Fargʻona viloyati Rishton tumani aholisining bandligini taʼminlashga doir qoʻshimcha chora-tadbirlar toʻgʻrisida (510-son)
06.07.2018
Oʻzbekiston Respublikasi Vazirlar Mahkamasining
qarori
Mintaqadagi mavjud tabiiy va mehnat resurslaridan toʻliq va samarali foydalanish, hunarmandchilikni va turizm tarmogʻini jadal rivojlantirish asosida Fargʻona viloyati Rishton tumani aholisining bandligini taʼminlash, aholi hayoti darajasi va sifatini yanada oshirish, fuqarolarni, ayniqsa ayollar va yoshlarni ishga joylashtirish maqsadida Vazirlar Mahkamasi qaror qiladi:
1. Quyidagilar:
respublika ishchi guruhi tomonidan mahallalarni uyma-uy aylanib chiqish, ijtimoiy soha obyektlariga va ishlab chiqarish obyektlariga tashrif buyurish orqali Fargʻona viloyatining Rishton tumanida ijtimoiy-iqtisodiy islohotlarni amalga oshirish kompleks oʻrganib chiqilgani;
Fargʻona viloyatining Rishton tumanida amalga oshirilayotgan ijtimoiy-iqtisodiy islohotlarni oʻrganish yakunlari boʻyicha mahalla, tuman va viloyat darajalarida hal etilishi talab etiladigan tizimli muammolar va kamchiliklarni bartaraf etishga yoʻnaltirilgan “yoʻl xaritalari” ishlab chiqilgani va tasdiqlangani maʼlumot uchun qabul qilinsin.
2. 2018-yilda Fargʻona viloyatining Rishton tumanida kafolatli ish oʻrinlari tashkil etish hamda sanoat, xizmatlar sohasi va qishloq xoʻjaligini rivojlantirish loyihalarining manzilli roʻyxati ilovaga muvofiq tasdiqlansin.
3. Fargʻona viloyati hokimligi:
Oʻzbekiston Respublikasi Investitsiyalar boʻyicha davlat qoʻmitasi, manfaatdor vazirliklar, idoralar va xoʻjalik boshqaruvi organlari, tijorat banklari, loyihalarning tashabbuskorlari bilan birgalikda tasdiqlangan manzilli roʻyxat parametrlari soʻzsiz bajarilishini taʼminlasin va bu borada loyihalarning oʻz vaqtida va sifatli amalga oshirilishini, ishlab chiqarishning moʻljallangan hajmlariga erishish va yangi ish oʻrinlari tashkil etilishini nazarda tutsin;
muammoli masalalarni muntazam ravishda koʻrib chiqib, ularni hal etish yuzasidan tezkor va amaliy zarur chora-tadbirlarni amalga oshirgan holda loyihalar bajarilishi ustidan tizimli monitoring olib borsin.
4. Oʻzbekiston Respublikasi Investitsiyalar boʻyicha davlat qoʻmitasiga Fargʻona viloyati hokimligi va xizmat koʻrsatuvchi banklar bilan kelishgan holda loyihaning qiymatini va ish oʻrinlari sonini saqlab qolish sharti bilan loyihalarning tasdiqlangan manzilli roʻyxatiga, zaruratga koʻra, qoʻshimcha va oʻzgartirishlar kiritish huquqi berilsin.
5. Oʻzbekiston Respublikasi Bandlik va mehnat munosabatlari vazirligi:
Fargʻona viloyati hokimligi bilan birgalikda Rishton tumani sektorlari va mahallalari boʻyicha 2018-2019-yillarda haq toʻlanadigan jamoat ishlarini, band boʻlmagan shaxslarni kasbga qayta tayyorlashni tashkil etish boʻyicha manzilli dasturni bir oy muddatda tasdiqlasin;
Rishton tumani hunarmandlar uyushmasi koʻmagida Fargʻona sanoat kasb-hunar kollejida hunarmandlar tayyorlash boʻyicha qisqa muddatli kurslarni tashkil etsin va Fargʻona viloyatining boshqa tumanlarida milliy hunarmandchilikni rivojlantirish uchun zarur shart-sharoitlar yaratsin;
ushbu bandda koʻrsatilgan maqsadlarni amalga oshirish uchun Oʻzbekiston Respublikasi Bandlik va mehnat munosabatlari vazirligi huzuridagi Jamoat ishlari jamgʻarmasidan, Oʻzbekiston Respublikasi Bandlikka koʻmaklashish davlat jamgʻarmasidan, qonun hujjatlarida taqiqlanmagan boshqa manbalardan zarur mablagʻlar ajratilishini taʼminlasin.
6. Oʻzbekiston Respublikasi Investitsiyalar boʻyicha davlat qoʻmitasi Iqtisodiyot vazirligi, Moliya vazirligi, Turizmni rivojlantirish davlat qoʻmitasi, Savdo-sanoat palatasi va Fargʻona viloyati hokimligi bilan birgalikda bir oy muddatda Fargʻona viloyatining Rishton tumanida xomashyo va energiya resurslari bilan uzluksiz taʼminlash mexanizmi joriy etilishini, “Rishton keramikasi” brendi jadallashtirilishini, tuman turistik yoʻnalishlarga kiritilishini, mehmon turizmi tashkil etilishini va har yilgi “Rishton sehri” festivali oʻtkazilishini, hunarmandchilik va keramika mahsulotlari eksporti kengaytirilishini, hunarmandlar kompleksi qurilishini nazarda tutuvchi Fargʻona viloyatining Rishton tumanida hunarmandchilik markazi tashkil etish toʻgʻrisidagi taklifni tayyorlasin va Vazirlar Mahkamasiga kiritsin.
7. Respublika ishchi guruhi va Fargʻona viloyati hokimligining tajriba-eksperimental yapon bogʻini tashkil etish va unda qishloq xoʻjaligi ekinlarini yetishtirishning Yaponiya texnologiyasini joriy etish, shuningdek, “Rishton — Tomioka”ning ishlab turgan Markazi negizida yoshlarni yapon tilini oʻrganishga oʻqitishni tashkil etish toʻgʻrisidagi taklifi qabul qilinsin.
Oʻzbekiston Respublikasi Qishloq xoʻjaligi vazirligi, Bandlik va mehnat munosabatlari vazirligi, Adliya vazirligi, Oʻzbekiston Respublikasi Vazirlar Mahkamasi huzuridagi Taʼlim sifatini nazorat qilish davlat inspeksiyasi ushbu bandning birinchi xatboshisida nazarda tutilgan tadbirlarni amalga oshirishda Fargʻona viloyati hokimligiga va “Rishton-Tomioka” markaziga har tomonlama koʻmaklashsinlar.
8. Oʻzbekiston Respublikasi Tashqi ishlar vazirligi Rishton tumani bilan Tomioka shahri (Yaponiya) oʻrtasida birodarlik munosabatlari oʻrnatilishi masalasini belgilangan tartibda ishlab chiqsin.
9. Fargʻona viloyati hokimligi, tegishli sektorlarning rahbarlari Fargʻona viloyatining Rishton tumanida amalga oshirilayotgan ijtimoiy-iqtisodiy islohotlarni kompleks oʻrganish yakunlari boʻyicha tasdiqlangan “yoʻl xaritalari”ning soʻzsiz bajarilishi yuzasidan amaliy nazoratni taʼminlasinlar.
10. Mazkur qarorning bajarilishini nazorat qilish Oʻzbekiston Respublikasi Bosh vazirining birinchi oʻrinbosari — “Oʻzbekiston temir yoʻllari” AJ boshqaruvi raisi A.J. Ramatov, Oʻzbekiston Respublikasi Bosh vazirining oʻrinbosari — moliya vaziri J.A. Qoʻchqorov va Fargʻona viloyati hokimi Sh.M. Gʻaniyev zimmasiga yuklansin.
Oʻzbekiston Respublikasining Bosh vaziri A. ARIPOV
Toshkent sh.,
2018-yil 6-iyul,
510-son
Vazirlar Mahkamasining 2018-yil 6-iyuldagi 510-son qaroriga ILOVA
2018-yilda Fargʻona viloyatining Rishton tumanida kafolatli ish oʻrinlari tashkil etish hamda sanoat, xizmatlar sohasi va qishloq xoʻjaligini rivojlantirish loyihalarining
MANZILLI ROʻYXATI