Oʻzbekiston Respublikasi hududida havo transportini boshqarish tizimi toʻgʻrisida (44-son)

04.02.1992

OʻZBEKISTON RESPUBLIKASI PREZIDENTI HUZURIDAGI VAZIRLAR MAHKAMASINING

qarori

Oʻzbekiston Respublikasi Prezidentining “Oʻzbekiston milliy aviokompaniyasini tashkil etish toʻgʻrisida” 1992-yil 28-yanvardagi Farmonini bajarish yuzasidan hamda respublika, davlatlararo va xalqaro aviayoʻllar boʻyicha aviatsiya orqali tashuvlarni tashkil etish, aholining va respublika xalq xoʻjaligining ehtiyojlarini yanada toʻlaroq qondirish, tashqi iqtisodiy faoliyatni kengaytirish maqsadida Vazirlar Mahkamasi qaror qiladi:

1. Oʻzbekiston Fuqaro aviatsiyasi boshqarmasi, Fuqaro aviatsiyasining 243-zavodi, “Aviastroy” qurilish-montaj birlashmasining “Aviaspetsmontajnaladka” xoʻjalik hisobidagi uchastkasi negizida Oʻzbekiston Respublikasining “Oʻzbekiston havo yoʻllari” milliy aviakompaniyasi tuzilsin.

2. Belgilab qoʻyilsinki “Oʻzbekiston havo yoʻllari” aviakompaniyasi fuqaro aviatsiyasi masalalari boʻyicha davlat boshqaruv organi sifatida Oʻzbekiston Respublikasi hududida havo transporti sohasidagi siyosatni ishlab chiqishni muvofiqlashtirish va amalga oshirishni taʼminlaydi.

3. Oʻzbekiston Respublikasi “Oʻzbekiston havo yoʻllari” milliy aviakompaniyasining ilova qilinayotgan Ustavi va uning tashkiliy tuzilishi ilovaga muvofiq; tasdiqlansin.

4. “Oʻzbekiston havo yoʻllari” aviakompaniyasi apparatining eng koʻp xodimlari soni 120 kishidan (xizmat koʻrsatuvchi xodimlar sonini hisobga olmasdan) iborat qilib belgilansin, ular tasarrufidagi korxonalar va tuzilma birliklari ajratgan mablagʻlar hisobiga saqlansin. “Oʻzbekiston havo yoʻllari” aviakompaniyasiga aviakompaniya bosh direktorining 4 nafar oʻrinbosari, shu jumladan bitta birinchi oʻrinbosari boʻlishga ruxsat etilsin.

“Oʻzbekiston havo yoʻllari” aviakompaniyasi bosh direktorining oʻrinbosarlari belgilangan tartibda Vazirlar Mahkamasi tomonidan tasdiqlanadilar. Kompaniyaning xorijiy vakolatxonalari rahbarlari Vazirlar Mahkamasi bilan kelishgan holda aviakompaniya tomonidan lavozimga tayinlanadilar.

Oʻzbekiston Respublikasining Bosh vaziri A. MUTALOV

Toshkent sh.,

1992-yil 4-fevral,

44-son

Vazirlar Mahkamasining 1992-yil 4-fevraldagi 44-son qarori bilan TASDIQLANGAN

Oʻzbekiston Respublikasi “Oʻzbekiston havo yoʻllari” milliy aviakompaniyasining

USTAVI

I. Umumiy qoidalar

1. “Oʻzbekiston havo yoʻllari” milliy aviakompaniyasi (bundan keyin matnda Aviakompaniya deb ataladi) Oʻzbekiston Respublikasining havo boʻshligʻidan fuqaro havo transporti maqsadlarida foydalanuvchi, shuningdek, xalqaro havo aloqalarini amalga oshiruvchi, Oʻzbekiston Respublikasining asosiy yuk tashuvchisi hisoblanadi. Aviakompaniya samoletlarida Oʻzbekiston Respublikasining Davlat bayrogʻi aks etgan.

2. Aviakompaniya Oʻzbekiston Respublikasi hukumatining qarori bilan Oʻzbekiston fuqaro aviatsiyasi boshqarmasi negizida tuzilgan va uning vorisi hisoblanadi.

3. Aviakompaniya oʻz faoliyatida Oʻzbekiston Respublikasi qonunlariga, Oʻzbekiston Respublikasi Oliy Kengashining boshqa qarorlariga, Oʻzbekiston Respublikasi Prezidentining farmonlari, qarorlari va farmoyishlariga, Oʻzbekiston Respublikasi Vazirlar Mahkamasining qarorlari va farmoyishlariga, mazkur Ustavga, shuningdek, Davlatlararo aviatsiya qoʻmitasining normativ aktlariga, ular Oʻzbekiston Respublikasi qonunlariga zid kelmaydigan darajada, amal qiladi.

4. Aviakompaniya yuridik shaxs boʻlib hisoblanadi, emblemaga, burchakli tamgʻa, shuningdek, Oʻzbekiston Respublikasining Davlat gerbi aks etgan hamda oʻz nomi oʻzbek va rus tillarida yozilgan muhrga ega boʻladi.

5. Aviakompaniya xoʻjalik hisobi, oʻzini oʻzi moliyaviy taʼminlash va oʻz xarajatlarini oʻz.i qoplash prinsiplarida ishlaydi. Aviakompaniya asosiy va oborot mablagʻlariga, mustaqil va yigʻma balansga, Oʻzbekiston Respublikasi va chet ellardagi bank muassasalarida hisob-kitob schyotlariga va boshqa schyotlarga ega boʻladi.

6. Aviakompaniya birlashma maqomiga ega boʻlib, huquqiy shaxs huquqlariga ega boʻlgan tuzilma birliklaridan va aviatuzatish korxonasidan iboratdir.

7. Aviakompannya Oʻzbekiston Respublikasida joylashgan boʻlib, manzilgohi quyidagichadir: 700061, Toshkent shahri. Proletar koʻchasi, 41.

II. Asosiy vazifalari

8. Aviakompaniyaning asosiy vazifalari quyidagilardan iborat:

Oʻzbekiston Respublikasi hududida havo transporti sohasidagi siyosatni ishlab chiqish, muvofiqlashtirish va amalga oshirish;

respublika, davlatlararo va xalqaro aviayoʻllarda avia tashuvlarga, shu bilan bogʻliq xizmatlarga, xalq xoʻjaligida aviatsiyadan foydalanib ishlashga va fuqaro aviatsiyasi sohasidagi faoliyatning boshqa turlariga boʻlgan ehtiyojni qondirish;

Oʻzbekiston Respublikasi hududida tuzilma birliklari, ajralib chiqqan korxonalar tomonidan aviatsiya ishlarini bajarishda va havo kemalaridan foydalanishda xavfsizlikni taʼminlash ustidan nazorat oʻrnatish;

Aviakompaniya faoliyatiga gʻayriqonuniy aralashishning oldini olish yuzasidan chora-tadbirlar ishlab chiqish, ularni Oʻzbekiston Respublikasining vakolatli organlari bilan hamjihatlikda amalga oshirish;

III. Asosiy funksiyalari

9. Ishlab chiqarish:

ilmiy-texnikaviy ishlanmalarni, ilgʻor tajribani, xalqaro fuqaro aviatsiyasi tashkilotlarining andazalari va tavsiyalarini amaliy faoliyatga jalb qilish;

parvozlarning xavfsizligini va doimiyligini taʼminlash, havo kemalarini, yerdagi texnikani, aerodromlarni, navigatsiya, aloqa va qoʻndirish vositalarini uchishda va texnikaviy ekspluatatsiya qilishni tashkil etish;

respublika, respublikalararo va xalqaro yoʻllarda parvozlarni meteorologik taʼminlash organlari bilan hamkorlik, parvozlarni meteorologik taʼminlash ustidan nazoratni amalga oshirish;

parvozlarni aloqa, radionavigatsiya va yoritish-texnika vositalari bilan taʼminlash, ularning ishini nazorat qilishni amalga oshirish, zarur radiolokatsiya, radionavigatsiya, aloqa vositalarini va boshqa texnika vositalarini joriy qilish. Parvozlarni radionavigatsiya axboroti bilan, shu jumladan, xorijda chiqadigan axborot bilan taʼminlash; shartnoma shartlari asosida va ularga muvofiq, Oʻzbekiston Respublikasi havo boʻshligʻida xorijiy havo kemalarining uchishini taʼminlash;

belgilangan javobgarlik doirasida havo yoʻllari harakatini boshqarishni taʼminlash. Havo yoʻllari harakatini boshqarishda parvozlar xavfsizligini taʼminlash boʻyicha tadbirlarni ishlab chiqish va amalga oshirish;

erdagi texnika vositalaridan yuksak samarali foydalanish na aviatsiya texnikasiga tijorat asosida xizmat koʻrsatish;

uchuvchilar, injener-texnik xodimlar va boshqa mutaxassislarning professional tayyorgarligi yuqori darajada boʻlishini taʼminlash;

oʻz havo kemalariga, shartnoma shartlari asoslarida va unga muvofiq, boshqa huquqiy shaxslarga tegishli havo kemalariga, shuningdek, xorijiy aviakorxonalarning havo kemalariga yuqori sifatli texnik va boshqa xizmatlar koʻrsatishni taʼminlash,

aviatashuvlarni statistik hisobga olishni amalga oshirish, ishlab chiqarish-moliyaviy faoliyatni iqtisodiy tahlil qilish, parvozlarning soni va yangi havo yoʻllarini, shu jumladan, xalqaro havo yoʻllarini ochish toʻgʻrisida takliflar tayyorlash, tashkilotlarning, shu jumladan, xorijiy tashkilotlarning talabnomalariga koʻra reysdan tashqari parvozlarni va xorijiy aviakompaniyalarning reysdan tashqari uchgan samolyotlariga texnik xizmat koʻrsatishni taʼminlash;

korxonalar va tuzilma boʻlinmalarining moddiy-texnika taʼminoti, moddiy resurslar fondlarini ishlatish, ehtiyot qismlar, materiallar, xomashyo, yoqilgʻi va elektr energiyasining toʻgʻri saqlanishini va ulardan samarali foydalanishni tashkil etish;

Aviakompaniyaning chet ellardagi vakolatxonalarida va aralash firmalarida, qoʻshma korxonalar direksiyalarida ishlash uchun kadrlarni tanlash va joy-joyiga qoʻyish, shuningdek, ularni Aviakompaniya vakolatiga kiruvchi masalalar boʻyicha tayyorlash;

shartnoma shartlari asosida va ularga muvofiq qoʻshimcha xalqaro barter reyslarini bajarishni rejalashtirishni va tashkil etishni amalga oshirish.

10. Tijorat va huquqiy:

samolyot-motor parkidan, aeroportlardan, yerdagi texnikadan, binolar va inshootlardan samarali foydalanish;

aviatashuvlar, xizmatlar bilan bogʻliq boshqa aviatsiya faoliyati bilan bogʻliq huquqiy, tijorat, valyuta-moliya va reklama ishini tashkil etish hamda buning uchun zarur boʻlgan eksport-import operatsiyalarini amalga oshirish;

yangi aviatsiya texnikasi sotib olish (ijaraga olish) yerdagi infratuzilmalarni yangilash, aeroportlar qurish boʻyicha koʻproq sarmoya ketadigan loyihalarni moliyaviy taʼminlash uchun investitsiya fondini tuzish;

Aviakompaniyaning chet ellardagi vakolatxonalari faoliyatini ularning tijorat ishining valyuta samaradorligini oshirish maqsadida tashkil etish va boshqarish;

Oʻzbekiston Respublikasining aeroportlarida oʻz havo kemalariga shartnomalar va bitimlar shartlari asosida va ularga muvofiq boshqa yuridik shaxslarning havo kemalariga, shuningdek, xorijiy aviakompampaniyalarning havo kemalariga yuqori samarali tijorat asosida xizmat koʻrsatishni tashkil etish;

tashqi iqtisodiy faoliyatning barcha turlarini rivojlantirish va aviatsiya xizmatlari eksportini kengaytirish;

oʻz hududi doirasida Oʻzbekiston Respublikasida ham, uning tashqarisida ham korxonalar, muassasalar, tashkilotlar, jamiyatlar va boshqa shaxslar bilan bitishuvlar va boshqa huquqiy, shu jumladan, kredit va veksel hujjatlarini imzolash, ular oldida, sudlarda, hakamlik sudlarida daʼvogar va javobgar boʻlish;

Aviakompaniya oʻz huquqi doirasiga tegishli masalalar boʻyicha Oʻzbekiston Respublikasining korxonalari, muassasalari va tashkilotlari bilan bevosita aloqalarni amalga oshirish;

Oʻzbekiston Respublikasida va chet ellarda oʻz faoliyatini amalga oshirish uchun belgilangan tartibda zarur boʻlimlar, filiallar, vakolatxonalar, agentliklar ochish;

faoliyati Aviakompaniyaning vazifalariga muvofiq keluvchi xalqaro aviatsiya tashkilotlari ishida qatnashish;

yuridik va jismoniy shaxslar bilan, shu jumladan, xorijiy shaxslar bilan tijorat, valyuta-moliya. texnikaviy bitimlar va boshqa bitimlar tuzish;

Oʻzbekiston Respublikasi qonunlari normalariga rioya qilishni va ularning toʻgʻri qoʻllanilishini taʼminlash, havo yoʻllari toʻgʻrisida, hukumatlararo bitimlarni, shuningdek, fuqaro aviatsiyasi masalalari boʻyicha xalqaro konvensiyalarning Aviakompaniyaga tegishli qismini bajarishni taʼminlash;

xorijiy aviakompaniyalar, ham chet eldagi, ham Oʻzbekiston Respublikasi hududidagi sayohatchilar firmalari va boshqa tashkilotlari bilan tijorat hamkorligini kengaytirish, zarur aloqalarni oʻrnatish va qoʻllab-quvvatlash, rasmiy tadbirlar oʻtkazish;

belgilangan, tartibda qoʻshma korxonalar tashkil etish va qoʻshma korxonalar faoliyatida xorijiy sheriklar bilan birga ularning taʼsischisi sifatida ishtirok etish.

11. Mulkiy-moliyaviy:

aviatashishlar, havo kemalariga tijorat va texnika xizmati koʻrsatish va boshqa xizmatlar sohasida Aviakompaniyaning majburiyatlari va talablari boʻyicha xorijiy firmalar, tashkilotlar, aviakompaniyalar bilan, shuningdek, Oʻzbekiston Respublikasi va boshqa respublikalarning korxonalari, muassasalari va tashkilotlari bilan chet el valyutasida moliyaviy hisob-kitoblar yuritish;

Oʻzbekiston Respublikasida ham, uning tashqarisida ham oʻz faoliyatini amalga oshirish uchun ishlab chiqarish binolari va boshqa binolarni, shuningdek, har xil koʻchirib boʻladigan va koʻchirib boʻlmaydigan mol-mulkni Oʻzbekiston Respublikasi qonunchiligida belgilangan tartibda qurish, sotib olish, ekspluatatsiya qilish va ijaraga berish;

boshqa respublikalar fuqaro aviatsiyasining boshqarmalari, birlashmalari va korxonalari bilan oʻzaro hisob-kitoblarni tashkil etish, Oʻzbekiston Respublikasining barcha aeroportlarida hisob-kitoblarning holatini va samolyotlarga xizmat koʻrsatish xarajatlarini toʻlash talablarini taqdim etishning toʻlaligini nazorat qilishni amalga oshirish, koʻrsatilgan xizmatlar uchun xorijiy aviakompaniyalar, shuningdek, Oʻzbekiston Respublikasining korxonalari, muassasalari, tashkilotlari bilan hisob-kitoblarni yaxshilash tadbirlarini ishlab chiqish va amalga oshirish;

ishlab chiqarish-xoʻjalik faoliyati boʻyicha statistika hisobotlari, yigʻma buxgalteriya hisobotlari va balanslarni belgilangan muddatlarda tuzish va taqdim etish, ajralib chiqqan korxonalar va tarbiyaviy boʻlinmalarning moliya-xoʻjalik faoliyatini belgilangan muddatlarda taftish qilish;

fuqaro aviatsiyasi sohasidagi shartnomalar va bitimlarni, bozor konyunkturasini va foyda olishda manfaatdorlikni hisobga olgan holda Oʻzbekiston Respublikasi hududida ham, uning tashqarisida ham aviatashishlarni sotish hamda korxonalar, firmalar, tashkilotlar va fuqarolarga xizmat koʻrsatish.

IV. Mol-mulki va mablagʻlari

12. Aviakompaniyaning strukturasiga kiruvchi hamda uning balansida oʻz ifodasini topuvchi asosiy fondlar va oborot mablagʻlar Aviakompaniyaning mulkini tashkil etadi.

13. Davlat boshqaruv organi boʻlgan Aviakompaniyaga davlat mulkini boshqarish huquqi berilgan. Oʻzbekiston Respublikasining qonunchilik aktlari va mazkur Ustavga muvofiq Aviakompaniyaning mol-mulki toʻliq xoʻjalik egaligi qilish huquqi bilan unga tegishli boʻladi.

14. Quyidagilar Aviakompaniyaning mol-mulkini shakllantirish manbalari hisoblanadi:

xoʻjalik va tashqi iqtisodiy faoliyatdan olingan daromadlar;

Oʻzbekiston Respublikasi qonunchiligida belgilangan tartibda xarid qilingan qimmatbaho qogʻozlardan olingan daromadlar;

budjetdan ajratilgan mablagʻlar;

Aviakompaniyaning qoʻshma korxonalarda qatnashishidan olingan daromadlar;

yuridik shaxslar, shu jumladan, xorijiy yuridik shaxslar bilan tuzilgan shartnomalar asosida ishlar va xizmatlarni bajarishdan olingan daromadlar;

Oʻzbekiston Respublikasining qonunchilik aktlari bilan taqiqlanmagan boshqa manbalar.

15. Oʻzbekiston Respublikasi qonunchiligi tomonidan belgilangan budjetga soliqlar toʻlashdan keyin qolgan foydani taqsimlash Aviakompaniya Kengashi huquq doirasiga kiradi.

V. Aviakompaniyaning huquqlari

16. Avikompaniya aviakompaniyaning amaldagi tuzilmasiga faqat avikompaniya Kengashi qaroriga koʻra uni keyinchalik Oʻzbekiston Respublikasi Vazirlar Mahkamasida tasdiqlash bilan yuridik shaxs huquqiga ega boʻlgan yangi tarkibiy birliklarni tashkil etish, mavjud korxonalarni tugatish va qayta tashkil etish masalalari yuzasidan oʻzgartirishlar kiritish huquqiga egadir.

Avikompaniya komplekslari, aeroportlari va korxonalari aviakompaniya direksiyasi bilan kelishgan holda tuzilmani mustaqil aniqlaydilar va shtatlarni belgilaydilar.

17. Aviakompaniya yagona korxona hisoblanadi, biroq ishlab chiqarishning texnologik toʻliq sikllarini bajarish uchun alohida korxonalar tashkil etishi mumkin.

18. Aviakompaniya oʻziga qarashli binolar, inshootlar, asbob uskunalar, transport vositalari, inventar, xomashyo va boshqa moddiy boyliklarni sotish, boshqa korxonalar, muassasalar va tashkilotlarga berish, ayirboshlash, ijaraga berish, bepul vaqtincha foydalanishga yoki qarzga berish, shuningdek, Oʻzbekiston Respublikasi qonunchiligida nazarda tutilgan tartibda ularni balansdan chiqarish huquqiga egadir.

19. Aviakompaniya Oʻzbekiston Respublikasi qonunchiligida belgilangan tartibda qimmatbaho qogʻozlarni chiqarish va sotish yoʻli bilan ishlab chiqarishni kengaytirish va takomillashtirish, jamoani ijtimoiy rivojlantirish maqsadida yuridik shaxslar va fuqarolarning pul mablagʻlarini jalb qilish huquqiga egadir.

20. Aviakompaniya ishlab chiqarishni rivojlantirish va iqtisodiy rivojlantirish uchun bank muassasalarining, shu jumladan, xorijiy bank muassasalarining kreditlaridan, ularni belgilangan tartibda toʻlagan holda, foydalanishi mumkin.

VI. Aviakompaniyaning javobgarligi

21. Aviakompaniya shartnoma majburiyatlarini, kredit-hisob-kitob va soliq intizomini, xoʻjalik faoliyatini amalga oshirishning boshqa qoidalarini buzganlik uchun Oʻzbekiston Respublikasi qonunchiligida va tuzilgan shartnomalarda nazarda tutilgan toʻliq mulkiy javobgarlikka tortiladi.

VII. Aviakompaniyani boshqarish

22. Aviakompaniyaning yuqori rahbar organi uning Kengashi hisoblanadi Kengashga Aviakompaniya Kengashi raisi boshchilik qiladi.

23. Aviakompaniya Kengashining faoliyati Aviakompaniya Kengashi raisi tomonidan tasdiqlanadigan Aviakompaniya Kengashi toʻgʻrisidagi nizom bilan belgilanadi.

24. Aviakompaniya faoliyatini Oʻzbekiston Respublikasi Prezidenti bilan kelishgan holda Oʻzbekiston Respublikasi Vazirlar Mahkamasi tomonidan tasdiqlanadigan Aviakompaniya bosh direktori boshqaradi.

Aviakompaniyaning bosh direktori lavozimi boʻyicha Aviakompaniya Kengashining raisi hisoblanadi.

25. Aviakompaniyaning bosh direktori Aviakompaniyaning ishlab chiqarish faoliyatini boshqarish uchun direksiya va uni taʼminlash uchun apparat tuzadi.

26. Direktorlar Ustavga muvofiq va Aviakompaniya Kengashi va bosh direktor rahbarligida oʻzlarining huquq doiralariga kiruvchi barcha joriy ishlab chiqarish faoliyati masalalari boʻyicha qarorlar chiqaradilar.

27. Direktorlar oʻz faoliyatlarini oldiga qoʻyilgan vazifalarni bajarish maqsadida mustahkam hamkorlikda amalga oshiradilar. Ular Aviakompaniya Kengashi tomonidan qabul qilingan qarorlarning bajarilishini taʼminlashlari kerak

28. Direktorlar Oʻzbekiston Respublikasi qonunchiligiga muvofiq korxona xodimlarini ishga qabul qilish va ishdan boʻshatish huquqga egadirlar.

29. Aviakompaniya faoliyatiga daxldor ijtimoiy-iqtisodiy masalalar boʻyicha qarorlar Kengash tomonidan qabul qilinadi va Aviakompaniya bosh direktori tomonidan amalga oshiriladi.

VIII. Aviakompaniya faoliyatini nazorat qilish

30. Aviakompaniyaning moliya-xoʻjalik faoliyatini kompleks taftish qilish, shuningdek, uning faoliyati ayrim jihatlarini tekshirish Oʻzbekiston Respublikasi qonunchiligida belgilangan tartibda unga vakil qilingan organlar hamda Aviokompaniya taftish komissiyasi tomonidan amalga oshiriladi.

IX. Aviakompaniya faoliyatini toʻxtatish

31. Aviakompaniya faoliyati “Oʻzbekiston Respublikasida korxonalar toʻgʻrisida”gi Oʻzbekiston Respublikasi Qonuniga muvofiq toʻxtatiladi.

Vazirlar Mahkamasining 1992-yil 4-fevraldagi 44-son qaroriga ILOVA

Oʻzbekiston Respublikasi “Oʻzbekiston havo yoʻllari” milliy aviakompaniyasining

TAShKILIY TUZILIShI

Direksiya

Korxona:

Aviatuzatish zavodi

Toshkent aeroporti

Tarkibiy boʻlinmalar:

Uchish kompleksi

Muhandislik-aviatsiya kompleksi

Yoʻlovchilar tashishni sotish va bronlashtirish kompleksi

Radiotexnika taʼminoti kompleksi

“Uzagronavigatsiya” havo harakatini boshqarish kompleksi

“Uzaviatexsnabtorg” moddiy-texnika taʼminoti kompleksi

Oʻquv-mashq qilish markazi

Tarmoq axborot-hisoblash markazi

Tajriba-eksperiment joriy etish markazi

Tuzatish-qurilish boshqarmasi

Andijon aeroporti

Buxoro aeroporti

Qoʻqon aeroporti

Navoiy aeroporti

Namangan aeroporti

Nukus aeroporti

Samarqand aeroporti

Sergeli aeroporti

Termiz aeroporti

Urganch aeroporti

Fargʻona aeroporti