Toshkent viloyatida kichik sanoat zonalarini kengaytirish chora-tadbirlari toʻgʻrisida (634-son)

08.08.2018

Oʻzbekiston Respublikasi Vazirlar Mahkamasining

qarori

Davlat mulki boʻlgan va davlat ulushi mavjud xoʻjalik yurituvchi jamiyatlar obyektlaridan samarali foydalanish, investitsiyalarni faol jalb qilish uchun qulay shart-sharoitlar yaratish, yangi raqobatbardosh ishlab chiqarishlar va kichik korxonalarni rivojlantirishni yanada qoʻllab-quvvatlash, ularni muhandislik-kommunikatsiya va ishlab chiqarish infratuzilmasi tashkil etilgan alohida hududlarda joylashtirishni taʼminlash va shu asosda ishlab chiqarish sohasida yangi ish oʻrinlari yaratish, aholining bandlik va farovonlik darajasini oshirish maqsadida Vazirlar Mahkamasi qaror qiladi:

1. Maʼlumot uchun qabul qilinsinki:

Toshkent viloyatida kichik biznes va xususiy tadbirkorlikni qoʻllab-quvvatlash chora-tadbirlarini izchil amalga oshirish doirasida Oʻzbekiston Respublikasi Prezidentining “Toshkent viloyatida kichik sanoat zonalarini tashkil etish toʻgʻrisida” 2017-yil 10-avgustdagi PQ-3194-son qaroriga asosan faoliyat yuritmayotgan korxonalar va ishlab chiqarish maydonlari negizida 17 ta kichik sanoat zonalari tashkil etilgan;

Toshkent viloyati kichik sanoat zonalarida amalga oshiriladigan investitsiya loyihalarini birgalikda moliyalashtirish uchun Oʻzbekiston Respublikasi Tiklanish va taraqqiyot jamgʻarmasi tomonidan 100 mln. AQSh dollari miqdorida kredit liniyalari ochilgan.

2. Toshkent viloyati hokimiyati, Oʻzbekiston Respublikasi Iqtisodiyot vazirligi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasining davlat mulki boʻlgan va davlat ulushi mavjud xoʻjalik yurituvchi jamiyatlarning foydalanilmayotgan obyektlarini 1-ilovaga muvofiq roʻyxat boʻyicha Toshkent viloyati kichik sanoat zonalari tarkibiga (keyingi oʻrinlarda KSZ deb ataladi) kiritish toʻgʻrisidagi taklifiga rozilik berilsin.

3. Oʻzbekiston Respublikasi Xususiylashtirilgan korxonalarga koʻmaklashish va raqobatni rivojlantirish davlat qoʻmitasi manfaatdor davlat va xoʻjalik boshqaruvi organlari bilan birgalikda foydalanilmayotgan tegishli davlat mulki boʻlgan obyektlarning bir oy muddatda Toshkent viloyati hokimligiga belgilangan tartibda oʻtkazilishini, shuningdek, davlat ulushi boʻlgan xoʻjalik jamiyatlari boshqaruv organlarining majlislarida foydalanilmayotgan obyektlarni budjet hamda budjetdan tashqari jamgʻarmalar oldidagi soliq boʻyicha qarzdorlikni beriladigan aktivlarning qoldiq (balans) qiymati summasiga, qarzdorlik mavjud boʻlmagan hollarda – ularning ustav jamgʻarmalaridagi davlat ulushi va xoʻjalik boshqaruvi organlarining ulushini kamaytirish hisobidan ushbu qarorga 1-ilovaga muvofiq, Toshkent viloyati hokimligiga berish masalasi koʻrib chiqilishini taʼminlasin.

4. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi Toshkent viloyati hokimligi bilan birgalikda 1-ilovada qayd etilgan KSZlar chegaralarini bir oy muddatda aniqlashtirsin.

5. Belgilab qoʻyilsinki:

KSZlar hududiga kiritilgan hududlarda faoliyat Oʻzbekiston Respublikasi Prezidentining “Toshkent viloyatida kichik sanoat zonalarini tashkil etish toʻgʻrisida” 2017-yil 10-avgustdagi PQ-3194-son qarori talablari asosida amalga oshiriladi;

KSZ hududida yer uchastkalari Oʻzbekiston Respublikasi Prezidentining “Erkin iqtisodiy zonalar va kichik sanoat zonalari faoliyati samaradorligini oshirish borasidagi qoʻshimcha chora-tadbirlar toʻgʻrisida” 2017-yil 25-oktabrdagi PQ-3356-son qaroriga muvofiq ajratiladi.

6. Toshkent viloyati kichik sanoat zonalarida muhandislik-kommunikatsiya va ishlab chiqarish infratuzilmasini qayta tiklash ishlarining manzilli roʻyxati 2-ilovaga muvofiq tasdiqlansin.

Oʻzbekiston Respublikasi Moliya vazirligi Toshkent viloyati Erkin iqtisodiy va kichik sanoat zonalari maʼmuriy kengashining asoslangan hisob-kitoblari boʻyicha ushbu qarorga 2-ilovaga muvofiq boʻlinish chegarasigacha Toshkent viloyati KSZlarining muhandislik-kommunikatsiya va ishlab chiqarish infratuzilmasini qayta tiklash ishlarini bajarish uchun Oʻzbekiston Respublikasi Davlat budjetidan mablagʻlar ajratsin.

Oʻzbekiston Respublikasi Uy-joy kommunal xoʻjaligi vazirligi, “Oʻzbekenergo” AJ, “Oʻztransgaz” AJ, Toshkent viloyati hokimligi bir oy muddatda ushbu qarorga 2-ilovaga muvofiq Toshkent viloyati KSZlarida muhandislik-kommunikatsiya va ishlab chiqarish infratuzilmasini qayta tiklash ishlarini amalga oshirish uchun tarmoq jadvallarini tasdiqlasin va ularning soʻzsiz bajarilishini taʼminlasin.

7. Toshkent viloyati Erkin iqtisodiy zonalar va kichik sanoat zonalari maʼmuriy kengashi, Oʻzbekiston Respublikasi Iqtisodiyot vazirligi, Investitsiyalar boʻyicha davlat qoʻmitasi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Oʻzbekiston Savdo-sanoat palatasi va tijorat banklari bilan birgalikda belgilangan tartibda:

Toshkent viloyati iqtisodiyotining ehtiyojlari, shuningdek, mavjud mineral xomashyo, qishloq xoʻjaligi resurslarini va infratuzilmani inobatga olgan holda, Toshkent viloyati KSZlari hududida import oʻrnini bosuvchi va eksportga yoʻnaltirilgan tayyor mahsulotlar, materiallar va butlovchi buyumlar turlarini ishlab chiqarish korxonalarini joylashtirish boʻyicha aniq takliflar — “yoʻl xaritalari” ikki oy muddatda ishlab chiqilishini;

Toshkent viloyati KSZlari hududida oʻzlashtirish uchun taklif qilinayotgan import oʻrnini bosuvchi va eksportga yoʻnaltirilgan tayyor mahsulotlar, materiallar va butlovchi buyumlar turlari toʻgʻrisidagi maʼlumotlarni tadbirkorlik subyektlariga yetkazilishini;

KSZlar hududida loyihalarni amalga oshirish uchun tadbirkorlik subyektlarini jalb etish, ular bilan tizimli ishlar olib borish, shuningdek, Toshkent viloyati KSZlari hududida ishlab chiqarishlarni joylashtirish boʻyicha investitsiya buyurtmanomalari sifatli va oʻz vaqtida koʻrib chiqilishini;

Toshkent viloyati KSZlari hududida ishlab chiqarishlarni tashkil etish boʻyicha investitsiya loyihalarining biznes-rejalarini ishlab chiqishda tadbirkorlik subyektlariga koʻmaklashishni taʼminlasinlar.

Amalga oshirilgan chora-tadbirlarning samaradorligi va natijadorligi toʻgʻrisida Oʻzbekiston Respublikasi Vazirlar Mahkamasiga 2018-yil 15-oktabrda va 2019-yil 15-yanvarda axborot berilsin.

8. Oʻzbekiston Respublikasi Vazirlar Mahkamasining “Toshkent viloyatida joylashgan davlat mulki obyektlaridan samarali foydalanish chora-tadbirlari toʻgʻrisida” 2017-yil 30-dekabrdagi 1040-son qaroriga 2-ilovaning 43-pozitsiyasi chiqarib tashlansin.

9. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari — Investitsiyalar boʻyicha davlat qoʻmitasi raisi S.R. Xolmuradov, Iqtisodiyot vaziri B.A. Xodjayev, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi raisining birinchi oʻrinbosari N.Sh. Sharipov va Toshkent viloyati hokimi G.I. Ibragimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 8-avgust,

634-son

Vazirlar Mahkamasining 2018-yil 8-avgustdagi 634-son qaroriga 1-ILOVA

Toshkent viloyati kichik sanoat zonalari tarkibiga kiritiladigan davlat mulki boʻlgan va davlat ulushi mavjud xoʻjalik yurituvchi jamiyatlarning foydalanilmayotgan obyektlari

ROʻYXATI

T/r KSZ nomi KSZ tarkibiga kiritilayotgan obyektlarning nomi Hududi (ga)* Bino va inshootlar maydoni (kv.m)* 1. Angren shahar KSZ “Naqlgazmaxsus-qurilish” AJ Namuna filiali 4-uchastkasi hududining bir qismi** 2,0 — 2. Ohangaron tumani KSZ Ohangaron tumani hokimligiga berilgan sobiq “Ohangaron” sovxozi bino va inshootlari 2,1 1 981,8 3. “Yangi-Angren IES” AJ mahsulotlarni qayta ishlash sexining bino va inshootlari** 6,38 8 111,8 4. Ohangaron tumani hokimligiga biriktirilgan bino va inshootlar 2,5 3 690,0 5. Bekobod shahar KSZ “Dalvarzin paxta tozalash” AJning sobiq paxta tozalash zavodi bino va inshootlari (shu jumladan yuklarni ortish sexi)** 2,47 1 216,7 6. Toshkent viloyati “Issiqlik manbai” IChB tuman qozonxona bino va inshootlari*** 3,6 8 135,0 7. “Bekobod Agroservis MTP” MChJ hududining bir qismi** 1,8 — 8. Quyichirchiq tumani KSZ Quyichirchiq tumani tibbiyot birlashmasining sobiq yuqumli kasalliklar shifoxonasi bino va inshootlari 2,5 1 500,0 9. Chirchiq shahar KSZ “Maksam Chirchiq” AJ ishlab chiqarish maydoni** 4,0 18 755,4 10. “Maksam Chirchiq” AJning qurilishi tugallanmagan obyekti va yer maydoni** 28,0 3 888,0 12. Yangiyoʻl tumani KSZ “Olmazor TMTYICh” DKning maʼmuriy va ishlab chiqarish bino va inshootlari 5,59 7 258,0 JAMI: 67,64 97 054,7

* Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi tomonidan tumanlar (shaharlar) hokimliklari bilan birgalikda aniqlanadi.

** Bino va inshootlar, shuningdek, ularga tutash hududlar xoʻjalik yurituvchi jamiyatlarning tegishli boshqaruv organlari yigʻilishlarida koʻrib chiqish natijalariga koʻra aniqlanadi.

*** Binolar budjet hamda davlat maqsadli jamgʻarmalar oldidagi qarzdorlikni kamaytirish boʻyicha qoldiq (balans) qiymati hisobiga beriladi.

Vazirlar Mahkamasining 2018-yil 8-avgustdagi 634-son qaroriga 2-ILOVA

2018-yilda Toshkent viloyatida kichik sanoat zonalarining muhandislik-kommunikatsiya va ishlab chiqarish infratuzilmasini qayta tiklash ishlarining

Manzilli roʻyxati

* Infratuzilma obyektlarining quvvati va xarajatlarning yakuniy miqdori loyiha-smeta hujjatlari belgilangan tartibda ekspertizadan oʻtkazilishi va tasdiqlanishi natijasida aniqlanadi.