Traktorlar, oʻziyurar shassilar, meliorativ yoʻl-qurilish mashinalari va traktor tirkamalarini majburiy texnik koʻrikdan oʻtkazish tartibi toʻgʻrisidagi nizomni tasdiqlash haqida (1432-son)

17.12.2004

Oʻzbekiston Respublikasi Qishloq va suv xoʻjaligi VAZIRINING

BUYRUGʻI

[Oʻzbekiston Respublikasi Adliya vazirligi tomonidan 2004-yil 17-dekabrda 1432-son bilan davlat roʻyxatidan oʻtkazilgan]

Yuridik va jismoniy shaxslarga tegishli traktorlar, oʻziyurar shassilar, meliorativ yoʻl-qurilish mashinalari va traktor tirkamalarining yoʻl harakati xavfsizligini taʼminlash maqsadida hamda Vazirlar Mahkamasi huzuridagi Respublika yoʻl harakati xavfsizligini taʼminlash komissiyasining 2004-yil 28-iyuldagi “Oʻzbekiston Respublikasi hududida sodir etilgan yoʻl-transport hodisalarining 2004-yilning 6 oyi mobaynidagi ahvoli hamda ularning oldini olishda hokimliklar, vazirliklar, idoralar va tashkilotlarning oʻrni toʻgʻrisida”gi yigʻilish qaroriga asosan, buyuraman:

1. “Traktorlar, oʻziyurar shassilar, meliorativ yoʻl-qurilish mashinalari va traktor tirkamalarini majburiy texnik koʻrikdan oʻtkazish tartibi toʻgʻrisida”gi nizom ilovaga muvofiq tasdiqlansin.

2. Mashina va asbob-uskunalarning texnikaviy holatini nazorat qilish davlat bosh inspeksiyasi (Boltaboyev) ushbu Nizomni Oʻzbekiston Respublikasi Adliya vazirligida belgilangan tartibda roʻyxatdan oʻtkazish va joylardagi tegishli tashkilotlarga yetkazish hamda manfaatdor tashkilotlar ishtirokida uni tushuntirish boʻyicha muntazam ravishda ishlar olib borish chorasini koʻrsin.

3. Ushbu buyruqning bajarilishini nazorat qilish vazir oʻrinbosari Ollaberganov zimmasiga yuklatilsin.

Qishloq va suv xoʻjaligi vazirining birinchi oʻrinbosari A. JOʻRAYEV

Toshkent sh.,

2004-yil 15-noyabr,

248-son

Qishloq va suv xoʻjaligi vazirining 2004-yil 15-noyabrdagi 248-sonli buyrugʻi bilan TASDIQLANGAN

Traktorlar, oʻziyurar shassilar, meliorativ yoʻl-qurilish mashinalari va traktor tirkamalarini majburiy texnik koʻrikdan oʻtkazish tartibi toʻgʻrisida

NIZOM

I. Umumiy qoidalar

1. Mazkur Nizom Oʻzbekiston Respublikasi Qishloq va suv xoʻjaligi vazirligi “Mashina va asbob-uskunalarning texnikaviy holatini nazorat qilish davlat bosh inspeksiyasi toʻgʻrisida”gi Vazirlar Mahkamasining 1998-yil 6-yanvardagi 8-sonli qaroriga muvofiq ishlab chiqarilgan va traktorlar, oʻziyurar shassilar, meliorativ yoʻl-qurilish mashinalari hamda traktor tirkamalarini (keyingi oʻrinlarda matnda “Mashinalar” deb yuritiladi) majburiy texnik koʻrikdan oʻtkazish tartibini belgilaydi.

2. Mashinalarning majburiy texnik koʻrigi (keyingi oʻrinlarda matnda “Texnik koʻrik” deb yuritiladi) “Oʻzdavtexnazorat” organlari tomonidan mazkur Nizomga muvofiq oʻtkaziladi.

3. Quyidagilar texnik koʻrikdan oʻtkazishning asosiy vazifalari hisoblanadi:

mashinalarning texnik holati, ulardan foydalanish qoidalariga rioya etilishi ustidan samarali nazoratni tashkil etish;

mashinalarning texnik holati va amaldagi xavfsizlikka muvofiqligini baholash;

mashinalar sonini, ularning holatini, amalda mavjudligini, tegishliligini va boshqa roʻyxatdan oʻtkazish maʼlumotlarini aniqlashtirish.

4. Yuridik va jismoniy shaxslarga tegishli boʻlgan va belgilangan tartibda “Oʻzdavtexnazorat” organlarida roʻyxatdan oʻtkazilgan mashinalar majburiy texnik koʻrikdan oʻtkazilishi kerak.

5. Mashinalar bir yilda bir marta texnik koʻrikdan oʻtkazilishi lozim.

6. Mashinalar texnik koʻrikdan oʻtkazilganligi uchun eng kam oylik ish haqining:

traktorlar, oʻzi yurar shassilar, meliorativ yoʻl qurilish mashinalariga — 0,08 foizi;

traktor tirkamalariga — 0,04 foizi;

birinchi texnik koʻrikdan nosoz deb topilgan mashinalar takroriy texnik koʻrikdan oʻtkazilganligi uchun belgilangan miqdorda yigʻim qayta undiriladi.

II. Yuridik shaxslarning mashinalarini texnik koʻrikdan oʻtkazishni tashkil etish

7. Texnik koʻrik mashinalar roʻyxatdan oʻtkazilgan joyda:

zarur shart-sharoitlarga (texnik diagnostika uskunalari, asfalt yoki beton qoplangan bir tekis gorizontal maydoncha) va malakali mutaxassislarga ega boʻlgan tashkilotlarda;

yuridik shaxslarning mashinalarini texnik koʻrikdan oʻtkazish joylari “Oʻzdavtexnazorat”ning hududiy organlari tomonidan belgilanadi;

tashkilotlarda texnik koʻrik boshlangunga qadar barcha diagnostika apparatlari tekshirilishi va ish holatiga keltirilishi zarur.

8. Texnik koʻrikni tashkil etish jadval tuzish bilan rejalashtiriladi, jadvalda texnik koʻrik oʻtkazish joyi, sanasi va vaqti, koʻrikka qoʻyilayotgan texnikalar soni toʻgʻrisidagi maʼlumotlar boʻlishi lozim.

Jadval yuridik shaxslarning buyurtmalari va texnik imkoniyatlari, ob-havo iqlimi, ishlab chiqarish va boshqa sharoitlarni hisobga olgan holda “Oʻzdavtexnazorat”ning hududiy organlari tomonidan tuziladi.

9. Bir kunda texnik koʻrikka qoʻyiladigan mashinalar soni, mavjud diagnostika va nazorat oʻlchash uskunalarining kunlik unumdorligidan kelib chiqqan holda belgilanadi.

10. Texnik koʻrikni oʻtkazish jadvali va uni oʻtkazish boʻyicha komissiyaning tarkibi har yili 15-yanvargacha Toshkent shahar xokimi, Qoraqalpogʻiston Respublikasi va viloyatlarning tegishli tumanlari (shaharlari) hokimlarining qarori bilan tasdiqlanadi.

Komissiya tarkibiga “Oʻzdavtexnazorat” organi tomonidan tavsiya etilgan yuqori malakali va tajribali mutaxassislar kiritiladi.

“Oʻzdavtexnazorat”ning hududiy organlari vakili komissiya raisi hisoblanadi.

11. Yuridik shaxsga texnik koʻrik oʻtkaziladigan muddatlar toʻgʻrisidagi bildirishnoma 30 kun oldin yuboriladi.

Texnik koʻrik dalolatnomalari blankalari talab etiladigan maʼlumotlar koʻrsatilgan holda mashinalar roʻyxatiga muvofiq toʻldiriladi. Mashinalar texnik koʻrigi dalolatnomasida koʻrsatilgan maʼlumotlar “Oʻzdavtexnazorat”ning tegishli organlarida hisobga olish maʼlumotlari bilan solishtiriladi.

12. Texnik koʻrik tashkilotlarda, korxonalar va boshqa belgilangan joylarda oʻtkaziladi.

13. Boshqa yuridik shaxslarga ijaraga berilgan mashinalar ijara “Shartnomasi”da belgilangan yuridik shaxslar tomonidan joylardagi “Oʻzdavtexnazorat” organlari tomonidan belgilangan muddatlarda texnik koʻrikdan oʻtadi.

14. Texnik koʻrik boshlanishidan kamida oʻn kun oldin yuridik shaxs “Oʻzdavtexnazorat”ning hududiy organiga quyidagi hujjatlarni taqdim etadi:

yuridik shaxsning rahbari yoki vakolat berilgan shaxs tomonidan imzolangan, yuridik shaxsning muhri bilan tasdiqlangan texnik koʻrikdan oʻtish kerak boʻlgan mashinalar toʻgʻrisida 1-ilovaga muvofiq maʼlumotnoma;

texnik koʻrikdan oʻtkazganlik uchun yigʻimning belgilangan summasi toʻlanganligini tasdiqlovchi hujjat (toʻlov topshirigʻi, kvitansiyasi);

mukammal taʼmirlashda, xizmat safarida boʻlgan ijaraga berilgan mashinalar sonini tasdiqlovchi maʼlumotlar.

III. Jismoniy shaxslarga tegishli mashinalarni texnik koʻrikdan oʻtkazishni tashkil etish

15. Jismoniy shaxslarga tegishli mashinani navbatdagi yillik texnik koʻrikka qoʻyish sanasi “Oʻzdavtexnazorat” organlari xodimlari tomonidan belgilanadi.

Texnik koʻrikni bir tekis oʻtkazish maqsadida “Oʻzdavtexnazorat” organlari jadvallar tuzishi va mashinalar egalariga mashinalarni texnik koʻrikka qoʻyishini aniq sanalar (oylar)ini tavsiya etishlari mumkin.

16. Mashinalarning texnik koʻrigi oʻtkaziladigan joy “Oʻzdavtexnazorat” organlari tomonidan belgilanadi.

17. Texnik koʻrikdan oʻtkazish uchun mashina egasi yoki uning vakolatli shaxsi tomonidan quyidagi hujjatlar koʻrsatiladi:

pasport yoki shaxsni tasdiqlovchi boshqa hujjat;

texnik koʻrikdan oʻtkazishga qoʻyilgan mashinaga muvofiq toifadagi mashinani boshqarish huquqini beruvchi haydovchilik guvohnomasi;

mashinaning roʻyxatdan oʻtkazilganligi toʻgʻrisidagi guvohnoma (texnik pasport);

texnik koʻrikdan oʻtish uchun belgilangan yigʻim summasi toʻlanganligini tasdiqlovchi hujjat (kvitansiya).

18. Mashinani nosozligi sababli texnik koʻrikdan oʻtkazish joyiga olib borish mumkin boʻlmagan taqdirda, uning egasi belgilangan muddatlarda “Oʻzdavtexnazorat”ning hududiy organiga yozma ariza va ushbu Nizomning 17-bandida koʻrsatilgan hujjatlarni taqdim etadi. Bunda “Oʻzdavtexnazorat”ning hududiy organi xodimi roʻyxatdan oʻtkazish guvohnomasiga (texnik pasportiga) nosozlik toʻgʻrisida “Nosoz” yozuvini qayd qiladi va shaxsiy imzo hamda muhr (shtamp) bilan tasdiqlaydi.

Nosozlik bartaraf etilgandan keyin mashina egasi uni Ushbu Nizomning 17-bandida koʻrsatilgan hujjatlarni koʻrsatgan holda texnik koʻrikka qoʻyadi.

19. Egasining yoʻqligi yoki kasalligi oqibatida texnik koʻrikdan belgilangan muddatlarda oʻtkazilmagan mashina egasi qaytib kelgandan yoki sogʻaygandan keyin 10 kun mobaynida mashinani texnik koʻrikdan oʻtkazadi.

IV. Texnik koʻrikni oʻtkazish tartibi

20. Mashinalar texnik koʻrikdan oʻtkazishga “Oʻzdavtexnazorat” organlari tomonidan koʻrsatilgan joyga qoʻyiladi va quyidagilar tekshiriladi:

har qaysi mashinaning roʻyxatdan oʻtkazish toʻgʻrisidagi guvohnomada (texnik pasportda, texnik talonda) koʻrsatilgan maʼlumotlarga mashina turi, markasi, modeli, zavod raqami, dvigateli raqami va davlat raqam belgisining muvofiqligini;

har qaysi mashina haydovchisining haydovchilik guvohnomasi toifasining muvofiqligini;

har bir haydovchining mashina boshqarishga yaroqlilik toʻgʻrisida belgilangan shakldagi tibbiy maʼlumotnomani;

har qaysi mashinaning texnik holati va jihozlari standart talablariga, yoʻl harakati va texnika xavfsizligi qoidalari hamda normalariga mos kelishlik jihatlarini;

murakkab qishloq xoʻjaligi mashinalaridan foydalanish toʻgʻrisidagi yoʻriqnoma va qoʻllanmalar mavjudligini hamda “Oʻzdavtexnazorat” tomonidan ishlab chiqilgan mavsum oldi texnik koʻrigidan oʻtkazish talablariga muvofiqligini.

21. Texnik koʻrikdan oʻtgan mashinalar guruhi boʻyicha dalolatnoma (2-ilova) va alohida texnik koʻrikdan oʻtgan mashina boʻyicha dalolatnoma (3-ilova) toʻldiriladi.

Texnik koʻrikdan oʻtgan mashinalar roʻyxatdan oʻtkazish guvohnomasiga (texnik pasportiga, texnik taloniga) “Oʻzdavtexnazorat” organining xodimi belgilangan namunada shtamp qoʻyadi, sozligi toʻgʻrisida “Soz” soʻzini qayd etadi, imzo bilan tasdiqlaydi.

Izoh: mashina-traktor saroylarini va chiqimga chiqariladigan mashinalarning texnikaviy holatini aniqlash uchun oʻtkaziladigan texnik koʻrik shartnoma asosida amalga oshiraladi.

Kelishilgan

Oʻzbekiston Respublikasi Qishloq va suv xoʻjaligi vazirining oʻrinbosari O. OLLABERGANOV

Toshkent sh.,

2004-yil 19-noyabr

Oʻzqishloqxoʻjalikmash-Xolding” Xolding kompaniyasi boshqaruvi raisi R. MATChANOV

Toshkent sh.,

2004-yil 18-noyabr

“Oʻzagromashservis” uyushmasi raisi D. SOLIHBOYEV

Toshkent sh.,

2004-yil 19-noyabr

Dehqon va fermer xoʻjaliklari uyushmasi raisi S. QOBILOV

Toshkent sh.,

2004-yil 18-noyabr

Traktorlar, oʻziyurar shassilar, meliorativ yoʻl-qurilish mashinalari va traktor tirkamalarini majburiy texnik koʻrikdan oʻtkazish tartibi toʻgʻrisidagi nizomga 1-ILOVA

Yillik texnik koʻrikdan oʻtishi kerak boʻlgan traktor, oʻzi yurar shassilar, meliorativ yoʻl-qurilish mashinalari va traktor tirkamalari toʻgʻrisida maʼlumot

Traktorlar, oʻziyurar shassilar, meliorativ yoʻl-qurilish mashinalari va traktor tirkamalarini majburiy texnik koʻrikdan oʻtkazish tartibi toʻgʻrisidagi nizomga 2-ILOVA

Mashinalarni majburiy texnik koʻrikdan oʻtkazish DALOLATNOMASI

Traktorlar, oʻziyurar shassilar, meliorativ yoʻl-qurilish mashinalari va traktor tirkamalarini majburiy texnik koʻrikdan oʻtkazish tartibi toʻgʻrisidagi nizomga 3-ILOVA

Texnik koʻrik dalolatnomasi

(Oʻzbekiston Respublikasi qonun hujjatlari toʻplami, 2004-y., 50-son, 508-modda)