Oʻzbekiston Respublikasi pensiya taʼminoti tizimini takomillashtirish chora-tadbirlari toʻgʻrisida (444-son)

15.11.2000

Oʻzbekiston Respublikasi Vazirlar Mahkamasining

qarori

Pensiya taʼminoti tizimidagi boshqaruv tuzilmasini takomillashtirish, davlat ijtimoiy sugʻurtasi boʻyicha majburiy badallar toʻliq yigʻilishini koʻpaytirish, amaldagi boshqaruv tuzilmalarini qisqartirish hamda pensiyalar va nafaqalar toʻlashga yoʻnaltiriladigan mablagʻlardan foydalanish samaradorligini oshirish maqsadida Vazirlar Mahkamasi qaror qiladi:

1. 2001-yil 1-yanvardan boshlab Oʻzbekiston Respublikasi Ijtimoiy taʼminot vazirligi huzuridagi Pensiya jamgʻarmasi Oʻzbekiston Respublikasining budjetdan tashqari Pensiya jamgʻarmasiga aylantirilsin.

2. Quyidagilar amaldagi qonun hujjatlariga muvofiq budjetdan tashqari Pensiya jamgʻarmasini shakllantirishning asosiy manbalari ekanligi maʼlumot uchun qabul qilinsin:

korxonalar, muassasalar va tashkilotlarning, yuridik shaxs boʻlmasdan tadbirkorlik faoliyati bilan shugʻullanuvchi jismoniy shaxslarning, shuningdek dehqon xoʻjaliklari aʼzolarining ixtiyoriy sugʻurta badallari;

fuqarolarning majburiy sugʻurta badallari;

korxonalar, muassasalar va tashkilotlarning sotilgan mahsulotlar (bajarilgan ishlar, koʻrsatilgan xizmatlar) haqiqiy hajmidan majburiy ajratmalari;

muddatidan oldin va imtiyozli pensiyalar tayinlanishi munosabati bilan qoplanadigan mablagʻlar, shuningdek “Fuqarolarning davlat pensiya taʼminoti toʻgʻrisida”gi Oʻzbekiston Respublikasi Qonuniga muvofiq regress talablar (daʼvolar) boʻyicha ish beruvchilar va fuqarolardan undiriladigan mablagʻlar;

oʻz vaqtida sugʻurta badallari toʻlanmaganligi va mablagʻ ajratilmaganligi uchun hisoblangan jarimalar va penya;

yuridik va jismoniy shaxslarning ixtiyoriy badallari.

3. Belgilansinki:

budjetdan tashqari Pensiya jamgʻarmasiga mablagʻ ajratish va badallar miqdori hamda ularni toʻlash muddatlari Oʻzbekiston Respublikasi Vazirlar Mahkamasi tomonidan belgilanadi;

budjetdan tashqari Pensiya jamgʻarmasiga majburiy toʻlovlar davlat soliqlari va yigʻimlariga tenglashtiriladi;

budjetdan tashqari Pensiya jamgʻarmasining daromadlari va xarajatlari har yili Oʻzbekiston Respublikasining yigʻma budjeti tarkibiga kiritiladi.

Budjetdan tashqari Pensiya jamgʻarmasiga majburiy badallar va ajratmalarni hisoblab chiqish va toʻlash tartibi buzilganligi uchun xoʻjalik yurituvchi subyektlarga nisbatan moliyaviy jazolar qoʻllaniladi, shu jumladan toʻlovlar oʻz vaqtida toʻlanmaganligi uchun penya hisoblanadi, aybdor mansabdor shaxslarga nisbatan esa amaldagi qonun hujjatlariga muvofiq maʼmuriy va jinoiy javobgarlik chora-tadbirlari qoʻllaniladi.

4. Oʻzbekiston Respublikasi Moliya vazirligi va Davlat soliq qoʻmitasining budjetdan tashqari Pensiya jamgʻarmasiga mablagʻ toʻplash va mablagʻ toʻliq tushishi ustidan nazorat qilish funksiyasini Oʻzbekiston Respublikasi Davlat soliq qoʻmitasiga yuklash toʻgʻrisidagi taklifi qabul qilinsin.

5. Oʻzbekiston Respublikasi Davlat soliq qoʻmitasi:

bir oy muddatda budjetdan tashqari Pensiya jamgʻarmasiga tushumlarning ishonchli va muntazam ravishda toʻliq tushishini taʼminlash boʻyicha markaziy apparat, viloyat, tuman va shahar soliq inspeksiyalariga yuklangan funksiyalarni hisobga olgan holda ular tuzilmasiga xodimlarning belgilangan soni doirasida tegishli oʻzgartirishlar kiritsin;

2001-yil 1-yanvargacha budjetdan tashqari Pensiya jamgʻarmasiga mablagʻlar tushishini hisobga olish va nazorat qilish funksiyalarini bajaruvchi kadrlarni oʻqitsin;

davlat ijtimoiy sugʻurtasi daromadlari prognozini soʻzsiz bajarish bilan bogʻliq masalalar boʻyicha Oʻzbekiston Respublikasi Moliya vazirligi va Ijtimoiy taʼminot vazirligi bilan mustahkam oʻzaro hamkorlikni taʼminlasin.

6. Oʻzbekiston Respublikasi Ijtimoiy taʼminot vazirligining Ijtimoiy taʼminot vazirligi huzuridagi Pensiya jamgʻarmasining markaziy apparati (ijroiya direksiya), hududiy boʻlinmalari, tuman (shahar) boʻlimlarini 2001-yil 1-yanvardan boshlab tugatish toʻgʻrisidagi taklifiga rozilik berilsin.

7. Oʻzbekiston Respublikasi Ijtimoiy taʼminot vazirligi qonunchilik hujjatlarida belgilangan tartibda:

Oʻzbekiston Respublikasi Ijtimoiy taʼminot vazirligi huzuridagi Pensiya jamgʻarmasi boshqaruv tuzilmalarini, shu jumladan, uning hududiy boʻlinmalarini tugatish tartibotlari oʻtkazilishini;

Mehnat vazirligi bilan birgalikda tugatilish munosabati bilan boʻshab qoladigan xodimlarni ishga joylashtirish va ijtimoiy himoya qilish masalalari hal etilishini;

Oʻzbekiston Respublikasi Ijtimoiy taʼminot vazirligi huzuridagi tugatilgan Pensiya jamgʻarmasi markaziy apparati va uning hududiy tuzilmalarining mol-mulkini, asosiy va aylanma mablagʻlarini vazirlik markaziy apparati va uning hududiy tuzilmalarining balansiga qabul qilinishini taʼminlasin.

8. Oʻzbekiston Respublikasi Mehnat va aholini ijtimoiy muhofaza qilish vazirligiga budjetdan tashqari Pensiya jamgʻarmasini boshqarish boʻyicha quyidagi funksiyalar yuklansin:

budjetdan tashqari Pensiya jamgʻarmasi mablagʻlari kelib tushishi va ularni sarflashning har yilgi hamda choraklar boʻyicha prognoz balanslarini shakllantirish;

pensiyalar, shuningdek ijtimoiy taʼminot boʻlimlari tomonidan toʻlanadigan nafaqalarni oʻz vaqtida hisoblash va toʻlash;

pensiyalar, davlat ijtimoiy sugʻurtasi boʻyicha nafaqalarni toʻlash xarajatlarini mablagʻ bilan taʼminlash;

pensiyalar va ijtimoiy taʼminot boʻlimlari tomonidan toʻlanadigan nafaqalarning toʻgʻri hisoblanishini hamda ularning oʻz vaqtida toʻlanishini nazorat qilish.

9. Belgilansinki, Oʻzbekiston Respublikasi Mehnat va aholini ijtimoiy muhofaza qilish vaziri va Qoraqalpogʻiston Respublikasi, viloyatlar, tumanlar va shaharlar mehnat va aholini ijtimoiy muhofaza qilish organlarining rahbarlari budjetdan tashqari Pensiya jamgʻarmasi mablagʻlarini boshqaruvchilar hisoblanadilar.

10. Oʻzbekiston Respublikasi Ijtimoiy taʼminot vazirligi, Moliya vazirligi Ijtimoiy taʼminot vazirligi markaziy apparati tuzilmasida xodimlari soni besh kishidan iborat boʻlgan budjetdan tashqari Pensiya jamgʻarmasi daromadlari va xarajatlari boʻlimini tashkil etsinlar.

11. “Nuroniy” jamgʻarmasining:

budjetdan tashqari Pensiya jamgʻarmasi mablagʻlari kelib tushishi va ulardan maqsadli foydalanish uchun jamoat nazorati funksiyasini “Nuroniy” jamgʻarmasi huzuridagi “Nazorat kengashi” jamoat komissiyasiga yuklash toʻgʻrisidagi;

“Nuroniy” jamgʻarmasi ijroiya apparati va uning viloyatlar boʻlinmalarining shtatdagi xodimlari sonini “Nazorat kengashi” jamoat komissiyalarining ishlarini tashkil etish va muvofiqlashtirish uchun bittadan shtat birligiga koʻpaytirish toʻgʻrisidagi taklifiga rozilik berilsin.

12. Oʻzbekiston Respublikasi Moliya vazirligi, Ijtimoiy taʼminot vazirligi Davlat soliq qoʻmitasi, Mehnat vazirligi va “Nuroniy” jamgʻarmasi bilan birgalikda budjetdan tashqari Pensiya jamgʻarmasi mablagʻlarini shakllantirish va ularni sarflash tartibi toʻgʻrisidagi nizomni ikki hafta muddatda ishlab chiqsinlar va tasdiqlash uchun Vazirlar Mahkamasiga kiritsinlar.

13. Oʻzbekiston Respublikasi Adliya vazirligi tegishli vazirliklar va idoralar bilan birgalikda bir oy muddatda qonun hujjatlariga mazkur qarordan kelib chiqadigan oʻzgartirish va qoʻshimchalar toʻgʻrisida Vazirlar Mahkamasiga takliflar kiritsin.

14. 2001-yil 1-yanvardan boshlab Oʻzbekiston Respublikasi Hukumatining ilovaga muvofiq qarorlari oʻz kuchini yoʻqotgan deb hisoblansin.

15. Mazkur qarorning bajarilishini nazorat qilish Oʻzbekiston Respublikasining Bosh vaziri Oʻ.T.Sultonov zimmasiga yuklansin.

Vazirlar Mahkamasining Raisi I. KARIMOV

Toshkent sh.,

2000-yil 15-noyabr,

444-son

Vazirlar Mahkamasining 2000-yil 15-noyabrdagi 444- son qaroriga ILOVA

Oʻzbekiston Respublikasi Hukumatining oʻz kuchini yoʻqotgan qarorlari

ROʻYXATI

1. Oʻzbekiston Respublikasi Vazirlar Mahkamasining “Oʻzbekiston Respublikasi Ijtimoiy taʼminot vazirligi huzurida Pensiya jamgʻarmasini tashkil etish toʻgʻrisida” 1996-yil 27-dekabrdagi 459-son qarori (Oʻzbekiston Respublikasi QT, 1996-y., 12-son, 37-modda).

2. Oʻzbekiston Respublikasi Vazirlar Mahkamasining “Yuridik shaxs boʻlmasdan tadbirkorlik faoliyati bilan shugʻullanuvchi jismoniy shaxslarning mehnat stajini hisobga olish va ularning pensiya jamgʻarmasiga badallar ajratish tartibini tasdiqlash toʻgʻrisida” 1998-yil 28-yanvardagi 47-son qaroriga 2-ilova (Oʻzbekiston Respublikasi QT, 1998y., 1-son, 4-modda).

3. Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish va ayrimlarini oʻz kuchini yoʻqotgan deb hisoblash toʻgʻrisida” 1999-yil 30-apreldagi 202-son qaroriga 1-ilova (Oʻzbekiston Respublikasi QT, 1999y., 4-son, 22-modda).

4. Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish hamda ularning baʼzilarini oʻz kuchini yoʻqotgan deb hisoblash toʻgʻrisida” 2000-yil 11-apreldagi 140-son qaroriga 1-ilovaning 4-bandi (Oʻzbekiston Respublikasi QT, 2000-y., 4-son, 18-modda).

5. Oʻzbekiston Respublikasi Vazirlar Mahkamasining “Oʻzbekiston Respublikasi Hukumatining ayrim qarorlariga oʻzgartirish va qoʻshimchalar kiritish toʻgʻrisida” 2000-yil 2-oktabrdagi 375-son qaroriga ilovaning 2-bandi (Oʻzbekiston Respublikasi QT, 2000y., 10-son, 63-modda).