“Urgut” erkin iqtisodiy zonasi hududini kengaytirish chora-tadbirlari toʻgʻrisida (628-son)

07.08.2018

Oʻzbekiston Respublikasi Vazirlar Mahkamasining

qarori

“Urgut” erkin iqtisodiy zonasi hududini kengaytirish orqali yuqori qoʻshilgan qiymatga ega boʻlgan raqobatbardosh mahsulot ishlab chiqarishni taʼminlaydigan zamonaviy, yuksak texnologiyali ishlab chiqarishlarni tashkil etish uchun xorijiy va mahalliy investitsiyalarni jalb qilish boʻyicha qulay shart-sharoitlarni shakllantirish, shuningdek, Samarqand viloyatining ishlab chiqarish va resurs salohiyatidan kompleks hamda samarali foydalanish, shu asosda yangi ish oʻrinlarini yaratish va aholi daromadlarini oshirish maqsadida Vazirlar Mahkamasi qaror qiladi:

1. Vazirlar Mahkamasining “Erkin iqtisodiy zonalar faoliyatini tashkil etish chora-tadbirlari toʻgʻrisida” 2017-yil 10-apreldagi 196-son qarorining (Oʻzbekiston Respublikasi QT, 2017-y., 4-son, 43-modda) 1-ilovasi I boʻlimi quyidagi mazmundagi 5-band bilan toʻldirilsin:

“5. Samarqand shahar “Xishrav-2” massivi yer maydonlari quyidagi chegaralar bilan:

shimoliy tomondan — “Dargʻom” kanali hududi;

sharqiy tomondan — Samarqand viloyati Yongʻin xavfsizligi bosh boshqarmasining malaka oshirish markazi hududi;

janubiy tomondan — davlat zaxira yerining jarlikkacha boʻlgan hududi;

gʻarbiy tomondan — Mudofaa vazirligining harbiy bazasiga tutash hududi”.

2. Samarqand viloyati hokimligi, Oʻzbekiston Respublikasi Yer resurslari, geodeziya, kartografiya va davlat kadastri davlat qoʻmitasi bilan birgalikda ikki hafta muddatda ushbu qarorning 1-bandidan kelib chiqib, “Urgut” erkin iqtisodiy zonasi hududining chegaralarini qayta belgilasin va tegishli yer uchastkalari ajratilishini taʼminlasin.

3. Mazkur qarorning bajarilishini nazorat qilish Oʻzbekiston Respublikasi Bosh vazirining oʻrinbosari – Investitsiyalar boʻyicha davlat qoʻmitasi raisi S.R. Xolmuradov va Samarqand viloyati hokimi vazifasini bajaruvchi E.O. Turdimov zimmasiga yuklansin.

Oʻzbekiston Respublikasining Bosh vaziri A. ARIPOV

Toshkent sh.,

2018-yil 7-avgust,

628-son