Namangan viloyatining Uchqoʻrgʻon tumanida sanoat, xizmatlar sohasi va qishloq xoʻjaligini rivojlantirish orqali aholi bandligini taʼminlashga doir qoʻshimcha chora-tadbirlari toʻgʻrisida (618-son)
06.08.2018
Oʻzbekiston Respublikasi Vazirlar Mahkamasining
qarori
Namangan viloyatining Uchqoʻrgʻon tumanida ijtimoiy-iqtisodiy islohotlar amalga oshirilishini oʻrganishda Respublika ishchi guruhi tomonidan aniqlangan muammolarni bartaraf etish, aholi turmush darajasini yanada oshirish, yangi ish oʻrinlari tashkil etish maqsadida Vazirlar Mahkamasi qaror qiladi:
1. Quyidagilar:
2018-2019-yillarda Namangan viloyatining Uchqoʻrgʻon tumanida kafolatli ish oʻrinlari tashkil etish hamda sanoat, xizmatlar sohasi va qishloq xoʻjaligini rivojlantirish loyihalarining manzilli roʻyxati 1-ilovaga muvofiq;
Namangan viloyatining Uchqoʻrgʻon tumanida kelgusi yillarda Oʻzbekiston Respublikasining rivojlanish davlat dasturi doirasida quriladigan va rekonstruksiya qilinadigan ijtimoiy soha obyektlari roʻyxati 2-ilovaga muvofiq tasdiqlansin.
2. Namangan viloyati hokimligi:
manfaatdor davlat va xoʻjalik boshqaruvi organlari, tijorat banklari, loyihalarning tashabbuskorlari bilan birgalikda tasdiqlangan manzilli roʻyxat parametrlari soʻzsiz bajarilishini taʼminlasin va bu borada investitsiya loyihalarining oʻz vaqtida va sifatli amalga oshirilishini, ishlab chiqarishning moʻljallangan hajmlari oʻzlashtirilishini va yangi ish oʻrinlari tashkil etilishini nazarda tutsin;
muammoli masalalarni muntazam ravishda koʻrib chiqib, ularni hal etish yuzasidan tezkor va amaliy zarur chora-tadbirlarni amalga oshirgan holda loyihalar bajarilishi yuzasidan tizimli monitoring olib borsin.
3. Namangan viloyati hokimligiga Oʻzbekiston Respublikasi Investitsiyalar boʻyicha davlat qoʻmitasi va xizmat koʻrsatuvchi tijorat banklari bilan kelishgan holda loyihaning qiymatini va ish oʻrinlari sonini saqlab qolish sharti bilan loyihalarning tasdiqlangan manzilli roʻyxatiga, zaruratga koʻra, oʻzgartirishlar kiritish huquqi berilsin.
4. Oʻzbekiston Respublikasi Investitsiyalar boʻyicha davlat qoʻmitasi, Moliya vazirligi, Xalq taʼlimi vazirligi, Sogʻliqni saqlash vazirligi, Maktabgacha taʼlim vazirligi, Namangan viloyat hokimligi 2-ilovadagi ijtimoiy soha obyektlarini qurish va rekonstruksiya qilish ishlarini tasdiqlangan loyiha-smeta hujjatlari asosida kelgusi yillarda Oʻzbekiston Respublikasining rivojlanish davlat dasturi doirasida amalga oshirilishini taʼminlasinlar.
5. Oʻzbekiston Respublikasi Bandlik va mehnat munosabatlari vazirligi Namangan viloyati hokimligi bilan birgalikda Uchqoʻrgʻon tumani sektorlari va mahallalari boʻyicha 2018-2019-yillarda haq toʻlanadigan jamoat ishlarini, band boʻlmagan aholini kasbga qayta tayyorlashni tashkil etish boʻyicha manzilli dasturni bir oy muddatda ishlab chiqsin va tasdiqlasin.
6. Namangan viloyati hokimligining 2018-2019-yillarda Uchqoʻrgʻon tumani “Boʻston” fuqarolar yigʻinining umumiy maydoni 1 ga boʻlgan yuk avtomobillari uchun texnik xizmat koʻrsatish stansiyasini, texnik yordam koʻrsatish punktini, toʻxtash joyini va kempingni oʻz ichiga oladigan xalqaro logistika markazi tashkil etish toʻgʻrisidagi taklifi maʼqullansin.
7. Namangan viloyati hokimligi Oʻzbekiston Respublikasi Investitsiyalar boʻyicha davlat qoʻmitasi bilan birgalikda logistika markazi tashkil etish loyihasini amalga oshirish uchun salohiyatli investorlarni jalb etish chora-tadbirlarini koʻrsin.
8. “Oʻzbekbaliqsanoat” uyushmasi ikki oy muddatda Respublikada yetishtiriladigan noyob baliq turlarining (forel, osetr, losos va shu kabilarni) ozuqa bazasini mustahkamlash maqsadida xalqaro brendga ega boʻlgan yuqori proteyinli, boyitilgan ozuqa mahsulotlari ishlab chiqaruvchi yetakchi xorijiy kompaniyalar bilan birgalikda ularni respublikada ishlab chiqarishni yoʻlga qoʻyish yuzasidan taklif kiritsin.
9. Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi, Xususiylashtirilgan korxonalarga koʻmaklashish va raqobatni rivojlantirish davlat qoʻmitasi, Namangan viloyati hokimligi Uchqoʻrgʻon tumanidagi muhandislik-kommunikatsiyalari mavjud boʻlgan, foydalanilmasdan boʻsh turgan bino va inshootlarni, shuningdek, yer uchastkalarini ikki oy muddatda xatlovdan oʻtkazsinlar va keyinchalik zamonaviy ishlab chiqarishlar barpo etish hamda yangi ish oʻrinlari tashkil etish sharti bilan tadbirkorlik subyektlariga va salohiyatli investorlarga belgilangan tartibda berish hamda mulkdorlar tomonidan ishlab chiqarishni (xizmat koʻrsatishni) yoʻlga qoʻyish orqali ulardan samarali foydalanilishini taʼminlasinlar.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov va Namangan viloyati hokimi X.H. Bozarov zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 6-avgust,
618-son
Vazirlar Mahkamasining 2018-yil 6-avgustdagi 618-son qaroriga 1-ILOVA
2018-2019-yillarda Namangan viloyatining Uchqoʻrgʻon tumanida kafolatli ish oʻrinlarini tashkil etish hamda sanoat, xizmatlar sohasi va qishloq xoʻjaligini rivojlantirish loyihalarining
MANZILLI ROʻYXATI
Vazirlar Mahkamasining 2018-yil 6-avgustdagi 618-son qaroriga 2-ILOVA
Namangan viloyatining Uchqoʻrgʻon tumanida kelgusi yillarda Oʻzbekiston Respublikasining rivojlanish davlat dasturi doirasida quriladigan va rekonstruksiya qilinadigan ijtimoiy soha obyektlari
ROʻYXATI