish chora-tadbirlari toʻgʻrisida (464-son)
29.11.2000
Oʻzbekiston Respublikasi Vazirlar Mahkamasining
qarori
Olib borilayotgan iqtisodiy tadqiqotlarning amaliy yoʻnaltirilishini kuchaytirish, ularni iqtisodiyotni isloh qilishning ustuvor vazifalarini amalga oshirishga qaratish, markaziy iqtisodiy organlarning prognoz-tahlil va metodologiya ishlari darajasini oshirish, shuningdek iqtisodiy yoʻnalishdagi ilmiy tadqiqotlarni tashkil etish tizimini takomillashtirish maqsadida Vazirlar Mahkamasi qaror qiladi:
1. Oʻzbekiston Respublikasi Makroiqtisodiyot va statistika vazirligi, Moliya vazirligi va Markaziy bankining:
Oʻzbekiston Respublikasi Iqtisodiyot vazirligi huzuridagi Makroiqtisodiy va ijtimoiy tadqiqotlar instituti negizida Samarali iqtisodiy siyosat markazi;
Oʻzbekiston Respublikasi Moliya vazirligining Moliya va narxlar ilmiy-tadqiqot instituti negizida Soliq-budjet siyosati markazi;
Oʻzbekiston Respublikasi Markaziy bankining Iqtisodiy tadqiqotlar va statistika markazi negizida Pul-kredit siyosati markazini tashkil etish toʻgʻrisidagi taklifi qabul qilinsin.
2. Quyidagilar Oʻzbekiston Respublikasi Iqtisodiyot vazirligi huzuridagi Samarali iqtisodiy siyosat markazining asosiy vazifalari va faoliyati yoʻnalishlari etib belgilansin:
makroiqtisodiy barqarorlikni, barqaror iqtisodiy oʻsishni va iqtisodiy islohotlar chuqurlashtirishni taʼminlashga doir takliflar tayyorlash, koʻp variantli uzoq muddatli va oʻrtacha muddatli makroiqtisodiy prognozlarni ishlab chiqish;
yoqilgʻi-energetika, mineral-xomashyo va yer-suv resurslarini rivojlantirish va ulardan oqilona foydalanish, iqtisodiyotning bazaviy tarmoqlarini rivojlantirish istiqbollarini tahlil etish va ular boʻyicha takliflar ishlab chiqish;
makroiqtisodiy, tarmoq va hududiy proporsiyalarni chuqur tahlil qilish, tarmoqlararo va moddiy balanslar tizimini ishlab chiqish, shu asosda iqtisodiyotni tarkibiy qayta oʻzgartirish strategiyasini va investitsiya siyosatini belgilash;
demografik jarayonlarni tatqiq etish, aholini ish bilan oqilona taʼminlovchi chora-tadbirlarni asoslash, aholining turmush darajasini va oila isteʼmol budjetini oʻrganish, ichki isteʼmol bozorini toʻldirish yoʻllarini belgilash;
inflatsiya darajasiga taʼsir etuvchi omillarni aniqlash va tahlil etish, inflatsiyaning prognoz darajalarini belgilash, inflatsiyaga qarshi tartibga solish mexanizmini ishlab chiqish;
respublikaning tashqi savdo va toʻlov balansini tahlil etish va prognozlashtirish, tashqi iqtisodiy va valyuta siyosatini takomillashtirish yuzasidan takliflar ishlab chiqish.
Samarali iqtisodiy siyosat markazining tuzilmasi 1-ilovaga muvofiq tasdiqlansin, uning xodimlarining cheklangan soni 90 nafar etib belgilansin (yordamchi va xizmat koʻrsatuvchi xodimlardan tashqari).
3. Oʻzbekiston Respublikasi Moliya vazirligi huzuridagi Soliq-budjet siyosati markaziga quyidagilar yuklansin:
moliya-budjet tizimini takomillashtirish, fiksal funksiyalarni qisqartirish, respublika va mahalliy budjetlar oʻrtasidagi oʻzaro munosabatlarni maqbullashtirishga doir takliflarni ishlab chiqish;
makroiqtisodiy prognozlar va hisob-kitoblar asosida Davlat budjetini ishlab chiqish metodologiyasini takomillashtirishga, uning balanslilik darajasini oshirishga, turli darajalardagi budjetlar oʻrtasida mablagʻlarni taqsimlashning amaliy mexanizmini joriy etishga doir takliflarni shakllantirish;
iqtisodiyotni mablagʻ bilan taʼminlashda va davlat xarajatlarini shakllantirishning normativ yondashuvlarini joriy etishda budjetdan ajratiladigan mablagʻlardan samarali foydalanish yoʻnalishlarini belgilash;
soliq siyosatini takomillashtirish, soliq solishning moslashuvchan va samarali shakllarini ishlab chiqish;
qulay investitsiya muhitini shakllantirish va respublikaga xorijiy sarmoyani jalb etishga doir chora-tadbirlarni ishlab chiqish.
Soliq-budjet siyosati markazining tuzilmasi 2-ilovaga muvofiq tasdiqlansin, uning xodimlarining cheklangan soni 40 nafar etib belgilansin (yordamchi va xizmat koʻrsatuvchi xodimlardan tashqari).
4. Oʻzbekiston Respublikasi Markaziy banki huzuridagi Pul-kredit siyosati markazi faoliyatining quyidagi asosiy yoʻnalishlari maʼqullansin:
bank sohasidagi islohotlarni chuqurlashtirish va banklarning yanada kapitallashuviga doir takliflar tayyorlash, aholi mablagʻlarini bank infratuzilmasiga jalb etishni ragʻbatlantirish mexanizmini ishlab chiqish;
pul muomalasini mustahkamlash, pul massasini tartibga solish, iqtisodiyotdagi toʻlovlar va hisob-kitoblar mexanizmini takomillashtirish tendensiyalarini tahlil etish va ular boʻyicha takliflar ishlab chiqish, makroiqtisodiy va moliyaviy barqarorlikni taʼminlash maqsadida foiz siyosatini asoslash;
monetar va kredit siyosatini, kredit berish shakllari va usullarini takomillashtirishga doir chora-tadbirlarni ishlab chiqish, iqtisodiyotning ustuvor tarmoqlari va sektorlarida investitsiya loyihalarini kreditlashda tijorat banklarining keng ishtirok etishi yoʻnalishlarini belgilash;
milliy valyuta barqarorligini taʼminlash, valyuta siyosatini erkinlashtirish boʻyicha takliflar ishlab chiqish.
Pul-kredit siyosati markazining xodimlarining cheklangan soni 35 nafar boʻlgan (yordamchi va xizmat koʻrsatuvchi xodimlardan tashqari) 3-ilovaga muvofiq tuzilmasiga rozilik berilsin.
5. Oʻzbekiston Respublikasi Makroiqtisodiyot va statistika vazirligi, Moliya vazirligi, Markaziy banki:
markazlar toʻgʻrisidagi nizomlarni ikki hafta muddatda ishlab chiqsinlar va tasdiqlasinlar;
bir oy muddatda kadrlarni attestatsiyadan oʻtkazsinlar;
markazlarning respublikada olib borilayotgan iqtisodiy islohotlar va bozor oʻzgarishlari mohiyatini chuqur anglaydigan yuqori malakali, tajribali mutaxassislar bilan toʻldirilishini taʼminlasinlar, bunda asosiy eʼtiborni chet ellarda oʻqigan va stajirovkadan oʻtgan yoshlarni jalb qilishga qaratsinlar.
6. Markazlarga:
tadqiqotlar oʻtkazishga davlat boshqaruvi organlari mutaxassislarini, ilmiy-tadqiqot institutlari va markazlar xodimlarini, shuningdek chet ellik olimlar hamda mutaxassislarni kontrakt asosida jalb qilish;
yuqori turuvchi tashkilot bilan kelishgan holda, xodimlarning belgilangan soni va mehnatga haq toʻlash fondi doirasida Markazlarning tasdiqlangan tuzilmasiga oʻzgartirishlar kiritish huquqi berilsin:.
7. Koʻrsatib oʻtilgan markazlar Oʻzbekiston Respublikasi Makroiqtisodiyot va statistika vazirligi, Moliya vazirligi, Markaziy banki, Davlat soliq qoʻmitasi, Mehnat va aholini ijtimoiy muhofaza qilish vazirligi, Tashqi iqtisodiy aloqalar vazirligi, boshqa vazirliklar va idoralarning byulletenlari, statistika maʼlumotlari majburiy ravishda yuboriladigan roʻyxatga kiritilsin.
8. Quyidagilar:
Oʻzbekiston Respublikasi Vazirlar Mahkamasining “Oʻzbekiston Respublikasi Vazirlar Mahkamasining Axborot-tahlil boshqarmasini tashkil etish toʻgʻrisida” 1997-yil 16-apreldagi 199-son qarorining 5-bandi;
Oʻzbekiston Respublikasi Vazirlar Mahkamasining “Oʻzbekiston Respublikasi Makroiqtisodiyot va statistika vazirligi huzuridagi Makroiqtisodiy va ijtimoiy tadqiqotlar instituti faoliyatini takomillashtirish toʻgʻrisida” 1997-yil 17-iyundagi 307-son qarori;
Oʻzbekiston Respublikasi Vazirlar Mahkamasining “Makroiqtisodiy va ijtimoiy tadqiqotlar instituti tuzilmasini tartibga solish toʻgʻrisida” 1999-yil 7-apreldagi 160-son qarori oʻz kuchini yoʻqotgan deb hisoblansin.
9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari R.S. Azimov va Oʻzbekiston Respublikasi Markaziy bankining raisi F.M. Mullajonov zimmasiga yuklansin.
Vazirlar Mahkamasining Raisi I. KARIMOV
Toshkent sh.,
2000-yil 29-noyabr,
464-son
Vazirlar Mahkamasining 2000-yil 29-noyabrdagi 464-son qaroriga 1-ILOVA
Oʻzbekiston Respublikasi Iqtisodiyot vazirligi huzuridagi Samarali iqtisodiy siyosat markazi
tuzilmasi
Ilmiy xodimlar umumiy soni — 90 kishi
Vazirlar Mahkamasining 2000-yil 29-noyabrdagi 464-son qaroriga 2-ILOVA
Oʻzbekiston Respublikasi Moliya vazirligi huzuridagi Soliq-budjet siyosati markazi
tuzilmasi
Ilmiy xodimlar umumiy soni — 40 kishi
Vazirlar Mahkamasining 2000-yil 29-noyabrdagi 464-son qaroriga 3-ILOVA
Oʻzbekiston Respublikasi Markaziy banki huzuridagi Pul-kredit siyosati markazi
tuzilmasi
Ilmiy xodimlar umumiy soni — 35 kishi